Gyisɛse ewule ne a anwo hyia kpalɛ wɔ tetedwɛkɛ nu a, ɔwule ɔliele alesama ngoane. Bɛambɔ sonla kɛ ɔyɛ ninyɛndane, ɔ nwo ɛdo ye, anzɛɛ ɔwu. (Mɔlebɛbo 1:31) Noko ɔlua nrenya mɔɔ lumua, Adam anwo zo yɛɛ ɛtane rale ewiade a. Gyisɛse wule amaa yealie yɛ yeavi ɛtane nee ewule nu.—Kenga Mateyu 20:28; Wulomuma 6:23.

Nyamenle lale ɛlɔlɛ mɔɔ tɛla biala la ali ɔlua ɔ Ra ne mɔɔ ɔzoanle ye wɔ azɛlɛ ye azo kɛ ɔrawu ɔmaa yɛ la azo. (1 Dwɔn 4:9, 10) Gyisɛse zele ye ɛdoavolɛma kɛ bɛhakye ye ewule ne ɔlua ɛvoyia sikalɛ bie mɔɔ bɛbava paano nee nwanye bayɛ la azo. Yɛyɛ ɛhye ɛvolɛ biala yɛfa yɛkile anyezɔlɛ wɔ ɛlɔlɛ mɔɔ Nyamenle nee Gyisɛse ɛla ye ali ɛhile yɛ la anwo.—Kenga Luku 22:19, 20.

Mekɛ mɔɔ lumua mɔɔ Gyisɛse zele ye ɛdoavolɛma kɛ bɛhakye ye ewule ne la, ɛnee ɔlɛka ngyekyeleɛ, anzɛɛ ngyehyɛleɛ nwo edwɛkɛ. (Mateyu 26:26-28) Ɔmanle menli ekyi bie nyianle anyelazo kɛ bɛ nee ye bayɛ arelemgbunli nee ɛsɔfoma wɔ anwuma. Menli mgbe dɔɔnwo kakye Gyisɛse ewule ne ɛdeɛ, noko menli mɔɔ bɛ nee bɛ yɛle ngyekyeleɛ ne la a di paano ne na bɛno nwanye ne bie a.—Kenga Yekile 5:10.

Asɛɛ ɛvolɛ 2,000 ɛne, Gyihova ɛlɛkpa menli mɔɔ bɛbayɛ arelemgbunli la. (Luku 12:32) Bɛ nwo anzo kɛ bɛdabɛ mɔɔ bɛbadɛnla azɛlɛ ye azo dahuu la.—Kenga Yekile 7:4, 9, 17.