“Ɔwɔ kɛ bɛyɛ kilehilevolɛma.” (Hib. 5:12) Dwenle nwo nea! Gyihova mɔɔ le kilehilevolɛ mɔɔ tɛla biala wɔ anwuma nee aze la ɛdo ɛsalɛ ɛvɛlɛ yɛ kɛ yɛhilehile menli ɔ nwo debie! Gyimalilɛ biala mɔɔ yɛdua zo yɛkilehile Gyihova anwo nɔhalɛ edwɛkɛ wɔ abusua ne anu, asafo ne anzɛɛ daselɛlilɛ nu la le nwolɛ adenle yɛɛ ɛzonlelilɛ kpole. Kɛzi yɛbayɛ ɛhye ɛ?

Mualɛ ne wɔ edwɛkɛ mɔɔ ɛzoanvolɛ Pɔɔlo hɛlɛle hɔmaanle Timote la anu: “Maa ɛ nye ɛbolo bagua nu ɛgengalɛ, folɛdulɛ, nee ngilehilelɛ nwo.” Ɔdoale zo kɛ: “Saa ɛyɛ ye zɔhane a, ɛbalie ɛ nwo nee bɛdabɛ mɔɔ bɛtie wɔ la ngoane.” (1 Tim. 4:13, 16) Ɛlɛ ngoane edwɛkɛ mɔɔ ɔwɔ kɛ ɛbɔ ye nolo. Yemɔti ɔhyia kɛ ɛnyia anyuhɔlɛ wɔ kɛzi ɛkenga nee kɛzi ɛkilehile la anu. Bɛyɛ brohyua ɛhye amaa yeaboa wɔ yeamaa wɔadwu zɔhane bodane ne anwo. Ninyɛne mɔɔ wɔ nu la bie mɔ ɛne:

Kilehilevolɛ biala nee Gyihova ɛnzɛ. (Dwobu 36:22) Mekɛ mɔɔ brohyua ɛhye ɛlɛboa wɔ yeamaa wɔanyia anyuhɔlɛ kɛ kengavolɛ nee kilehilevolɛ kpalɛ la, kakye kɛ Gyihova ɛkɛ a yɛ edwɛkɛ ne vi a yɛɛ ɔdaye a ɔtwe menli ne a. (Dwɔn 6:44) Yemɔti, ta sɛlɛ sunsum nwuanzanwuanza ne. Ta fa Nyamenle Edwɛkɛ ne di gyima. Twe adwenle kɔ Gyihova anwo zo, tɛ ɛ nwo zo. Maa ɔyɛ wɔ bodane kɛ ɛbamaa wɔ tievolɛma anyia ɛhulolɛ kpole amaa ye.

Bɛdo ɛsalɛ bɛvɛlɛ wɔ kɛ ɛhilehile edwɛkɛ mɔɔ anwo hyia kpalɛ tɛla biala mɔɔ bɛva bɛmaa alesama la. Yɛlɛ anwodozo kɛ, wɔ mekɛ mɔɔ ɛlɛgyinla “anwosesebɛ ne mɔɔ Nyamenle fa maa la azo” wɔayɛ zɔ la, ɛbali konim.​—1 Pita 4:11.

Ɛ gɔnwo mɔ kilehilevolɛma,

Gyihova Alasevolɛ Neazo Eku