DWOSEFI gyi ye tola ne anu wɔ mekɛ mɔɔ aleɛ ɛlɛdwo la. Bie a ɛnee ɔlɛnea arɛlɛ ne mɔ, azudenle mɔɔ mbaka gyigyi nu nee bakama gyɛne. Na bane ne anzi yɛɛ Falo belemgbunli sua nu wɔ a. Dwenle ɛnelɛ ne mɔɔ Dwosefi te wɔ ye sua nu ɛkɛ la anwo nea; ɔ ra Manasɛ ɛlɛka ɔ diema Yifelaem mɔɔ le adɔma la nwɔhoa. Dwosefi kola pɛ mɔɔ ɛlɛkɔ zo wɔ ye sua nu ɛkɛ la nvoninli, ɔ ye anyunlu ɛyɛ ɛzelekɛ ɔlua ngakula ne mɔ nwɔhoa ne ati. Ɔdaye noko ɔzelele. Ɛnee ɔze kɛ bɛyila ye.

Dwosefi donle ye belamunli ralɛ ne duma Manasɛ ɔluakɛ ɔkile arɛlevilɛ. (Mɔlebɛbo 41:51) Kɛmɔ Nyamenle ɛyila Dwosefi la ati, yemaa nyane mɔɔ ɛnee ɔdi wɔ sua nu, ɔ mediema nee ɔ ze anwo la azo ɛde. Ɛkpɔlɛ mɔɔ ɔ mediema mgbanyima vale rale ɔ nwo zo la ɛmaa ye ɛbɛlabɔlɛ ɛhakyi. Bɛhyele ye, bɛyɛle bɛ adwenle kɛ bɛku ye, na akee bɛdɔnenle ye kɛ akɛlɛ bɛmaanle gualilɛma. Ɔvi mekɛ zɔhane, ɔyiale ngyegyelɛ dɔɔnwo wɔ ye ɛbɛlabɔlɛ nu. Kɛyɛ ɛvolɛ bulu nee nwiɔ anu, yegyinla akɛlɛzonlenlɛ nee efiade ɛlalɛ nloa mɔɔ ɛnee nwɔnzɔnwɔnzɔ gua ɔ sa nee ɔ gyakɛ a. Noko kɛkala, yerayɛ tumivolɛ mɔɔ Falo ɛnle ɛkɛ a ɔdaye a ɔwɔ kɛ wɔ Yigyibiti maanle nu! *

Ɛvolɛ dɔɔnwo pɛle nu la, Dwosefi nwunle kɛ edwɛkɛ mɔɔ Gyihova hanle la ɛlɛba nu pɛpɛɛpɛ. Ngapezo ne mɔɔ kile kɛ aleɛ babu Yigyibiti wɔ ɛvolɛ nsuu la ɛra nu, na Dwosefi noko nleanle maanle bɛboɔboale aleɛ mɔɔ ɛha wɔ maanle ne anu la anloa. Mekɛ zɔhane, ɛnee ɔ nee ɔ ye Asɛnate ɛwo mrenyia nwiɔ. Noko, ɛnee ye adwenle ta kɔ ye abusua ne mɔɔ yegyakyi bɛ ɔ nzi la​—titili ɔ diema kakula Bɛngyaman, nee bɛ ze Gyekɔbo anwo zo. Bie a ɛnee Dwosefi ɛngola ɛnnwu ye kɛ saa bɛte kpɔkɛ a. Bie noko a ɛnee ɔdwenle ɔ mediema mgbanyinli ne mɔ anwo, kɛ saa bɛhakyi bɛ amumuyɛ nyɛleɛ ne anzɛɛ saa ɔbahola yeava ye abusua ne ɛtane yeahyɛ bɛ na ɔ nee bɛ abɔ nu bieko a.

Saa anyebolo, ɛkpɔlɛ anzɛɛ awie ɛye wɔ ɛmaa na yezɛkye wɔ abusua ne anzodwolɛ a, ɛnee wɔ edwɛkɛ ne le kɛ Dwosefi ɛdeɛ ne la. Duzu a yɛbahola yɛazukoa yɛavi Dwosefi diedi ne anu wɔ mekɛ mɔɔ ɛnee ɔlɛnea ye abusua ne la ɛ?

Ɛvolɛ dɔɔnwo pɛle nu, mɔɔ ɛnee Dwosefi ɛnlɛ alagye fee wɔ alehyenlɛ ko biala anu a. Kɛmɔ Gyihova luale ɛlalɛ ne mɔɔ ɔmaanle Falo hanle la azo hanle la, aleɛ dɔɔnwo rale wɔ ɛvolɛ nsuu ne anu na yemɔ anzi ninyɛne hakyile bɔkɔɔ. Aleɛ nwo yɛle se! Yeangyɛ ɛhɔne rale maanle mɔɔ zuozua bɛ la kɔsɔɔti azo. Noko, kɛmɔ Baebolo ne ka la, “Yigyibiti ɛdeɛ, ɛnee aleɛ wɔ ɛkɛ.” (Mɔlebɛbo 41:54) Ɔda ali kɛ, edwɛkɛ mɔɔ Dwosefi luale Nyamenle sunsum ne azo hanle dole ɛkɛ nee ngyehyɛleɛ kpalɛ mɔɔ ɔyɛle la boale Yigyibitima.

Bie a Yigyibitima dele nganeɛ kɛ ɔfɛta kɛ bɛyɛ Dwosefi mo na bɛye ye ayɛlɛ wɔ ye ngyehyɛleɛ kpalɛ ne anwo. Noko, ɛnee Dwosefi kpondɛ kɛ bɛfa nganvolɛ biala bɛmaa ye Nyamenle, Gyihova ne. Saa yɛdua mɛlɛbɛnwoaze nu yɛfa yɛ nrɛlɛbɛ  mɔɔ yɛlɛ la yɛdi gyima wɔ Nyamenle ɛzonlenlɛ nu a, bie a ɔbamaa yɛava yɛali gyima dɔɔnwo yɛadɛla mɔɔ yɛbahola yɛazuzu nwo la.

Noko nzinlii, ɛhɔne ne bie hunle Yigyibitima. Mekɛ mɔɔ bɛzunle bɛvɛlɛle Falo kɛ ɔboa bɛ la, ɔzele bɛ kɛ: “Bɛhɔ Dwosefi ɛkɛ, na bɛyɛ debie biala mɔɔ ɔkɛze bɛ la.” Dwosefi maanle bɛbukebukele ɛleka ɛleka mɔɔ bɛvale aleɛ bɛziele la amuala, na menli ne ahola adɔ mɔɔ bɛhyia nwo la.​—Mɔlebɛbo 41:55, 56.

Noko akee, maanle mɔɔ zuozua bɛ la anwo anyɛ moavolɛ. Ɛnee Dwosefi abusua ne mɔɔ wɔ Keena la ɛlɛnwu amaneɛ. Gyekɔbo mɔɔ ɛnyi la dele kɛ abɛlɛ wɔ Yigyibiti, yemɔti ɔzele ɔ mra mrenyia ne mɔ kɛ bɛhɔdɔ bie bɛrɛla.​—Mɔlebɛbo 42:1, 2.

Gyekɔbo zoanle ɔ mra mrenyia bulu ne, noko Bɛngyaman angɔ bie. Gyekɔbo hakyele mekɛ mɔɔ ɔzoanle ye kulovolɛ ralɛ Dwosefi angome kɛ ɔhɔkpɔla ɔ mediema mgbanyinli ne mɔ la. Ɔvi mekɛ zɔhane, Gyekɔbo annwu kakula ne bieko. Ɔ mra mgbanyinli ne mɔ vale Dwosefi tɛladeɛ kɛnlɛma ne​—mɔɔ kile kɛzi ye papa dwenle ɔ nwo na ɔkulo ye edwɛkɛ​—mɔɔ ɛnee ɛtete na mogya wɔ nu la rɛlɛle ye. Bɛmaanle nrenyia kpanyinli ɛhye mɔɔ ɛlɛdi nyane la liele lile kɛ nane bie ɛhye Dwosefi ɛli.​—Mɔlebɛbo 37:31-35.

Gyekɔbo amra ne mɔ dwule Yigyibiti wɔ mekɛ mɔɔ ɛnee bɛpɛ adenle tendenle la. Mekɛ mɔɔ bɛbizale ɛleka mɔɔ bɛtɔne abɛlɛ ne la, bɛhilele bɛ arane nu kpanyinli mɔɔ bɛfɛlɛ ye Zafɛnate Pania la. (Mɔlebɛbo 41:45) Asoo bɛnwunle kɛ Dwosefi ɔ? Kyɛkyɛ. Bɛnwunle Yigyibiti sonla kpole bie mɔɔ bɛhyia ye moalɛ la. Amaa bɛahile kɛ bɛbu ye la: ‘Bɛbɔle bɛ ti aze bɛmaanle ye, bɛbutubutule bɛ nyunlu aze.’​—Mɔlebɛbo 42:5, 6.

Na Dwosefi noko ɛ? Ɔnwunle kɛ ɔ mediema ne mɔ ɔ! Bieko, mekɛ mɔɔ ɔnwunle kɛ bɛlɛbɔ bɛ ti aze bɛamaa ye la, ɔhakyele ye ngakula nu edwɛkɛ bie. Kɛlɛtokɛ ne ka kile yɛ kɛ “Dwosefi hakyele ɛlalɛ ne” mɔɔ Gyihova maanle ɔhanle ye wɔ ye ngakula nu la, mɔɔ kile mekɛ mɔɔ ɔ mediema ne mɔ babɔ bɛ ti aze wɔ ɔ nyunlu la​—kɛmɔ bɛyɛle la pɛpɛɛpɛ! (Mɔlebɛbo 37:2, 5-9; 42:7, 9) Duzu a Dwosefi bayɛ a? Ɔyɛ bɛ atuu ɔ? Ɔli nzenralɛ ɔ?

Kɛ ɔde ye biala la, ɛnee Dwosefi ze kɛ ɔnle kɛ ɔdi ye nganeɛdelɛ nzi. Ɔda ali kɛ ɛnee Gyihova a ɛlɛmaa ninyɛne ɛhye mɔɔ ɛlɛsisi la ara ye zɔ a. Ɛnee ɔfane ye bodane nwo. Yebɔ ɛwɔkɛ kɛ ɔbamaa Gyekɔbo abozoamra ayɛ maanle kpole. (Mɔlebɛbo 35:11, 12) Saa Dwosefi amediema ne mɔ ɛtɛgyakyile basabasayɛlɛ, angomedi, nee nzisi a, anrɛɛ mɔɔ vi nu bara la bahola ayɛ esiane kpole! Bieko, saa Dwosefi anzi abotane a, anrɛɛ ɔbahola yeava ngyegyelɛ dɔɔnwo yeara sua nu, mɔɔ ɔbagyegye ye papa nee Bɛngyaman bɔbɔ a. Asoo bɛtɛte aze bɔbɔ? Dwosefi anla ɔ nwo ali angile bɛ amaa yeazɔ ɔ mediema ne mɔ yeanlea na yeanwu menli holɛ ko mɔɔ bɛde la. Akee ɔbanwu mɔɔ Gyihova kulo kɛ ɔyɛ la.

 Ɔbahola yeara ye kɛ ɛtɛkɔle tɛnlabelɛ mɔɔ le kɛ ɛhye la bie anu ɛlɛ. Noko akee, butule nee mgbakyemgbakyenu mɔɔ wɔ abusua nu la ɛbu zo wɔ ɛnɛ ewiade ye anu. Saa yɛyia ngyegyelɛ zɛhae a, yɛta yɛdi yɛ ahonle nzi na yɛyɛ mɔɔ yɛkulo la. Nrɛlɛbɛ wɔ nu kɛ yɛbazukoa Dwosefi na yɛabɔ mɔdenle yɛade kɛzi Nyamenle kulo kɛ yɛdi ninyɛne nwo gyima la abo. (Mrɛlɛbulɛ 14:12) Kakye kɛ, ɔhyia kɛ yɛmaa anzodwolɛ tɛnla yɛ nee yɛ abusua ne avinli ɛdeɛ, noko anzodwolɛ mɔɔ ɔtɛnla yɛ nee Gyihova nee ɔ Ra ne avinli la hyia kpole kpalɛ.​—Mateyu 10:37.

Dwosefi luale ndenle ngakyile zo zɔle ɔ mediema ne mɔ nleanle kɛ ɔfa yeanwu mɔɔ wɔ bɛ ahonle nu la. Ɔbɔ ɔ bo la, ɔdendɛle ahonle zo mɔɔ ɛnee awie a kilehile nu a, na ɔbɔle bɛ somolɛ kɛ bɛle busiama. Amaa bɛalie bɛ nwo la, bɛhanle bɛ abusua ne anu edwɛkɛ bɛhilele ye na bɛvale bɛzɔle zolɛ kɛ bɛlɛ bɛ diema nrenyia ekyi ko wɔ sua nu. Dwosefi bɔle mɔdenle kɛ ɔnrɛmaa bɛnrɛnwu kɛ ɔ nye ɛlie. Asoo amgba ɔ diema nrenyia ekyi ne de aze? Akee Dwosefi ɛnwu mɔɔ ɔbayɛ la. Ɔhanle kɛ: “Yɛfa ɛhye yɛanlea bɛ nɔhalɛ,” akee ɔzele bɛ kɛ ɔkpondɛ kɛ ɔnwu bɛ diema ekyi zɔhane. Nzinlii, ɔmaanle bɛ nuhua ko hale ɛkɛ na ɔgyakyile bɛdabɛ mɔɔ bɛha la kɛ bɛhɔva bɛ diema ne bɛrɛla.​—Mɔlebɛbo 42:9-20.

Bɛbɔle ɔ bo kɛ bɛbɔ bɛ nwo somolɛ wɔ ɛtane mɔɔ bɛyɛle ye wɔ ɛvolɛ 20 mɔɔ ɛze la, mɔɔ ɛnee bɛnze kɛ Dwosefi te mɔɔ bɛlɛka la a. Bɛhanle kɛ, “Yɛdi fɔlɛ bɔkɔɔ wɔ mɔɔ yɛvale yɛyɛle yɛ diema nrenya ne la anwo. Yɛdayɛ yɛnwunle ye ɛbolɛ mɔɔ ɛnee ɛlɛte, wɔ mekɛ mɔɔ ɛnee ɔlɛkpa yɛ kyɛlɛ la, noko yɛandie ye. Yemɔti a abodelɛ ɛhye ɛra yɛ nwo zo la.” Dwosefi dele mɔɔ ɛnee bɛlɛka la, yemɔti ɔhwenle ɔ nwo ahane amaa bɛannwu kɛ ɔlɛsu. (Mɔlebɛbo 42:21-24) Noko, ɛnee ɔze kɛ anlubɛnwo kpalɛ ɛnle nyane ala mɔɔ ɛdi ɔlua mɔɔ ɛvi ɛtane bie mɔɔ ɛyɛle la anu ɛra la. Yemɔti ɔhɔle zolɛ ɔzɔle bɛ ɔnleanle.

Ɔdole Semɛyɔn efiade na ɔmaanle menli mɔɔ ɛha la hɔle. Eza ɔmaanle bɛvale ezukoa bɛveale bɛ aleɛ ahodoku ne anu bɛvale bɛhɔle sua nu. Mediema ne mɔ dwule sua nu na bɛbɔle mɔdenle kɛ bɛdi Gyekɔbo adwenle amaa yeamaa bɛ nee ye kulovolɛ ralɛ Bɛngyaman ahɔ Yigyibiti. Bɛdwule Yigyibiti la, bɛhanle ye wienyi bɛhilele Dwosefi awuke zo neavolɛ ne kɛ bɛnwunle ezukoa wɔ bɛ ahodoku ne anu, na bɛhanle kɛ bɛbadua ye kɔsɔɔti. Mɔɔ bɛyɛle la le debie kpalɛ ɛdeɛ, noko ɛnee Dwosefi kpondɛ kɛ ɔnwu bɛ kpalɛ. Ɔdole ɛkponle ɔmaanle bɛ, ɔluakɛ ɛnee ɔ nye ɛlie kɛ yenwu ɔ diema Bɛngyaman. Akee ɔmaanle bɛ aleɛ ɔvale ɔguale bɛ adenle zo, noko mekɛ ɛhye anu ɔmaanle bɛvale ye dwɛtɛ fufule kɔpo ne bɛveale Bɛngyaman kodoku ne anu.​—Mɔlebɛbo 42:26–44:2.

Akee Dwosefi nwunle kɛ mekɛ ɛdwu. Ɔmaanle bɛdoale ɔ mediema ne mɔ, bɛhyele bɛ, na bɛdole bɛ ɛzonle kɛ bɛwua kɔpo ne. Mekɛ mɔɔ bɛnwunle ye wɔ Bɛngyaman baage ne anu la, bɛvale bɛ muala bɛrale Dwosefi anwo ɛkɛ. Kɛkala Dwosefi ɛnyia adenle mɔɔ bamaa yeanwu menli holɛ mɔɔ ɔ mediema ne mɔ de la. Dwuda a dendɛle bɛ nloa azo a. Ɔzɛlɛle kɛ bɛze bɛ anwunvɔne, na ɔhanle kɛ bɛdabɛ 11 ne bayɛ ngɛkɛlɛ wɔ Yigyibiti bɔbɔ. Dwosefi hanle kɛ Bɛngyaman ala a baha Yigyibiti ɛke na yeazonle kɛ akɛlɛ na bɛdabɛ mɔɔ bɛha la bɛahɔ sua nu.​—Mɔlebɛbo 44:2-17.

Dwuda hanle edwɛkɛ mɔɔ ka ahonle. Dwuda se, “Ɔ nli akunlu ɛdeɛ ne, ɔdaye ɔ ngome a yeha a, yɛɛ ɔ ze kulo ye kpalɛ.” Ɔbayɛ kɛ edwɛkɛ ɛhye hanle Dwosefi. Ɔdaye a ɔle Gyekɔbo aye Relahyɛle mɔɔ ɔkulo ye la ralɛ nrenyia kpanyinli a. Relahyɛle wule wɔ mekɛ mɔɔ ɔlɛwo Bɛngyaman la. Ɔda ali kɛ, Dwosefi kakye Relahyɛle kɛmɔ ye papa yɛ ala la. Ɔbayɛ kɛ ɛhye maanle Dwosefi hulole Bɛngyaman edwɛkɛ kpalɛ.​—Mɔlebɛbo 35:18-20; 44:20.

Dwuda hɔle zo bodole Dwosefi kɛ ɔmmamaa Bɛngyaman yɛ akɛlɛ. Ɔhanle bɔbɔ kɛ ɔbali Bɛngyaman agyakɛ anu yeayɛ akɛlɛ. Akee ɔhanle arɛlebɔlɛ edwɛkɛ ɛhye: “Ɔluakɛ saa kakula ne ɛmboka nwolɛ a ɛnee kɛ mesi meazia meahɔ egya anwo lɔ ɛ? Mesulo mɔɔ kɛzi egya anwo zo la.” (Mɔlebɛbo 44:18-34) Kɛkala, ɛhye le daselɛ mɔɔ kile  kɛ yehakyi a. Tɛ anlubɛnwo angome a ɔhilele a, emomu eza ɔlale anwunvɔnezelɛ, atiakunlukɛnlɛma nee ahunluyelɛyelalɛ ali.

Dwosefi angola ɔ nwo sɔ bieko. Ɛnee akee ɔwɔ kɛ ɔda ye nganeɛdelɛ ali. Ɔmaanle ye sonvolɛma amuala vindele, akee ɔzunle alɔbɔlɛ ɛzunlɛ ɔmaanle bɛdele ɔ ne wɔ Falo suakunlu ɛkɛ. Akee ɔlale ɔ nwo ali kɛ: “Medame a mele Dwosefi.” Ɔyɛle ɔ mediema ne mɔ mɔɔ bɛ ahonle ɛdu la atuu na ɔhilele kɛ yeva bɛ ɛtane mɔɔ bɛyɛle ye la amuala yehyɛ bɛ. (Mɔlebɛbo 45:1-15) Yemɔti ɔlale Gyihova mɔɔ fa ɛtane kyɛ bɔkɔɔ la subane ne bie ali. (Edwɛndolɛ 86:5) Asoo zɔhane a yɛyɛ a?

Mekɛ mɔɔ Falo dele mɔɔ hɔle zo amuala wɔ Dwosefi sua nu ɛkɛ la, ɔvɛlɛle Dwosefi na ɔhanle kɛ ɔmaa ɔ ze nee ye abusua ne kɔsɔɔti ɛrɛla ɛradɛnla Yigyibiti. Yeangyɛ biala yɛɛ ɔ nee ye abusua ne bɔle nu a. Gyekɔbo zunle na ɔhanle kɛ: “Kɛkala mɔɔ menwu ɛ nyunlu na menwu kɛ ɛtɛte ngoane nu la, mewu bɔbɔ a ɔnyɛ ɛhwee.”​—Mɔlebɛbo 45:16-28; 46:29, 30.

Nɔhalɛ nu, Gyekɔbo dɛnlanle aze ɛvolɛ 17 bieko wɔ Yigyibiti. Ɔdɛnlanle aze ɔhyɛle na ɔyilale ɔ mra 12 ne wɔ ngapezo adenle zo. Ɔ ra, Dwosefi mɔɔ tɔ zo 11 la nyianle nyilalɛ dɔɔnwo mɔɔ ɛnee le belamunli ralɛ ne ɛdeɛ la. Yizilayɛ mbusua nwiɔ bavi ye ɛkɛ. Na Dwuda mɔɔ tɔ zo nna la mɔɔ lile ɔ mediema ne mɔ anyunlu lale anlubɛnwo subane ali la noko ɛ? Ɔnyianle nyilalɛ kpole: Mɛzaya ne bavi ye abusua ne anu a ara a!​—Mɔlebɛbo, tile 48, 49.

Mekɛ mɔɔ Gyekɔbo lile ɛvolɛ 147 na ɔwule la, Dwosefi amediema ne mɔ zulole kɛ bɛ diema ne mɔɔ ɛnyia tumi la bɛali nzenralɛ. Noko Dwosefi vile ɛlɔlɛ nu kyekyele bɛ rɛle. Ɛnee yela subane ɛhye ali mekɛ tendenle ɔvi mekɛ mɔɔ Gyihova maanle ye abusua ne rale Yigyibiti la, yemɔti ɔnle kɛ ɔ mediema ne mɔ di nyane wɔ mɔɔ zile la anwo. Akee ɔbizale kpuya ɛhye kɛ: ‘Mebahola meagyinla Nyamenle agyakɛ anu ɔ?’ (Mɔlebɛbo 15:13; 45:7, 8; 50:15-21) Dwosefi nwunle kɛ Gyihova le Ndɛnebuavolɛ mɔɔ di munli. Akee Dwosefi a le nwane mɔɔ ɔwɔ kɛ ɔtwe menli mɔɔ Gyihova ɛva bɛ ɛtane ɛhyɛ bɛ la anzo a?​—Hibuluma 10:30.

Asoo ɔyɛ se kɛ ɛbava ɛtane wɔahyɛ? Ɔbahola yeayɛ se wɔ mekɛ mɔɔ awie anyefuu kɛvo yɛ la. Noko, saa yɛfi yɛ ahonle nu yɛfa bɛdabɛ mɔɔ bɛnlu bɛ nwo nɔhalɛ nu la ɛtane yɛkyɛ bɛ a, ɔbaboa yɛ nee ahenle. Saa yɛyɛ ye zɔ a, ɛnee yɛlɛsukoa Dwosefi diedi ne nee ye anwunvɔnezelɛ Selɛ, Gyihova neazo ne.