RELEEHABE nleanle ye nvɛnzɛlɛ ne anu wɔ mekɛ mɔɔ aleɛbahye wienyi ne dɔle fiene ne mɔɔ ɛbɔ Gyɛleko ɛyia azo la. Ɛlɔne bie mɔɔ ɛlɛba bɛ nwo zo la ɛyia wɔ ɛkɛ—Yizilayɛ ɛlɔnema ne. Mekɛ mɔɔ bɛbɔle ɔ bo bɛdiale kilikili bɛbɔle suakpole ne bɛyiale la, bɛnwunle bɛ gyakɛ abo munlutu ne na bɛdele aweɛne ne mɔ ane.

Releehabe sua zo a le Gyɛleko; ɛnee ɔze adenle biala mɔɔ wɔ zo, zolɛ azua, gua nee efiade ne mɔ. Ɛnee ɔze menli mɔɔ wɔ zolɛ la kpalɛ. Ɛnee ɔkola ɔnwu kɛ ɛzulolɛ kpole ɛlɛka bɛ wɔ mekɛ mɔɔ alehyenlɛ biala Yizilayɛma kɔ zo yɛ deɛ ne mɔɔ yɛ bɛ ɛzulolɛ la—bɛtia kilikili bɛbɔ suakpole ne anwo bɛyia alehyenlɛ biala. Noko, mekɛ mɔɔ Releehabe dele bɛ aweɛne ne ane wɔ Gyɛleko adenle ne mɔ azo la ye ahonle andu yɛɛ ɔ rɛle ambɔ kɛ ye menli ne mɔ la.

Kenle nsuu ne azo mɔɔ ɛlɔnema ne dwazole ndɛ hɔbɔle suakpole ne anwo mgbɔlɔka yiale la ɛnee Releehabe ɛlɛnea bɛ. Wɔ Yizilayɛ sogyama ne anu, ɔnwunle ɛsɔfoma mɔ bɛlɛbɔ aweɛne na bɛzo ɛlɛka nwuanzanwuanza ne mɔɔ kile kɛ bɛ Nyamenle, Gyihova ne boka bɛ nwo la. Ɔbayɛ kɛ ɛnee Releehabe ɛva ɔ sa ɛdo nyɛma kɔkɔlɛ ne mɔɔ henda ye nvɛnzɛlɛ ne, mɔɔ anye wɔ Gyɛleko bane kpole ne anzi la azo. Zɔhane nyɛma ne manle Releehabe hakyele anyelazo mɔɔ ɔlɛ kɛ ɔ nee ye abusua ne banyia bɛ ti wɔ suakpole ne ɛzɛkyelɛ ne anu la. Ɛnee Releehabe le maamɔvo ɔ? Gyihova ambu ye zɔ; ɔbule ye kɛ raalɛ mɔɔ lɛ diedi kpole la. Bɛmaa yɛzia yɛhɔ Releehabe edwɛkɛ ne mɔlebɛbo na yɛnwu mɔɔ yɛbahola yɛazukoa yɛavi ye ɛkɛ la.

Ɛnee Releehabe le tuutuunli. Zɔhane nɔhalɛ wienyi ne zinle menli mɔɔ ka Baebolo ne anwo edwɛkɛ la bie mɔ anwo wɔ tete ne yemɔti bɛhanle kɛ ɔdie nyɛvolɛ ala. Noko, Baebolo ne ka ye wienyi, na ɔnva nɔhalɛ ne ɔnvea. (Dwɔhyua 2:1; Hibuluma 11:31; Gyemise 2:25) Wɔ Keena amaamuo nu, ɔbayɛ kɛ ɛnee bɛdie Releehabe gyima ne bɛto nu. Noko akee, amaamuo ɛnzɛkye adwenle mɔɔ maa yɛnwu kpalɛ nee ɛtane mɔɔ Gyihova ɛva ɛmaa yɛ kɔsɔɔti la. (Wulomuma 2:14, 15) Ɔbayɛ kɛ ɛnee Releehabe ze kɛ ɔbɔ anyiemgba ɛbɛla. Bie a, kɛmɔ menli dɔɔnwo mɔɔ yɛ gyima ɛhye bie ɛnɛ de la, ɔdele nganeɛ kɛ ɔnlɛ gyima bieko, saa yeanyɛ yemɔ ala a ɔnrɛhola ɔnrɛnlea ye abusua ne.

Ɔda ali kɛ ɛnee Releehabe ɛlɛkpondɛ ɛbɛlabɔlɛ kpalɛ. Ɛnee basabasayɛlɛ, ɛbɛlafunlibɔlɛ, mɔɔ mogyafonla nee nane mɔɔ bɛ nee ye da boka nwolɛ la ɛbu zo wɔ ye sua zo. (Sɛlɛvolɛma 18:3, 6, 21-24) Ɛnee ninyɛndane zɛhae mɔɔ ɛbu zo la boka bɛ ɛzonlenlɛ ne anwo. Ɛnee bɛsi tuutuubɔlɛ adua yɛɛ awozonle mɔɔ le kɛ Beeyale nee Molɛke ɛzonlenlɛ maa bɛyela ngakula anyewɔzo wɔ afɔlebɔlɛ senle nu.

Ɛnee Gyihova nwu mɔɔ ɛlɛkɔ zo wɔ Keena la. Nɔhalɛ nu, ɔlua Keenama ɛbɛlatane ne ati, Gyihova hanle kɛ: ‘Bɛzɛkye azɛlɛ ne, ɔlua ye ɛtane ne azo mebadea azɛlɛ ne, na azɛlɛ ne bave menli mɔɔ de zolɛ la agua.’ (Sɛlɛvolɛma 18:25) Ye ‘ɛtane ne anwo ndeanlɛ’ kile duzu? Nyamenle bɔle Yizilayɛma ɛwɔkɛ kɛ: “[Gyihova] bɛ Nyamenle ne bavoa menli ɛhye mɔ ngyikyi ngyikyi.” (Mɛla ne 7:22) Wɔ ɛvoya dɔɔnwo mɔɔ lumua la anu, ɛnee Gyihova  ɛbɔ ɛwɔkɛ kɛ ɔbava azɛlɛ ne yeamaa Ebileham, yɛɛ ‘Nyamenle, ɛmbɔ adalɛ ɛlɛ.’—Taetɛse 1:2; Mɔlebɛbo 12:7.

Noko akee, Gyihova eza hanle kɛ ɔwɔ kɛ bɛfoa menli ekpunli bie bɛfi azɛlɛ ne azo na bɛsɛkye bɛ bɔkɔɔ. (Mɛla ne 7:1, 2) Kɛmɔ ɔle “azɛlɛ ye amuala ndɛnebuavolɛ” mɔɔ di pɛlepɛle la ati, ɔze awie biala ahonle kɛzi de yɛɛ ɛbɛlafunlibɔlɛ biala. (Mɔlebɛbo 18:25; 1 Edwɛkɛsisilɛ 28:9) Kɛzi ɛnee Releehabe te nganeɛ wɔ suakpole ɛhye mɔɔ bɛbua ye fɔlɛ mɔɔ ɔde zo la anwo ɛ? Ɔbayɛ kɛ ɔdele Yizilayɛma anwo amaneɛbɔlɛ ne la ɔ nye liele. Ɔdele kɛ Yizilayɛ Nyamenle ne lile ye menli ne anyunlu—ahanra maanle mɔɔ ɛnee bɛmbu bɛ—ɔmanle bɛlile konim bɔkɔɔ wɔ Yigyibiti ɛlɔnema anwo zo, konle ɛlɔnema mɔɔ ɛnee bɛtɛla biala wɔ zɔhane ewiade ne anu la. Kɛkala, akee Yizilayɛma ɛlɛba Gyɛleko anwo zo! Noko, menli mɔɔ wɔ suakpole ne azo la hɔle zo yɛle bɛ ninyɛndane ne. Yɛkola yɛnwu deɛmɔti Baebolo ne ka Releehabe agɔnwo mɔ Keenama anwo edwɛkɛ kɛ “menli anzosesebɛ ne mɔ” la.—Hibuluma 11:31.

Ɛnee Releehabe le ngakyile. Wɔ ɛvolɛ dɔɔnwo anu, ɔbayɛ kɛ ɔzuzule amaneɛbɔlɛ mɔɔ fane Yizilayɛma nee bɛ Nyamenle, Gyihova mɔɔ ɔdele la anwo. Nea kɛzi ɛnee ɔle ngakyile wɔ Keena awozonle ne mɔ anwo la! Nyamenle ɛhye a honle manle ye menli na yeanzɛkye bɛ la, ɔmanle ye menli ne bɔle ɛbɛla kpalɛ na bɛ nwo angua evinli la. Ɛnee Nyamenle ɛhye bu mraalɛ kɛ bɛ nwo hyia, na bɛnle menli mɔɔ bɛtɔ bɛ kɛ bɛ nee bɛ da, bɛadɔne bɛ, na bɛayɛ bɛ mgbane mgbane wɔ ɛzonlenlɛ nu a. Mekɛ mɔɔ Releehabe nwunle kɛ Yizilayɛma ɛyɛ bɛ azokoɛleɛ wɔ Dwɔdan ne anzi, na bɛlɛsiezie bɛ nwo kɛ bɛba bɛ nwo zo la, ɔbayɛ kɛ ɔ rɛle bɔle wɔ mɔɔ ɛhye bahola ahile amaa ye menli ne la anwo. Asoo Gyihova nwunle Releehabe na ɔbule debie kpalɛ mɔɔ wɔ ye nu la kɛ ɔsonle bolɛ?

Ɛnɛ, menli dɔɔnwo wɔ ɛkɛ mɔɔ bɛle kɛ Releehabe a. Bɛnnwu mɔɔ bɛyɛ a, bɛlɛbɔ ɛbɛla mɔɔ gua bɛ nyunlu aze na ɔmmaa bɛ nye ɛnlie a; bɛte nganeɛ kɛ awie ɛnnwu bɛ yɛɛ nvasoɛ ɛnle bɛ nwo zo. Releehabe edwɛkɛ ne kyekye yɛ rɛle maa yɛkakye kɛ Nyamenle nwu awie biala. Saa yɛte nganeɛ kɛ yɛnzɔho ɛhwee bɔbɔ a, “Nyamenle nee yɛ nuhua biala avinli ande biala.” (Gyima ne 17:27) Ɔbikye yɛ, na yeziezie ɔ nwo kɛ ɔbamaa menli mɔɔ lɛ diedi wɔ ye nu la anyia anyelazo. Asoo Releehabe yɛle zɔ?

Kenle ko bie, kolaa na Yizilayɛma abɔ Gyɛleko anwo mgbɔlɔka la, nyɛvolɛ nwiɔ rale Releehabe ɛkɛ. Ɛnee mrenya nwiɔ ne anye la kɛ awie biala ɛnrɛnwu bɛ, noko wɔ suakpole ne mɔɔ ɛzulolɛ ɛha bɛ la azo, ɛnee menli dɔɔnwo anye la kɛ bɛbanwu kɛ Yizilayɛ busiama bie ɛra ɛkɛ a. Bie a Releehabe nwunle bɛ menli holɛ ndɛndɛ. Tɛ kɛ mrenya ɛmba ye ɛkɛ ne, noko ɛnee menli nwiɔ ɛhye kpondɛ ɛleka mɔɔ bɛbala la ala—na tɛ kɛ bɛkpondɛ tuutuunli bɛ nee ye ala.

Nɔhalɛ nu, ɛnee mrenya nwiɔ ne le busiama mɔɔ bɛvi Yizilayɛ azokoɛleɛ ɛkɛ ne a. Ɛnee Dwɔhyua mɔɔ li bɛ nyunlu la ɛzoa bɛ kɛ bɛhɔnlea ɛleka mɔɔ Gyɛleko lɛ anwosesebɛ nee ɛleka mɔɔ ɔnlɛ  anwosesebɛ la. Ɛhye a le Keena suakpole mɔɔ Yizilayɛma balumua ahɔ zo a yɛɛ bie a yemɔ a anwo yɛ se kpalɛ a. Ɛnee Dwɔhyua kulo kɛ ɔnwu mɔɔ bado ye nee ye menli ne la. Ɔda ali kɛ busiama ne anye fuu a kpale kɛ bɛbahɔ Releehabe ɛkɛ a. Tuutuunli sua nu a nyɛvolɛ kɔ ɛkɛ a bɛnnwu bɛ a. Bie a ɛnee busiama ne anye la kɛ bɛbade edwɛkɛ bie mɔɔ hyia la bɛavi menli mɔɔ tendɛ a bɛndwenle nwolɛ la ɛkɛ.

Baebolo ne ka kɛ Releehabe ‘liele soanvolɛma ne kɛnlɛma.’ (Gyemise 2:25) Ɔvale bɛ ɔhɔle sua nu, saa ɛnee ɔngola ɔnnwu bɛ menli holɛ nee deɛmɔti bɛra ɛkɛ ne bɔbɔ la a, ɔmanle bɛdɛnlanle ɛkɛ. Bie a ɛnee ɔ nye la kɛ ɔbazukoa bɛ Nyamenle Gyihova ne anwo debie dɔɔnwo.

Noko, arɛlevilɛ nu ala, Gyɛleko belemgbunli ne soanvolɛma rale ɛkɛ! Edwɛkɛ ne ɛsalo kɛ Yizilayɛ busiama bie ɛra Releehabe sua nu ɛkɛ. Duzu a Releehabe bayɛ a? Saa ɔbɔ nyɛvolɛ nwiɔ ne anwo bane a, asoo ɔnrɛva ɔ nwo nee ye sua nu amra ɔnrɛdo esiane nu? Saa ɔmaa agbɔvolɛ ɛhye mɔ da ye sua nu a, asoo menli mɔɔ wɔ Gyɛleko la ɛnrɛhu bɛ muala? Noko akee, kɛkala, ɔda ali kɛ Releehabe ɛnwu menli ne sonla holɛ. Saa yenwu kɛ Gyihova le Nyamenle kpalɛ tɛla ye ɛdeɛ ne a, asoo ɛhye le nwolɛ adenle mɔɔ bamaa yeagyinla Gyihova afoa ɔ?

Mekɛ ekyi bie a Releehabe nyianle dwenlenle edwɛkɛ ne anwo a, noko ɔvale ye adwenle ɔlile gyima na ɔyɛle ye ndɛndɛ. Ɔvale busiama ne ɔveale ye sua ne ati zo anwuma na ɔvulale bolɔfodɔ nzoleɛ ɔguale bɛ nwo zo. Akee ɔhanle ɔhilele belemgbunli soanvolɛma ne kɛ: “Ɔle nɔhalɛ kɛ menli bie rale me sua nu ɛke, noko menze ɛleka mɔɔ bɛvi la. Bɛziale na sɛnzɛne ne adɔ, kolaa na bɛado suakpole ne anlenkɛ kpole ne anu. Meambiza bɛ ɛleka mɔɔ bɛkɔ la; bɛhɔle la ɛtɛkyɛle. Saa bɛkpo bɛ a, bɛbahɔdo bɛ adenle nu.” (Dwɔhyua 2:4, 5) Dwenle Releehabe mɔɔ ɛlɛnea belemgbunli soanvolɛma ne anyunlu la anwo nea. Asoo ɛnee ɔsulo kɛ bɛbanwu kɛ ye ahonle ɛdu?

Ye mɛlɛbɛla ne boale! Menli mɔɔ belemgbunli ne zoanle bɛ la kpole bɛ dedee bɛdwule ɛleka mɔɔ bɛpɛ Dwɔdan ne la. (Dwɔhyua 2:7) Ɔbayɛ kɛ Releehabe anwo dɔle ye. Ɔluale adenle sikalɛ bie azo ɔbɛlɛbɛlale kɔdiawuma mɔɔ bɛnlɛ adenle kɛ bɛnwu nɔhalɛ ne la, na ɔliele Gyihova azonvolɛ mɔɔ bɛnze nwolɛ bie la.

Releehabe ziale hɔle ye sua ne ati zo ndɛndɛ na ɔhanle mɔɔ yeyɛ la ɔhilele busiama ne. Eza ɔhanle nɔhalɛ edwɛkɛ bie mɔɔ hyia la kɛ: Awie biala mɔɔ wɔ yɛ maanle ye anu la sulo bɛ. Ɔbayɛ kɛ busiama ne anye liele edwɛkɛ ɛhye anwo. Gyihova, Yizilayɛ Nyamenle ne tumi ne hanle Keena ɛtanevolɛma ne ɛzulolɛ! Releehabe akee hanle debie mɔɔ nwolɛ hyia yɛ kpole kpalɛ la. Ɔhanle kɛ: “[Gyihova] bɛ  Nyamenle ne a le Nyamenle wɔ anwuma lɔ nee azɛlɛ ye azo a.” (Dwɔhyua 2:11) Amaneɛbɔlɛ mɔɔ ɔdele wɔ Gyihova anwo la manle ɔnwunle ɛhye kɛ: Ɔfɛta kɛ ɔnyia anwodozo wɔ Yizilayɛ Nyamenle ne anu. Ɔnyianle diedi wɔ Gyihova anu.

Releehabe nwunle kɛ Gyihova bamaa ye menli ne ali konim. Yemɔti ɔzɛlɛle kɛ bɛze ye anwunvɔne, na ɔbodole kɛ bɛlie ye nee ye abusua ne na bɛanwu. Busiama ne liele dole nu, na bɛhanle bɛhilele Releehabe kɛ ɔmmaka mɔɔ bɛyɛ la ɔkile awie yɛɛ ɔwɔ kɛ ɔfa nyɛma kɔkɔlɛ ɔkenda ye nvɛnzɛlɛ ne mɔɔ wɔ suakpole ne bane ne anloa la anwo amaa sogyama ahola abɔ ɔdaye nee ye abusua ne anwo bane.—Dwɔhyua 2:12-14, 18.

Yɛbahola yɛazukoa diedi nwo nɔhalɛ titile yɛavi Releehabe ɛkɛ. Kɛmɔ Baebolo ne ka la, “saa yɛte edwɛkɛ ne a yɛɛ yɛnyia diedi a.” (Wulomuma 10:17) Ɔdele Gyihova Nyamenle tumi nee ye pɛlepɛlelilɛ ne anwo edwɛkɛ, yemɔti ɔnyianle diedi nee anwodozo wɔ ye nu. Ɛnɛ, yɛkola yɛsukoa Gyihova anwo ninyɛne dɔɔnwo. Asoo yɛbabɔ mɔdenle yɛanwu ye na yɛanyia ye nu diedi ɔlua mɔɔ yɛbazukoa wɔ ye Edwɛkɛ, Baebolo ne anu la azo?

Releehabe manle busiama nwiɔ ne luale nyɛma nwo vi sua ne nvɛnzɛlɛ ne anu dwule aze na bɛhɔle awoka ne mɔ azo lɔ koonwu mɔɔ awie ande bɛ ne a. Ɛnee mbɔnza nee bolɛ bɔne dɔɔnwo wɔ Gyɛleko sɔlɔ mɔɔ busiama ne bahola avea nu kɔkpula kɛ bɛbahola bɛazia bɛahɔ Yizilayɛma azokoɛleɛ ɛkɛ na bɛava edwɛkɛ kpalɛ mɔɔ Releehabe ɛha ɛhile bɛ la bɛabɔ bɛ amaneɛ a.

Nzinlii, ɛzulolɛ kpole hanle menli mɔɔ wɔ Gyɛleko la wɔ mekɛ mɔɔ bɛdele kɛ Gyihova ɛmaa Dwɔdan Azule ne ɛsesa wɔ nwanwane adenle zo na menli ne ɛlua azɛlɛ resee zo ɛpɛ la. (Dwɔhyua 3:14-17) Noko wɔ Releehabe afoa nu, zɔhane edwɛkɛ ne manle ɔnwunle daselɛ dɔɔnwo mɔɔ kile kɛ diedi mɔɔ ɔnyianle wɔ Gyihova anu la fɛta.

Akee yedwu kɛ Yizilayɛma tia kilikili bɔ Gyɛleko anwo mgbɔlɔka yia—kenle nsia, bɛbɔ mgbɔlɔka ko alehyenlɛ biala. Akee ɔdwule kenle nsuu ne la ɔyɛle ngakyile. Kɛmɔ yɛhanle ye wɔ edwɛkɛ ɛhye mɔlebɛbo ne la, bɛbɔle ɛdialɛ ne abo aleɛbahye, ɛlɔne ne bɔle Gyɛleko anwo mgbɔlɔka wiele la, bɛdoale zolɛ, na bɛyɛle ye fane dɔɔnwo. (Dwɔhyua 6:15) Duzu a ɛnee Yizilayɛma ɛlɛyɛ a?

Awieleɛ ne, kenle nsuu ne azo mɔɔ bɛbɔle mgbɔlɔka fane nsuu ne bɛwiele la, ɛlɔnema ne gyinlanle. Aweɛne ne gyakyile. Ɛkɛ ne yɛle koonwu. Ɔbayɛ kɛ ɛnee ɛzulolɛ kpole ɛha sua ne azo amra. Akee Dwɔhyua yɛle sɛkɛlɛneɛ bie hilele bɛ, na Yizilayɛ ɛlɔnema ne deanle nu kpole ko. Asoo menli mɔɔ gyigyi Gyɛleko bane ne azo ɛlɛsinza la dwenlenle kɛ ɛdeanlɛ ɛhye mɔɔ bɛfa bɛateta bɛ la yɛ ɛzulolɛ? Saa bɛdwenlenle zɔ a ɛnee yeangyɛ fee. Bane kpole ne bɔle ɔ bo kɛ ɔte yeagua. Ɔwozole, yeakpuke na akee yeadɔ aze gɔɔ! Noko, mekɛ mɔɔ munlutu ne hanle aze la, bɛnwunle kɛ bane ne foa bie gyi ye kpundii. Releehabe sua ne anzɛkye, ɛhye kakye yɛ wɔ diedi kpundii mɔɔ raalɛ ko nyianle la anwo. Suzu kɛzi ɔdele nganeɛ wɔ mekɛ mɔɔ ɔnwunle kɛ Gyihova ɛbɔ ɔ nwo bane la anwo nea! * Ye abusua ne nyianle bɛ ti!—Dwɔhyua 6:10, 16, 20, 21.

Gyihova menli noko lile Releehabe eni wɔ ye diedi ne anwo. Mekɛ mɔɔ bɛnwunle kɛ bane ne ɛbu na yeha sua kokye la, bɛnwunle kɛ Gyihova nee raalɛ ɛhye lua. Ɔ nee ye abusua ne nyianle ngoane wɔ ɛzɛkyelɛ mɔɔ rale ɛtanevolɛma sua ɛhye azo la anwo. Konle ne anzi, bɛmanle Releehabe dɛnlanle ɛleka mɔɔ bikye Yizilayɛma azokoɛleɛ ne la. Mekɛ hɔle bie la, Releehabe rabokale Dwuuma anwo. Ɔgyale awie mɔɔ bɛfɛlɛ ye Salemɔn la. Bɛ ra nrenya Bowaze nyinle na ɔyɛle awie mɔɔ lɛ diedi kpole la. Ɔgyale Mowabenli Wulutu. * (Wulutu 4:13, 22) Belemgbunli Devidi yɛɛ nzinlii Mɛzaya mumua ne, mɔɔ le Gyisɛse Kelaese la vi zɔhane abusua kɛnlɛma ne anu vindele.—Dwɔhyua 6:22-25; Mateyu 1:5, 6, 16.

Releehabe edwɛkɛ ne kile kɛ yɛ nuhua ko biala anwo hyia Gyihova. Ɔnwu yɛ muala, ɔnwu yɛ ahonle nu, na saa ɔnwu kɛ yɛlɛ diedi kɛ Releehabe la a ɔ nye die. Ye diedi ne manle ɔyɛle nwolɛ debie. Kɛmɔ Baebolo ne ka la, ‘ye gyima manle ɔzɔle Nyamenle anye.’ (Gyemise 2:25) Nea kɛzi yɛsukoa ye diedi ne a yɛbanwu nrɛlɛbɛ la!