Ewule le kɛ nafelɛ la, ɔluakɛ mɔwuamra ɛnze ɛhwee yɛɛ bɛngola bɛnyɛ ɛhwee. Noko akee, Bɔvolɛ ne bahola alua ewudwazo zo amaa mɔwuamra azia ara bieko. Ɛhye anwo daselɛ a le kɛ Nyamenle manle Gyisɛse tumi manle ɔdwazole menli dɔɔnwo ɔrale ngoane nu.—Kenga Nolobɔvo ne 9:5; Dwɔn 11:11, 43, 44.

Nyamenle ɛbɔ ɛwɔkɛ kɛ ɔbadwazo mɔwuamra mɔɔ wɔ ye ngakyelɛ nu la yeara ngoane nu wɔ tenlene ewiade fofolɛ nu. Ɔwɔ kɛ menli mɔɔ bɛbadwazo bɛ la da wɔ ewule nu kɔkpula kɛ Nyamenle bamaa bɛ ngoane bieko la. Tumivolɛ Bedevinli Nyamenle ne anye la kɛ ɔbava ye tumi ne yeadwazo mɔwuamra yeara ngoane nu bieko.—Kenga Dwobu 14:14, 15.

Saa Nyamenle dwazo menli a, bɛbahola bɛanwu bɛ nwo, bɛ gɔnwo mɔ yɛɛ bɛ abusua. Ahenle sonlabaka ne bakpɔlɔ ɛdeɛ, noko Nyamenle bahola adwazo ahenle zɔhane ala na yeamaa ye sonlabaka fofolɛ.—Kenga 1 Kɔlentema 15:35, 38.

Menli ekyi bie ala a bɛbadwazo bɛ bɛahɔ anwuma a. (Yekile 20:6) Bɛbadwazo menli dɔɔnwo bɛara ngoane nu wɔ azɛlɛ ye azo paladaese nu. Menli ɛhye mɔ babɔ ɛbɛla bo fofolɛ na bɛanyia anyelazo kɛ bɛbadɛnla aze dahuu.—Kenga Edwɛndolɛ 37:29; Gyima ne 24:15.