Asoo Nyamenle bamaa alesama ahɔ zo asisi bɛ nwo na bɛ kenle bie nwo ara edwɛkɛ ɔ? Kyɛkyɛ, kɛmɔ yɛnwu ye la Nyamenle bava ɔ nwo alie nu na yeava nyanelilɛ nee nzisi mɔɔ ɛhɔ zo mekɛ tendenle la yeara awieleɛ. Bɔvolɛ ne mɔɔ bɔle alesama nee azɛlɛ ne la kpondɛ kɛ ɛnwu ye kɛ ye mekɛ mɔɔ ɔbava yeali ninyɛne nwo gyima la ɛlɛbikye. Kɛzi ɔmaa yɛnwu ɛhye ɛ?

Suzu ndonwo ɛhye anwo: Saa ɛlɛtu adenle wɔahɔ sua bie mɔɔ ɛnze zolɛ la azo a, bie a ɛbabiza wɔamaa bɛahile wɔ ninyɛne mɔɔ ɛbanwu ye wɔ adenle ne azo la. Akee saa ɛnwu sɛkɛlɛneɛ bie mɔɔ nee mɔɔ bɛhanle bɛhilele wɔ la le ko a, ɔmaa ɛnyia anwodozo kɛ ɔka ekyi ɛdwu sua ne azo. Zɔhane ala a, Nyamenle ɛva ye Edwɛkɛ ne ɛmaa yɛ mɔɔ maa yɛnwu debie mɔɔ bazi ewiade la. Saa yɛnwu sɛkɛlɛneɛ zɔhane kɛ ɔlɛsisi a, ɔmaa yɛdie yɛdi kɛ yɛwɔ awieleɛ mekɛ nu.

Baebolo ne kilehile nu kɛ ewiade edwɛkɛ badwu ɛleka mɔɔ ɔyɛ se na awieleɛ ne ara. Ninyɛne dɔɔnwo mɔɔ babɔ nu asisi wɔ ewiade amuala yɛɛ tɛnlabelɛ ne bayɛ ngakyile mɔɔ bie ɛtɛbale ɛlɛ a. Suzu ninyɛne bie mɔ mɔɔ bɛha nwolɛ edwɛkɛ wɔ Baebolo ne anu la anwo.

1. NZENZALEƐ KPOLE BARA EWIADE AMUALA Ngapezo bie mɔɔ wɔ Mateyu tile 24 la ka ninyɛne mɔɔ basisi azɛlɛ ye azo mɔɔ bayɛ sɛkɛlɛneɛ la anwo edwɛkɛ. Ninyɛne ɛhye mɔ a bayɛ “ewiade ɛhye awieleɛ ne anwo sɛkɛlɛneɛ” na yeava ‘awieleɛ ne yeara’ a. (Ngyɛnu 3, 14) Konle, ɛhɔne, azɛlɛ mɔɔ bakpusu ɛleka muala, basabasayɛlɛ mɔɔ bahɔ ɔ nyunlu, ɛlɔlɛ mɔɔ baha aze, nee asɔne mgbanyima mɔɔ bɛbabɛlɛbɛla menli la boka sɛkɛlɛneɛ ne anwo. (Ngyɛnu 6-26) Nɔhalɛ nu, zɛhae ninyɛne ne mɔ ɛhɔ zo wɔ ɛvoya dɔɔnwo anu. Noko, mekɛ mɔɔ awieleɛ ne ɛlɛbikye la, ɔ muala bazi wɔ ngyegyelɛ mekɛ ko ne ala anu. Kɔkɔbɔlɛ nwo sɛkɛlɛneɛ nsa noko badoa zo.

2. MENLI SUBANE Baebolo ne ka kɛ menli subane mɔɔ bahakyi la boka sɛkɛlɛneɛ mɔɔ kile kɛ yɛwɔ “awieleɛ mekɛ ne anu” la anwo. Yɛkenga kɛ: “Menli bayɛ angomedi nee ezukoa nwo anyebolo, bɛbamemaa bɛ nwo zo na bɛazua anyetele; bɛbabɔ aholoba, bɛnrɛdie bɛ awovolɛma, bɛbakpo amunli, bɛnrɛzonle Nyamenle; bɛ ti bayɛ se, bɛnrɛze anwunvɔne, bɛbabɔ nzekue, bɛbali mgbonde, bɛbava ɛya mgbane mgbane na bɛahyi kpalɛ, bɛbaye bɛ gɔnwo mɔ bamaa, bɛbayɛ mgbaha na bɛ ti anu ayɛ bɛ fɛ; bɛbahulo anyelielɛ bɛadɛla Nyamenle.” (2 Temɔte 3:1-4) Ɔle nɔhalɛ kɛ menli mɔɔ bɛmbu bɛ la ɛnle debie fofolɛ, noko “awieleɛ mekɛ ne anu” yɛɛ bɛbala subane ɛhye ali kpole kpalɛ a, yemɔti yɛbahola yɛaha kɛ ɔle “anwongyelelɛ” mekɛ. Asoo wɔnwu kɛ menli da subane ɛtane ɛhye mɔ bie ali?

3. BƐLƐSƐKYE AZƐLƐ NE Baebolo ne se Nyamenle ‘bazɛkye bɛdabɛ mɔɔ bɛsɛkye azɛlɛ ye la.’ (Yekile 11:18) Ndenle boni mɔ azo a menli ɛlɛsɛkye azɛlɛ ne a? Bɛhanle Nowa mekɛ zo ɛdeɛ ne wɔ adenle ko ne ala azo kɛ: “Na ɔrale kɛ ɛnee azɛlɛ ne ɛzɛkye wɔ Nyamenle anyunlu, na ɛnee amumuyɛyɛlɛ ɛlie ebia wɔ azɛlɛ ye azo ɛleka biala. Na Nyamenle nwunle azɛlɛ ne kɛ amgba yezɛkye.” Yemɔti Nyamenle hanle ewiade ɛtane zɔhane anwo edwɛkɛ kɛ: “Mesɛkye bɛ.” (Mɔlebɛbo 6:11-13, NW) Asoo wɔnwu daselɛ dɔɔnwo mɔɔ kile kɛ basabasayɛlɛ ɛbu azɛlɛ ne azo la? Bieko, alesama wɔ mekɛ mɔɔ bie ɛtɛbale ɛlɛ la anu: Bɛkola bɛsɛkye azɛlɛ ne ɔlua alesama mɔɔ bɛbɔ bɛ bo zo la azo. Bɛdedɛ konle ninyɛne dɔɔnwo. Eza bɛlɛsɛkye azɛlɛ ne wɔ adenle fofolɛ zo. Ninyɛne mɔɔ boa maa yɛtɛnla aze​—anwoma mɔɔ yɛdie, nyɛmoa  nee mbaka mɔɔ boa bɛ nwo, nyevile ne​—ɛlɛsɛkye ɔluakɛ alesama ɛnnea ninyɛne zo boɛ.

Biza ɛ nwo kɛ, ‘Ɛvoya mɔɔ ɛze ɛhɔ la, asoo alesama nyianle tumi mɔɔ bɛbava bɛazɛkye bɛ nwo bɔkɔɔ?’ Noko kɛkala menli ɛlɛkuohua adu dɔɔnwo anloa na bɛlɛsɛkye ninyɛne mɔɔ ɛbɔ yɛ nwo ɛyia la. Anyuhɔlɛ mɔɔ bɛnyia ye ndɛndɛ wɔ ɛlɛtɔlɔneke ninyɛne nwo la bo sonla ndelebɛbo zo anzɛɛ bɛngola bɛnli ngyegyelɛ mɔɔ ɔfa ɔba la anwo gyima. Noko, sonla ɛnlɛ kɛzi azɛlɛ ne bayɛ kenle bie la azo tumi anzɛɛ ɔngola ɔnzi nwolɛ kpɔkɛ. Kolaa na bɛazɛkye debie biala bɛavi azɛlɛ ne azo la, Nyamenle bava ɔ nwo alie nu azɛkye bɛdabɛ mɔɔ bɛlɛsɛkye azɛlɛ ne la. Ɛwɔkɛ ɛhye a yebɔ a!

4. EWIADE AMUALA EDWƐKƐHANLƐ GYIMA Awieleɛ ne anwo sɛkɛlɛneɛ bieko mɔɔ bɛhanle bɛdole ɛkɛ ne la a le kɛ bɛbayɛ gyima kpole bie: “Bɛbabɔ Edwɛkpa ɛhye mɔɔ fane Anwuma Belemgbunlililɛ ne anwo la nolo wɔ aleɛabo amuala, amaa yeayɛ daselɛlilɛ yeamaa aleɛabo amra kolaa na awieleɛ ne ara.” (Mateyu 24:14) Edwɛkpa ɛhye mɔɔ bɛlɛbɔ ye nolo la bayɛ ngakyile avi mɔɔ asɔne ngakyile dɔɔnwo ɛbɔ ye nolo wɔ ɛvoya dɔɔnwo anu la anwo. Wɔ awieleɛ mekɛ ne anu, bɛbazi edwɛkɛ fɔɔnwo bie, “edwɛkpa ɛhye mɔɔ fane Anwuma Belemgbunlililɛ ne anwo” la azo. Asoo ɛze asɔne ekpunli bie mɔɔ ta ka edwɛkɛ ɛhye la? Saa awie mɔ ɛlɛka edwɛkɛ ɛhye bɔbɔ a, asoo bɛle ekpunli bie, anzɛɛ bɛha edwɛkpa ɛhye bɛhɔdwu “aleɛabo amuala, amaa yeayɛ daselɛlilɛ yeamaa aleɛabo amra”?

Yɛ web site www.pr418.com ne twe adwenle kɔ “edwɛkpa ɛhye mɔɔ fane Anwuma Belemgbunlililɛ ne anwo la” azo. Mbuluku wɔ gyimalilɛleka ne mɔɔ kilehile zɔhane edwɛkɛ ne anu wɔ aneɛ mɔɔ bo 700 la anu. Ɛze adenle fofolɛ bieko mɔɔ bɛdua zo bɛbɔ edwɛkpa ne mɔɔ fane Belemgbunlililɛ ne anwo nolo wɔ ewiade amuala la ɔ? Bɛze Gyihova Alasevolɛ kɛ bɛbɔ mɔdenle bɛbɔ edwɛkpa ne mɔɔ fane Nyamenle Belemgbunlililɛ ne anwo la nolo kolaa na Intanɛte ne ara. Ɔvi 1939 mɔɔ ba la, edwɛkɛ “Ɔbɔ Gyihova Belemgbunlililɛ Nolo” finde Ɛzinzalɛ Arane ko biala azo. Buluku bie mɔɔ ka ɛzonlenlɛ nwo edwɛkɛ la ka kɛ Gyihova Alasevolɛ ɛyɛ edwɛkɛhanlɛ gyima ne “kpole kpalɛ ɛhɔdwu ɛleka dɔɔnwo.” Daselɛlilɛ ɛhye si zo kɛ ɔlua Nyamenle Belemgbunlililɛ ne azo ɔnrɛhyɛ “na awieleɛ ne ara.”

Asoo wɔyɛ ye nzonlɛ kɛ Baebolo ne anu kɔkɔbɔlɛ nwo sɛkɛlɛneɛ nna mɔɔ wɔ edwɛkɛ ɛhye anu la ɛra nu wɔ wɔ mekɛ zo? Ɛvolɛ mɔɔ bo ɛya ko la  anu, magazine ɛhye ɛmaa ye kengavolɛma ɛnwu ninyɛne mɔɔ ɛlɛsisi ewiade la amaa yeaboa bɛ yeamaa bɛanwu kɛ amgba yɛlɛbikye awieleɛ ne. Nɔhalɛ nu, kpolerazulɛma se nɔhalɛ edwɛkɛ nee mgbondabulɛ kola gyinla awie ɔdaye ye nzuzulɛ nee ye nganeɛdelɛ zo. Eza bɛka kɛ ɔlua ewiade ngitanwolilɛ mɔɔ ɛlɛkɔ ɔ nyunlu la ati, ɔzɔho kɛ ewiade tɛnlabelɛ ne ɛlɛsɛkye. Noko, yɛlɛ daselɛ dɔɔnwo mɔɔ ɔkile kɛ yɛwɔ awieleɛ mekɛ ne anu a.

Benlerama bie mɔ te nganeɛ kɛ nzenzaleɛ kpole ɛlɛba azɛlɛ ɛhye azo. Kɛ neazo la, wɔ 2014, Abɔdeɛ nwo nrɛlɛbɛvolɛma nee Banebɔlɛ Ekpunli mɔɔ le Bulletin of the Atomic Scientists ne bɔle Maamgbole Koyɛlɛ Banebɔlɛ Ayiama ne kɔkɔ wɔ esiane kpole mɔɔ ɛlɛba alesama anwo zo la. Abɔdeɛ nwo nrɛlɛbɛvoma ɛhye mɔ se: “Neɛnleanu ɛhye ɛmaa yela ali kɛ esiane mɔɔ anyebukelɛ ɛlɛfa ara la ɛlɛkɔ ɔ nyunlu kpalɛ.” Menli dɔɔnwo die di kɛ yɛwɔ mekɛ mɔɔ anu yɛ se la anu. Magazine ɛhye yɛvoma nee ye kengavolɛma die to nu kɛ amgba mekɛ ɛhye mɔɔ yɛwɔ nu la le awieleɛ mekɛ na awieleɛ ne ɛbikye. Noko kɛ anrɛɛ ɛbazulo mɔɔ bazi kenle bie la, ɛ nye bahola alie mɔɔ bavi nu ara la anwo. Duzu ati a ɔle zɔ a? Ɔluakɛ ɛbahola wɔanyia ngoane!