Bɛwole me wɔ Baku, mɔɔ wɔ Azerbaijan la. Yɛle ngakula nwiɔ na medame a mele ekyi a. Me papa le Kɛnlamonli, yɛɛ me mame le Dwuunli. Ɛnee me awovolɛ kulo bɛ nwo na bɛdie bɛ diedi ngakyile ne bɛto nu. Saa me Papa ɛlɛdi Ramadan ne a, me Mame boa ye, yɛɛ me Papa noko boa me Mame maa ɔdi Akpabɛnwo ne. Yɛlɛ Koran ne, Torah, nee Baebolo ne wɔ yɛ sua nu.

Mengɔle Ngɛnlamo. Meanga ye ɛlɛ kɛ Nyamenle ɛnle ɛkɛ ɛdeɛ, noko ɛnee edwɛkɛ bie mɔ gyegye me. Membizale me nwo kɛ, ‘Duzu ati a Nyamenle bɔle sonla a, na bodane boni ati a awie banwu amaneɛ wɔ ye ɛbɛlabɔlɛ kɔsɔɔti anu na bahile ye nyane wɔ hell dahuu a?’ Kɛmɔ menli ka kɛ debie biala mɔɔ kɛzi la le Nyamenle ɛhulolɛdeɛ la ati, membizale me nwo kɛ, ‘Asoo Nyamenle maa menli nwu amaneɛ na akee yeazele bɛ ɔ?’

Menlile ɛvolɛ 12 la, membɔle ɔ bo kɛ mesɛlɛ namaz, Ngɛnlamoma nzɛlɛlɛ mɔɔ bɛyɛ ye fane nnu alehyenlɛ biala la. Mekɛ zɔhane, me Papa vale me nee me diema raalɛ ne hɔle Dwuuma sukulu. Ninyɛne mɔɔ bɛhilele yɛ la bie mɔ a le Torah amaamuo nee Hibulu aneɛ. Yɛyɛ Dwuuma nzɛlɛlɛ kolaa na yɛabɔ debiezukoalɛ bo alehyenlɛ biala. Yemɔti meyɛ namaz asɔne wɔ sua nu nwonlomɔ, na saa mekɔ sukulu a me nee bɛ abɔ nu ayɛ Dwuuma nzɛlɛlɛ.

Ɛnee me kunlu a anrɛɛ menyia me kpuyia ne mɔ anwo mualɛ. Ɛnee mekɔ zo mebiza kilehilevolɛ ne mɔ wɔ sukulu kɛ: “Duzu ati a Nyamenle bɔle sonla a? Kɛzi Nyamenle bu me papa mɔɔ le Kɛnlamonli la ɛ? Ɔle sonla kpalɛ, noko, kɛmɔti a bɛbu ye kɛ ɔ nwo ɛnde ɛ? Duzu ati a Nyamenle bɔle ye a?” Ɛnee ndelebɛbo biala ɛnle mualɛ mɔɔ menyianle la anu.

Nyamenle anu diedi mɔɔ ɛnee melɛ la zɛkyele bɔkɔɔ wɔ 2002. Yɛdule yɛhɔle Germany la, ɔ nzi dapɛne ko ala yɛɛ me papa nyianle  stroke mɔɔ ɛnee ɔndendɛ. Ɛnee meva ɛvolɛ dɔɔnwo mezɛlɛ kɛ me abusua ne bɛade kpɔkɛ na bɛ nwo adɔ bɛ. Ɛnee melɛ anwodozo kɛ Tumivolɛ Bedevinli ne ala a lɛ tumi wɔ ngoane nee ewule nwo zo a, yemɔti menzɛlɛle dahuu kɛ ɔdo me papa ngoane nu. Menzuzule kɛ, ‘Ɔnyɛ se ɔmmaa Nyamenle kɛ ɔbadie kakula raalɛ ekyi ahonle nu edwɛkɛ.’ Ɛnee meze kɛ ɔbadie me modolɛ. Noko me ze wule.

Ɔzinle me nwo kɛ Nyamenle andie me la, na ɛhye manle me nwo bubule me. Menzuzule kɛ, ‘Bie a ɛnee menyɛ nzɛlɛlɛ ne kpalɛ anzɛɛ Nyamenle ɛnle ɛkɛ.’ Me rɛle bɔle na meangola meanyɛ namaz nzɛlɛlɛ ne bieko. Ɛnee me nye ɛnlie asɔne gyɛne nwo, yemɔti menganle kɛ Nyamenle ɛnle ɛkɛ.

Ye siane nsia anzi, Gyihova Alasevolɛ rale yɛ sua nu ɛkɛ. Kɛmɔ ɛnee yɛndwenle Keleseɛnezonlenlɛ nwo la ati, ɛnee me nee me diema raalɛ ne kpondɛ kɛ yɛmaa bɛnwu kɛ bɛvo. Yɛbizale bɛ kɛ: “Kɛmɔti a Keleseɛnema sonle Gyisɛse, meanubaka, Mɛle, nee abaaba gyɛne wɔ mekɛ mɔɔ ɔtia Mɛla Bulu ne la ɛ?” Alasevolɛ ne mɔ gyinlanle Ngɛlɛlera ne azo manle yɛnwunle ye kɛ nɔhalɛ Keleseɛnema tendɛ tia abaaba ɛzonlenlɛ na Nyamenle ala a ɔwɔ kɛ yɛ asɔneyɛlɛ dwu ye ɛkɛ a. Ɛhye zinle me nwo.

Akee yɛbizale kɛ: “Na Nsako ne noko ɛ? Saa Gyisɛse le Nyamenle a, kɛzi ɔkola ɔtɛnla azɛlɛ ye azo na alesama ku ye ɛ?” Bieko, bɛvale Baebolo ne bɛbuale na bɛhilehilele nu kɛ Gyisɛse ɛnle Nyamenle yɛɛ ɔ nee Ye ɛnzɛ. Alasevolɛ ne mɔ hilele nu kɛ ɔlua ɛhye ati, bɛnlie Nsako ne bɛnli. Ɔzinle me nwo na menganle kɛ, ‘Keleseɛnema ɛhye mɔ anwo yɛ ɛzulolɛ.’

Noko, ɛnee mekulo kɛ menwu deɛmɔti menli wu nee deɛmɔti Nyamenle maa amaneɛnwunlɛ nwo adenle la. Alasevolɛ ne mɔ vale buluku Knowledge That Leads to Everlasting Life * hilele me. Edwɛkɛtile dɔɔnwo wɔ nu mɔɔ buale me kpuyia ne mɔ a. Bɛbɔle ɔ bo bɛ nee me zukoale Baebolo ne.

Wɔ debiezukoalɛ ko biala anu, menyianle mualɛ kpalɛ mɔɔ gyi Baebolo ne azo la. Menwunle kɛ Nyamenle duma a le Gyihova. (Edwɛndolɛ 83:18) Ɛlɔlɛ le ye subane titile. (1 Dwɔn 4:8) Ɔbɔle menli ɔluakɛ ɔkulo kɛ bɛnyia ngoane ahyɛlɛdeɛ ne bie. Mendele ɔ bo kɛ Nyamenle maa ninyɛndane nwo adenle ɛdeɛ, noko ɔkyi ye kɔkɔ na ɔnrɛhyɛ ɔbaye yeavi ɛkɛ bɔkɔɔ. Menzukoale kɛ Adam nee Yive anzosesebɛ ne a ɛva ngyegyelɛ ɛra alesama anwo zo a. (Wulomuma 5:12) Mɔɔ ɛvi nuhua ɛra mɔɔ yɛ alɔbɔlɛ la ko a le dɔvolɛ bie ewule, mɔɔ le kɛ me papa ɛdeɛ ne la. Noko akee, Nyamenle baye ngyegyelɛ zɛhae avi ɛkɛ wɔ ewiade fofolɛ ne mɔɔ ɛlɛba la anu, na yeadwazo mɔwuamra.—Gyima ne 24:15.

Baebolo nu nɔhalɛ buale me kpuyia ne mɔ. Menyianle Nyamenle anu diedi bieko. Mekɛ mɔɔ menwunle Gyihova Alasevolɛ ne mɔ kpalɛ la, menwunle kɛ bɛle mediema wɔ ewiade amuala. Me nye liele koyɛlɛ nee ɛlɔlɛ mɔɔ wɔ bɛ avinli la anwo. (Dwɔn 13:34, 35) Gyihova anwo debie mɔɔ menzukoale la manle menyianle ɛhulolɛ kɛ mesonle ye, yemɔti menzile kpɔkɛ kɛ mebayɛ Gyihova Alasevolɛ ne mɔ anu ko. Bɛzɔnenle me wɔ January 8, 2005.

Baebolo nu ndelebɛbo hakyile me ɛbɛlabɔlɛ manle ɔyɛle kpalɛ. Ngilenu kpalɛ mɔɔ menwunle ye wɔ Nyamenle Edwɛkɛ ne anu la manle me ahonle dɔle me azule nu. Ewudwazo nwo ɛwɔkɛ mɔɔ wɔ Nyamenle Edwɛkɛ ne anu la maa me nye die na ɔkyekye me rɛle ɔmaa menyia anyelazo kɛ mebanwu me papa bieko.—Dwɔn 5:28, 29.

Me nee me hu Jonathan mɔɔ sulo Nyamenle la ɛdɛnla anyelielɛ nu ɛvolɛ nsia. Yɛzukoale kɛ Nyamenle anwo nɔhalɛ ne abo ɛdelɛ ɛnyɛ se, eza ɔle agyadeɛ mɔɔ sonle bolɛ. Ɛhye ati a yɛ nye die kɛ yɛbaha yɛ diedi nee yɛ anyelazo kɛnlɛma ne anwo edwɛkɛ yɛahile awie mɔ la. Ɛnɛ menwu kɛ Gyihova Alasevolɛ ne mɔ anwo ɛnyɛ “ɛzulolɛ” emomu bɛle nɔhalɛ Keleseɛnema.