Foa 7

Duzu A Ɛvi Atuadelɛ Ne Anu Ɛra A?

1-3. Adenle boni azo a mekɛ mɔɔ ɛgua nu la ɛmaa yɛnwu kɛ mɔɔ Gyihova hanle la le nɔhalɛ a?

MƆƆ fane adenle mɔɔ Nyamenle lɛ di tumi nwo edwɛkɛ ne anwo la, duzu a ɛvi ɛvolɛ ɛya dɔɔnwo mɔɔ alesama ɛva ɛzie bɛ nwo mɔɔ Nyamenle asa ɛnle nu la anu ɛra a? Asoo menli ɛmaa yela ali kɛ bɛ tumililɛ le kpalɛ tɛla Nyamenle ɔ? Ɔda ali kɛ, saa yɛgyinla amumuyɛ mɔɔ menli ɛyɛ bɛ gɔnwo mɔ la azo yɛabua a, yɛbaha kɛ ɔnle zɔ.

² Mekɛ mɔɔ yɛ awovolɛ mɔɔ lumua la kpole Nyamenle tumililɛ la, munzule a rale a. Bɛ nee alesama abusua ne ɛnwu amaneɛ. Awie biala ɛnli bɛ nwo ɛzonle a, bɛdabɛ mumua ne bɛyɛle a. Nyamenle Edwɛkɛ ne se: “Bɛanli nɔhalɛ bɛammaa ye, bɛnle ɔ mra ko, ɔboalekɛ bɛ nwo lɛ dɛne.”—Mɛla ne 32:5.

³ Tetedwɛkɛ ɛmaa yɛnwu nɔhalɛ mɔɔ wɔ kɔkɔbɔlɛ mɔɔ Nyamenle vale manle Adam nee Yive kɛ saa bɛtwe bɛ nwo bɛfi ye ngyehyɛleɛ nwo a, bɛbatuto na awieleɛ bɔkɔɔ ne bawu la anu. (Mɔlebɛbo 2:17; 3:19) Bɛhwenle bɛ nwo bɛvile Nyamenle tumililɛ bo na mekɛ guale nu la amgba noko bɛtutole na bɛwule.

4. Duzu ati a bɛwo yɛ kɔsɔɔti mɔɔ yɛtɔ sinli, yɛ nwo to yɛ na yɛwu a?

⁴ Mɔɔ nzinlii zile bɛ bo zo amra amuala anwo  zo la a bɛhile nu wɔ Wulomuma 5:12 la: “Kɛmɔ ɛtane luale sonla ko [Adam, alesama abusua ne ati] anwo zo a rale ewiade, na sonla ko ne ɛtane ne vale ewule rale la, yɛɛ ewule dele kpondenle aleɛabo amra anwo zo a, ɔluakɛ menli kɔsɔɔti ɛyɛ ɛtane.” Zɔhane ati, mekɛ mɔɔ yɛ awovolɛ mɔɔ lumua dele atua tiale Nyamenle tumililɛ la, bɛrayɛle ɛtanevolɛma mɔɔ ɛnli munli. Kɛmɔ subane mɔɔ bɛfa bɛwo nwo mɛla ne de la, sinlidɔlɛ mɔɔ bɛnyianle la ala a ɛnee bɛbahola bɛava bɛagyakyi bɛ bo zo amra a. Yemɔti a bɛwo yɛ kɔsɔɔti mɔɔ yɛtɔ sinli, yɛ nwo to yɛ na yɛwu a.

5, 6. Duzu a tetedwɛkɛ ɛmaa yɛnwu ye wɔ mɔdenle mɔɔ sonla ɛbɔ kɛ ɔfa nɔhalɛ anzondwolɛ nee ɛkpazilɛ yeara la anwo a?

⁵ Ɛvoya dɔɔnwo ɛpɛ nu. Arelemgbunli mgbole ɛra ɛhɔ. Bɛzɔle arane biala mɔɔ rale adwenle nu la bɛnleanle. Noko akee, ninyɛne mɔɔ yɛ ɛzulolɛ la dɔɔnwo ɛdo alesama abusua ne. Wɔ ɛvolɛ apenle nsia anzi, anrɛɛ awie bazuzu kɛ alesama bahola anyia anyuhɔlɛ amaa bɛava anzondwolɛ, pɛlepɛlelilɛ nee ɛkpazilɛ bara ewiade amuala na anrɛɛ kɛkala atiakunlukɛnlɛmayɛlɛ, anwunvɔnezelɛ yɛɛ koyɛlɛ wɔ ɛkɛ.

⁶ Noko akee, nɔhalɛ nu, ninyɛne mgbane mgbane ngome a ɛra a. Sonla arane biala ɛtɛfale nɔhalɛ anzondwolɛ nee ɛkpazilɛ ɛtɛbɛlɛle alesama kɔsɔɔti. Wɔ ɛvoya mɔɔ tɔ zo 20 ne la angome anu, yɛnwu menli mgbe mgbe mɔɔ bɛhye bɛ bɛhuhu bɛ yɛɛ mɔɔ bo mgbe 100 mɔɔ ɛwu konle nu la. Wɔ yɛ mekɛ ye anu, bɛyɛ menli dɔɔnwo mɔɔ bɛnze bɛ nloa la kpɔdekpɔde, bɛhu bie mɔ, yɛɛ bɛdo bie mɔ efiade ɔlua adwenle gyɛne mɔɔ bɛnlie bɛndo nu wɔ maanyɛlɛ nu la ati.

Tɛnlabelɛ Mɔɔ wɔ Ɛkɛ Ɛnɛ

7. Kɛzi ɛbahilehile tɛnlabelɛ mɔɔ alesama abusua ne wɔ nu ɛnɛ la anu ɛ?

⁷ Bieko, suzu tɛnlabelɛ mɔɔ alesama abusua ne wɔ nu ɛnɛ la kɔsɔɔti anwo. Amumuyɛ nee basabasayɛlɛ ɛbu zo. Nyile ɛtane ɛnlonlɛ ɛbu zo. Ewule mɔɔ bɛnyia bɛfi nla nu la ɛbu zo. Ewule ɛtane AIDS ɛlɛka menli mgbe mgbe dɔɔnwo. Mekɛ mɔɔ menli ekyi bie ɛnyia bɛ nwo tɔ la, ɛnee ɛhɔne anzɛɛ ewule ewule ɛlɛku menli mgbe mgbe dɔɔnwo. Menli yɛ azɛlɛ ne azo evinli na bɛsɛkye ye. Abusua asetɛnla ɛzɛkye wɔ ɛleka biala na menli dɔɔnwo ɛmbɔ ɛbɛla kpalɛ. Nɔhalɛ nu, menli nyɛleɛ da Seetan, ‘ewiade nyamenle ne’ tumililɛ ɛtane ne ali. Ewiade ne mɔɔ ɔdi zo tumi la ɛnlɛ ɛlɔlɛ, ati yɛ se na yekpɔlɔ bɔkɔɔ.—2 Kɔlentema 4:4.

8. Duzu ati a yɛnrɛhola yɛnrɛha kɛ ninyɛne mɔ alesama ɛyɛ la le nɔhalɛ anyuhɔlɛ a?

⁸ Nyamenle ɛmaa alesama mekɛ dɔɔnwo amaa bahola bayɛ mɔɔ bɛbahola la amuala wɔ abɔdeɛ nwo nrɛlɛbɛnwunlɛ nee ninyɛne gyɛne ɛyɛlɛ nu. Noko, asoo yɛbahola yɛaha kɛ bɛnyia anyuhɔlɛ kpalɛ wɔ mekɛ mɔɔ bɛva adu mɔɔ ɔto ndɛndɛ, kale nee anwumalɛne mɔɔ bɛfa bɛkɔ konle nee nukelea akodeɛ bɛzie ɛda nee atwɛ agyakɛ anu la ɔ? Asoo ɔle anyuhɔlɛ wɔ mekɛ mɔɔ menli kola tu adenle kɔ anwomanyunlu noko bɛngola bɛndɛnla bɛmbɔ nu wɔ anzondwolɛ nu wɔ azɛlɛ ye azo la ɔ? Asoo ɔle anyuhɔlɛ wɔ mekɛ mɔɔ menli sulo kɛ bɛkɛvinde nɔɔzo anzɛɛ alehyenlɛ nu wɔ ewiade ɛleka bie mɔ bɔbɔ la ɔ?

 Mɔɔ Mekɛ Ɛmaa Yela Ali

9, 10. (a) Duzu a ɛvoya dɔɔnwo mɔɔ ɛze ɛhɔ la ɛmaa yela ali wienyi a? (b) Kɛmɔti a Nyamenle anlie adenle mɔɔ yɛlɛ yɛkpa mɔɔ yɛkulo la ɛ?

⁹ Neɛnleanu mɔɔ bɛyɛ ye ɛvoya dɔɔnwo anu la ɛla ye ali kɛ alesama ɛnrɛhola ɛnrɛhile bɛ nwo adenle kpalɛ mɔɔ Nyamenle moalɛ ɛmboka nwo a. Bɛnrɛhola bɛnrɛyɛ zɔ kɛmɔ bɛnrɛhola bɛnrɛhoati aleɛlilɛ, nzulenlonlɛ nee ɛnwomenlelielɛ wɔ azedɛnlanlɛ nu la. Ɔda ali wienyi kɛ: kɛmɔ yɛhyia aleɛ, nzule nee anwoma na yɛahola yɛadɛnla ngoane nu la, zɔhane ala a yɛhyia yɛ Bɔvolɛ ne adehilelɛ a.

¹⁰ Ɛtanelilɛ mɔɔ Nyamenle ɛmaa nwolɛ adenle la ɛmaa yela ali wienyi kɛ saa yɛanva adenle mɔɔ yɛlɛ yɛkpa mɔɔ yɛkulo la yɛanli gyima kpalɛ a, nyanelilɛ a vi nu ba a. Adenle mɔɔ yɛlɛ yɛkpa mɔɔ yɛkulo la sonle bolɛ kpalɛ, yemɔti kɛ anrɛɛ Nyamenle balie avi alesama asa nu la, yemaa bɛnwu mɔɔ saa bɛanva bɛanli gyima wɔ adenle kpalɛ zo a ɔbavi nu yeara la. Mɔɔ Nyamenle Edwɛkɛ ne ka la le nɔhalɛ: “Sonla ɔdaye ɔnlɛ ye ngoane zo tumi.” Eza ɛhye mɔɔ ɔka la noko le nɔhalɛ: “Bie mɔ lɛ tumi ɛlɛsisi bie mɔ bɛamaa bɛanwu amaneɛ.”—Gyɛlɛmaya 10:23; Nolobɔvo ne 8:9.

11. Asoo sonla tumililɛ bie ɛye amaneɛnwunlɛ ɛvi ɛkɛ?

¹¹ Ɛvolɛ mɔɔ bo apenle nsia mɔɔ Nyamenle ɛmaa alesama ɛva ɛzie bɛ nwo la ɛmaa yela ali wienyi kɛ sonla ɛnrɛhola ɛnrɛzi amaneɛnwunlɛ adenle. Sonla ɛtɛkolale ɛtɛyɛle ɛhye bie ɛlɛ. Kɛ neazo la, ɔnvane nwolɛ kɛ ɛnee Yizilayɛ Belemgbunli Sɔlɔmɔn ze nrɛlɛbɛ, ɔlɛ anwonyia nee tumi la, yeangola yeanye nzisi yeanvi sonla tumililɛ bo. (Nolobɔvo ne 4:1-3) Zɔhane ala a, wɔ yɛ mekɛ ye anu noko ɔnvane nwolɛ anyuhɔlɛ mɔɔ bɛnyia ye wɔ ninyɛne ɛyɛlɛ nu kenlensa ye la, ewiade mgbanyima ɛtɛkolale ɛtɛyele amaneɛnwunlɛ ɛtɛfile ɛkɛ a. Tetedwɛkɛ ɛmaa yela ali kɛ saa menli twe bɛ nwo fi Nyamenle tumililɛ bo a, ɔmmaa bɛ nwo ɛndɔ bɛ, emomu ɔmaa bɛnwu amaneɛ kpole.

Nyamenle Nwu Ninyɛne Kɔ Moa

12-14. Nvasoɛ mɔɔ ɛnlɛ awieleɛ la boni a bavi amaneɛnwunlɛ mɔɔ Nyamenle ɛmaa nwolɛ adenle la anu ara a?

¹² Ɛtane nwo adenle mɔɔ Nyamenle ɛmaa la ɛmaa yɛnwu amaneɛ dɔɔnwo. Noko, ɔyɛle ɛhye ɔluakɛ ɛnee ɔze mɔɔ awieleɛ kolaa ne ɔbavi nu yeara a. Mɔɔ Nyamenle ɛyɛ la bayɛ nvasoɛ amaa abɔdeɛ kɔsɔɔti, tɛ wɔ ɛvolɛ ekyi anzɛɛ apenle ekyi bie anu, emomu wɔ ɛvolɛ mgbe mgbe, ɛhɛe, wɔ mekɛ mɔɔ ɛnlɛ awieleɛ la anu.

¹³ Saa kenlebie awie fa adenle mɔɔ ɔlɛ ɔkpa mɔɔ ɔkulo la ɔdi gyima wɔ adenle ɛtane zo ɔtendɛ ɔtia kɛzi Nyamenle di ninyɛne nwo gyima la a, ɔnrɛhyia kɛ Nyamenle maa ye mekɛ ɔmaa ɔkile kɛ mɔɔ ɔlɛka la le nɔhalɛ. Nyamenle ɛlua ɛvolɛ apenle dɔɔnwo mɔɔ yemaa atuadelɛma ne adenle la azo yepɛ kilemunli yedo ɛkɛ mɔɔ saa edwɛkɛ zɛhae bie ba kenlebie wɔ maanzaleɛ ye ɛleka biala a ɔbahola yeagyinla zo yeabua a.

 ¹⁴ Kɛmɔ Gyihova ɛmaa amaneɛnwunlɛ nee ɛtanelilɛ nwo adenle wɔ yɛ mekɛ ye anu la ati, ɔbadwu zɔhane mekɛ ne la ɛnee yela ali wienyi kɛ debie biala mɔɔ ɛnle ye ɛhulolɛdeɛ la ɛnrɛwie boɛ. Ɛnee yela ali bɔkɔɔ kɛ kpɔkɛ biala mɔɔ menli anzɛɛ sunsum nu abɔdeɛ biala bali ɔ ti anwo abɔ la ɛnrɛhola ɛnrɛva nvasoɛ mɔɔ ɛnlɛ awieleɛ la ɛnrɛra. Yemɔti Nyamenle bali benle saa ɔsɛkye atuadelɛnli bie ɛkɛ ne ala a. “Amumuyɛma ɛdeɛ, ɔbazɛkye bɛ.”—Edwɛndolɛ 145:20; Wulomuma 3:4.

[Debiezukoalɛ kpuyia ne mɔ]

[Nvoninli wɔ mukelɛ 15]

Yɛ awovolɛ mɔɔ lumua la dele Nyamenle anwo atua la, bɛyɛle mrelera na bɛwule

[Nvoninli ne mɔɔ wɔ mukelɛ 16]

Munzule a ɛvi alesama tumililɛ mɔɔ Nyamenle asa ɛnle nu la anu ɛra a

[Edwɛkɛ Ɛvileka]

U.S. Coast Guard photo