DWOSEFI lua awozinli nu wɔ anuhɔlɛ ɛkɛ na ɛhɛlɛnra ɛlɛte ye ɔlua gyima mɔɔ yeyɛ wɔ ewia mɔɔ ɛlɛbɔ katekate anu la ati. Wɔ alie ne anwo, ewia mɔɔ ɛlɛbɔ Yigyibiti la ɛmaa efiade ɛkɛ ne ɛyɛ wuluwulu kɛ fonlomo nu. Ɔzɔho kɛ asɛɛ ɔze belekese mɔɔ wɔ ɛleka biala yɛɛ bane biala mɔɔ nwolɛ ɛkpuke la. Ɛnee ye ewiade ne amuala ɛne. Nɔhalɛ nu, ɛnee bɛbu ye kpalɛ wɔ ɛkɛ. Noko akee, ɛnee ɔle pilizanli.

Nea kɛzi ɔbayɛ kɛ ɛnee ɔta ɔdwenle ye ɛbɛlabɔlɛ wɔ Hibulɔn mɔɔ awoka dɔɔnwo wɔ zo, ɛleka mɔɔ ɛnee ɔnea ye papa mboane ne mɔ la anwo a! Ɔbayɛ kɛ ɛnee yeli 17 wɔ mekɛ mɔɔ ye papa, Gyekɔbo, zoanle ye manle ɔpɛle mayɛlɛ dɔɔnwo la. Kɛkala, ɔnlɛ zɔhane fanwodi ne bieko. Dwosefi amediema anyebolo ne mɔ nyianle ɔ nwo ɛkpɔlɛ kɛ bɛku ye na akee bɛdɔne ye kɛ kanranli. Bɛvale ye bɛhɔle Yigyibiti, ɛleka mɔɔ ɔlumuale ɔzonlenle wɔ Yigyibitima kpanyinli Pɔtefaa sua nu la. Ɛnee Pɔtefaa die Dwosefi di kɔkpula kɛ ɔ ye ne dole ye ɛzonle kɛ yedo ye bɔna mɔɔ manle bɛdole ye efiade wɔ ɛke la. *​—Mɔlebɛbo, tile 37, 39.

Kɛkala Dwosefi ɛli ɛvolɛ 28, na yeva ɛvolɛ kɛyɛ bulu yezonle kɛ kanranli na ɔtɛda efiade. Yɛbaha a, ye asetɛnla ne anyɛ kɛmɔ ɛnee ɔsuzu la. Asoo bɛbagyakyi ye bɔkɔɔ? Asoo ɔbanwu ye papa mɔɔ ɔkulo ye la bieko anzɛɛ ɔ diema kakula Bɛngyaman mɔɔ ɔkulo ye la ɔ? Ɔtɛnla ɛkɛ ne yeahɔdwu kenlenzu?

Asoo wɔde Dwosefi nganeɛ ne bie ɛlɛ ɔ? Ɔyɛ a, asetɛnla ne yɛ ngakyile fi mɔɔ yɛ nye la zo wɔ yɛ ngakula nu la anwo. Nɔhalɛ nu, nyanenwunlɛ bie kola kɔ zo mekɛ tendenle mɔɔ ɔbahola yeayɛ se kɛ yɛbanyia ye sɔbelɛ anzɛɛ yɛbagyinla ɔ nloa a. Maa yɛnlea mɔɔ yɛbahola yɛazukoa yɛavi Dwosefi diedi ne anu la.

Ɛnee Dwosefi ze kɛ ye Nyamenle, Gyihova, arɛle ɛnrɛvi ye ɛlɛ, na ɛhye a boale ye manle ɔgyinlanle kpundii a. Dwosefi la efiade wɔ maanle gyɛne zo ɛdeɛ, noko Gyihova luale ndenle ngakyile zo yilale ye. Yemɔti yɛkenga kɛ: “Na ɛnee [Gyihova] nee Dwosefi lua. Ɔhilele ɛhulolɛ dɔɔnwo wɔ ɔ nwo, na ɔmanle ɔzɔle nrenya ne mɔɔ nea pilizama ne mɔ anwo zo la anye.” (Mɔlebɛbo 39:21-23) Mekɛ mɔɔ Dwosefi ɛlɛyɛ gyima ɛsesebɛ la, ɔmanle ye Nyamenle ne nyianle debie gyinlanle zo yilale ye. Nea kɛzi ɔ rɛle kyekyele wɔ mekɛ mɔɔ ɔnwunle kɛ Gyihova nee ye lua dahuu la!

Asoo ɛnee ɔwɔ Gyihova adwenle nu kɛ ɔmaa Dwosefi aha efiade ne bɔkɔɔ? Dwosefi ala a bahola aye ɔ nloa a, na amgba ɔvale edwɛkɛ ne ɔdole Nyamenle anyunlu wɔ nzɛlɛlɛ nu. Kɛmɔ ɔta ɔsi la, mualɛ ne rale wɔ adenle mɔɔ ɛnee ɔ nye ɛnla la azo. Kenle ko bie, mgbonde dɔle efiade ne wɔ mekɛ mɔɔ menli fofolɛ nwiɔ bie mɔɔ bɛle Falo mgbanyima rale la. Ko to belemgbunli ne paano; ko noko su ye nza.​—Mɔlebɛbo 40:1-3.

Sinzavolɛ kpanyinli ne vale mrenya nwiɔ ɛhye mɔɔ ɛnee lɛ dibilɛ la wulale Dwosefi asa nu kɛ  ɔnlea bɛ. * Kenle ko nɔɔzo bɛ mu nwiɔ bɛhanle ɛlalɛ mɔɔ anu la ɛkɛ na ɔyɛ azibɛnwo. Mɔɔ Dwosefi nwunle bɛ nwonlomɔ ne la, ɛnee ɔkola ɔnwu kɛ debie ɛngɔ ye boɛ. Yemɔti ɔbizale kɛ: “Duzu ati a ɛnɛ bɛ nyunlu ɛdo zɛhae a?” (Mɔlebɛbo 40:3-7) Bie a atiakunlukɛnlɛma mɔɔ ɔlale ye ali la manle mrenya ne mɔ nwunle kɛ ɔle kpalɛ kɛ bɛbaha bɛ ngyegyelɛ ne bahile ye. Ɛnee Dwosefi ɛnze nwolɛ ɛhwee, noko zɔhane adwelie ne bamaa nzenzaleɛ kpole ara ye ɛbɛlabɔlɛ nu. Saa Dwosefi anla atiakunlukɛnlɛma ali angile mrenya nwiɔ ne a, anrɛɛ bie a ɔ nee bɛ anli adwelie ne. Ye kpɔkɛzilɛ ne bɛaha yɛ yeamaa yɛabiza yɛ nwo kɛ, ‘Asoo meda me diedi mɔɔ melɛ ye wɔ Nyamenle anu la ali ɔlua menli mɔɔ mekile bɛ nwo anyelielɛ la azo ɔ?’

Mrenya nwiɔ ne hilele nu kɛ bɛ ɛlalɛ ne mɔɔ anu la ɛkɛ na ɔyɛ azibɛnwo la manle bɛ rɛle bɔle​—na ɛnee bɛnlɛ awie mɔɔ bahile ɔ bo yeahile bɛ a. Yigyibitima anye die ɛlalɛ ɛhanlɛ nwo kpalɛ na ɛnee bɛfa bɛ nwo bɛto mrenya mɔɔ kola kile ɔ bo la anwo zo kpalɛ. Ɛnee mrenya nwiɔ ne ɛnze ye kɛ ɛlalɛ ne mɔɔ bɛhanle la vi Gyihova, Dwosefi Nyamenle ne ɛkɛ. Noko ɛnee Dwosefi ze. Ɔkyekyele bɛ rɛle kɛ: ‘Asoo tɛ Nyamenle a kile ɛlalɛ bo a? Mebodo bɛ, bɛha bɛ ɛlalɛ ne mɔ bɛhile me.’ (Mɔlebɛbo 40:8) Dwosefi edwɛkɛ ne anwo hyia maa Baebolo sukoavoma mɔɔ bɛlɛ ahonle kpalɛ la kɔsɔɔti ɛnɛ. Ɔwɔ kɛ awie biala mɔɔ kɔ asɔne la da mɛlɛbɛnwoaze ko ne ala bie ali! Ɔhyia kɛ yɛnyia ɛhulolɛ kɛ yɛbaye anwomemaazo subane yɛavi yɛ nu na yɛfa yɛ nwo yɛto Nyamenle anwo zo amaa yɛade ye edwɛkɛ ne abo kpalɛ.​—1 Tɛsalonaekama 2:13; Gyemise 4:6.

Mɔɔ su nza ne la a lumuale hanle a. Ɔhanle ɛlalɛ bie mɔɔ fane vanye baka ngane nsa mɔɔ ɛzo ma la ɔhilele Dwosefi. Ma ne bolole, na ɔhwihwinle nuhua nzule ne ɔguale Falo kɔpo ne anu. Ɔlua Gyihova moalɛ zo, Dwosefi nwunle mɔɔ ɛlalɛ ne abo kile la ndɛndɛ. Ɔzele nzasuvolɛ ne kɛ baka ngane nsa ne kile kenle nsa; zɔhane mekɛ ne, Falo bava nzasuvolɛ ne azie ye gyinlabelɛ ne bieko. Mekɛ mɔɔ nzasuvolɛ ne ahonle ɛdɔ ye azule nu la, Dwosefi bodole ye kɛ: “Yɛ boɛ ɛhye maa me. Mebodo wɔ, bɔ me duma kile [Falo] belemgbunli ne.” Dwosefi hilele nu kɛ bɛwuale ye bɛvile ye sua zo na ɔtɛyɛle ɛhwee yɛɛ bɛdo ye efiade a.​—Mɔlebɛbo 40:9-15.

Amaneɛ fɛlɛko ne mɔɔ nzasuvolɛ ne dele la manle paanotovolɛ ne nyianle anwosesebɛ bizale Dwosefi mɔɔ ye ɛlalɛ ne abo kile la. Wɔ ye ɛlalɛ ne anu, ɔnwunle kɛ ɔzo keeki ahɛndɛne nsa wɔ ɔ ti zo yɛɛ nloma ɛlɛsuso ko anu ɛdeɛ ne. Dwosefi nyianle ɛhye noko anwo mualɛ. Noko ɛnee ɔnle edwɛkɛ kpalɛ ɔmaa paanotovolɛ ne. Dwosefi hanle kɛ: “Wɔ ɛlalɛ ne abo ɛne: ahɛndɛne nsa ne kile kenle nsa.  Ɛnɛ anwo zo kenle nsa belemgbunli ne bamaa bɛaraye ɛ ti ne bɛavi zolɛ. Bɛbahenda wɔ baka zo, na nloma bali wɔ nwonane ne.” (Mɔlebɛbo 40:16-19) Kɛmɔ Nyamenle nɔhalɛ azonvolɛ kɔsɔɔti yɛ ye la, Dwosefi vale akɛnrasesebɛ hanle Nyamenle edwɛkɛ ne, mɔɔ le edwɛkpa ne nee ndɛnebualɛ mɔɔ ɛlɛba la.​—Ayezaya 61:2.

Ye kenle nsa anzi, Dwosefi edwɛkɛ ne rale nu. Falo lile ye awolɛkenle​—nyɛleɛ mɔɔ ɛnee Nyamenle menli ɛnyɛ wɔ Baebolo mekɛ zo​—na ɔbuale ye azonvolɛ nwiɔ ne ndɛne. Bɛhunle paanotovolɛ ne, kɛmɔ Dwosefi hanle la, noko bɛvale mɔɔ su nza ne la bɛziele ye dibilɛ ne bieko. Ɔyɛ alɔbɔlɛ kɛ, nrenya ɛhye mɔɔ bu ɔ nye gua debie zo la arɛle vile Dwosefi bɔkɔɔ.​—Mɔlebɛbo 40:20-23.

Ɛvolɛ nwiɔ pɛle nu. (Mɔlebɛbo 41:1) Dwenle kɛzi ɔbayɛ kɛ Dwosefi arɛle bɔle la anwo nea! Bie a ye anyelazo yɛle kpole wɔ mekɛ mɔɔ Gyihova manle ɔdele nzasuvolɛ nee paanotovolɛ ne ɛlalɛ ne mɔɔ ɔ bo ɛdelɛ yɛ se abo la. Yemɔ anzi, alehyenlɛ biala, bie a Dwosefi nyia anyelazo kɛ bɛbaye ye zɔhane kenle ne​—mɔɔ ɔnwu ye ala a le kɛ dahuu ɔtɛbɔ efiade ɛkɛ, bɛnye ye. Ɔbayɛ kɛ zɔhane ɛvolɛ nwiɔ ne yɛle se kpalɛ manle Dwosefi kɛ ɔbagyinla ɔ nloa. Noko, yeamaa anwodozo mɔɔ ɔlɛ wɔ Gyihova, ye Nyamenle ne anu la anga aze ɛlɛ. Kɛ anrɛɛ ɔbamaa ɔ sa nu ado la, ɛnee yezi pi kɛ ɔgyinla kpundii, na ɔnyianle anwosesebɛ kpalɛ wɔ mekɛ ɛsesebɛ ɛhye kɔsɔɔti anu.​—Gyemise 1:4.

Mekɛ ɛhye mɔɔ anu yɛ se la, yɛ nuhua boni a ɔngyia kɛ ɔgyinla kpundii a? Amaa yɛagyinla asetɛnla nu ngyegyelɛ mɔɔ nuhua ɛlɛyɛ se anloa la, ɔhyia kɛ yɛnyia abotane, yɛsi pi na yɛnyia anzondwolɛ ne mɔɔ Nyamenle ala a fa maa la. Kɛmɔ ɔyɛle ɔmanle Dwosefi la, ɔkola ɔboa yɛ ɔmaa yɛgyinla abɛnubulɛ nloa na yɛsɔ yɛ anyelazo ne anu.​—Wulomuma 12:12; 15:13.

Bie a nzasuvolɛ ne arɛle vile Dwosefi, noko Gyihova anyɛ zɔ. Kenle ko nɔɔzo, ɔmanle Falo hanle ɛlalɛ ngakyile nwiɔ mɔɔ ɔ rɛle ɛnrɛvi ye ɛlɛ a. Mɔɔ lumua la anu, belemgbunli ne nwunle nlankɛ ngɛnlɛma dɔlera nsuu mɔɔ vi Azule Naele ne anu ɛlɛfinde, yɛɛ nlankɛ nwanlera, kengamgbaanwo nsuu doa bɛ. Nwanlera ne mɔ hyele dɔlera ne mɔ lile. Nzinlii, Falo hanle ɛlalɛ kɛ yenwu kɛ abɛlɛ mgbole nsuu ɛwɔlɔwɔlɔ abɛlɛ baka ko anwo. Noko yeangyɛ biala abɛlɛ mbaka ɛtane nee agyendo nsuu wɔlɔwɔlɔle na ɔmemenle mbaka mgbole ne. Aleɛ hyenle la, Falo dwazole mɔɔ ɛnee ye adwenle ɛzɛkye wɔ ɛlalɛ ne anwo, yemɔti ɔvɛlɛle ye nrɛlɛbɛvolɛma nee ngonyia ɛsɔfoma kɔsɔɔti kɛ bɛhile ɔ bo. Biala angola. (Mɔlebɛbo 41:1-8) Saa ɛhye kile kɛ ɔyɛle bɛ azibɛnwo anzɛɛ bɛhilele ɔ bo wɔ adenle ngakyile zo mɔɔ kye adwenle la a, yɛnze. Mɔɔ ɔde la a le kɛ, Falo anwo vɔle​—noko ɛnee ɔ nye ɛbolo kɛ ɔbanwu mɔɔ ɛlalɛ ɛhye abo kile la.

Awieleɛ bɔkɔɔ ne, nzasuvolɛ ne hakyele Dwosefi! Ɛnee ɔgyegye ye, na ɔhanle kpavolɛ ne mɔɔ ɛvolɛ nwiɔ mɔɔ ɛze la hilele ye ɛlalɛ ne nee paanotovolɛ ɛdeɛ ne abo kpalɛ la anwo edwɛkɛ ɔhilele Falo. Ɛkɛ ne ala, Falo manle bɛyele Dwosefi bɛvile efiade.​—Mɔlebɛbo 41:9-13.

Dwenle kɛzi Dwosefi bade nganeɛ kɛ Falo ɛzoa ye soanvolɛma nee alehelɛ ɛmaa bɛra ɔ nwo ɛkɛ la anwo nea. Ɔhakyile ye tɛladeɛ ne na ɔkpale ye enrinli​—bie a bɛkpale ɔ ti zo enrinli ne amuala, ɔluakɛ kɛ ɛnee Yigyibitima amaamuo ne de la ɛne. Ɔda ali kɛ, ɔyɛle asɔne ɛsesebɛ kɛ Gyihova bayila ye wɔ ayia ɛhye anwo! Yeangyɛ, ɛnee ɔwɔ belemgbunli mɔɔ le sukoavolɛ la sua nu, ɔgyi belemgbunli ne anyunlu. Yɛkenga kɛ: “[Falo] zele Dwosefi kɛ: ‘Meha ɛlalɛ bie, na awie biala ɛnle ɛkɛ mɔɔ kola kile ɔ bo a. Na mede noko kɛ wɔmɔ, saa bɛka ɛlalɛ bɛkile wɔ a ɛkile ɔ bo.’” Bieko, Dwosefi mualɛ ne manle ye mɛlɛbɛnwoaze nee ye diedi mɔɔ ɔlɛ wɔ Nyamenle anu la lale ali: “Medame me ngome mengola. Nyamenle yɛɛ bahile ɔ bo ahile Nana a.”​—Mɔlebɛbo 41:14-16.

Gyihova kulo menli mɔɔ bɛlɛ bɛ nwo aze na bɛdi nɔhalɛ la, yemɔti ɔnyɛ nwanwane kɛ ɔmanle Dwosefi nyianle mualɛ ne mɔɔ nrɛlɛbɛvolɛma nee ɛsɔfoma annwu ye la. Dwosefi hilele nu kɛ Falo ɛlalɛ nwiɔ ne kile debie ko. Gyihova luale edwɛkɛ ne mɔɔ ɔhanle ye fane nwiɔ la azo hilele kɛ yebɔ edwɛkɛ ne ‘kpɔkɛ yewie’​—ɔbara nu bɔkɔɔ. Nlankɛ mgbole nee abɛlɛ mbaka mgbole ne kile kɛ aleɛ babu wɔ Yigyibiti ɛvolɛ nsuu, yɛɛ nlankɛ nwanlera  nee abɛlɛ mbaka ɛtane ne kile ɛvolɛ nsuu mɔɔ ɛhɔne kpole kpalɛ bara la. Ɛhɔne zɔhane bamaa azɛlɛ ne azo aleɛ awie.​—Mɔlebɛbo 41:25-32.

Ɛnee Falo ze kɛ Dwosefi ɛhile ɛlalɛ ne abo kpalɛ. Noko duzu a bɛbayɛ a? Dwosefi manle bɛ nzuzulɛ bie. Ɛnee ɔhyia kɛ Falo kpondɛ nrenya mɔɔ “ɔ nye gyi ɔ ti anwo na ɔze nrɛlɛbɛ la” amaa yeanlea yeamaa bɛaboɔboa aleɛ mɔɔ bɛbanyia ye wɔ ɛvolɛ nsuu ne mɔɔ aleɛ babu wɔ azɛlɛ ne azo la anloa. Na akee bɛava bɛamaa menli mɔɔ ɛhyia la wɔ ɛhɔne mekɛ ne anu. (Mɔlebɛbo 41:33-36) Ɛnee Dwosefi anwubielɛ nee ye nrɛlɛbɛ maa ɔfɛta ɔ bo zo, noko yeanga kɛ bɛkpa ye. Ye mɛlɛbɛnwoaze ɛnrɛmaa ɔnrɛmemaa ɔ nwo zo; ye diedi ɛmmaa ye adenle kɛ ɔyɛ zɔ. Saa yɛlɛ Gyihova anu diedi kpalɛ a, ɔngyia kɛ yɛpele dibilɛ anzɛɛ yɛbu yɛ nwo somaa. Saa yɛgyakyi edwɛkɛ ne yɛmaa ɔdi nwolɛ gyima a, yɛ nzo nu bahola adwo yɛ!

Falo nee ye azonvolɛ kɔsɔɔti nwunle nrɛlɛbɛ mɔɔ wɔ Dwosefi nzuzulɛ ne anu la. Eza belemgbunli ne nwunle kɛ Dwosefi Nyamenle ne a manle Dwosefi hanle nrɛlɛbɛ edwɛkɛ ne a. Ɔhanle ɔhilele ye azonvolɛ mɔɔ wɔ belemgbunli sua nu ɛkɛ la kɛ: “Bɛnea a awie bie wɔ ɛkɛ tɛla ɛhye mɔɔ Nyamenle Sunsum ne wɔ ye nu la ɔ?” Ɔhanle ɔhilele Dwosefi kɛ: “Kɛmɔ Nyamenle ɛye ɛhye mɔ amuala ɛhile wɔ la, awie ɛnle ɛkɛ mɔɔ anye gyi ɔ ti anwo na ɔze nrɛlɛbɛ kɛ ɛdawɔ la. Ɛbanlea me sua nu ɛke, na me menli ne amuala bayɛ tieyɛ amaa wɔ. Debie mɔɔ mefa metɛla wɔ la a le me belemgbunli ebia ne mɔɔ mede zolɛ la.”​—Mɔlebɛbo 41:38-41.

Falo lile ye ɛwɔkɛ zo. Yeangyɛ, bɛvale tɛladeɛ kɛnlɛma bɛwulale Dwosefi. Falo manle ye nvutuke ndweabane, kpɔdelera, belemgbunli konle ehwili, nee tumi kɛ ɔhɔ azɛlɛ ne amuala azo na ɔyɛ mɔɔ yeha la. (Mɔlebɛbo 41:42-44) Kenle ko demua ne, Dwosefi vile efiade rale belemgbunli sua nu. Ɔdwazole la ɛnee ɔle pilizanli, noko ɔkala la ɛnee ɛye Falo a ɔdaye a ɔwɔ ɛkɛ a. Nea kɛzi ɔda ali kɛ ɛnee Dwosefi lɛ Gyihova Nyamenle anu diedi la! Gyihova nwunle amaneɛ mɔɔ ye sonvolɛ ɛhye ɛhɔ nu wɔ ɛvolɛ dɔɔnwo anu la. Ɔlile tɛnlabelɛ ne anwo gyima wɔ mekɛ kpalɛ nu nee adenle kpalɛ zo. Ɛnee ɔwɔ Gyihova adwenle nu kɛ ɔdie Dwosefi yeavi mɔɔ yehɔ nu la anu na eza yeabɔ kenlebie Yizilayɛ maanle ne anwo bane. Yɛbanwu kɛzi ɛhye le zɔ wɔ edwɛkɛ mɔɔ bara kenlebie la anu.

Saa ɛyia tɛnlabelɛ mɔɔ anu yɛ se, bie a nzisi mɔɔ ɔ bo ɛmpɛ ɛlɛ a, mmamaa wɔ abɛ nu bu. Kakye Dwosefi. Ɔluakɛ yeammaa ye atiakunlukɛnlɛma, ye mɛlɛbɛnwoaze, ye kpundiigyinlanlɛ nee ye diedi anga aze ɛlɛ la ati, ɔmanle Gyihova nyianle debie gyinlanle zo na ɔyilale ye wɔ awieleɛ ne.