Dwenle kɛzi arane kokye bahola aboa alesama la anwo nea. Ɛnɛ menli dɔɔnwo nwu amaneɛ ɔluakɛ bɛle ehyiavolɛma, yɛɛ bie mɔ ɛnyia bɛ nwo. Noko arane mɔɔ te menli ngyianlɛ bo la banlea kɛ bɛ kɔsɔɔti bɛbanyia mɔɔ bɛhyia nwo la. Ɛsuzu kɛ sonla a bava arane zɛhae ara ɔ?​—Kenga Gyɛlɛmaya 10:23.

Ɔvi tete ne amuala, arane ngakyile ne mɔ angola annea bɛ maanlema, titile ehyiavolɛma. Arane bie mɔ ati yɛ se. (Nolobɔvo ne 4:1; 8:9) Noko Tumivolɛ Bedevinli Nyamenle ɛbɔ ɛwɔkɛ kɛ ɔbava arane mɔɔ bagyinla bɛ kɔsɔɔti agyakɛ anu la yeara. Zolɛ Belemgbunli ne banlea menli ne boɛ.​—Kenga Ayezaya 11:4; Daneɛle 2:44.

Gyihova Nyamenle ɛkpa ewiade Belemgbunli mɔɔ fɛta​—ɔ Ra, Gyisɛse. (Luku 1:31-33) Mekɛ mɔɔ ɛnee Gyisɛse wɔ azɛlɛ ye azo la, ɛnee ɔ nye die kɛ ɔbaboa menli. Kɛmɔ ɔle Belemgbunli la ati, ɔbaha menli mɔɔ wɔ maanle kɔsɔɔti anu la yeabɔ nu na yeamaa bɛ nwo adɔ bɛ bɔkɔɔ.​—Kenga Edwɛndolɛ 72:8, 12-14.

Asoo awie biala a balie Gyisɛse ado nu kɛ ɔle Belemgbunli a? Kyɛkyɛ. Noko Gyihova lɛ abotane. (2 Pita 3:9) Ɔlɛmaa menli anyia adenle alie Gyisɛse ado nu kɛ bɛ Belemgbunli. Ɔnrɛhyɛ, Gyisɛse baye ɛtanevolɛma avi azɛlɛ ne azo na yeava anzondwolɛ nee banebɔlɛ yeara ewiade amuala.​—Kenga Maeka 4:3, 4.