Bɛwole me wɔ Puerto Limón, sua bie mɔɔ meli agyinlaleɛ wɔ ɛkɛ wɔ Costa Rica aduduleɛ ɛnwea zo la. Me awovolɛ wole ngakula mɔtwɛ, ɛnee metɔ zo nsuu. Menyianle ɛvolɛ mɔtwɛ la yɛɛ me papa wule a. Ɔti me mame angomekye a tetele yɛ a.

Ɛnee me nye die baseball nwo kpalɛ. Mele kakula la ɛnee me nye die nwɔhoalilɛ nwo. Ɔka ekyii na meanyia ɛvolɛ 20 la, menvale me nwo membɔle baseball eku bie mɔɔ bɛndua bɛ kakɛ la anwo. Mekɛ mɔɔ mewɔ eku zɔhane anu la, nrenyia bie hanle kɛ ɔmaa meahɔ baseball eku fofolɛ bie mɔɔ bɛbadua me kakɛ la anu wɔ Nicaragua. Noko kɛmɔ ɛnee melɛnea me mame mɔɔ ɛnde kpɔkɛ la ati, meangɔ. Meanlie ɛsalɛdolɛ zɔhane meando nu. Nzinlii, awie fofolɛ dole ɔ sa vɛlɛle me kɛ memboka Costa Rica baseball eku ne anwo, ɛnee menli mɔɔ wɔ eku ngyikyi ne mɔ anu la a bɛva bɛ bɛde eku ɛhye a. Menliele nwolɛ adenle ɛhye mendole nu. Ɛnee meboka Costa Rica baseball eku ne anwo ɔvi 1949 kɔdwu 1952 na yɛbɔle baseball wɔ ɛleka ngakyile le kɛ Cuba, Mexico, nee Nicaragua. Ɛnee amgba meze ye bɔ kpalɛ, mekola mebɔ 17 metoa zo mɔɔ menvo a. Saa mete kɛ menli ne ɛlɛteɛdea nu abɔ me duma a, ɛnee me nye ɛlie!

Ɔyɛ nyane kɛ, eza membɔle ɛbɛla ɛtane. Ɛnee melɛ nwewe ko ala ɛdeɛ, noko ɛnee medoɔdoa mraalɛ gyɛne. Eza ɛnee meno nza dɔɔnwo. Kenle ko, membole kɛ tandi ɔti meannwu kɛzi ɔyɛle mɔɔ mendwule sua nu a! Bieko, ɛnee meto kyakya.

Mekɛ ɛhye anu ala yɛɛ me mame rayɛle Gyihova Dasevolɛ a. Ɔbɔle mɔdenle kɛ ɔka ye diedi ne anwo edwɛkɛ yeahile me, noko ɛnee nzule lua bolɛ nwo ɔluakɛ ɛnee me ti ɛmi me bɔlo ɛbɔlɛ ne anu. Saa ɛnee melɛdi nwɔhoa a mende ɛhɔne! Mefa me adwenle muala mesie nwɔhoa ne azo. Mengulole baseball mendɛlale debie biala!

Noko mɔɔ menyianle ɛvolɛ 29 la, membodale kpole bie wɔ mekɛ mɔɔ menyɛle kɛ mekye bɔlo la. Mendele kpɔkɛ la, menyɛle  kɛ menrɛbɔ bɔlo menrɛlie ezukoa bieko. Ɛnee eku bie mɔɔ bɔ baseball mɔɔ bɛndua bɛ kakɛ la bikye me sua nu, ɔti ɛnee mekile bɛ.

Wɔ 1957, bɛdole ɛsalɛ bɛvɛlɛle me wɔ Gyihova Alasevolɛ nyianu bie mɔɔ bɛyɛle ye wɔ nwɔhoalilɛleka bie mɔɔ ɛnee mebɔ baseball wɔ ɛkɛ la abo. Mɔɔ mede menli ne anu la, menwunle kɛzi Alasevolɛ ne mɔ da ɛbulɛ ali la, ɛnee bɛnle kɛ menli mɔɔ nea baseball mɔɔ yɛ bɛ ninyɛne basabasa la. Mɔɔ menwunle ye wɔ nyianu ne abo la hanle me maanle me nee Alasevolɛ ne mɔ bɔle Baebolo ɛzukoalɛ bo na mengɔle bɛ debiezukoalɛ ne mɔ.

Me nye liele Baebolo ngilehilelɛ dɔɔnwo mɔɔ menzukoale la anwo. Kɛ neazo la, Gyisɛse hanle kɛ wɔ awieleɛ mekɛ ne anu, ye ɛdoavolɛma babɔ Nyamenle Belemgbunlililɛ ne anwo edwɛkpa ne nolo wɔ ewiade amuala. (Mateyu 24:14) Eza menzukoale kɛ nɔhalɛ Kilisienema ɛnlie ezukoa wɔ edwɛkɛhanlɛ gyima ne anwo. Gyisɛse hanle kɛ: “Bɛnyianle ye mgbane, bɛva bɛmaa mgbane.”​—Mateyu 10:8.

Wɔ me Baebolo ɛzukoalɛ ne anu, menvale mɔɔ menzukoale la mentotole mɔɔ menwunle ye wɔ Gyihova Alasevolɛ ne mɔ anwo la. Me nye liele mɔdenle mɔɔ bɛbɔ kɛ bɛbabɔ Nyamenle Belemgbunlililɛ ne anwo edwɛkpa ne nolo wɔ ewiade amuala la anwo. Menwunle ɛmaanlɛ subane mɔɔ Gyisɛse hilele Kilisienema kɛ bɛla ye ali la wɔ bɛ avinli. Ɔti mɔɔ mengengale Maake 10:21 na menwunle Gyisɛse ɛsalɛdolɛ ne mɔɔ se: “Bɛla badoa me” la, ɛnee mekulo kɛ meyɛ Dasevolɛ.

Ɔliele mekɛ ekyii na meahola meazi kpɔkɛ ɛhye. Kɛ neazo, ɛnee dapɛne biala mepɛ loto, na menvale ɛvolɛ dɔɔnwo a menyɛle ɛhye a. Noko, menzukoale ye wɔ Baebolo ne anu kɛ Nyamenle kyi azonvolɛ mɔɔ ‘sonle Saleɛ bozonle’ nee menli mɔɔ le anyebolo la. (Ayezaya 65:11; Kɔlɔsaema 3:5) Ɔti mengyakyile kyakyadolɛ. Mengyakyile la, ye Molɛ mɔɔ limoa la anu me nɔma ne dole! Ɔluakɛ meanpɛ loto zɔhane dapɛne ne la ati, menli golole me nwo na bɛpiepianle me kɛ mempɛ ye bieko, noko meandie bɛ. Ɔvi mekɛ zɔhane meando kyakya bieko.

Menyiale “subane fofolɛ ne” mɔɔ ɛnee ɔwɔ kɛ mewula la anwo sɔnea bieko wɔ kenle mɔɔ bɛzɔnenle me kɛ Gyihova Dasevolɛ la. (Ɛfɛsɛsema 4:24) Ye nɔsolɛ nu mɔɔ melɛkɔ nyɛvolɛ sua mɔɔ ɛnee mela nu la anu la menwunle me nwewe dɛba ne wɔ me anlenkɛ ne anloa. Ɔzele me kɛ, “Sammy, maa yɛlie yɛ nye ekyii ɛ!” Na menganle ye ndɛndɛ kɛ, “Kyɛkyɛ!” Memaanle ɔdele ɔ bo kɛ, kɛkala melɛfa Baebolo ngyinlazo meali gyima. (1 Kɔlentema 6:18) Ɔdeanle nu kɛ “Nzɔne?” Akee ɔmaanle ɔyɛle kɛ asɛɛ mɔɔ Baebolo ne ka ye wɔ adwɔmanebɔlɛ nwo la ɛngyia yemɔti ɔhanle kɛ memmaa yɛbɔ yɛ agɔnwolɛvalɛ ne abo bieko. Noko akee, mendwule menvale ɔ nwo zo na mendole me anlenkɛ ne anu. Ɛnɛ, ɔyɛ me fɛ kɛ ɔvi 1958 mɔɔ membanyɛle Dasevolɛ la, meva nɔhalɛlilɛ mezɔ nzenzaleɛ mɔɔ menyɛle ye wɔ me ɛbɛlabɔlɛ nu la anu.

Menyia nvasoɛ dɔɔnwo wɔ Baebolo adehilelɛ mɔɔ menvale menlile gyima la azo. Nvasoɛ ne bie a le kɛ ɛnɛ melɛ agɔnwolɛma kpalɛ, me ɛbɛlabɔlɛ ɛnyia ngyinlazo yɛɛ menyia nɔhalɛ anyelielɛ.

Me nye tɛdie baseball nwo, noko adwenle mɔɔ melɛ wɔ nwo la le ngakyile. Ɛnee mebɔ medie duma nee ezukoa, ninyɛne ɛhye mɔ ɛndɛnla ɛkɛ ne dahuu. Noko, me nee Nyamenle nee me mediema avinli agɔnwolɛvalɛ ne badɛnla ɛkɛ dahuu. Baebolo ne ka kɛ: “ewiade nee ye atiakunluwɔzo ɛlɛpɛ nu, noko awie mɔɔ yɛ Nyamenle ɛhulolɛdeɛ la de aze dahuu.” (1 Dwɔn 2:17) Ɛnɛ, mekulo Gyihova Nyamenle nee ye menli ne metɛla debie biala!