Mekɛ mɔɔ menyianle ɛvolɛ nsa la, bɛhyele me papa, me ankle, yɛɛ me nenya bɛhɔle gyimayɛlɛleka ɔlua bɛ Keleseɛne afoa mɔɔ bɛngyi la ati. Me papa ala a anwu a. Wɔ 1947, Ewiade Konle II ne anzi, ɔziale ɔrale sua nu, na ɛnee ɔ nze ɛhyea. Ɛnee ɔnlɛ anwosesebɛ ɛdeɛ, noko ɔgyinlanle ye diedi ne anu kpundii.

Mekɛ mɔɔ menyianle ɛvolɛ ngɔnla la, bɛvale yɛ abusua ne nee Moldova Alasevolɛ ɛya dɔɔnwo bɛhɔle Siberia. Wɔ July 6, 1949, bɛvale yɛ bɛwulale ahale mɔɔ bɛgua nlankɛ wɔ nu la anu. Kenle 12 anzi mɔɔ ɛnee yɛpɛ adenle mɔɔ bo mayɛlɛ 4,000 la, yɛgyinlanle wɔ Lebyazhe keteke agyinlanleɛ. Ɛnee ɛkɛ ne maamulɛ mgbanyima ɛlɛkendɛ yɛ. Bɛhyɛle yɛ nu ekpunli ngyikyi na bɛyɛle ye ndɛndɛ bɛvale yɛ bɛhɔle ɛleka ngakyile. Sukulu sua ekyi bie mɔɔ menli ɛnle nu la a yɛ ekpunli ne dɛnlanle nu a. Ɛnee yɛvɛ na yɛ rɛle ɛbɔ. Raalɛ kpanyinli bie mɔɔ boka yɛ nwo la dole edwɛne bie mɔɔ Alasevolɛ ne mɔ dole wɔ Ewiade Konle II ne anu la wɔ ɔ nzo abo. Yeangyɛ, yɛ muala yɛdole edwɛne ne bie wɔ yɛ nloa anu:

“Bɛvale mediema dɔɔnwo bɛhɔle moa moa.

Bɛvale bɛ bɛhɔle sɔlɔ nee aduduleɛ.

Kɛmɔ bɛyɛle Nyamenle gyima la ati, bɛbuale bɛ fɔlɛ kɛ bɛnwu amaneɛ, na ɛkɛ ne bɛgyinlanle sɔnea mɔɔ le kɛ ewule la anloa.”

Mekɛ hɔle bie la, ɛnee yɛkola yɛkɔ Baebolo debiezukoalɛ Molɛ biala wɔ ɛleka mɔɔ nee yɛ sua nu bayɛ mayɛlɛ mɔtwɛ (km 13) la. Ɛnee yɛta yɛfi ɛkɛ ne ndɛ wɔ nwonlomɔ mɔɔ ɛyɛlɛ ne wɔ nu la na yɛdua ezukɔtweaba mɔɔ ye ɛyɛlɛ ne le (-40°C) la anu. Menli 50 anzɛɛ mɔɔ bo zɔ la mia bɛ nwo tɛnla sua ekyi bie anu. Yɛbɔ ɔ bo yɛto edwɛne ko, nwiɔ anzɛɛ nsa. Ɛnee yɛyɛ asɔne na yɛsuzu Baebolo kpuyia nwo. Ɛnee yɛkɔ zo yɛyɛ ɛhye kɛyɛ dɔnehwele ko anzɛɛ mɔ bo zɔ la. Yɛdole edwɛne dɔɔnwo, na yɛbizale Baebolo kpuyia dɔɔnwo. Nea kɛzi ɛnee zɔhane mekɛ ne maa yɛnyia sunsum nu anwosesebɛ la!

Ɔkadwu 1960 la, Alasevolɛ mɔɔ bɛvale bɛ bɛhɔle la nyianle fanwodi dɔɔnwo. Ɛnee yɛle ehyiavolɛma ɛdeɛ, noko, Mengolale mengɔle Moldova, na menwunle Nina, mɔɔ ye awovolɛ nee ye nenya nee ye nana noko le Alasevolɛ la. Yeangyɛ yɛgyale na yɛziale yɛhɔle Siberia, na ɛkɛ ne yɛɛ yɛwole yɛ ra raalɛ Dina wɔ 1964 yɛɛ yɛ ra nrenya Viktor, wɔ 1966 a. Ɛvolɛ nwiɔ anzi, yɛhɔle Ukraine na yɛdɛnlanle sua  ekyi bie anu wɔ Dzhankoy, suakpole bie mɔɔ ɛvi ɛkɛ ne mɔɔ kɔ Yalta, mɔɔ wɔ Crimea azɛlɛ ne mɔɔ azule ɛbɔ ɛyia ye la bayɛ mayɛlɛ 100 la.

Ɛnee bɛva bɛ sa bɛdo Gyihova Alasevolɛ gyima ne azo wɔ Crimea, kɛmɔ ɛnee ɔde wɔ Soviet Union ɛleka biala la. Noko bɛandua yɛ gyima ne kpunli yɛɛ ɛnee bɛmkpɔ yɛ ɛsesebɛ. Yemɔti Alasevolɛ bie mɔ ati anu yɛle bɛ fɛ. Bɛnyianle adwenle kɛ kɛmɔ bɛnwu amaneɛ dɔɔnwo wɔ Siberia la ati, saa bɛyɛ gyima ɛsesebɛ bɛfa bɛkpondɛ ninyɛne ekyi a ɔfɛta.

Wɔ March 27, 1991, bɛliele yɛ gyimayɛlɛ wɔ ɛleka mɔɔ ɛnee bɛfɛlɛ ye Soviet Union la bɛdole nu wɔ mɛla adenle zo. Ɛkɛ ne ala, bɛyɛle kenle nwiɔ nyianu titile nsuu nwo ngyehyɛleɛ wɔ maanle ne anu amuala. Ɛnee ɔwɔ kɛ yɛkɔ ko ne mɔɔ wɔ Odessa, Ukraine, mɔɔ babɔ ɔ bo August 24 la. Ɔhale siane ko la yɛɛ mendwule ɛkɛ a amaa meaboa meamaa bɛaziezie nwɔhoalilɛleka ne mɔɔ bɛbayɛ nyianu ne la.

Ɛnee yɛnda yɛmkpɔne ndɛ, yemɔti ɛnee yɛda nwɔhoalilɛleka ne mbia ne mɔ azo wɔ nɔsolɛ nu. Ɛnee Alasevolɛ mraalɛ ekpunli dɔɔnwo siezie nwɔhoalilɛleka ne. Yɛdole ewula mɔɔ bayɛ tɔn 70 la yɛguale. Menli mɔɔ nea dabelɛ zo la kpondɛle dabelɛ wɔ sua zo manle menli 15,000 mɔɔ ɛnee yɛ nye la bɛ ade la. Arɛlevilɛ nu ala a, yɛdele edwɛkɛ mɔɔ yɛ azibɛnwo a!

Wɔ August 19—kenle nnu pɛ na yɛ nyianu ne abɔ ɔ bo la—bɛhyele Mikhail Gorbachev mɔɔ ɛnee le maanle kpanyinli wɔ USSR la wɔ mekɛ mɔɔ ɔlɛdie ɔ menle wɔ ɛleka bie mɔɔ bikye Yalta, mɔɔ nee ɛleka mɔɔ yɛwɔ anwa la. Bɛpɛle adenle mɔɔ yɛnyianle kɛ yɛyɛ nyianu ne la anu. Menli mɔɔ bahɔ nyianu ne la vɛlɛle na bɛbizale kɛ, “Duzu a yɛyɛ ye wɔ yɛ bɔɔso nee keteke mɔɔ yɛva la anwo a?” Menli mɔɔ ɛlɛnea nyianu ne azo la yɛle nwolɛ asɔne dɔɔnwo na bɛhanle bɛhilele bɛ kɛ, “Kɛ ɔde ye biala la bɛrɛla!”

Anwomoalɛ nee asɔneyɛlɛ hɔle zolɛ. Menli mɔɔ nea kale zo la hɔvale mediema mɔɔ vi Soviet Union ɛleka ngakyile rale la na bɛ nee bɛ hɔle ɛleka mɔɔ bɛbala la. Nwonlomɔ biala, Nyianu Kɔmatii ne anu amra kɔyia mgbanyima mɔɔ nea suakpole ne azo la. Nɔsolɛ biala, bɛbaka edwɛkɛ kpalɛ.

Wɔ Kule, August 22—ɔhale kenle nwiɔ na yɛabɔ ɔ bo la—Nyianu Kɔmatii ne anu amra vale nrɛlaleɛ kpalɛ rale kɛ: Bɛlie nyianu ne bɛdo nu! Mekɛ mɔɔ yɛdole edwɛne mɔɔ yɛvale yɛbukele na yɛbɔle nu yɛyɛle asɔne la, yɛ nye liele kpole. Folɛ ne mɔɔ yɛkpɔnenle la, yɛhale ɛkɛ yɛmanle aleɛ dwole, yɛbɔle adawu na yɛmiemianle yɛ agɔnwolɛvalɛ ne anu. Keleseɛnema mɔɔ bɛlɛ diedi kpole na bɛhola bɛgyinla sɔnea mɔɔ yɛ se anloa la a ɛyia ɛke la.

Wɔ nyianu ne anzi ɛvolɛ mɔɔ bo 22 la anu, sunsum nu anyuhɔlɛ dɔɔnwo ɛra. Bɛsisi Belemgbunlililɛ Asalo wɔ Ukraine ɛleka dɔɔnwo, na nolobɔlɛma dodo ne mɔɔ ɛnee bɛle 25,000 wɔ 1991 la kɛkala ɛbo 150,000!

Yɛ abusua ne tɛbɔ Dzhankoy, mɔɔ kɛkala le suakpole mɔɔ menli kɛyɛ 40,000 a wɔ zo la. Mekɛ mɔɔ yɛvi Siberia yɛrale ɛke wɔ 1968 la, ɛnee Alasevolɛ mbusua ekyi bie a wɔ ɛke a, noko ɛnɛ yɛlɛ asafo mɔɔ bo nsia la wɔ Dzhankoy.

Me abusua ne noko ɛyɛ kpole. Kɛkala yɛle awolɛndoazo nna mɔɔ yɛtɛte aze na yɛlɛsonle Gyihova a—yɛ mra, bɛ mra, yɛɛ bɛ mra amra.