Kpa ndonwo mɔɔ ɔ bo ɛdelɛ ɛnyɛ se. Kɛ mɔɔ Gyisɛse yɛle la, fa ninyɛne ngyikyi kilehile ninyɛne mgbole nu, na fa ninyɛne mɔɔ ɔ bo ɛdelɛ ɛnyɛ se la kilehile ninyɛne kpomgbondee nu. Mmaka ninyɛne mɔɔ bamaa ndonwo ne ayɛ kpomgbondee la. Amaa wɔ tievolɛma ne adwenle angɔ ninyɛne mɔɔ ɔnvale wɔ edwɛkɛ ne anwo la azo la, nea kɛ wɔ ndonwo ne anu edwɛkɛ ne nee ɛzukoalɛdeɛ mɔɔ ɛlɛkilehile nu la yia.

Maa mɔɔ baboa wɔ tievolɛma la ɛdɛnla wɔ adwenle nu. Fa ninyɛne mɔɔ wɔ tievolɛma ze ye na bɛ nye balie nwo la yɛ ndonwo. Nea boɛ na wɔ ndonwo ne ammaa bɛ nyunlu angua aze anzɛɛ bɛanva ɛya.

Kilehile edwɛkɛ titili ne anu. Yɛ edwɛkɛ titili ne mɔ anwo ndonwo tɛ edwɛkɛ mɔɔ anwo ɛngyia dɔɔnwo la. Nea kɛ wɔ tievolɛma ne bahakye ɛzukoalɛdeɛ mɔɔ wɔ wɔ ndonwo ne anu la na tɛ ndonwo ne ala.