Asoo debie ɛboda wɔ kpole yemaa wɔzu ɛlɛ?— * Ɔbayɛ kɛ bie ɛdo yɛ kɔsɔɔti ɛlɛ. Noko, ɔdwu mekɛ ne bie a alɔbɔlɛlilɛ maa yɛsu. Awie bahola aha yɛ nwo edwɛkɛ ɛtane mɔɔ ɔnle nɔhalɛ la. Ɔdaye noko ɔyɛ nyane, ɔnle zɔ ɔ?— Nyamenle noko kola di nyane wɔ mekɛ mɔɔ bɛkɛha ɔ nwo edwɛkɛ mɔɔ ɔnle nɔhalɛ la. Bɛmaa yɛha ɛhye anwo edwɛkɛ na yɛnwu kɛzi yɛbahola yɛamaa Nyamenle anye alie na yeanli nyane la.

Baebolo ne ka kɛ menli bie mɔɔ hanle kɛ bɛkulo Nyamenle la manle ɔlile nyane. Ɛhɛe, ‘bɛmanle Nyamenle lile nyane’! Ɛnee, bɛmaa yɛnlea deɛmɔti Gyihova di nyane wɔ mekɛ mɔɔ yɛanyɛ mɔɔ ɔkɛha la.

Menli nwiɔ ne mɔɔ Gyihova lumuale bɔle bɛ wɔ azɛlɛ ye azo la manle ɔlile nyane dɔɔnwo. Bɛbɔle menli nwiɔ ɛhye bɛdole azɛlɛ ye azo Paladaese ne mɔɔ bɛfɛlɛ ye “Yidɛn tola ne” la anu. Menli nwiɔ ɛhye a le nwane mɔ?— Bɛmɛ a le Adam, yɛɛ nzinlii, Yive. Bɛmaa yɛnlea mɔɔ bɛyɛle mɔɔ manle Gyihova lile nyane la.

Gyihova bɔle bɛ guale zɔhane tola ne anu la, ɔhanle kɛ bɛnlea zolɛ. Eza ɔhanle ɔhilele bɛ kɛ bɛbahola bɛawo mralɛ na bɛabɔ nu bɛadɛnla zɔhane tola ne anu mɔɔ bɛnrɛwu a. Noko kolaa na Adam nee Yive awo mralɛ la, edwɛkɛ ɛtane bie zile. Ɛze mɔɔ zile la ɔ?— Anwumabɔvolɛ bie manle Yive nee Adam dele atua tiale Gyihova. Bɛmaa yɛnlea kɛzi ɛhye zile la.

Anwumabɔvolɛ ne manle ɔyɛle kɛ ɛwɔlɛ ɛlɛtendɛ la. Yive anye liele mɔɔ ɔdele la anwo—ɛwɔlɛ  ne hanle kɛ ɔbayɛ ‘kɛ Nyamenle la.’ Yemɔti ɔyɛle mɔɔ ɛwɔlɛ ne hanle kɛ ɔyɛ la. Ɛze mɔɔ ɔhanle kɛ ɔyɛ la ɔ?—

Yive lile baka ne mɔɔ Gyihova hanle hilele Adam kɛ bɛmmadi la bie. Kolaa na Nyamenle abɔ Yive la, ɔhanle ɔhilele Adam kɛ: “Ɛkola ɛdi bakama biala mɔɔ wɔ tola ye anu la bie, na kpalɛ nee ɛtane ɛnwunlɛ baka ne, yemɔ mmadi ye ma ne bie, ɔluakɛ kenle ko ne mɔɔ ɛkɛli bie la ɛbawu.”

Ɛnee Yive ze zɔhane mɛla ne. Noko akee, ɔhɔle zo ɔnleanle baka ne, na ‘ɔnwunle kɛ ye ma ne le kɛnlɛma na bɛdi a ɔle kpalɛ la, . . . ɔdele bie ɔlile.’ Nzinlii, ɔdele bie ɔhɔmanle Adam “lile.” Kɛmɔti a ɛsuzu kɛ ɔyɛle zɔ ɛ?— Kɛmɔ Adam hulole Yive kpole dɛlale Gyihova la ati ɔ. Ɔbɔle kpɔkɛ kɛ ɔbazɔ ɔ nye yeadɛla kɛ ɔbazɔ Nyamenle anye. Noko ɔhyia kɛ yɛtie Gyihova yɛtɛla awie gyɛne biala!

Ɛkakye ɛwɔlɛ ne mɔɔ dendɛle hilele Yive la ɔ? Kɛmɔ awie kola maa ɔyɛ kɛ debie ɛlɛtendɛ la, awie manle ɔyɛle kɛ zɔhane ɛwɔlɛ ne ɛlɛtendɛ la. Nwane ane a ɛnee ɛwɔlɛ ne ɛlɛfa adendɛ a?— “Mɔmoane ɛwɔlɛ ne mɔɔ bɛfɛlɛ ye Abɔnsam nee Seetan” la ane ɔ.

Asoo ɛze kɛzi ɛbahola wɔamaa Gyihova anye alie la?— Saa dahuu ɛbɔ mɔdenle ɛsɔ ɔ nye a, ɛbahola wɔayɛ zɔ. Seetan se ɔbahola yeamaa awie biala ayɛ mɔɔ ɔkulo kɛ bɛyɛ la. Yemɔti Gyihova tu yɛ folɛ kɛ: “Me ra nrenya [anzɛɛ raalɛ], nwu nrɛlɛbɛ na maa me nye ɛlie, amaa saa awie ka me nwo edwɛkɛ a meahola ye bua.” Seetan ka Gyihova ahyi anzɛɛ ɔgolo ɔ nwo. Ɔka kɛ, ɔbahola yeahwe awie biala yeavi Gyihova ɛzonlenlɛ nwo. Yemɔti tie Gyihova na sonle ye maa ɔ nye ɛlie! Ɛbabɔ mɔdenle wɔayɛ zɔ ɔ?—