DEƐMƆTI BIE MƆ ƐNLIE ƐNLI: Menli dɔɔnwo te nganeɛ kɛ Nyamenle bu alesama kɛ bɛle ɛtanevolɛma mɔɔ bɛ nwo ɛngyia ye a. Kendra, mɔɔ adwenledwenle ɛdɔ ɔ nwo la, bua ɔ nwo fɔlɛ ɔluakɛ ɔngola ɔnyɛ mɔɔ Nyamenle kpondɛ kɛ ɔyɛ la. Ɛhye ati, ɔhanle kɛ, “mengyakyile asɔneyɛlɛ.”

MƆƆ NYAMENLE EDWƐKƐ NE KILEHILE: Gyihova ɛnnea wɔ sinlidɔlɛ ne mɔ, ɔnea kɛ ɔbade kɛzi ɛde la abo. Baebolo ne ka kɛ, “ɔze kɛ yɛsi yɛde la; ɔkakye kɛ yɛle ndɛtɛlɛ ala.” Bieko, ɔ nee yɛ ɛnli ye “kɛmɔ yɛ ɛtane ne mɔ si de la,” noko saa yɛnu yɛ nwo a, ɔfi anwunvɔnezelɛ nu ɔfa yɛ ɛtane ne mɔ ɔkyɛ yɛ.​—Edwɛndolɛ 103:10, 14.

Fa Devidi, Yizilayɛ belemgbunli ne mɔɔ yɛbɔle ye duma wɔ edwɛkɛ ne mɔɔ lumua anu la kɛ neazo. Devidi hanle ye wɔ asɔneyɛlɛ nu hilele Nyamenle kɛ: “Metɛsɔhonle ɛhwee la ɛnee ɛ nye gyi me nwo; ɛnee bɛhɛlɛ me nwo edwɛkɛ biala wɔ wɔ buluku ne anu . . . Neɛnlea me nu, O Nyamenle, na nwu me ahonle nu!” (Edwɛndolɛ 139:16, 23) Ɛhɛe, ɛnee Devidi lɛ anwodozo kɛ yeyɛ ɛtane bɔbɔ ɛdeɛ​—ɛtane kpole​—noko Gyihova kola nwu kɛ yenlu ɔ nwo wɔ ye ahonle nu.

Gyihova te wɔ edwɛkɛ bo kpalɛ tɛla dasanli biala. Baebolo ne ka kɛ, ‘Dasanli nea sonla ɛnyelɛ zo ala, na Gyihova ɛdeɛ, ɔnea sonla ahonle nu.’ (1 Samoɛle 16:7) Nyamenle ze kɛzi ɛbɔ wɔ ɛbɛla la​—kɛzi subane mɔɔ bɛvale bɛwole wɔ, ɛleka mɔɔ ɛnyinle, ɛleka mɔɔ ɛde yɛɛ wɔ sonlaholɛ ɛmaa wɔyɛ sonla mɔɔ ɛde la. Nvonleɛ wɔ ɛ nwo ɛdeɛ, noko ɔnwu sonla mɔɔ ɛkulo kɛ ɛyɛ la na ɔ nye die nwolɛ.

Noko akee, kɛzi Nyamenle fa mɔɔ ɛde bɔkɔɔ mɔɔ ɔze la kyekye ɛ rɛle ɛ?