PANAYIOTA nyinle wɔ bɔra bie mɔɔ wɔ Mɛdetɛlenia la azo. Kɛ bɛlɛra la, ɛnee ɔ nye die maanyɛlɛ nwo. Nzinlii, ɔrayɛle kɛlɛhɛlɛvolɛ ɔmaanle maanyɛlɛ fane bie mɔɔ wɔ namule ne mɔɔ ɔvi zolɛ la azo. Ɔhɔle azua nu ɔkpondɛle ezukoa ɔmaanle maanyɛlɛ fane ne bɔbɔ. Noko, nzinlii, Panayiota arɛle bɔle bɔkɔɔ. Ɛnee nyeyenu, anyebolo, mgbonde nee nungule wɔ bɛ avinli ɔnva nwo kɛ bɛka kɛ bɛle agɔnwolɛma la.

Bɛtetele Daniel wɔ abusua mɔɔ bɛkɔ asɔne kpalɛ la anu wɔ Ireland. Noko, ɔyɛ alɔbɔlɛ kɛ, ɔkakye ɛsɔfo ne mɔ nabalaba nyɛleɛ ne kpalɛ. Bie mɔ bo, bɛto kyakya na bɛwua asɔne ezukoa, ɔnva nwo kɛ bɛka bɛkile ye kɛ saa ɔyɛ ɛtane a bɛbayela ye wɔ hell la.

Jeffery vale mekɛ tendenle yɛle gyima maanle menli mɔɔ lɛ meli wɔ United Kingdom nee United States la. Ɔkakye fane dɔɔnwo mɔɔ ɛnee menli mɔɔ ɔ nee bɛ di gua la bɔ adalɛ wɔ mekɛ mɔɔ bɛ nee arane mgbanyima ɛlɛdi gua la. Ɛnee bɛkola bɛka edwɛkɛ biala mɔɔ bɛkulo la bɛbɛlɛbɛla awie mɔ amaa bɛ sa aha gyima bie.

Noko ɛhye ɛnle edwɛkɛ fofolɛ. Nabalabayɛlɛ ɛbu zo ɛnɛ wɔ dasanli ɛbɛlabɔlɛ kɔsɔɔti anu—maanyɛlɛ, ɛzonlenlɛ nee gualilɛma nu. Yɛnwu ye zɔ, ɔluakɛ bɛnyianle Nrelenza edwɛkɛkpɔkɛ “nabalaba” bɛvile Giliki edwɛkɛ mɔɔ kile tendɛvolɛ anzɛɛ awie mɔɔ gyi bama zo, mɔɔ ta fa debie ɛzulolɛ bie keda ɔ nyunlu la. Nzinlii, bɛhilele edwɛkɛkpɔkɛ ɛhye abo kɛ awie mɔɔ bɛlɛbɛla menli anzɛɛ ɔdua zo ɔdi ye angomedi bodane nwo gyima la.

Menli mɔɔ bɛfa ɛhye bɛdi bɛ la fa ɛya kpole kpalɛ na bɛfa edwɛkɛ ne bɛsie bɛ nu. Bie a, menli ɛhye mɔ bava ɛya na bɛaha kɛ: “Nabalabayɛlɛ! Asoo ɔbara awieleɛ?” Nyamenle Edwɛkɛ ne maa yɛnwu deɛmɔti yɛbahola yɛalie yɛali kɛ ɔ bo bapɛ la.

Baebolo ne maa yɛnwu kɛ sunsum nu abɔdeɛ bie mɔɔ bɛnnwu ye la a limoale lale nabalaba subane ɛhye ali a, na tɛ alesama ɔ. Mɔlebɛbo ne ala yɛɛ Seetan Abɔnsam yɛle ɔ nwo kɛ ɔle boavolɛ kpalɛ amaa yeabɛlɛbɛla Yive, raalɛ mɔɔ limoa la. (Mɔlebɛbo 3:1-5) Ɔvi mekɛ zɔhane, alesama dɔɔnwo ne ala ɛyɛ bɛ nwo kɛ asɛɛ bɛle menli kpalɛ, na bɛyɛ ɛhye amaa bɛabɛlɛbɛla awie mɔ na bɛ sa aha mɔɔ bɛkpondɛ la.

Mekɛ mɔɔ tete Yizilayɛ maanle ne vale bɛ nwo wulale adalɛ ɛzonlenlɛ nee sunsum nu nabalabayɛlɛ nu la, Nyamenle bɔle bɛ kɔkɔ fane dɔɔnwo wɔ mɔɔ bavi nu ara la anwo. Gyihova Nyamenle luale ngapezonli Ayezaya anwo zo hanle kɛ: “Menli ɛhye mɔ fa bɛ nloa mgbane a twe bikye me, bɛdi me eni  na bɛ ahonle ɛmbikye me.” (Ayezaya 29:13) Mɔɔ maanle ne kpole kɛ bɛbahakyi la, Nyamenle maanle maanle fofolɛ mɔɔ lɛ tumi la razɛkyele ɛleka mɔɔ Yizilayɛma yia sonle la—Gyɛlusalɛm nee ye ɛzonlenlɛ sua ne. Babelɔnma limoale zɛkyele ye wɔ 607 K.Y.M., yɛɛ awieleɛ bɔkɔɔ ne Wulomu ɛlɔnema zɛkyele ye wɔ 70 Y.M. Ɔda ali kɛ, Nyamenle ɛnlie nabalabayɛlɛ ɛndo nu.

Noko, Nyamenle nee Ɔ Ra, Gyisɛse bu alesama mɔɔ bɛdi nɔhalɛ na bɛlɛ ahonle kpalɛ la. Kɛ neazo la, nrenyia bie mɔɔ bɛfɛlɛ ye Natanayɛle la bikyele Gyisɛse wɔ mekɛ mɔɔ ɔbɔle ye ɛzonlenlɛ gyima ne abo la. Gyisɛse nwunle ye la, ɔdeanle nu kɛ: “Bɛnlea, Yizilayɛnli kpalɛ mɔɔ ɛnze adalɛ bɔ la ɛne!” (Dwɔn 1:47) Natanayɛle mɔɔ eza bɛfɛlɛ ye Baatɔlomiyu la rayɛle Gyisɛse ɛzoanvolɛma 12 ne anu ko.—Luku 6:13-16.

Gyisɛse nee ye ɛdoavolɛ ne mɔ dɛnlanle na ɔmaanle bɛnwunle Nyamenle adwenle. Ɛnee ɔnle kɛ bɛyɛ bɛ nwo nabalabama. Gyisɛse dendɛle ɛsesebɛ tiale asɔne mgbanyima mɔɔ ɛnee wɔ ɛkɛ ne la wɔ bɛ nabalaba nyɛleɛ ne anwo vale yɛle kɔkɔbɔlɛ maanle bɛ. Suzu mɔɔ bɛyɛle la bie mɔ anwo nea.

Bɛyɛle bɛ ‘tenleneyɛlɛ’ ne wɔ ɛnyelɛ zo. Gyisɛse zele ye tievolɛma kɛ: “Bɛnlea boɛ na bɛanyɛ bɛ Nyamenle ɛzonlenlɛ gyima [anzɛɛ tenleneyɛlɛ] ne ɛnyelɛ zo . . . kɛmɔ nabalabama ne mɔ yɛ la.” Eza ɔhanle kɛ saa bɛkyɛ debie a bɛyɛ ye “fealera nu.” Ɛnee ɔwɔ kɛ bɛyɛ bɛ nzɛlɛlɛ ne fealera nu amaa awie mɔ annwu bɛ. Ɛhye bamaa bɛ ɛzonlenlɛ ne ayɛ nɔhalɛ na ɔ Ze alie ado nu.—Mateyu 6:1-6.

Ɔngyɛ na bɛadendɛ bɛatia awie mɔ. Gyisɛse hanle kɛ: “Wɔmɔ nabalabanli! Dumua ye dubinli ne mɔɔ la ɛ nye zo la na wɔanwu debie kpalɛ, na wɔahola wɔaye mumunli ne mɔɔ la ɛ diema ne anye zo la.” (Mateyu 7:5) Saa yɛfa yɛ adwenle yɛsie awie mɔ nvonleɛ zo wɔ mekɛ mɔɔ yɛdayɛ mumua ne yɛyɛ nvonleɛ kpole la a, ɛnee yɛle nabalaba. Ɔluakɛ, nɔhalɛ nu, “menli kɔsɔɔti ɛyɛ ɛtane na bɛnfɛta Nyamenle anyunlunyia ne.”—Wulomuma 3:23.

Ɛnee bɛfa adwenle ɛtane bɛsie bɛ ti anu. Mekɛ bie, Falasiima ɛdoavolɛma nee Hɛlɔdo ɛdoavolɛma bizale Gyisɛse adwuledualɛ nwo kpuya. Bɛdole Gyisɛse agyiba bɛbizale ye kɛ: “Kilehilevolɛ, yɛze kɛ wɔmɔ ɛka nɔhalɛ. Ɛkilehile Nyamenle adenle ne nɔhalɛ nu.” Akee bɛzɔle ye bɛnleanle na bɛbizale ye kɛ: “Asoo ɔfa yɛ mɛla ne adenle zo kɛ yɛkɛdua adwule yɛkɛmaa Wulomu Maanle Maanle Belemgbunli ne?” Gyisɛse buale bɛ kɛ: “Bɛmɛ nabalabama, duzu ati a bɛsɔ me bɛanlea ɛ?” Ɔfɛta kɛ Gyisɛse vɛlɛle bɛ nabalabama la, ɔluakɛ ɛnee bɛmkpondɛ kpuya ne anwo mualɛ emomu ɛnee bɛkpondɛ kɛ ‘bɛdua kpuya ɛbizalɛ zo bɛkye ye.’—Mateyu 22:15-22.

Mekɛ mɔɔ bɛvale Kilisiene asafo ne bɛziele ɛkɛ ne wɔ Pɛntekɔso 33 Y.M. la, ɛnee menli mɔɔ wɔ nu la bahola ali nɔhalɛ. Nɔhalɛ Kilisienema bɔle mɔdenle kɛ bɛye nabalaba subane bɛavi bɛ nu. Kɛ neazo la, Pita mɔɔ boka ɛzoanvolɛma 12 ne anwo la dule ɔ gɔnwo mɔ Kilisienema folɛ kɛ bɛyɛ “tieyɛ wɔ nɔhalɛ ne anwo . . . na bɛnyia ɛhulolɛ [mɔɔ nabalaba ɛnle nu la] bɛmaa bɛ mediema diedima.” (1 Pita 1:22) Ɛzoanvolɛ Pɔɔlo dule ɔ gɔnwo mɔ gyimayɛvoma folɛ kɛ bɛnyia “ɛhulolɛ mɔɔ vi ahonle mɔɔ ɛtane ɛnle nu, adwenle mɔɔ nuhua te wienyi, nee diedi mɔɔ di munli la.”—1 Temɔte 1:5.

Tumi mɔɔ wɔ Gyisɛse nee ɛzoanvolɛma ne ngilehilelɛ ne mɔɔ yɛnwu ye wɔ Baebolo ne anu wɔ ɛvoyia mɔɔ limoa la, tɛde zɔ ɛnɛ. Pɔɔlo hɛlɛle kɛ: “Nyamenle Edwɛkɛ ne gyi zo na ɔyɛ se, ɔyɛ nla ɔtɛla dadeɛ anye nwiɔ biala. Ɔpɛ to, ɔdua ɛkɛla nee sunsum ayia zo, ɔgya mbowule agbɔkɛ nee bowule ɛnlome ɛweɛne na ɔfede adwenle nee ahonle nu ɔnwu bɛ nzuzulɛ muala.” (Hibuluma 4:12) Baebolo ngilehilelɛ ne mɔɔ yɛbanwu ye na yɛabɔ mɔdenle yɛava yɛabɔ yɛ ɛbɛla la ɛboa menli dɔɔnwo ɛmaa bɛhwe bɛ nwo bɛvi nabalabayɛlɛ nwo na  bɛlɛfa nɔhalɛlilɛ bɛabɔ bɛ ɛbɛla. Dwenle menli nsa ne mɔɔ yɛhanle bɛ nwo edwɛkɛ wɔ mɔlebɛbo ne la anwubielɛ ne anwo.

Panayiota ɛbɛlabɔlɛ hakyile wɔ mekɛ mɔɔ bɛdole ɛsalɛ bɛvɛlɛle ye kɛ ɔrɛla Gyihova Alasevolɛ Belemgbunlililɛ Asalo la. Yeannwu kɛ bɛyɛ bɛ nwo tenlene amaa awie mɔ anye alie bɛ nwo. Ɔka kɛ: “Menwunle nɔhalɛ ɛlɔlɛ nee nɔhalɛ anyelielɛ mɔɔ bɛkile ye wɔ menli nwo la, ɛhye le debie mɔɔ metɛnwunle bie ɛlɛ wɔ mekɛ tendenle mɔɔ menvale me nwo menwulale maanyɛlɛ nu la.”

Panayiota bɔle ɔ bo kɛ ɔsukoa Baebolo ne na ɔmaanle bɛzɔnenle ye. Ɛvolɛ 30 ɛpɛ nu. Ɔse: “Menyia asetɛnla kpalɛ, tɛ mekɛ mɔɔ ɛnee mekɔ azua nu mekanvo maanyɛlɛ fane bie la ɔ, emomu mɔɔ membɔle ɔ bo kɛ meka Nyamenle Belemgbunlililɛ ne—mɔɔ le adenle kokye mɔɔ ɔlua zo yɛbanyia ewiade mɔɔ pɛlepɛle wɔ nu anwo edwɛkɛ la.”

Daniel nyianle anyuhɔlɛ wɔ Kilisiene asafo ne anu na bɛmaanle ye gyimalilɛ bie mɔ. Ɛvolɛ ekyii pɛle nu la, ɔvonle na ye adwenle bɔle ɔ bo kɛ ɔbua ye folɛ. Ɔhanle kɛ, “Nabalabayɛlɛ mɔɔ ɛnee menwu ye wɔ me asɔne ne anu la maanle mendele nganeɛ kɛ ɔwɔ kɛ mefa me ɛzonlenlɛ nwo adenle ne meto ɛkɛ. Ɛnee mengulo kɛ me mediema Kilisienema banwu kɛ mele nabalaba.”

Ɔyɛ anyelielɛ kɛ, mekɛ mɔɔ bɛboale Daniel la anzi, ɔdele nganeɛ kɛ ɔbahola yeava adwenle mɔɔ anu te la yeazonle na ɔvale anyelielɛ ɔliele ɛzonlelilɛ mɔɔ wɔ asafo ne anu la ɔdole nu bieko. Bɛnwu nɔhalɛlilɛ ɛhye wɔ bɛdabɛ mɔɔ bɛsonle Nyamenle mɔɔ nabalabayɛlɛ ɛnle bɛ nu la anwo. Bɛye “dubinli ne” mɔɔ la bɛ nye zo la kolaa na bɛaye “mumunli ne” mɔɔ la bɛ diema anye zo la.

Jeffery mɔɔ vale ye mekɛ kɔsɔɔti yɛle gualilɛ nwo gyima la hanle kɛ: “Kɛmɔ menyianle Baebolo ne anu ndelebɛbo la ati, menwunle kɛ menrɛhola menrɛyɛ gualilɛnli mɔɔ meye nloa anu, meka edwɛkɛ biala amaa meanyia mɔɔ mekpondɛ la. Baebolo ngyɛnu mɔɔ maanle me adwenle buale me fɔlɛ la a le Mrɛlɛbulɛ 11:1 mɔɔ se ‘Gyihova kyi tone mɔɔ bɛwua nu la.’” Jeffery mɔɔ ɛnle kɛ bɛdabɛ mɔɔ bɛbizale Gyisɛse adwuledualɛ nwo edwɛkɛ ne la, zukoale kɛ ɔnrɛva debie biala ɔnrɛvea ɔ mediema nee bɛdabɛ mɔɔ bɛnle diedima la.

Gyihova Alasevolɛ mgbe dɔɔnwo mɔɔ wɔ ewiade amuala la ɛlɛbɔ mɔdenle kɛ bɛbava mɔɔ bɛsukoa ye wɔ Baebolo ne anu la bɛabɔ bɛ ɛbɛla. Bɛlɛbɔ mɔdenle kɛ ‘bɛbava bɛ su fofolɛ ne mɔɔ Nyamenle ɛbɔ ye kɛ ɔdaye ye ɛsaso na ɔkile ɔ nwo wɔ nɔhalɛ ɛbɛla mɔɔ tenrɛ na ɔle nwuanzaanwu la anu la bɛawula.’ (Ɛfɛsɛsema 4:24) Yɛlɛmaa wɔ anwosesebɛ kɛ kpondɛ menli holɛ ko mɔɔ Gyihova Alasevolɛ ne mɔ de, mɔɔ bɛdie bɛdi nee kɛzi bɛbahola bɛaboa wɔ bɛamaa wɔazukoa Nyamenle ewiade fofolɛ ne mɔɔ yeva yebɔ ɛwɔkɛ la anwo debie la. Ɛkɛ ne a “pɛlepɛlelilɛ” wɔ a, na nabalabayɛlɛ ɛnrɛdɛnla ɛkɛ ne bieko.—2 Pita 3:13.