Ɛnee bɛfa ɛdibolɛ bɛti abɛlɛ bɛyɛ paano. Ɛnee mraalɛ anzɛɛ sonvolɛma ta fa ɛdibolɛ di gyima wɔ sua biala anu alehyenlɛ biala. Wɔ tete ne, ɛnee bɛte ninyɛne ɛdinlɛ ne alehyenlɛ biala.—Adendulɛ 11:5; Gyɛlɛmaya 25:10.

Nvoninli mɔɔ bɛnwu ye wɔ tete Yigyibiti la di ɛhye anwo daselɛ. Ɛnee bɛfa abɛlɛ bɛgua bolɛ ɛdɛbaa mɔɔ ye avinli bɔ kɔ nu la azo. Ahenle mɔɔ ɛlɛti deɛ ne la koto ɛdibolɛ ne anyunlu na ɔsɔ bolɛ ralɛ ne anu. Akee ɔti abɛlɛ ne wɔ zolɛ. Buluku bie ka kɛ, bolɛ ralɛ ne ɛnlomboɛ bayɛ kilo 2 mɔɔ kɔ 4. Bɛto bɛbɔ awie wɔ konle nu a, ɔkola ɔku ye.—Maanlebuvolɛma 9:50-54.

Kɛmɔ abɛlɛ ma ɛdinlɛ nwo hyia amaa abusua bie anyia aleɛ ali la ati, Baebolo mɛla bie duale kɛ ɔnle kɛ bɛfa ɛdibolɛ bɛdi agyinla nu. Mɛla ne 24:6 se, “Ɔnle kɛ awie biala fa awie mɔɔ yebɔ ye bosea la ɛdibolɛ di agyinla nu. Saa ɔyɛ ye zɔhane a ɛnee ɔkile kɛ ɔlɛye ahenle ne mɔɔ bizale ye bosea ne la nee ye sua nu amra anloa anu aleɛ.”

Baebolo ne se Gyisɛse de “Selɛ ne anwo ɛkɛ.” (Dwɔn 1:18) Edwɛkɛ ɛhye maa yɛnwu kɛzi Gyisɛse bikye Nyamenle kpalɛ na yenyia ɔ nyunlu ɛlolɛ la. Ɛhye twe adwenle kɔ kɛzi ɛnee Dwuuma tɛnla di debie la azo.

Wɔ Gyisɛse mekɛ zo, ɛnee Dwuuma da ɛkpa mɔɔ bɛziezie wɔ ɛkponle mɔɔ bɛdi aleɛ wɔ zolɛ la azo. Menli mɔɔ ɛlɛdi aleɛ ne la ati wɔ ɛkponle ne anwo yɛɛ bɛ gyakɛ gua ɔ nzi lɔ, na bɛfa bɛ sa bɛne ne bɛsie esumi ne azo. Ɛhye maa bɛ sa fema da ɛkɛ ne mgbane. Kɛmɔ aleɛlilɛma ne da bɛ sa bɛne ne azo la ati, buluku bie hilele nu kɛ, “nrenyia ko ati bikye ko mɔɔ ɔzua ye la anyɛfo, na ɔlua ɛhye ati, bɛka kɛ ‘yela ɔ nwo ɛkɛ’ ne.”

Ɛnee bɛbu awie mɔɔ kɛla abusua tile ne anwo ɛkɛ anzɛɛ ahenle mɔɔ liele bɛ nyɛvolɛ wɔ ɛkponledolɛ ne abo la anwo ɛkɛ kɛ ɔle enililɛ kpole mɔɔ yenyia a. Ɛhye ati, wɔ Gyisɛse Akpabɛnwo ɛvoyia ne mɔɔ li awieleɛ la anu, “ɛnee ɛdoavolɛ ne mɔɔ Gyisɛse kulo ye edwɛkɛ,” mɔɔ yemɔ a le ɛzoanvolɛ Dwɔn la a ɛnee de Gyisɛse anwo ɛkɛ a. Yemɔti, ɛnee Dwɔn kola ‘bikye Gyisɛse’ na ɔbiza ye edwɛkɛ.—Dwɔn 13:23-25; 21:20.