Menyinle wɔ Montreal, suakpole bie mɔɔ gyima dɔɔnwo ɛnle ɛkɛ la azo. Menyianle siane nsia la yɛɛ me papa wule a, na ɛhye maanle debie biala dɔle me mame asa zo. Yɛle ngakula mɔtwɛ na medame a mele ekyi a.

Mekɛ mɔɔ melɛnyi la, ɛnee nyile ɛtane ala a meno a, meto kyakya, meyɛ basabasa, na me nee nwulema tu. Menyianle ɛvolɛ bulu la, ɛnee tuutuuma nee menli mɔɔ bɔ bosea die mpaefoa mgbole la a soɔzoa me a. Ɛnee meta mebɔ adalɛ yɛɛ me nye die kɛ mebabɛlɛbɛla menli wɔ adenle biala azo. Ɛnee ɔle kɛ ayile mɔɔ meno la.

Menyianle ɛvolɛ 14 la, ɛnee akee mebe wɔ menli ɛbɛlɛbɛlalɛ nu. Kɛ neazo la, ɛnee metɔ wate, ngɛba yɛɛ kpɔdelera mɔɔ ezukoa nvutuke ekyi bie a wɔ nu la dɔɔnwo na mekɛlɛ nwolɛ kɛ nvutuke dɔɔnwo wɔ nu. Akee metɔne ye wɔ awɔdenle nee sotɔɔ mgbole mɔɔ kale gyigyi ɛkɛ la anyunlu. Ɛnee mefa me nwo mewula ezukoa alufudeɛ ɛkpondɛlɛ nu. Kenle ko bie, menyianle dɔla 10,000!

Menyianle ɛvolɛ 15 la yɛɛ bɛyele me bɛvile sukulu nu a, na ɛnee menlɛ ɛleka mɔɔ mebadɛnla a. Ɛnee meda gua zo, kale agyinlaleɛ, anzɛɛ me gɔnwo mɔ bie sua nu.

Ɔlua me mɛlɛbɛla ne ati, ɛnee kpolisima ta gyegye me. Kɛmɔ mendɔne awule ninyɛne la ati, bɛando me efiade ɛlɛ. Noko, ɛnee metua ezukoa mgbole ɔlua mɛlɛbɛla nee ninyɛne mɔɔ metɔne mɔɔ menlɛ nwolɛ tumi kɛlata la ati. Ɛnee medie ezukoa memaa menli mɔɔ bɔ bosea die mpaefoa mgbole mɔɔ menzulo awie biala a. Ɛnee ɔyɛ ɛzulolɛ, yemɔti ɔyɛ a, etu wɔ me nwo. Ɔdwu mekɛ ne bie noko a, me nee nwulema ekpunli kɔ.

Menyianle ɛvolɛ 17 la yɛɛ mendele Baebolo ne anwo edwɛkɛ a. Ɛnee me nee me nwewe bie mɔɔ bɔle ɔ bo kɛ ɔ nee Gyihova Alasevolɛ sukoa Baebolo ne la a de a. Noko akee, ɛnee menlie Baebolo ne ɛbɛlabɔlɛ kpalɛ nwo mɛla ne mendo nu, yemɔti mengyakyile ye na menvale raalɛ fofolɛ me nee ye dɛnlanle.

 Membɔle ɔ bo kɛ meyɛ nzenzaleɛ wɔ mekɛ mɔɔ me bɛlɛra ɛhye noko bɔle ɔ bo kɛ ɔ nee Alasevolɛ ne mɔ sukoa la! Ɔyɛle nzenzaleɛ wɔ ye ɛbɛlabɔlɛ nu, na me nye liele kɛ ɛnee ɔlɛnyia mɛlɛbɛnwoaze nee abotane subane la. Bɛdole ɛsalɛ bɛvɛlɛle me bɛmaanle mengɔle debiezukoalɛ wɔ Gyihova Alasevolɛ Belemgbunlililɛ Asalo. Menli mɔɔ bɛdi bɛ nwo eni na bɛlɛ atiakunlukɛnlɛma la liele me kɛnlɛma nu. Ɛnee metɛnwunle bie zɛhae ɛlɛ! Meande nganeɛ ɛlɛ kɛ me abusua ne dwenle me nwo; bɛanla ɛlɔlɛ nee ahunlunyele ɛhye bie ali bɛangile me wɔ me ngakula nu. Anyelielɛ mɔɔ menyianle ye wɔ Gyihova Alasevolɛ ne mɔ avinli la yɛɛ ɛnee melɛkpondɛ a. Alasevolɛ ne mɔ hanle kɛ bɛ nee me sukoa Baebolo ne la, menliele mendole nu.

Mɔɔ ɛnee melɛsukoa meavi Baebolo ne anu la liele me ngoane. Ɛnee me nee me gɔnwo mɔ nwiɔ ɛbɔ kpɔkɛ kɛ yɛbawua amaa meahola meadua me kyakya ne anwo kakɛ mɔɔ bo dɔla 50,000 la. Nea kɛzi me nye liele kɛ meangɔ la! Me gɔnwo mɔ nwiɔ ne hɔle. Bɛhyele ko, yɛɛ bɛhunle ko.

Mekɛ mɔɔ melɛsukoa Baebolo ne la, menwunle kɛ ɔwɔ kɛ meyɛ nzenzaleɛ dɔɔnwo. Kɛ neazo la, menzukoale mɔɔ Baebolo ne ka wɔ 1 Kɔlentema 6:10 la kɛ: “Bɛdabɛ mɔɔ bɛle nwule, bɛle anyebolo, bɛdabɛ mɔɔ nza ɛgya bɛ, bɛdabɛ mɔɔ bɛ nloa ɛdendɛlɛ ɛnyɛ fɛ nee bɛdabɛ mɔɔ bɛle ahɔdiawu la, biala ɛnrɛnyia Nyamenle Belemgbunlililɛ ne.” Mengengale ngyɛnu zɔhane la, kɛzi me ɛtane ne kpole de la maanle menzunle. Menwunle kɛ ɔwɔ kɛ mekakyi me subane bɔkɔɔ. (Wulomuma 12:2) Ɛnee meyɛ basabasa yɛɛ me nye yɛ se kpalɛ, na ɛnee adalɛ ala a mebɔ a.

Noko akee, eza menzukoale menvile Baebolo ne anu kɛ Gyihova se anwunvɔne yɛɛ ɔfa ɛtane ɔkyɛ. (Ayezaya 1:18) Menyɛle asɔne ɛsesebɛ kpalɛ, na menzɛlɛle Gyihova kɛ ɔboa me ɔmaa mengyakyi me ɛbɛla dɛba ne. Ye moalɛ zo mengolale mengakyile me subane. Mɔɔ menlimoale menyɛle la a le kɛ mengyale bɛlɛra ne wɔ mɛla adenle zo.

Menyianle ɛvolɛ 24 la ɛnee megya, melɛ ngakula nsa. Akee ɔwɔ kɛ mekpondɛ gyima kpalɛ meyɛ. Noko ɛnee me nwomazukoalɛ wɔ aze yɛɛ menlɛ ngɛlata biala mɔɔ di me nwo daselɛ a. Bieko, menzɛlɛle Gyihova ɛsesebɛ. Akee mengɔle kɛ mekakpondɛ gyima. Menzele gyimamenlema kɛ mekpondɛ kɛ mekakyi me ɛbɛlabɔlɛ na mefa nɔhalɛlilɛ meyɛ gyima. Ɔdwu mekɛ ne bie a, mekilehile nu kɛ melɛsukoa Baebolo ne na mekpondɛ kɛ meyɛ maanle sonla kpalɛ. Gyimamenlema dɔɔnwo anva me. Awieleɛ kolaa ne, membukele me nu menganle me ngyegyelɛ muala mengilele ahenle mɔɔ ɛlɛbizebiza me edwɛkɛ la, na ɔhanle kɛ: “Mennwu deɛmɔti ɔwɔ kɛ mefa wɔ a, noko mete nganeɛ kɛ ɔwɔ kɛ mefa wɔ.” Medie medi kɛ ɛhye le me nzɛlɛlɛ ne anwo mualɛ. Yeangyɛ, bɛzɔnenle me nee me ye kɛ Gyihova Alasevolɛ.

Mede aze ɛnɛ ɔlua Baebolo ngyinlazo mɔɔ mefa medi gyima nee Keleseɛne ɛbɛlabɔlɛ kpalɛ ti. Melɛ abusua mɔɔ anyelielɛ wɔ nu. Melɛ adwenle mɔɔ anu te, ɔluakɛ melɛ anwodozo kɛ Gyihova ɛva me ɛtane ɛhyɛ me.

Ɛvolɛ 14 mɔɔ ɛze la, mefa dɔnehwele 70 mebɔ edwɛkpa ne nolo siane biala, meboa menli memaa bɛsukoa mɔɔ Baebolo ne kilehile la, yɛɛ me ye noko ɛraboka me nwo. Ɛvolɛ 30 mɔɔ ɛze la anu, me nye ɛlie kɛ meboa me gɔnwo mɔ gyimayɛvoma 22 memaa bɛbɔ ɔ bo bɛlɛsonle Gyihova. Metɛkɔ ɛleka mɔɔ bɛdi gua la, noko mengɔ kɛ mekabɛlɛbɛla awie kɛmɔ menyɛle ye mekɛ bie la. Kɛkala saa mekɔ ɛkɛ a, meta meka me diedi ne anwo edwɛkɛ mekile awie mɔ. Mekulo kɛ memaa bɛ debie: anyelazo mɔɔ bɛbanyia bɛadɛnla ewiade fofolɛ ne mɔɔ mɛlɛbɛla ɛnle ɛkɛ la.​—Edwɛndolɛ 37:10, 11.