Asoo ɛnee ɔfɛta kɛ Devidi bamaa ɔ nye ala kɛ Nyamenle badwenle ɔ nwo ɔ? Asoo Nyamenle dwenle ɛ nwo? Menli dɔɔnwo ɛnlie ɛnli kɛ tumivolɛ Nyamenle bie dwenle bɛ nwo. Kɛmɔti ɛ?

Adwenle ko a le kɛ Nyamenle le awie mɔɔ kpogya tɛla alesama. Saa ɔwɔ anwuma nehane na ɔnea maanle kɔsɔɔti a, ‘bɛle kɛ nzule kpɔnwo ko mɔɔ vi bokiti nu ɛpe la; bɛle kɛ munlutu wɔ tone zo’ wɔ ɔ nye zo. (Ayezaya 40:15) Yɛ mekɛ ye azo kɛlɛvolɛ bie mɔɔ su kpolera la hanle kɛ, “saa awie die di kɛ Nyamenle bie wɔ ɛkɛ mɔɔ dwenle ɔ nwo a, ɛnee yebɛlɛbɛla ɔ nwo kpole.”

Menli bie mɔ noko te nganeɛ kɛ bɛ nyɛleɛ ɛmmaa ɔnfɛta kɛ Nyamenle dwenle bɛ nwo. Kɛ neazo la, nrenya bie mɔɔ bɛfɛlɛ ye Jim, mɔɔ ɛlɛkɔ ye mgbanyifoa la hanle kɛ: “Ɛnee meta meyɛ asɔne kɛ mebanyia anzondwolɛ na meahola meahomo me nwo zo, noko ɔyɛ a ɔngyɛ na meava ɛya. Awieleɛ ne, menganle kɛ me ɛtane ne bo zolɛ yemɔti Nyamenle ɛnrɛhola ɛnrɛboa me.”

Asoo Nyamenle nee alesama avinli wale mɔɔ ɔti ɔnnwu yɛ ɔ? Kɛzi ɔte nganeɛ wɔ ye abɔdeɛ mɔɔ ɛnli munli la anwo ɛ? Saa Nyamenle ammaa yɛannyia ɔ nwo ndelebɛbo a, dasanli biala ɛnrɛhola ɛnrɛdendɛ Nyamenle anloa zo na yeabua zɔhane kpuyia ne mɔ. Noko akee, Nyamenle edwɛkɛ ne mɔɔ vi sunsum nu mɔɔ bɛva bɛmaa alesama​—Baebolo ne​—maa yɛnwu kɛ Nyamenle ɛnle moa mɔɔ ɔndwenle menli nwo a. Baebolo ne ka kɛ, ‘Nɔhalɛ nu, Nyamenle nee yɛ nuhua biala avinli ande biala.’ (Gyima ne 17:27) Wɔ edwɛkɛ nna mɔɔ doɔdoa zo la anu, yɛbazuzu kɛzi Nyamenle kile kɛ ɔdwenle menli nwo nee kɛzi yehile kɛ ɔdwenle menli mɔɔ le kɛ ɛdawɔ anwo la.