Foa 6

Deɛ Mɔɔ Ɔti Nyamenle Ɛmaa Amaneɛnwunlɛ Nwo Adenle La

1, 2. Kɛ ɔyɛle mɔɔ yɛ awovolɛ mɔɔ lumua la zɛkyele mɔlebɛbo kɛnlɛma mɔɔ Nyamenle vale manle bɛ la ɛ?

DUZU a angɔ boɛ a? Duzu a zile mɔɔ zɛkyele mɔlebɛbo kɛnlɛma ne mɔɔ Nyamenle vale manle yɛ awovolɛ mɔɔ lumua wɔ Yidɛn Paladaese ne anu la ɛ? Kɛ anrɛɛ yɛbanyia anzondwolɛ nee koyɛlɛ wɔ Paladaese la, duzu ati a amumuyɛ nee amaneɛnwunlɛ yɛɛ ɛhɔ zo ɛvolɛ apenle dɔɔnwo a?

² Deɛ mɔɔ ɔti ɔrale ye zɔ la a le kɛ, Adam nee Yive anva adenle mɔɔ bɛlɛ bɛkpa mɔɔ bɛkulo la bɛanli gyima kpalɛ. Bɛmanle bɛ rɛle vile kɛ saa bɛtwe  bɛ nwo bɛfi Nyamenle mɛla nwo a, ɔnrɛwie bɛ boɛ. Bɛhwenle bɛ nwo bɛvile Nyamenle abo na ɛnee bɛsuzu kɛ ɛhye ɛyɛlɛ bawie bɛ boɛ. Ɛhye ati bɛdɛlale adenle mɔɔ bɛlɛ bɛkpa mɔɔ bɛkulo ɛweɛne ne.—Mɔlebɛbo, tile 3.

Maanzaleɛ Tumililɛ nwo Edwɛkɛ Ne

3-5. Duzu ati a Nyamenle anzɛkye Adam nee Yive na yeambɔ debie biala abo fofolɛ a?

³ Duzu ati a Nyamenle anzɛkye Adam nee Yive na yeambɔ menli nwiɔ fofolɛ a? Ɛnee awie ɛzu ye maanzaleɛ tumililɛ, adenle mɔɔ ɔlɛ ɔdi tumi mɔɔ bɛngola bɛnlie bɛnvi ɔ sa nu la anwo kpolera.

⁴ Ɛnee edwɛkɛ ne gyi kpuyia ɛhye azo: Nwane a lɛ adenle di tumi a, na nwane tumililɛ a le kpalɛ a? Kɛmɔ Nyamenle le tumivolɛ bedevinli yɛɛ abɔdeɛ muala Bɔvolɛ la ati, yemɔ a ɔlɛ adenle ɔdi bɛ nwo zo tumi a. Eza ɔze nrɛlɛbɛ ɔtɛla awie biala, yemɔti ye tumililɛ le kpalɛ maa abɔdeɛ muala. Noko akee, Nyamenle tumililɛ nwo ɛra edwɛkɛ. Bieko, asoo ɛnee nvonleɛ wɔ sonla mɔɔ Nyamenle bɔle ye la anwo ɔ? Amozii, yɛbazuzu kɛzi edwɛkɛ ɛhye fane dasanli nɔhalɛlilɛ nwo la anwo.

⁵ Sonla dele ɔ nwo vile Nyamenle anwo la, ɔmanle edwɛkɛ fofolɛ rale: Saa Nyamenle anli alesama anwo zo a, asoo ɔbawie bɛ boɛ? Ɛnee Bɔvolɛ ne ze edwɛkɛ ɛhye anwo mualɛ, noko saa alesama banwu ye a, ɛnee ɔwɔ kɛ ɔmaa bɛ sa ka fanwodi ne mɔɔ bɛkpondɛ la. Bɛdabɛ mumua ne a bɛkpale kɛ bɛdi bɛ ti anwo a, yemɔti Nyamenle manle bɛ adenle.

6, 7. Duzu ati a Nyamenle ɛmaa alesama ɛli bɛ ti anwo ɛvolɛ dɔɔnwo a?

⁶ Ɛnee saa Nyamenle maa alesama adenle maa bɛfa bɛ fanwodi ne bɛdi gyima kɛmɔ bɛkulo la a, yɛɛ ɔbala ali saa ye tumililɛ ne a le kpalɛ anzɛɛ alesama ɛdeɛ ne a. Yɛɛ eza ɔwɔ kɛ mekɛ ne yɛ tendenle mɔɔ bamaa alesamaa ahola ayɛ debie biala mɔɔ bɛkulo kɛ bɛyɛ la wɔ maanyɛlɛ, ninyɛne ɛyɛlɛ, abɔdeɛ nwo nrɛlɛbɛ yɛɛ ayileyɛlɛ nu a.

⁷ Ɛhye ati, Nyamenle ɛmaa bɛ adenle toonwo yeradwu ɛnɛ amaa yeala ali kɛ saa alesama di bɛ ti anwo a ɔnrɛwie bɛ boɛ. Yemɔti menli ɛhola ɛkpa kɛ bɛbayɛ atiakunlukɛnlɛma anzɛɛ atisesebɛ, bɛbanyia ɛhulolɛ anzɛɛ ɛkpɔlɛ bɛamaa bɛ nwo, bɛbayɛ ninyɛne mɔɔ tenrɛ anzɛɛ mɔɔ ɛndenrɛ. Noko bɛnyia mɔɔ bɛkpa la anwo ahatualɛ: kpalɛyɛlɛ nee anzonudwolɛ anzɛɛ ɛtaneyɛlɛ nee amaneɛnwunlɛ.

Sunsum nu Abɔdeɛ Dele Atua

8, 9. (a) Kɛ ɔyɛle mɔɔ atuadelɛ rale anwuma ɛ? (b) Nwane mɔ bieko a Seetan bɛlɛbɛlale bɛ bokale Adam nee Yive anwo a?

⁸ Edwɛkɛ bieko wɔ ɛkɛ mɔɔ ɔwɔ kɛ yɛsuzu nwo. Tɛ yɛ awovolɛ mɔɔ lumua la angome a dele atua tiale Nyamenle tumililɛ a. Ɛnee nwane bieko a wɔ ɛkɛ wɔ zɔhane mekɛ ne a? Sunsum nu abɔdeɛ ne mɔ ɔ. Kolaa na Nyamenle abɔ sonla la, ɔlumuale ɔbɔle sunsum nu abɔdeɛ mɔɔ bɛlɛ tumi bɛtɛla sonla, anwumabɔvolɛ dɔɔnwo ɔguale anwuma. Ɛnee bɛdabɛ noko bɛlɛ adenle bɛkpa mɔɔ bɛkulo, na ɛnee ɔwɔ kɛ bɛbɛlɛ bɛ nwo aze bɛmaa Nyamenle tumililɛ.—Dwobu 38:7; Edwɛndolɛ 104:4; Yekile 5:11.

⁹ Baebolo ne kile kɛ atuadelɛ bɔle ɔ bo wɔ anwuma. Ɛnee sunsum nu abɔdeɛ bie kulo kɛ  ɔnyia fanwodi mɔɔ ɛnlɛ ɛweɛne. Ɛnee ɔkpondɛ kɛ alesama sonle ye bɔbɔ. (Mateyu 4:8, 9) Zɔhane sunsum nu abɔdeɛ ne bɔle adalɛ hilele Adam nee Yive kɛ Nyamenle ɛlɛfa debie kpalɛ avea bɛ na ɛhye manle bɛdele atua. (Mɔlebɛbo 3:1-5) Ɛhye ati, bɛfɛlɛ ye Abɔnsam (Sokpavolɛ) yɛɛ Seetan (Kpɔvolɛ). Amozii ɔbɛlɛbɛlale sunsum nu abɔdeɛ fofolɛ ɔmanle bɛdele atua. Bɛravɛlɛle bɛ awozonle anzɛɛ sunsum evinli.—Mɛla ne 32:17; Yekile 12:9; 16:14.

10. Duzu a vile alesama nee sunsum nu abɔdeɛ ne mɔ atuadelɛ ne anu rale a?

¹⁰ Mekɛ mɔɔ alesama dele Nyamenle anwo atua la, bɛvale bɛ nwo bɛhɔwulale Seetan nee ye sunsum evinli ne mɔ tumi bo. Ɛhye ati a Baebolo ne fɛlɛ Seetan kɛ “ɛtane ewiade ɛhye nyamenle” a, na ‘yezi bɛdabɛ mɔɔ bɛnlie bɛnli la adwenle ne anye.’ Nyamenle Edwɛkɛ ne ka kɛ “Abɔnsam di ɛtane ewiade ye azo belemgbunli.” Gyisɛse mumua ne hanle kɛ ‘Seetan a sie ɛtane ewiade ɛhye a.’—2 Kɔlentema 4:4; 1 Dwɔn 5:19; Dwɔn 12:31.

Edwɛkɛ Nwiɔ Ne

11. Edwɛkɛ boni bieko a, Seetan luale zo dendɛle tiale Nyamenle a?

¹¹ Eza Seetan hanle edwɛkɛ bieko tiale Nyamenle. Wɔ adenle bie azo, ɛnee ɔlɛka kɛ Nyamenle ambɔ sonla kpalɛ na awie biala ɛnle ɛkɛ mɔɔ ɔbayɛ ninyɛne mɔɔ tenrɛ wɔ mekɛ mɔɔ ɔlɛyia ngyegyelɛ la. Nɔhalɛ nu, ɔlale ye ali kɛ saa sonla nwu amaneɛ a, ɔbakpo Nyamenle. (Dwobu 2:1-5) Wɔ adenle ɛhye azo, Seetan manle alesama nɔhalɛlilɛ nwo rale edwɛkɛ.

12-14. Kɛzi mekɛ mɔɔ bagua nu la bamaa yɛanwu nɔhalɛ mɔɔ wɔ edwɛkɛ nwiɔ ne mɔɔ Seetan vale rale la anu ɛ?

¹² Yemɔti, Nyamenle ɛmaa mekɛ dɔɔnwo ɛgua nu amaa ye abɔdeɛ mɔɔ ze nrɛlɛbɛ la anwu kɛzi ɔbali zɛhae edwɛkɛ ne nee Nyamenle tumililɛ nwo edwɛkɛ ne anwo gyima la. (Fa to Adendulɛ 9:16 anwo.) Ɛnee mɔɔ bazi wɔ alesama ɛbɛlabɔlɛ nu la bamaa nɔhalɛ mɔɔ wɔ zɛhae edwɛkɛ nwiɔ ye anu la ala ali.

¹³ Mɔɔ lumua la, duzu a mekɛ ne bamaa yɛanwu ye wɔ Nyamenle maanzaleɛ tumililɛ, adenle mɔɔ ɔlɛ ɔdi tumi la anwo a? Asoo alesama bahola anlea bɛ nwo zo boɛ adɛla Nyamenle? Asoo sonla ngyehyɛleɛ mɔɔ ɛnvi Nyamenle la bahola amaa yɛanyia ewiade mɔɔ anyelielɛ wɔ nu na konle, ɛtanelilɛ, nee nzisi ɛnle nu la ɔ? Asoo bɛ nuhua bie bahola aye ehyia avi ɛkɛ na yeamaa menli kɔsɔɔti asa aha mɔɔ bɛkpondɛ la? Asoo bɛbahola bɛaye anwodolɛ, mgbanyinliyɛlɛ yɛɛ ewule bɛavi ɛkɛ ɔ? Nyamenle tumililɛ ne bahola ayɛ ɛhye mɔ amuala.—Mɔlebɛbo 1:26-31.

¹⁴ Mɔɔ fane edwɛkɛ mɔɔ tɔ zo nwiɔ anwo la, duzu a mekɛ ne bamaa yɛanwu ye wɔ bolɛ mɔɔ alesama sonle la anwo a? Asoo nvonleɛ wɔ kɛzi Nyamenle bɔle alesama la anwo? Asoo bɛ nuhua bie mɔ bayɛ mɔɔ tenrɛ la wɔ mekɛ mɔɔ bɛlɛnwu amaneɛ la ɔ? Asoo bɛ nuhua bie mɔ bala ye ali kɛ bɛkulo Nyamenle tumililɛ bɛtɛla sonla ɛdeɛ ɔ?

[Debiezukoalɛ kpuyia ne mɔ]

[Nvoninli wɔ mukelɛ 13]

Nyamenle ɛmaa alesama mekɛ amaa bɛahola bɛayɛ debie biala mɔɔ bɛkulo kɛ bɛyɛ la

[Edwɛkɛ Ɛvileka]

Shuttle: Based on NASA photo