Foa 8

Nyamenle Atiakunlukpɔkɛ Ɛlɛba Nu

1, 2. Duzu nziezielɛ a Nyamenle ɛyɛ kɛ ɔdua zo yeaye amaneɛnwunlɛ yeavi ɛkɛ a?

MENLI mɔɔ ɛde atua nee sunsum evinli tumililɛ ɛmaa alesama abusua ne ɛnwu amaneɛ wɔ ɛvoya dɔɔnwo anu. Noko, Nyamenle ɛtɛbule ɔ nye ɛtɛguale yɛ amaneɛnwunlɛ zo. Emomu, wɔ ɛvoya ɛhye mɔ amuala anu, ɔlɛyɛ nziezielɛ mɔɔ ɔbava yealie alesama yeavi ɛtaneyɛlɛ nee amaneɛnwunlɛ nu a.

² Mekɛ mɔɔ atuadelɛ zile wɔ Yidɛn la Nyamenle bɔle ɔ bo lale ye atiakunlukpɔkɛ mɔɔ ɔlɛ ye kɛ ɔbalua ye belemgbunlililɛ zo yeamaa azɛlɛ ɛhye ayɛ paladaese amaa menli la ali. (Mɔlebɛbo 3:15) Nzinlii, Gyisɛse mɔɔ ɔle Nyamenle kpɔmavolɛ la vale Nyamenle Belemgbunlililɛ ɛhye mɔɔ ɛlɛba la yɛle ye edwɛkɛhanlɛ gyima ne edwɛkɛtile. Ɔhanle kɛ ɔbayɛ alesama anyelazo kokye.—Daneɛle 2:44; Mateyu 6:9, 10; 12:21.

3. Kɛzi Gyisɛse vɛlɛle arane ne mɔɔ ɛlɛba arali azɛlɛ ye azo la ɛ, na duzu ati ɔ?

³ Gyisɛse vɛlɛle zɔhane arane ne mɔɔ Nyamenle ɛlɛfa ara la “Anwuma Belemgbunlililɛ,” ɔluakɛ ɔbali tumi yeavi anwuma. (Mateyu 4:17) Eza ɔvɛlɛle ye “Nyamenle Belemgbunlililɛ,” ɔboalekɛ Nyamenle a vale ziele ɛkɛ a. (Luku 17:20) Wɔ ɛvoya dɔɔnwo mɔɔ ɛze ɛhɔ la anu, Nyamenle luale ye sunsum ne azo manle menli hɛlɛle bɛdabɛ mɔɔ bɛbabɔ nu bɛayɛ zɔhane arane ne nee mɔɔ arane ne bayɛ la anwo ngapezo dole ɛkɛ.

Belemgbunli Fofolɛ Mɔɔ Bazie Azɛlɛ Ye

4, 5. Kɛ Nyamenle zile lale ye ali kɛ Gyisɛse a le ye Belemgbunli mɔɔ yekpa ye ɛ?

⁴ Kɛyɛ ɛvolɛ apenle nwiɔ mɔɔ ɛze ɛhɔ la, Gyisɛse manle ahenle mɔɔ bali Nyamenle Belemgbunlililɛ ne azo Belemgbunli anwo ngapezo mɔɔ wɔ ɛkɛ ne la rale nu. Ɔlale ye ali kɛ ɔdaye a Nyamenle ɛkpa ye kɛ anwuma arane ne mɔɔ bali alesama anwo zo tumi la Belemgbunli a. Wɔ Gyisɛse ewule nzi, Nyamenle dwazole ye hɔle anwuma kɛ sunsum nu abɔdeɛ mɔɔ lɛ tumi na ɔnwu ɛlɛ a. Menli dɔɔnwo lile ye ewudwazo ne anwo daselɛ.—Gyima ne 4:10; 9:1-9; Wulomuma 1:1-4; 1 Kɔlentema 15:3-8.

⁵ Akee Gyisɛse ‘hɔdɛnlanle Nyamenle asa fema zo.’ (Hibuluma 10:12) Ɔhendɛle mekɛ mɔɔ Nyamenle kɛmaa ye tumi kɛ Nyamenle anwuma Belemgbunlililɛ ne azo Belemgbunli la. Ɛhye manle ngapezo mɔɔ Nyamenle hanle hilele ye wɔ Edwɛndolɛ 110:1 la rale nu: “Tɛnla me sa fema zo, kɔkpula kɛ menwɔva wɔ kpɔvolɛma amuala menwɔwula ɛ gyakɛ abo.”

6. Adenle boni azo a Gyisɛse lale ye ali kɛ ɔfɛta kɛ Nyamenle Belemgbunlililɛ ne azo Belemgbunli a?

⁶ Mekɛ mɔɔ Gyisɛse wɔ azɛlɛ ye azo la, ɔlale ye ali kɛ ɔfɛta zɛhae gyinlabelɛ ne. Ɔnvane nwolɛ kɛ bɛyɛle ye kpɔdekpɔde la, ɔlile nɔhalɛ ɔmanle Nyamenle. Ɔluale ɛhye mɔɔ ɔyɛle la azo ɔhilele kɛ Seetan edwɛkɛ mɔɔ ɔhanle kɛ dasanli biala ɛnrɛhola ɛnrɛli nɔhalɛ ɛnrɛmaa Nyamenle wɔ sɔnea nu la le adalɛ. Gyisɛse, sonla mɔɔ di munli, ‘Adam mɔɔ li amozi la,’ lale ye ali kɛ nvonleɛ biala ɛnle kɛzi Nyamenle bɔle sonla mɔɔ di munli la anwo.—1 Kɔlentema 15:22, 45; Mateyu 4:1-11.

7, 8. Ninyɛne kpalɛ boni a Gyisɛse yɛle wɔ mekɛ mɔɔ ɔrale azɛlɛ ye azo la ɛ, na ɔvale ɔhilele nzɔne?

⁷ Tumivolɛ boni a ɛhola ɛyɛ ninyɛne kpalɛ mɔɔ Gyisɛse yɛle ye wɔ mekɛ ekyi mɔɔ ɔvale ɔyɛle ye ɛzonlenlɛ gyima ne la bie a? Gyisɛse mɔɔ ɛnee Nyamenle sunsum nwuanzanwuanza ne ɛyi ye tɛkɛɛ la, yɛle wuleravolɛma, abuburama, anyezinliravolɛma, anzodilirama yɛɛ mumulema ayile. Ɔdwazole mɔwuamra bɔbɔ! Ɔluale sɛkɛlɛneɛ ekyi ɛhye mɔɔ ɔyɛle la azo ɔhilele mɔɔ ɔbayɛ yeamaa alesama amuala wɔ mekɛ mɔɔ ɔbali Belemgbunli la.—Mateyu 15:30, 31; Luku 7:11-16.

 ⁸ Gyisɛse yɛle ninyɛne kpalɛ dɔɔnwo wɔ mekɛ mɔɔ ɔrale azɛlɛ ye azo la, ɛhye manle ɛdoavolɛ Dwɔn hanle kɛ: “Ninyɛne dɔɔnwo wɔ ɛkɛ ne mɔɔ Gyisɛse yɛle a. Saa bɛhɛlɛle bɛ muala ngoko ngoko a anrɛɛ menea a nwolɛ mbuluku ɛnrɛzo ewiade ye amuala anu.”—Dwɔn 21:25. *

9. Duzu ati a ahonle kpalɛma dule doale Gyisɛse ɛ?

⁹ Ɛnee Gyisɛse le atiakunlukɛnlɛma, ɔse anwuvɔne na ɔlɛ ɛlɔlɛ kpole ɔmaa menli. Ɔboale ehyiavolɛma nee menli mɔɔ bɛmbu bɛ la, noko yeambu ɔ nye yeangua bɛdabɛ mɔɔ bɛlɛ anwonyia anzɛɛ dibilɛ la anwo zo. Ahonle kpalɛma liele Gyisɛse ɛsalɛdolɛ mɔɔ ɛlɔlɛ wɔ nu la azo: “Bɛdabɛ mɔɔ bɛzo ɛnlomboɛ na bɛvɛ la, bɛ muala bɛrɛla me nwo ɛke, na menwɔmaa bɛ ɛnwomenlelielɛ. Bɛva me gyɛnvayile ne bɛdo bɛ kɔme zo na bɛzukoa mɔɔ meyɛ la, ɔluakɛ mele bɛtɛɛ, yɛɛ memmemaa me nwo zo, na bɛ ɛkɛla ne mɔ anwo kɛdɔ bɛ. Ɔluakɛ me gyɛnvayile ne le felafela, yɛɛ bɔlɛ mɔɔ mebava meazoa bɛ la ɛnyɛ ɛnlomboɛ.” (Mateyu 11:28-30) Menli mɔɔ sulo Nyamenle la dule doale Gyisɛse na bɛmanle bɛ nye lale ye belemgbunlililɛ ne ade.—Dwɔn 12:19.

Menli Mɔɔ nee Ye Bali Belemgbunli

10, 11. Nwane mɔ a baboka Gyisɛse anwo ali azɛlɛ ye azo tumi a?

¹⁰ Kɛmɔ sonla arane lɛ mgbanyima mɔɔ bɔ nu di tumi la, zɔhane ala a Nyamenle anwuma Belemgbunlililɛ ne noko de a. Menli bie mɔ nee Gyisɛse babɔ nu ali azɛlɛ ye azo tumi, ɔluakɛ Gyisɛse bɔle ɔ gɔnwo mɔ ɛwɔkɛ kɛ ɔ nee bɛ bali arelemgbunli wɔ alesama anwo zo.—Dwɔn 14:2, 3; Yekile 5:10; 20:6.

¹¹ Ɛhye ati, bɛbadwazo menli bie mɔ bɛavi ewule nu bahɔboka Gyisɛse anwo wɔ anwuma. Menli ɛhye mɔ a bɔ nu yɛ Nyamenle Belemgbunlililɛ ne mɔɔ bava dahuu nyilalɛ arɛlɛ alesama a. (2 Kɔlentema 4:14; Yekile 14:1-3) Wɔ ɛvolɛ dɔɔnwo mɔɔ ɛze ɛhɔ la anu, Gyihova ɛdo tumililɛ mɔɔ bava dahuu nyilalɛ arɛlɛ alesama abusua ne la adiabo.

Tumililɛ Mɔɔ Ɛnvi Nyamenle La Bara Awieleɛ

12, 13. Duzu a Nyamenle Belemgbunlililɛ ne ɛziezie ɔ nwo kɛ ɔyɛ a?

¹² Nyamenle vale ɔ nwo liele alesama edwɛkɛ nu wɔ ɛvoya ne mɔɔ pɛle nu la anu. Kɛmɔ buluku ɛhye Foa 9 ne bahilehile nu la, Baebolo ngapezo kile kɛ bɛvale Nyamenle Belemgbunlililɛ ne mɔɔ Kelaese a di zo tumi la bɛziele ɛkɛ wɔ 1914 ne anu, na kɛkala yeziezie ɔ nwo kɛ ɔsɛkye Seetan ngyehyɛleɛ ne kɔsɔɔti. Zɛhae Belemgbunlililɛ ne ɛziezie ɔ nwo kɛ ‘ɔdi Kelaese kpɔvolɛma anwo zo belemgbunli.’—Edwɛndolɛ 110:2.

¹³ Mɔɔ fane ɛhye anwo la, ngapezo mɔɔ wɔ Daneɛle 2:44 la ka kɛ: “Wɔ arelemgbunli ne mɔ [mɔɔ wɔ ɛkɛ ne ɛnɛ la] mekɛ ne anu, anwuma Nyamenle ne bava belemgbunlililɛ bie azie ɛkɛ  [wɔ anwuma] mɔɔ bɛnrɛzɛkye ye ɛlɛ a. Na bɛnrɛva belemgbunlililɛ ne [Nyamenle Belemgbunlililɛ ne] bɛnrɛmaa maanle fofolɛ biala [alesama ɛnrɛli tumi bieko]. Ɔbazɛkye arelemgbunlililɛ ɛhye mɔ amuala bɔkɔɔ, na yemɔ ɔbadɛnla ɛkɛ ne dahuu.”—New World Translation.

14. Nvasoɛ boni mɔ a bavi alesama tumililɛ mɔɔ bara awieleɛ la anu ara a?

¹⁴ Mekɛ mɔɔ bɛye tumililɛ mɔɔ ɛnvi Nyamenle kɔsɔɔti bɛvi ɛkɛ la, Nyamenle Belemgbunlililɛ ne bali azɛlɛ ne amuala azo tumi. Na ɔluakɛ Belemgbunlililɛ ne bavi anwuma ali tumi la ati, dasanli biala ɛnrɛhola ye sɛkye. Tumililɛ ne bazia ahɔ Nyamenle ɛkɛ, ɛleka mɔɔ alumua ne ɛnee ɔwɔ la. Ɔluakɛ Nyamenle a bali azɛlɛ ye azo tumi la ati, adalɛ ɛzonlenlɛ anzɛɛ sonla nzuzulɛ nee maanyɛlɛ ngyehyɛleɛ mɔɔ nvasoɛ biala ɛnle zo la ɛnrɛbɛlɛbɛla awie biala. Ninyɛne ɛhye mɔ anu biala ɛnrɛdɛnla ɛkɛ.—Mateyu 7:15-23; Yekile, tile 17 kɔdwu 19.

[Ɔ bo ɛkɛ ne edwɛkɛ]

[Debiezukoalɛ kpuyia ne mɔ]

[Nvoninli wɔ mukelɛ 18]

Mekɛ mɔɔ Gyisɛse wɔ azɛlɛ ye azo la ɔyɛle wuleravolɛma ayile na ɔdwazole mɔwuamra ɔvale ɔhilele mɔɔ ɔbayɛ ye wɔ ewiade fofolɛ ne anu la

[Nvoninli wɔ mukelɛ 19]

Nyamenle anwuma Belemgbunlililɛ ne bazɛkye tumililɛ mɔɔ ɛnvi ye mɔɔ wɔ ɛkɛ ne ɛnɛ la amuala