“Ɛngyia Nyamenle anwo ɔ? Menli mgbe dɔɔnwo ɛngyia ɔ nwo.” Edwɛkɛ ɛhye a menli ekpunli bie mɔɔ bɛnlɛ Nyamenle anu diedi la duale manle bɛhɛlɛle bɛbɔle ɛleka bie kenlensa ye a. Bɛte nganeɛ kɛ bɛngyia Nyamenle anwo.

Noko, menli dɔɔnwo mɔɔ die Nyamenle di la si kpɔkɛ kɛ asɛɛ ɔnle ɛkɛ la. Salvatore Fisichella, mɔɔ le Katɔlek ɛsɔfo kpanyinli la, hanle menli mɔɔ wɔ ye asɔne ne anu la anwo edwɛkɛ kɛ: “Saa awie nea yɛ a ɔnrɛnwu kɛ yɛle Keleseɛnema ɛnɛ ɔluakɛ yɛbɔ yɛ ɛbɛla kɛ menli mɔɔ bɛngɔ asɔne la.”

Bie mɔ ɛnlɛ alagye yemɔti bɛndwenle Nyamenle anwo. Bɛbu ye kɛ ɔwɔ moa anzɛɛ ɔnrɛhola ɔnrɛboa bɛ kpalɛ wɔ bɛ ɛbɛlabɔlɛ nu. Mekɛ mɔɔ bɛdwenle Nyamenle anwo la a le mekɛ mɔɔ bɛnyia edwɛkɛ bie anzɛɛ bɛhyia debie la, bɛbu ye kɛ ɔle sonvolɛ mɔɔ bɛhyia ɔ nwo a yɛɛ bɛfɛlɛ ye a.

Bie mɔ noko ɛnnwu nvasoɛ biala mɔɔ wɔ asɔne ngilehilelɛ zo a, anzɛɛ bɛnyɛ mɔɔ bɛ asɔne ne ka la. Nwolɛ neazo ko ɛne, Katɔlekma mɔɔ wɔ Germany la anu ɛya ko ngyɛnu 76 die di kɛ ɔle kpalɛ kɛ nrenya nee raalɛ badɛnla kolaa na bɛagya—debie mɔɔ bɛ asɔne ne nee Baebolo ne ɛnga ye zɔ la. (1 Kɔlentema 6:18; Hibuluma 13:4) Nɔhalɛ nu, tɛ Katɔlekma angomekye a ɛnyɛ mɔɔ bɛ asɔne ne ka la a. Asɔne dɔɔnwo anu ɛsɔfoma ka kɛ bɛ menli ne mɔ bɔ bɛ ɛbɛla kɛ “bɛnlɛ Nyamenle anu diedi la.”

Neazo ɛhye mɔ maa yɛbiza kɛ: Asoo yɛhyia Nyamenle amgba ɔ? Edwɛkɛ ɛhye ɛnle fofolɛ. Bɛbizale edwɛkɛ ɛhye wɔ Baebolo ne mukelɛ mɔɔ lumua la anu. Amaa yɛabua zɔhane kpuyia ne la, bɛmaa yɛnlea edwɛkɛ dɔɔnwo mɔɔ bɛbizale wɔ Mɔlebɛbo buluku ne mɔɔ wɔ Baebolo ne anu la.