“Awie mɔɔ ɔnze fakyɛ la sɛkye belegye ne mɔɔ ɔwɔ kɛ ɔdaye mumua ne ɔfa zo la.” Zɔhane edwɛkɛ ne mɔɔ tetedwɛkɛ kɛlɛvolɛ Edward Herbert mɔɔ vi Britain hɛlɛle wɔ ɛvoya ne mɔɔ tɔ zo 17 anu la maa yɛnwu debie ko mɔɔ ɔti ɔwɔ kɛ yɛfa edwɛkɛ yɛkyɛ awie mɔ la: Ɔngyɛ biala, ɛnee bie a ɔwɔ kɛ yɛsɛlɛ awie mɔ kɛ bɛva yɛ ɛtane bɛhyɛ yɛ. (Mateyu 7:12) Noko akee, debie bie wɔ ɛkɛ mɔɔ hyia kpalɛ mɔɔ ɔti ɔwɔ kɛ yɛfa ɛtane yɛkyɛ a. Tie ɛzoanvolɛ Pɔɔlo edwɛkɛ ɛhye wɔ Kɔlɔsaema 3:13.—Kenga.

Kɛmɔ yɛ muala yɛtɔ sinli la ati, ɔyɛ a yɛka awie mɔ ɛya anzɛɛ yɛmaa bɛfa ɛya, yɛɛ bɛdabɛ noko bɛyɛ yɛ bie. (Wulomuma 3:23) Kɛ ɔkɛyɛ na anzondwolɛ adɛnla yɛ nee yɛ gɔnwo mɔ menli mɔɔ bɛtɔ sinli la avinli ɛ? Nyamenle manle Pɔɔlo dule yɛ folɛ kɛ yɛnyia abotane na yɛva edwɛkɛ yɛhyɛ. Zɔhane folɛdulɛ ne anwo hyia ɛnɛ kɛmɔ ɛnee ɔde wɔ ɛvolɛ kɛyɛ apenle nwiɔ mɔɔ ɛze ɛhɔ mɔɔ bɛhɛlɛle la anu la. Bɛmaa yɛnlea Pɔɔlo edwɛkɛ ne anu kpalɛ.

‘Bɛsosɔ bɛ nwo ngoko ngoko, na bɛnyia abotane.’ Edwɛkɛ agbɔkɛ “bɛsosɔ bɛ nwo” kile Giliki edwɛkɛkpɔkɛ mɔɔ kile abotane la abo. Buluku ko ka kɛ Keleseɛnema da subane ɛhye ali ɔlua “abotane mɔɔ bɛsi na bɛ nee menli mɔɔ bɛ subane ka bɛ ɛya tɛnla la azo.” Edwɛkɛ agbɔkɛ “bɛsosɔ bɛ nwo ngoko ngoko” maa yɛnwu kɛ ɔwɔ kɛ menli nwiɔ ne amuala nyia abotane. Ɛhye kile kɛ, saa yɛnwu kɛ yɛlɛ subane mɔɔ ka awie mɔ ɛya la a, yɛnrɛmaa ninyɛne mɔɔ yɛngulo ye wɔ awie mɔ anwo la ɛnrɛzɛkye anzondwolɛ mɔɔ la yɛ nee bɛ avinli la. Na saa awie mɔ yɛ ɛtane tia yɛ ɛ?

“Bɛva ɛtane bɛhyɛ.” Nwomanli ko kile kɛ Giliki edwɛkɛkpɔkɛ mɔɔ bɛhile ɔ bo “bɛva ɛtane bɛhyɛ” la “ɛngile fakyɛ ala . . . emomu, ɔkɔ moa na ɔkile kɛzi ɛlolɛ wɔ fakyɛ ne anu la.” Bieko ka kɛ edwɛkɛkpɔkɛ ɛhye kola kile “debie mɔɔ ahunlundwolɛ wɔ nu, ɛlolɛ wɔ nu na ɔle moalɛ la.” Saa yɛfi yɛ ɛhulolɛ nu yɛfa ɛtane yɛkyɛ wɔ mekɛ bɔbɔ mɔɔ ‘yɛlɛ yɛ gɔnwo anwo ɛya’ la a yɛkile kɛ yɛle dovolɛ. Noko, duzu ati a ɔwɔ kɛ yɛnyia ɛhulolɛ na yɛdo awie mɔ a? Debie ko a le kɛ ɔnrɛhyɛ, bie a ɛnee ɔhyia kɛ ɛtanevolɛ ne do yɛ na ɔfa yɛ ɛtane ɔkyɛ yɛ.

“Kɛmɔ [Gyihova] ɛva bɛ nwo edwɛkɛ ɛhyɛ bɛ la.” Ɛhye a le adwenle titile mɔɔ ɔti ɔwɔ kɛ yɛfa awie mɔ ɛtane yɛkyɛ bɛ a: Gyihova Nyamenle fa yɛ nwo edwɛkɛ kyɛ yɛ. (Maeka 7:18) Suzu ɛlolɛ kpole mɔɔ Gyihova fa do ɛtanevolɛma mɔɔ kɛnlu bɛ nwo la anwo ekyii nea. Gyihova ɛnyɛ ɛtane kɛ yɛdayɛ la. Noko, ɔfi ye ɛhulolɛ nu ɔfa ɛtanevolɛma mɔɔ kɛnlu bɛ nwo la ɛtane ɔkyɛ bɛ ɔnva nwo kɛ ɔze kɛ ɔnrɛyɛ yɛ ɛtane na yɛava yɛahyɛ ye la. Nɔhalɛ nu, Gyihova a le awie mɔɔ fa ɛtanevolɛma mɔɔ kɛnlu bɛ nwo la ɛtane kyɛ bɛ la anwo neazo kɛnlɛma a!

Gyihova anwunvɔnezelɛ ne maa yɛbikye ye na ɔka yɛ ɔmaa yɛsukoa ye. (Ɛfɛsɛsema 4:32–5:1) Ɔle kpalɛ kɛ yɛbiza yɛ nwo kɛ, ‘Saa Gyihova ɛlolɛ ne maa ɔfa me ɛtane ɔkyɛ me a, ɛnee kɛzi menrɛva me gɔnwo dasanli mɔɔ tɔ sinli mɔɔ kɛyɛ ɛtane kɛtia me na ɔkɛnlu ɔ nwo nɔhalɛ nu la ɛtane menrɛhyɛ ye ɛ?’—Luku 17:3, 4.