Ɛnlie ɛndo nu kɛ saa alesama abusua ne le nzisi a, ɛnee arane biala mɔɔ boka nwolɛ la noko bayɛ nzisi ɔ? Saa ɔle zɔ a, ɛnee tɛ alesama a bahola ava arane mɔɔ nzisi ɛnle nu la ara a. Baebolo ne ka arane ɛhye anwo edwɛkɛ—Nyamenle Belemgbunlililɛ, arane ne mɔɔ Gyisɛse hilele ye ɛdoavolɛma kɛ bɛyɛ nwolɛ asɔne la.—Mateyu 6:9, 10.

Nyamenle Belemgbunlililɛ ne le arane kpalɛ mɔɔ bavi anwuma ali tumi. Ɔbali alesama arane kɔsɔɔti agyakɛ anu. (Edwɛndolɛ 2:8, 9; Yekile 16:14; 19:19-21) Nyilalɛ mɔɔ Belemgbunlililɛ ne bamaa alesama anyia la bie a le kɛ ɔbaye arane nu nzisi yeavi ɛkɛ. Suzu Belemgbunlililɛ ne anu ninyɛne nsia mɔɔ si ɛhye azo adua la anwo nea.

NGYEGYELƐ: Fane dɔɔnwo ne ala, arane nyia ezukoa fi adwule mɔɔ ɔdie ɔfi ye maanlema ɛkɛ la. Mgbanyima bie mɔ anye bolo ezukoa dɔɔnwo ɛhye na bɛwua, bie mɔ noko die ndoloboa fi menli mɔɔ bɛkulo kɛ bɛte bɛ adwule anzɛɛ ezukoa mɔɔ ɔwɔ kɛ bɛtua bɛmaa arane azo la ɛkɛ. Mɔɔ vi nu ba la ɛnle kpalɛ—arane to adwule nu amaa ɔ sa aha mɔɔ ɛminli la, na ɛhye maa nzisi kɔ ɔ nyunlu. Wɔ ɛleka zɛhae, menli mɔɔ di nɔhalɛ la nwu amaneɛ kpalɛ.

YE SƆBELƐ: Nyamenle Belemgbunlililɛ ne tumi ne vi Gyihova Nyamenle mɔɔ le tumivolɛ bedevinli la  ɛkɛ. * (Yekile 11:15) Ɔngyia adwule nwo na yeava yeadua ye gyima nwo kakɛ. Emomu, Nyamenle lɛ “tumi” na ye ahunlunyele bamaa Belemgbunlililɛ ne ava ye maanlema ngyianlɛ kɔsɔɔti amaa bɛ.—Ayezaya 40:26; Edwɛndolɛ 145:16.

NGYEGYELƐ: Susan Rose-Ackerman mɔɔ yɛhanle ɔ nwo edwɛkɛ la ka kɛ saa bɛbɔ mɔdenle bɛadu nzisi bo a “ɔwɔ kɛ mgbanyima ne mɔ a bɔ ɔ bo a.” Arane dɔɔnwo die duma ɛtane wɔ mekɛ mɔɔ bɛlɛbɔ mɔdenle kɛ bɛmaa kpolisima anzɛɛ menli mɔɔ nea ninyɛne mɔɔ ba maanle ne anu agyakyi nzisi, noko bɛgyakyi bɛ mgbanyima bɛmaa bɛyɛ zɔ la. Dasanli tumivolɛ mɔɔ di ɔ nwo eni bɔbɔ la tɔ sinli. Kɛmɔ Baebolo ne ka la, “tenlenenli biala ɛnle azɛlɛ ye azo mɔɔ kpalɛ ngome ala a ɔyɛ” a.—Nolobɔvo ne 7:20.

YE SƆBELƐ: Gyisɛse Kelaese mɔɔ Nyamenle ɛkpa ye kɛ Tumivolɛ wɔ Belemgbunlililɛ ne azo la ɛnle kɛ alesama mɔɔ tɔ sinli la ati, ɛtane ɛngola ɛnzɔ ye ɛnnea. Gyisɛse yɛle ɛhye ɔlua belaebo kpole mɔɔ tɛla biala mɔɔ ɔkpole—“aleɛabo arelemgbunli maanle maanle ne mɔ amuala nee bɛ anyunlunyia.” Abɔnsam mɔɔ sie ewiade ne la bɔle Gyisɛse ɛwɔkɛ kɛ saa ɔsonle ye a ɔbava yeamaa ye. (Mateyu 4:8-10; Dwɔn 14:30) Mekɛ mɔɔ Gyisɛse ɛlɛnwu amaneɛ yeahɔ ewule nu bɔbɔ la, ɛnee yezi pi kɛ ɔgyinla ye munlililɛ nu, ɔlua zo ɔkpole kɛ ɔbanlo ayile mɔɔ ɔnrɛmaa ɔnrɛde nyane noko ɔnrɛmaa ɔnrɛnwu mɔɔ ɛlɛkɔ zo la. (Mateyu 27:34) Kɛkala mɔɔ Nyamenle ɛdwazo ye ɛhɔ anwuma la, Gyisɛse ɛhile kɛ ɔfɛta kɛ ɔdi tumi wɔ Belemgbunlililɛ ne azo.—Felepaema 2:8-11.

NGYEGYELƐ: Maanle dɔɔnwo to ɛra dahuu, mɔɔ menli ne adwenle a le kɛ bɛmaa bɛaye mgbanyima mɔɔ bɛle nzisi la bɛavi zolɛ. Noko, nɔhalɛ ne a le kɛ wɔ maanle mɔɔ bɛnyia anyunluhɔlɛ bɔbɔ la anu, bɛyɛ nzisi wɔ ɛradolɛ nee nwolɛ nolobɔlɛ nu. Kɛmɔ sukoavolɛma boa bɛ wɔ ɛradolɛ nwo nolobɔlɛ yɛɛ ninyɛne gyɛne nu la ati, bɛkola bɛkile menli mɔɔ bɛanyia gyima wɔ arane nu ɛnɛ nee kenlebie la.

Ndɛnebuavolɛ John Paul Stevens mɔɔ wɔ U.S. Kɔɔto Kpole ne anu la hɛlɛle kɛ nyɛleɛ zɛhae “maa bɛnwu kɛ arane ne ɛnyɛ ninyɛne wɔ adenle kpalɛ zo yɛɛ eza ɔmmaa menli ɛnlie arane ne ɛnli.” Ɔnyɛ nwanwane kɛ, menli dɔɔnwo mɔɔ wɔ ewiade amuala la lɛ adwenle kɛ maanyɛlɛ fane ne mɔ a le ngyehyɛleɛ mɔɔ nzisi wɔ nu kpalɛ tɛla biala a.

YE SƆBELƐ: Nyamenle Belemgbunlililɛ ne baye ɛradolɛ nu nzisi yeavi ɛkɛ na ye tumililɛ adɛnla ɛkɛ ne dahuu. (Daneɛle 7:13, 14) Kɛmɔ Nyamenle a ɛkpa Belemgbunli ne la ati, bɛnrɛdo ma na bɛava ye  bɛazie zolɛ yɛɛ bɛnrɛdu ye bɛnrɛvi zolɛ. Kɛmɔ ɔwɔ ɛkɛ ne dahuu la ati, ninyɛne mɔɔ ɔbayɛ la baboa ye menli ne dahuu.

NGYEGYELƐ: Mɔlebɛbo ne, bie a bɛbadwenle kɛ saa bɛyɛ mɛla fofolɛ a ɔbaboa. Noko akee, nwomama ɛnwu ye kɛ fane dɔɔnwo ne ala mɛla so a, ɔbuke adenle ɔmaa nzisi kɔ ɔ nyunlu. Bieko, mɛla fɔɔnwo mɔɔ bɛyɛ kɛ bɛfa bɛade nzisi zo la maa bɛbɔ kakɛ dɔɔnwo noko debie kpalɛ biala ɛnvi nu ɛmba.

YE SƆBELƐ: Nyamenle Belemgbunlililɛ ne mɛla le kpalɛ tɛla alesama arane ɛdeɛ ne kolaa. Neazo ɛne, kɛ anrɛɛ Gyisɛse bayɛ mɛla dɔɔnwo la, ɔvale Mɛla Kpalɛ ne ɔmanle. Ɔse: “Zɔhane ati mɔɔ bɛkpondɛ kɛ menli yɛ maa bɛ la, bɛdabɛ noko bɛyɛ zɔhane ala bɛmaa bɛ.” (Mateyu 7:12) Bie a mɔɔ hyia titile la, Belemgbunlililɛ mɛla ne twe adwenle kɔ nzuzulɛ nee nyɛleɛ zo. Gyisɛse hanle kɛ, “Kulo ɛ gɔnwo kɛ ɛdawɔ ɛ nwo la.” (Mateyu 22:39) Nɔhalɛ nu, Nyamenle mɔɔ nwu ahonle nu la kola yɛ ye kyengye kɛ yɛli mɛla zɛhae azo.—1 Samoɛle 16:7.

NGYEGYELƐ: Tumi mɔɔ maa bɛsisi awie mɔ la a le anyebolo nee angomedi. Ɔyɛ a, arane mgbanyima nee maanlema da subane ɛtane ɛhye mɔ ali. Mɔɔ fane sotɔɔ kpole ne mɔɔ bule guale wɔ Seoul mɔɔ yɛlumua yɛha nwolɛ edwɛkɛ la anwo, gyimayɛvoma ne mɔ wulale arane mgbanyima ne mɔ asa abo mɔɔ ɛnee bɛze kɛ saa bɛmaa bɛ ezukoa ɛhye a, ɔnrɛmaa bɛnrɛva sua nwo ninyɛne mɔɔ bɛ awolɛ yɛ se la bɛnrɛzi sua ne.

Amaa bɛaye nzisi bavi ɛkɛ ne la, ɔwɔ kɛ bɛkilehile menli bɛmaa bɛdi nzuzulɛ mɔɔ ɛzɔ ndinli wɔ bɛ nu mɔɔ bie a le anyebolo nee angomedi la azo konim. Noko, sonla arane ɛnlɛ ɛhulolɛ nee anwosesebɛ mɔɔ bɛfa bɛayɛ ngyehyɛleɛ bɛahilehile bɛ a.

YE SƆBELƐ: Nyamenle Belemgbunlililɛ ne ɛbɔ ɔ bo ɛlɛkilehile menli kɛzi bɛbali nzisi nee mɔɔ nzuzulɛ  ɛtane fa ba azo konim. * Ngilehile ɛhye boa maa “bɛyɛ bɛ fofolɛ wɔ tumi ne mɔɔ kile bɛ adwenle adenle la anu.” (Ɛfɛsɛsema 4:23, NW) Bɛsukoa kɛ bɛbava ahunlundwolɛ nee awie mɔ boɛyɛlɛ bɛazie anyebolo nee angomedi agyakɛ anu.—Felepaema 2:4; 1 Temɔte 6:6.

NGYEGYELƐ: Ɛleka bɔbɔ mɔɔ menli sukoa ɛbɛla kpalɛ ɛbɔlɛ nwo debie la, bie mɔ kpa kɛ bɛnrɛli nɔhalɛ na bɛyɛ nzisi. Nwomama die to nu kɛ, ɛhye ati a sonla arane ɛngola ɛndu nzisi bo la. Bɛbahola bɛade kɛzi nzisi bahola azɛkye ninyɛne ndɛndɛ la azo.

YE SƆBELƐ: United Nations Mɛla Mɔɔ Tia Nzisi la ka kɛ amaa bɛadu nzisi bo la, ɔwɔ kɛ arane ngakyile ne mɔ maa “nɔhalɛlilɛ, ɛbɛla kpalɛ, nee ɛzonlelilɛ” kyia bɛ. Ɛhye le bodane kpalɛ ɛdeɛ, noko Nyamenle Belemgbunlililɛ ne maa ye maanlema anwosesebɛ maa bɛda subane ɛhye mɔ ali. Baebolo ne ka kɛ menli mɔɔ le “anyebolo” nee “adalɛma” ɛnrɛnyia Belemgbunlililɛ ne.—1 Kɔlentema 6:9-11; Yekile 21:8.

Menli kola sukoa ɛbɛlabɔlɛ ngyinlazo kpalɛ ɛhye na bɛdi zo, kɛmɔ alumua Keleseɛnema yɛle la. Kɛ neazo la, mekɛ mɔɔ ɛdoavolɛ bie mɔɔ bɛfɛlɛ ye Saemɔn bɔle mɔdenle kɛ ɔtɔ sunsum nwuanzanwuanza ne yeavi ɛzoanvolɛma ne ɛkɛ la, bɛkpole belaebo ne na bɛzele ye kɛ: “Nu ɛ nwo wɔ wɔ amumuyɛ adwenle ɛhye anwo.” Mɔɔ Saemɔn nwunle esiane mɔɔ wɔ ye adwenle ɛtane ne anwo la, ɔzele ɛzoanvolɛ ne mɔ kɛ bɛzɛlɛ bɛmaa ye amaa yeali zolɛ konim.—Gyima ne 8:18-24.

Ɔnva nwo maanle mɔɔ ɛvi nu la, ɛlɛ adenle ɛboka Nyamenle Belemgbunlililɛ maanlema ne anwo. (Gyima ne 10:34, 35) Ngilehilelɛ nwo ngyehyɛleɛ mɔɔ Belemgbunlililɛ ne ɛyɛ wɔ ewiade amuala kɛkala la bamaa wɔanwu kɛzi ɛbayɛ ye la. Gyihova Alasevolɛ anye balie kɛ bɛ nee wɔ bayɛ ngyehyɛleɛ azukoa Baebolo ne wɔ sua nu mɔɔ kɛyɛ mitini bulu dapɛne biala. Ninyɛne mɔɔ ɛbazukoa la bie mɔ a le “Edwɛkpa ne mɔɔ fane Nyamenle Belemgbunlililɛ ne anwo” mɔɔ badu arane nu nzisi bo la. (Luku 4:43) Yɛsɛlɛ wɔ nwu Alasevolɛ mɔɔ wɔ bɛ ɛkɛ ne la anzɛɛ kɔ yɛ Intanɛte gyimalilɛleka, jw.org/nzi azo.