Ɛnɛ menli dɔɔnwo ɛngulo kɛ bɛkɛyɛ gyima, kɛmɔ Alex edwɛkɛ ne kile la. Aaron mɔɔ yɛ kale boɛ la hanle kɛ, “Menli dɔɔnwo dwenle kɛ bɛbo gyima mɔɔ ‘bɛmbu ye bie’ la ɛyɛlɛ zo. Bɛ subane a le kɛ: ‘Meyɛ ɛhye bie zɔ kɔkpula kɛ mebanyia gyima kpalɛ la.’”

Duzu ati a menli dɔɔnwo te nganeɛ kɛ ɔnle kɛ bɛyɛ gyima ɛsesebɛ a? Bie a bɛmaa adwelie kɛlɛvoma mɔɔ ta ka kɛ asetɛnla “kpalɛ” a le kɛ ɛ nye balie na ɛ nwo adɔ wɔ la di bɛ adwenle. Matthew mɔɔ yɛ ninyɛne mɔɔ ɛzɛkye la boɛ la hanle kɛ, “Menli dwenle kɛ ɛyɛ gyima ɛsesebɛ bɔbɔ ala a ɛnee ɛgyi ɛ gyakɛ anu.” Shane mɔɔ ɔsiezie azua nu la noko ɛyɛ ɛhye nzonlɛ. Ɔse: “Menli ɛngulo kɛ bɛfa kenle ne amuala bɛyɛ gyima amaa bɛ sa aha bɛ ahatualɛ ne amuala.”

Noko akee, menli dɔɔnwo mɔɔ de boɛ la kulo gyima ɛsesebɛ ɛyɛlɛ. Daniel mɔɔ ɛli ɛvolɛ 25 mɔɔ si sua la ka kɛ, “Menea a nvasoɛ wɔ gyima ɛsesebɛ zo, titile saa ɔgyi bodane kpalɛ zo a.” Andre, mɔɔ ɛli 23 la nee ye yɛ adwenle. Ɔse, “Medie medi kɛ gyimayɛlɛ a maa yɛ nye die a. Saa yɛanyɛ gyima kpalɛ a ɔmmaa yɛ nye ɛnlie​—ɔmaa ɔfonle yɛ ala!”

Kɛ ɔyɛle mɔɔ Daniel nee Andre ɛnyia gyimayɛlɛ nwo adwenle kpalɛ ɛ? Ye sikalɛ a le kɛ, bɛva Baebolo ngyinlazo bɛli gyima wɔ bɛ ɛbɛlabɔlɛ nu. Baebolo ne ɛnga kɛ yɛmmayɛ gyima emomu ɔsi yɛ adua kɛ yɛyele yɛ nwo yɛyɛ gyima ɛsesebɛ. Noko tɛ gyima ala a Baebolo ne se yɛyɛ a. Eza ɔkile kɛzi yɛ nye balie yɛ gyima nwo la.

Baebolo ngyinlazo boni a bahola aboa wɔ yeamaa ɛ kunlu adwo wɔ gyima nwo ɛ? Yɛsɛlɛ wɔ suzu nuhua ekyi anwo, kɛmɔ bɛha ye wɔ edwɛkɛ mɔɔ doa zo anu la.