Rita: Shirley, ahye o. Me nye liele kɛ menwunle wɔ wɔ Gyisɛse Kelaese ewule Ngakyelɛlilɛ ne abo wɔ ɛkenle dapɛne ne la. * Kɛzi ɛnwunle ayia ne ɛ?

Shirley: Me nye liele kɛ membale la, noko saa mebaha a, meande debie biala mɔɔ bɛhanle la abo kpalɛ. Meze kɛ menli dɔɔnwo di Gyisɛse awolɛ kenle wɔ Bolonyia nu tɛla ye ewule. Mesɛlɛ wɔ, ɛbahola wɔahilehile deɛmɔti ɔhyia kɛ yɛkakye Gyisɛse ewule ne la anu wɔahile me ɔ?

Rita: Ɔle nɔhalɛ, menli dɔɔnwo di Bolonyia. Noko Gyihova Alasevolɛ te nganeɛ kɛ kenle mɔɔ anwo hyia mɔɔ ɔwɔ kɛ yɛkakye la a le kenle mɔɔ Gyisɛse wule la. Saa ɛlɛ mekɛ ekyi a, anrɛɛ me nye balie kɛ yɛbazuzu deɛmɔti ɔhyia kɛ yɛyɛ ɛhye la anwo.

Shirley: Ɛhɛe, melɛ mekɛ.

Rita: Mɔɔ ɔde la a le kɛ, Gyihova Alasevolɛ kakye Gyisɛse ewule ne ɔluakɛ ɔzele ye ɛdoavolɛma kɛ bɛyɛ zɔ. Suzu mɔɔ zile nɔe ne kolaa na Gyisɛse awu la anwo. Asoo ɛkakye kɛ bɛse ɔ nee ye ɛdoavolɛma mɔɔ di nɔhalɛ la lile aleɛ titili bie ɔ?

Shirley: Ɛkile Aleɛlilɛ Mɔɔ Li Awieleɛ la ɔ?

Rita: Ɛhɛe. Eza bɛfɛlɛ ye Awulae Nɔsolɛ Aleɛ. Gyisɛse maanle ye ɛdoavolɛma ne adehilelɛ fɔɔnwo wɔ zɔhane aleɛlilɛ ne abo. Mesɛlɛ wɔ kenga edwɛkɛ mɔɔ wɔ Luku 22:19 la wɔamaa me.

Shirley: Yoo. “Akee ɔvale kpanwo, ɔyɛle Nyamenle mo, ɔbubule nuhua, ɔvale ɔmanle bɛ na ɔzele kɛ, ‘Ɛhye a le me nwonane ne mɔɔ bɛva bɛmaa bɛ la. Anrɛɛ bɛyɛ ɛhye bɛva bɛhakye me.’”

Rita: Meda wɔ ase. Yɛ adehilelɛ mɔɔ Gyisɛse vale maanle wɔ ngyɛnu ne awieleɛ la nzonlɛ: “Anrɛɛ bɛyɛ ɛhye bɛva bɛhakye me.” Kolaa na Gyisɛse ava adehilelɛ ɛhye amaa ye ɛdoavolɛma kɛ bɛhakye ye la, ɔmaanle bɛnwunle mɔɔ ɔwɔ kɛ bɛfa bɛkakye ye la. Ɔhanle kɛ ɔbava ye ngoane yeado ɛkɛ yeamaa ye ɛdoavolɛma. Gyisɛse hanle edwɛkɛ ko ne ala wɔ Mateyu 20:28. Ngyɛnu ɛhye ka kɛ: “Medame Sonla Ra bɔbɔ, meamba kɛ bɛzonle me; membale kɛ mebazonle, na meava me ngoane meayɛ ɛkpɔnedeɛ meamaa menli dɔɔnwo.” Saa yɛka ye sikalɛ a, ɛhye ati a Gyihova Alasevolɛ yia nu ɛvolɛ biala di Gyisɛse ewule ne anwo ɛvoyia bɛfa bɛkakye Gyisɛse ɛkpɔnelɛ afɔlebɔlɛ ne a. Ye ewule ne bahola ahile ngoane amaa alesama kɔsɔɔti mɔɔ yɛ tieyɛ la.

Shirley: Mete kɛ menli ka kɛ Gyisɛse wule amaa yɛahola yɛanyia ngoane. Nɔhalɛ nu, mende kɛzi ɛhye bayɛ zɔ la abo kpalɛ.

Rita: Shirley, tɛ ɛ ngomekye ɔ. Gyisɛse ɛkpɔnelɛ afɔlebɔlɛ ne le edwɛkɛ mɔɔ anwo hyia kpalɛ. Noko eza ɔboka nɔhalɛ edwɛkɛ mɔɔ yɛ anyelielɛ kpalɛ mɔɔ wɔ Nyamenle Edwɛkɛ ne anu anwo. Mesɛlɛ wɔ, ɛlɛ mekɛ ekyi ɔ?

Shirley: Melɛ mekɛ ekyi.

 Rita: Edwɛkɛ kpalɛ ɔ. Mengengale ɛkpɔnedeɛ ne anwo edwɛkɛ la ɛtɛkyɛle, na mekulo kɛ mekilehile wɔ nu sikalɛ.

Shirley: Mede.

Rita: Amaa yɛade ɛkpɔnedeɛ ne abo la, ɔwɔ kɛ yɛdimoa yɛte mɔɔ Adam nee Yive vale rale wɔ mekɛ mɔɔ bɛyɛle ɛtane wɔ Yidɛn tola ne anu la abo. Amaa yɛade edwɛkɛ ɛhye abo la, maa yɛbɔ nu yɛgenga Wulomuma 6:23. Mesɛlɛ wɔ ɛbagenga ngyɛnu ɛhye ɔ?

Shirley: Ɛhɛe. Ɔse: “Ɛtane ahatualɛ a le ewule, na Nyamenle ahyɛlɛdeɛ ne mɔɔ ɔfa ɔmaa mgbane la a le ngoane mɔɔ ɛnlɛ awieleɛ wɔ yɛ Awulae Kelaese Gyisɛse ati.”

Rita: Mo. Maa yɛzuzu edwɛkɛ ɛhye anwo. Mɔɔ limoa la, yɛ kɛzi ngyɛnu ne bɔ ɔ bo la nzonlɛ: “Ɛtane ahatualɛ a le ewule.” Ɛhye a le mɛla mɔɔ Nyamenle lile wɔ alesama tetedwɛkɛ ne mɔlebɛbo a—ɛtane ahatualɛ anzɛɛ anzohwenlɛ, a le ewule. Nɔhalɛ nu, mɔlebɛbo ne, ɛnee awie biala ɛnle ɛtanevolɛ. Bɛbɔle Adam nee Yive la, ɛnee bɛdi munli yɛɛ anrɛɛ bɛ mra kɔsɔɔti noko bɛali munli. Yemɔti, anrɛɛ yɛ nuhua biala ɛnrɛwu. Ɛnee Adam nee Yive yɛɛ ɔ bo zo amra lɛ dahuu ngoane mɔɔ anyelielɛ wɔ nu la anwo anyelazo. Noko kɛmɔ yɛze ye la, ninyɛne angɔ ye kɛmɔ ɔde ye la, anaa?

Shirley: Kyɛkyɛ. Adam nee Yive lile bakama mɔɔ bɛduale bɛ la.

Rita: Ɔle nɔhalɛ. Mekɛ mɔɔ Adam nee Yive kpale kɛ bɛnrɛdie Nyamenle la bɛyɛle ɛtane. Adenle ɛhye azo, bɛnyianle sinlidɔlɛ, na bɛrayɛle ɛtanevolɛma. Zɔhane kpɔkɛ ne mɔɔ bɛzile la vale ngyegyelɛ kpole rale Adam nee Yive nee bɛ bo zo amra kɔsɔɔti anwo zo.

Shirley: Boni a ɛkile a?

Rita: Ɔyɛ, maa menyɛ neazo ɛhye. Ɛze paano to ɔ?

Shirley: Ɛhɛe! Mekulo ye ɛyɛlɛ.

Rita: Yɛva ye kɛ ɛlɛ kyɛnze fofolɛ mɔɔ bɛfa bɛto paano la. Noko kolaa na wɔava wɔado paano la ɔdɔle aze na nwolɛ bondole. Kɛkala, kɛ paano biala mɔɔ ɛbado ye wɔ kyɛnze ne anu la bayɛ ɛ? Asoo biala anwo ɛnrɛbondo ɔ?

Shirley: Ɛhɛe, ɔbayɛ zɔ.

Rita: Zɔhane ala a mekɛ mɔɔ Adam nee Yive yɛle Nyamenle anwo anzosesebɛ la, bɛ nwo “bondole,” ɔlua ɛtane nee sinlidɔlɛ mɔɔ bɛnyianle la ati. Ɔluakɛ bɛrayɛle ɛtanevolɛma na bɛawo la ati, bɛ mra biala mɔɔ bɛbawo bɛ la noko anwo “babondo.” Bɛbawo bɛ muala wɔ ɛtane nu. Wɔ Baebolo ne anu, edwɛkɛkpɔkɛ “ɛtane” ɛngile nyɛleɛ bie ala emomu eza ɔle gyinlabelɛ mɔɔ yɛhɔ nu la. Ɛnee bɛtɛwole medame nee ɛdawɔ na yɛayɛ ɛtane ɛdeɛ, noko mekɛ mɔɔ Adam nee Yive yɛle ɛtane la, bɛbuale bɛ bo zo amra amuala mɔɔ yɛdayɛ noko yɛ nee yɛ bo zo amra boka nwo la ewule fɔlɛ na bɛvale ɛtane nee sinlidɔlɛ bɛwole yɛ muala. Kɛmɔ yɛgengale Wulomuma 6:23 la, ɛtane ahatualɛ a le ewule.

Shirley: Ɛhye ɛnle edwɛkɛ kpalɛ fee. Kɛmɔti a ɔwɔ kɛ alesama kɔsɔɔti nwu amaneɛ ɔlua Adam nee Yive ɛtane ne ati ɛ?

Rita: Ɔle nɔhalɛ—anrɛɛ ɔnle kɛ ɔba ye zɔ. Noko tɛ yemɔ ala ɛne. Ɔlua Nyamenle pɛlepɛlelilɛ mɔɔ di munli la azo, yezi kpɔkɛ kɛ ɔwɔ kɛ Adam nee Yive wu wɔ bɛ ɛtane ne mɔ anwo, noko yɛmɛ mɔɔ yɛle ɔ bo zo amra la yɛlɛ anyelazo. Nyamenle ɛyɛ ngyehyɛleɛ mɔɔ bamaa yeaye yɛ yeavi ngyegyelɛ ɛhye anu a. Ɛhye ati a Gyisɛse ɛkpɔnelɛ afɔlebɔlɛ ne anwo hyia la. Nea Wulomuma 6:23 ne bieko. Mekɛ mɔɔ ɔhanle kɛ “ɛtane ahatualɛ a le ewule” la, ngyɛnu ne eza ka kɛ: “Na Nyamenle ahyɛlɛdeɛ ne mɔɔ ɔfa ɔmaa mgbane la a le ngoane mɔɔ ɛnlɛ awieleɛ wɔ yɛ Awulae Kelaese Gyisɛse ati.” Yemɔti Gyisɛse ewule ne a ɛbuke adenle amaa yealie yɛ yeavi ɛtane nee ewule nu a. *

Rita: Edwɛkɛ bieko wɔ ngyɛnu ɛhye anu mɔɔ mekulo kɛ metwe wɔ adwenle mesie zo a.

Shirley: Yemɔ a le boni?

Rita: Yɛ ye nzonlɛ kɛ ngyɛnu ne se: “Nyamenle ahyɛlɛdeɛ ne mɔɔ ɔfa ɔmaa mgbane la a le ngoane mɔɔ ɛnlɛ awieleɛ wɔ yɛ Awulae Kelaese Gyisɛse ati.” Kɛkala, saa Gyisɛse a le awie mɔɔ nwunle amaneɛ na ɔwule ɔmaanle yɛ ɔvale ye ngoane ɔdole ɛkɛ wɔ yɛmɛ yɛ ti a, ɛnee duzu ati a ngyɛnu ne ka kɛ ɛkpɔnedeɛ ne le “Nyamenle ahyɛlɛdeɛ ne mɔɔ ɔfa ɔmaa” la ɛ? Kɛmɔti a ɔnle “Gyisɛse ahyɛlɛdeɛ ne mɔɔ ɔfa ɔmaa” la ɛ? *

Shirley: Hmm. Menze.

Rita: Nyamenle a bɔle Adam nee Yive a, na ɔdaye a bɛyɛle ɛtane bɛtiale ye wɔ mekɛ mɔɔ bɛyɛle ɔ nwo anzosesebɛ wɔ Yidɛn tola ne anu la. Ɔbayɛ kɛ ɔlile nyane kpole wɔ mekɛ mɔɔ ɔ mra nwiɔ ne mɔɔ limoa la dele ɔ nwo atua la. Noko Gyihova nyianle nwolɛ sɔbelɛ wɔ ɛkɛ ne ala. * Ɔbɔle kpɔkɛ kɛ ɔbamaa ye sunsum nu abɔdeɛ ne mɔ anu ko ara azɛlɛ ye azo, yeadɛnla aze kɛ dasanli mɔɔ di munli na awieleɛ ne, yeava ye ngoane yeado aze kɛ ɛkpɔnelɛ afɔlebɔlɛ. Yemɔti, nziezielɛ mɔɔ fane ɛkpɔnedeɛ ne anwo la amgba le ahyɛlɛdeɛ mɔɔ vi Nyamenle ɛkɛ a. Adenle bieko wɔ ɛkɛ mɔɔ kile kɛ ɛkpɔnedeɛ ne le Nyamenle ahyɛlɛdeɛ a. Asoo wɔzuzu kɛzi Nyamenle dele nganeɛ wɔ mekɛ mɔɔ bɛhunle Gyisɛse la ɔ?

Shirley: Kyɛkyɛ, metɛdwenlenle nwolɛ.

Rita: Menwu tɔye bie wɔ wɔ sua ne anyunlu. Ɔbayɛ kɛ ɛlɛ ngakula.

Shirley: Ɛhɛe, melɛ ngakula nwiɔ—nrenyia ko nee raalɛ ko.

Rita: Kɛmɔ ɛle wovolɛ la, wɔmɔ dwenle kɛzi ɔbayɛ kɛ Gyisɛse anwuma Selɛ, Gyihova Nyamenle dele nganeɛ wɔ kenle mɔɔ Gyisɛse wule la anwo nea. Mekile kɛ, kɛzi ɔdele nganeɛ wɔ mekɛ mɔɔ ɔwɔ anwuma na ɔlɛnea ye kulovolɛ Ralɛ mɔɔ bɛhye ye, bɛgolole ɔ nwo, na bɛbole ye la ɛ? Na kɛzi Selɛ ne dele nganeɛ wɔ mekɛ mɔɔ bɛbɔle ɔ Ra ne baka nu na bɛgyakyile ye bɛmaanle ɔwule abodelɛ ewule la ɛ?

Shirley: Ɔbayɛ kɛ ɔlile nyane kpole. Metɛdwenlenle nwolɛ ɛlɛ!

Rita: Nɔhalɛ nu, yɛnrɛhola yɛnrɛha kɛzi Nyamenle dele nganeɛ wɔ zɔhane kenle ne la pɛpɛɛpɛ. Noko yɛze kɛ ɔte nganeɛ, na eza yɛze deɛmɔti ɔmaanle ɛhye amuala zile la. Bɛhilele nuhua kɛnlɛma bɛmaanle yɛ wɔ ngɛlɛlera bie mɔɔ bɛze ye kpalɛ, Dwɔn 3:16 anu. Mesɛlɛ wɔ ɛbagenga wɔamaa me ɔ?

Shirley: Ɛhɛe. Ɔse: “Nyamenle hulole ewiade amra kpole kpalɛ la ati yɛɛ ɔvale Ɔ Ra kokye ne ɔmanle a, amaa awie biala mɔɔ kɛlie ye kɛli la anwu na yeanyia ngoane mɔɔ ɛnlɛ awieleɛ.”

Rita: Mo. Nea ngyɛnu ɛhye mɔlebɛbo ne bieko. Ɔse: “Nyamenle hulole ewiade amra kpole kpalɛ.” Edwɛkɛ titili mɔɔ wɔ nu la a le ɛlɔlɛ. Ɛlɔlɛ a hanle Nyamenle maanle ɔzoanle ɔ Ra ne wɔ azɛlɛ ye azo amaa yeawu wɔ yɛmɛ yɛ ti. Nɔhalɛ nu, ɛkpɔnelɛ afɔlebɔlɛ ne le ɛlɔlɛ kpole mɔɔ tɛla biala mɔɔ bɛla ye ali a. Na yemɔti a Gyihova Alasevolɛ bɔ nu yia wɔ ɛvolɛ biala kakye Gyisɛse ewule ne la. Edwɛkɛ ɛhye mɔɔ yɛhakye yɛ nwo la ɛboa wɔ ɔ?

Shirley: Ɛhɛe, yeboa me. Meyɛ wɔ mo kɛ wɔnyia mekɛ ɛ nee me ɛzuzu ɛhye anwo a.