Nyamenle Ewiade Fofolɛ Kɛnlɛma Ne
Foa 10
Nyamenle Ewiade Fofolɛ Kɛnlɛma Ne
1, 2. Saa Amagɛdɔn konle ne ye ninyɛndane fi ɛkɛ a, duzu a bara a?
MEKƐ mɔɔ Nyamenle ɛlua Amagɛdɔn konle ne azo ɛye ninyɛndane ɛvi ɛkɛ la, duzu bieko a bazi a? Akee ewiade fofolɛ kɛnlɛma ne babɔ ɔ bo. Menli mɔɔ lile nɔhalɛ manle Nyamenle na bɛnyianle bɛ ti wɔ Amagɛdɔn ne anu la bahɔ ewiade fofolɛ ne anu. Nea kɛzi zɔhane mekɛ ne mɔɔ Nyamenle bayila alesama abusua ne la bayɛ anyelielɛ mekɛ a!
2 Wɔ Nyamenle Belemgbunlililɛ ne adehilelɛ bo, menli mɔɔ banyia bɛ ti la babɔ ɔ bo ayɛ azɛlɛ ne paladaese. Bɛbava bɛ anwosesebɛ bayɛ gyima mɔɔ bamaa menli mɔɔ wɔ azɛlɛ ne azo amuala la anyia zolɛ nvasoɛ a. Bɛbabɔ ɔ bo bɛahakyi azɛlɛ ne ɛleka kɛnlɛma mɔɔ anzondwolɛ nee ahunlundwolɛ wɔ maa alesama a.
Ɛtaneyɛlɛ Bavi Ɛkɛ na Tenleneyɛlɛ Ara
3. Anwodɔlɛ boni a bara wɔ Amagɛdɔn anzi a?
3 Ɛhye mɔ amuala bayɛ boɛ ɔlua Seetan ewiade ne mɔɔ bɛbazɛkye ye la ati. Adalɛ ɛzonlenlɛ mɔɔ mgbakyemgbakye wɔ nu, ɛbɛlabɔlɛ nwo ngyehyɛleɛ, anzɛɛ arane ngakyile kɔsɔɔti bavi ɛkɛ. Adalɛ edwɛkɛ mɔɔ vi Seetan la ɛnrɛbɛlɛbɛla menli bieko; bɛbaye Seetan nee ɔ sa zo amra mɔɔ fa ninyɛne ɛhye mɔ amuala ba la bavi ɛkɛ. Suzu nwolɛ nea: ninyɛndane mɔɔ Seetan ewiade ne ɛva ɛra la amuala abo zo baminli! Nea anwodɔlɛ mɔɔ bara a!
4. Kile nzenzaleɛ mɔɔ bara ngilehilelɛ nu la.
4 Menli ngilehilelɛ ɛtane bavi ɛkɛ na Nyamenle ngilehilelɛ mɔɔ maa anwosesebɛ la ara. “[Gyihova] bahilehile ɛ mra mrenya ne mɔ.” (Ayezaya 54:13) Ɔlua ngilehilelɛ kpalɛ ɛhye mɔɔ bahɔ zo ɛvolɛ biala la ati, Gyihova “anwo adwenle bayi azɛlɛ ye tɛkɛɛ kɛ nzule mɔɔ wɔ nyevile nu la.” (Ayezaya 11:9) Menli ɛnrɛzukoa ɛtaneyɛlɛ bieko, emomu ‘ewiade amra bazukoa pɛlepɛlelilɛ.’ (Ayezaya 26:9) Edwɛkɛ mɔɔ maa anwosesebɛ yɛɛ ɛbɛlabɔlɛ kpalɛ a bahɔ zo alehyenlɛ biala a.—Gyima ne 17:31; Felepaema 4:8.
5. Duzu a bado ɛtaneyɛlɛ nee ɛtanevolɛma amuala a?
5 Zɔhane ati, kɔdiawu nyɛleɛ, basabasayɛlɛ, bɔnadolɛ, awule, anzɛɛ ɛtane gyɛne biala bavi ɛkɛ. Awie biala ɛnrɛnwu amaneɛ ɔlua ɛtane mɔɔ ɔ gɔnwo mɔ bayɛ la ati. Mrɛlɛbulɛ 10:30 ka kɛ: “Bɛnrɛdu tenlenema ɛlɛ, na amumuyɛma ɛnrɛdɛnla azɛlɛ ne azo ɛlɛ.”
Kpɔkɛdelɛ Mɔɔ Di Munli Bazia Ara
6, 7. (a) Debie mɔɔ yɛ nyane la boni a Belemgbunlililɛ ne baye avi ɛkɛ a? (b) Kɛzi Gyisɛse yɛle ɛhye anwo neazo wɔ mekɛ mɔɔ ɔwɔ azɛlɛ ye azo la ɛ?
6 Wɔ ewiade fofolɛ ne anu, bɛbaye ninyɛndane mɔɔ atuadelɛ mɔɔ lumua vale rale la kɔsɔɔti bɛavi ɛkɛ. Kɛ neazo la, Belemgbunlililɛ ne baye anwodolɛ nee mgbanyinliyɛlɛ avi ɛkɛ. Ɛnɛ, saa ɛte kpɔkɛ bɔbɔ a, ɔbadwu mekɛ bie la ɛbayɛ ɛrelera, ɛ nye zo bayɛ monzomonzo, egye badudu, ɛnrɛde edwɛkɛ kpalɛ, ɛ nwo nane bapimbi, ɛ kunlu nu ninyɛne bazɛkye, kɔkpula kɛ awieleɛ bɔkɔɔ ne ɛbawu.
7 Noko akee, zɔhane ninyɛne ne mɔ mɔɔ yɛnyianle yɛvile yɛ awovolɛ mɔɔ lumua ɛkɛ ne la amuala bapɛ nu aze. Asoo ɛkakye mɔɔ Gyisɛse yɛle wɔ kpɔkɛdelɛ nwo wɔ mekɛ mɔɔ ɔwɔ azɛlɛ ye azo la ɔ? Baebolo ne ka kɛ: ‘Menli dɔɔnwo kpalɛ vale abuburama, anyenzinliravolɛma, mumule, yɛɛ bɛdabɛ mɔɔ ewule ngakyile ɛha bɛ la amuala raguale Gyisɛse agyakɛ anu, na ɔyɛle bɛ muala ayile. Mɔɔ menli ne nwunle kɛ mumule ɛlɛtendɛ, abubura ɛlɛtia, mɔɔ ɛdwidwe la anwo ɛza, na anyenzinliravolɛ nwu debie la, ɔzinle bɛ nwo.’—Mateyu 15:30, 31.
8, 9. Kile anyelielɛ mɔɔ bara ewiade fofolɛ ne anu wɔ mekɛ mɔɔ kpɔkɛdelɛ kpalɛ ɛzia ɛra la.
8 Nea kɛzi ewiade fofolɛ ne anu bayɛ anyelielɛ wɔ mekɛ mɔɔ bɛye anwodolɛ kɔsɔɔti ɛkɛ ne la! Anwodolɛ ɛnrɛmaa menli ɛnrɛnwu amaneɛ bieko. “Awie biala mɔɔ wɔ sua ne azo la ɛnrɛha kɛ, ‘Me nwo ɛdo me.’” “Anyenzinlirama anye badukue, anzondilirama anzo badukue. Abuburama bawuluwulu kɛ ahɛtɛboɛ, yɛɛ mumulema bava anyelielɛ ado edwɛne.”—Ayezaya 33:24; 35:5, 6.
9 Asoo ɔnrɛyɛ anyelielɛ kɛ sonla badwazo nwonlomɔ biala na yeanwu kɛ ɔlɛ kpɔkɛdelɛ kpalɛ ɔ? Asoo ɔnrɛyɛ ahunlundwolɛ kɛ mgbanyima banwu kɛ bɛzia bɛnyia bɛ mgbavolɛ nu anwosesebɛ ne bieko na bɛbali munli kɛmɔ ɛnee Adam nee Yive de ye mɔlebɛbo ne la ɔ? Baebolo ne bɔ ɛwɔkɛ kɛ: “Maa ye nwonane ɛzia ɛyɛ kɛ ye mgbavolɛ nu, na ɔnyia ye mgbavolɛ nu anwosesebɛ ne bieko.” (Dwobu 33:25) Nea anyelielɛ mɔɔ ɔbayɛ wɔ mekɛ mɔɔ bɛbavuandi ɛhwɛleɛ, ninyɛne mɔɔ boa maa bɛte edwɛkɛ anzɛɛ bɛtia, abuburama ehwili, yɛɛ nyile bagua ye lɔ la! Asopiti, dɔketama, nee menli mɔɔ bɔ egyele la anwo ɛnrɛhyia bieko.
10. Kɛ bɛbayɛ ewule ɛ?
10 Menli mɔɔ banyia kpɔkɛdelɛ kpalɛ ɛhye la ɛnrɛhulo kɛ bɛkɛwu. Na ɔnle kɛ bɛwu, ɔluakɛ sinlidɔlɛ nee ewule ɛnrɛli alesama anwo zo bieko. “Ɔwɔ kɛ Kelaese di belemgbunli kɔkpula kɛ Nyamenle kɛli ye agbɔvolɛ amuala anwo zo konim na ɔkɛva bɛ ɔkɛwula ɔ gyakɛ abo la. Kpɔvolɛ mɔɔ li amozi mɔɔ bɛbazɛkye ye la a le ewule.” “Nyamenle ahyɛlɛdeɛ ne mɔɔ ɔfa ɔmaa mgbane la a le ngoane mɔɔ ɛnlɛ awieleɛ.”—1 Kɔlentema 15:25, 26; Wulomuma 6:23; eza nea Ayezaya 25:8.
11. Kɛzi Yekile ka nyilalɛ mɔɔ bara ewiade fofolɛ ne anu la anwo edwɛkɛ sikalɛ ɛ?
11 Baebolo buluku mɔɔ li awieleɛ la ka nyilalɛ mɔɔ Nyamenle mɔɔ dwenle alesama abusua ne anwo bava ara wɔ Paladaese ne anu la anwo edwɛkɛ sikalɛ la, ɔhanle kɛ: “Nyamenle mumua ne nee bɛ badɛnla na yeayɛ bɛ Nyamenle. Ɔbakyikyi bɛ nye anwo monle. Ewule ɛnle ɛkɛ bieko, monle ɛnle ɛkɛ, nyane ɛnle ɛkɛ, ɛzunlɛ ɛnle ɛkɛ ne bieko. Ɔluakɛ alumua ninyɛne ne mɔ ɛze ɛhɔ.”—Yekile 21:3, 4.
Mɔwuamra Bɛadwazo
12. Kɛ Gyisɛse zile lale tumi mɔɔ Nyamenle ɛva ɛmaa ye kɛ ɔdwazo mɔwuamra la ali ɛ?
12 Gyisɛse yɛle ninyɛne gyɛne bokale wuleravolɛma mɔɔ ɔyɛle bɛ ayile nee abuburama mɔɔ ɔmanle bɛdiale la anwo. Eza ɔdwazole mɔwuamra. Yemɔti ɔmanle bɛnwunle tumi kpole mɔɔ Nyamenle ɛva ɛmaa ye kɛ ɔdwazo mɔwuamra la. Ɛkakye mekɛ mɔɔ Gyisɛse hɔle nrenya bie mɔɔ ɛnee ɔ ra raalɛ ɛwu la sua nu la ɔ? Gyisɛse zele kakula raalɛ ne kɛ: “Mese, dwazo!” Duzu a zile a? “Ɛkɛ ne ala ɔdwazole na ɔkpɔsale sua ne anu.” Mɔɔ menli ne nwunle mɔɔ ɛzi la ɔyɛle bɛ “nwanwane kpole” anzɛɛ bɛlile fɛlɛko. Bɛangola bɛanvea bɛ fɛlɛkolilɛ ne azo.—Maake 5:41, 42; eza nea Luku 7:11-16; Dwɔn 11:1-45.
13. Nwane mɔ a bɛbadwazo bɛ a?
13 Wɔ ewiade fofolɛ ne anu, “Menli kɔsɔɔti, ɛtanevolɛma nee kpalɛyɛlɛma badwazo ara ngoane nu.” (Gyima ne 24:15) Wɔ zɔhane mekɛ ne, Gyisɛse bava tumi mɔɔ Nyamenle ɛva ɛmaa ye kɛ ɔdwazo mɔwuamra la yeali gyima, ɔboalekɛ ɔzele kɛ: “Mame a mele ewudwazo ne nee ngoane ne a. Mɔɔ kɛlie me kɛli la, saa ɔwu bɔbɔ a ɔkɛnyia ngoane.” (Dwɔn 11:25) Eza ɔhanle kɛ, ‘Mɔwuamra mɔɔ Nyamenle kakye bɛ la amuala bade Gyisɛse ane wɔ bɛ nla ne mɔ anu, na bɛvi bɛ nla ne mɔ anu bɛbavinde.’—Dwɔn 5:28, 29.
14. Kɛmɔ ewule ɛnrɛdɛnla ɛkɛ ne bieko la ati, duzu ninyɛne a bavi ɛkɛ a?
14 Anyelielɛ ne bayɛ kpole wɔ azɛlɛ ye azo saa mɔwuamra ekpunli ekpunli sia ba ngoane nu baboka bɛ alɔvolɛ nwo a! Bɛnrɛnwu menli mɔɔ ɛwu la anwo edwɛkɛ wɔ adwelie ngɛlata nu bieko na yeamaa menli mɔɔ de aze la ali nyane. Emomu, amaneɛbɔlɛ mɔɔ fane menli fofolɛ mɔɔ bɛdwazo bɛ mɔɔ bamaa bɛ alɔvolɛ anye alie la a bɛbade a. Ɛhye ati ɛzɛneyɛlɛ, azie, ninyɛne mɔɔ bɛfa bɛyela funli anzɛɛ ɛleka mɔɔ bɛyela funli la bavi ɛkɛ!
Anzondwolɛ Ewiade Amgba
15. Adenle boni azo a Maeka ngapezo ne bara nu bɔkɔɔ a?
15 Anzondwolɛ mɔɔ di munli wɔ ɛbɛlabɔlɛ nu la bara ewiade amuala. Konle konle, menli mɔɔ ka konle nee menli mɔɔ yɛ konle ninyɛne la kɔsɔɔti bavi ɛkɛ. Duzu ati ɔ? Ɔluakɛ maanle, aneɛ nee mbusua mɔɔ fa mgbakyemgbakye ba la bavi ɛkɛ. Akee ɔbara nu bɔkɔɔ kɛ, “Bɛbabolo bɛ atwɛ ne mɔ bɛayɛ ɛdedadeɛ. Maanle biala ɛnrɛva konle ɛnrɛdoa maanle, yɛɛ bɛnrɛzukoa konle ɛhonlɛ bieko.”—Maeka 4:3.
16. Duzu a Nyamenle bayɛ amaa konle avi ɛkɛ a?
16 Ɛhye bayɛ nwanwane ɔluakɛ menli ɛva ɛvolɛ dɔɔnwo ɛha mogya ɛgua wɔ konle nu. Noko ɛhye zile ɔluakɛ ɛnee alesama wɔ menli nee sunsum evinli tumililɛ bo. Wɔ Nyamenle Belemgbunlililɛ ne abo wɔ ewiade fofolɛ ne anu, mɔɔ ɔbazi la ɛne: “Bɛrɛla, baranlea [Gyihova] gyima mɔɔ ɛli, . . . Ɔmaa bɛgyakyi konle wɔ azɛlɛ ye amuala azo; ɔbubu ɛda nee atwɛ ne mɔ, ɔfa senle ɔyela konle ehwili ne mɔ!”—Edwɛndolɛ 46:8, 9.
17, 18. Abusuabɔlɛ boni a badɛnla menli nee nane avinli wɔ ewiade fofolɛ ne anu a?
17 Menli nee nane badɛnla anzondwolɛ nu kɛmɔ ɛnee ɔde wɔ Yidɛn la. (Mɔlebɛbo 1:28; 2:19) Nyamenle se: “Kenle zɔhane me nee ɛbɔ nu nanemgbole, anwomanyunlu nloma, yɛɛ debie biala mɔɔ twenle ɔ kɛnra aze la bayɛ ngyekyeleɛ; . . . na me menli ne adɛnla bɛ nwo adɔ bɛ.”—Hozia 2:18.
18 Nienwu a zɔhane anzondwolɛ ne bahɔ ahɔdwu a? ‘Bɛdi nee boane ralɛ badɛnla, yɛɛ boboduma nee abɔnkye ralɛ bala ɛleka ko. Ɛnlankɛ ralɛ nee awenade babɔ nu adidi, na kakula yɛɛ banlea bɛ nwo zo a.’ Nane ne mɔ ɛnrɛha bɛ nwo nee menli ɛzulolɛ bieko. Na bɔbɔ “Bedi nee boane ralɛ babɔ nu adidi.”—Ayezaya 11:6-9; 65:25.
Bɛbahakyi Azɛlɛ ne Paladaese
19. Azɛlɛ ne bahakyi ayɛ duzu?
19 Bɛbahakyi azɛlɛ ne amuala paladaese bɛamaa alesama. Ɛhye ati a Gyisɛse bɔle nrenya bie mɔɔ liele ye lile la ɛwɔkɛ kɛ: “Ɛbaboka me nwo wɔ Paladaese” la. Baebolo ne ka kɛ: “Ɛsɛlɛ nee azɛlɛ resee bali fɛlɛko, fienemgbole anye balie, zolɛ abɔ ndotolo. . . . Ɔluakɛ azule bavinde fienemgbole ne mɔ anu, yɛɛ azudenle baze ɛsɛlɛ zo.”—Luku 23:43, NW; Ayezaya 35:1, 6.
20. Duzu ati a ɛhɔne ɛnrɛhu alesama bieko a?
20 Wɔ Nyamenle Belemgbunlililɛ ne abo, ɛhɔne ɛnrɛhu menli mgbe mgbe bieko. “Maa aleɛ ɛbu azɛlɛ ne azo; maa abɛlɛ ɛzi agole wɔ awoka ne mɔ azo.” “Ɛbɔ nu mbaka bazo ma amaa bɛ, na azɛlɛ ne amaa bɛ aleɛ ahye, na bɛ nwo adɔ bɛ wɔ bɛ maanle ne anu.”—Edwɛndolɛ 72:16; Yizikeɛle 34:27.
21. Duzu a bara menli mɔɔ ɛnlɛ sua ɛnla nu anzɛɛ bɛnde ɛleka kpalɛ nee awɔdenle mɔɔ bɛdi ɛtane zo la azo a?
21 Ehyia, menli mɔɔ ɛnlɛ sua ɛnla nu anzɛɛ bɛnde ɛleka kpalɛ nee awɔdenle mɔɔ bɛdi ɛtane zo la bavi ɛkɛ. “Bɛbasisi azua bɛadɛnla nu, bɛbayɛ vanye egyinli na bɛali nuhua ma ne bie. Bɛnrɛsisi azua na awie mɔ gyɛne adɛnlɛdɛnla nu; bɛnrɛlua na awie mɔ gyɛne ali.” “Awie biala badɛnla ye vanye egyinli nu, yɛɛ ye feege mbaka bo anzondwolɛ nu; awie ɛnrɛha bɛ ɛzulolɛ.”—Ayezaya 65:21, 22; Maeka 4:4.
22. Kɛzi Baebolo ne ka nyilalɛ mɔɔ Nyamenle Belemgbunlililɛ ne bava ara la anwo edwɛkɛ ɛ?
22 Alesama banyia nyilalɛ ɛhye mɔ amuala ne gyɛne dɔɔnwo wɔ Paladaese. Edwɛndolɛ 145:16 ka kɛ: “Ɛbuke ɛ sa nu, ɛmaa tease abɔdeɛ biala akunlu dwo ɔ nwo.” Ɔnyɛ azibɛnwo kɛ Baebolo ngapezo ka kɛ: “Na bɛlɛvoma bava azɛlɛ ne ayɛ bɛ ɛdeɛ, na bɛ nye alie bɛ ɛkpazilɛ nwo. Tenlenema bava azɛlɛ ne ayɛ bɛ ɛdeɛ, na bɛadɛnla zolɛ dahuu.”—Edwɛndolɛ 37:11, 29.
Ninyɛne Dɛba ne Bavi Ɛkɛ
23. Adenle boni azo a Nyamenle Belemgbunlililɛ ne baye amaneɛ biala mɔɔ yɛnwu ye la avi ɛkɛ a?
23 Nyamenle Belemgbunlililɛ ne baye ngyegyelɛ biala mɔɔ alesama abusua ne ɛyia ye wɔ ɛvolɛ apenle nsia mɔɔ ɛze ɛhɔ anu la. Anyelielɛ mɔɔ bɛbanyia ye zɔhane mekɛ ne la badɛla amaneɛ biala mɔɔ alesama ɛnwu ye la. Yɛnrɛhakye amaneɛ biala mɔɔ yɛnwunle ye la na yeazɛkye zɔhane asetɛnla ne. Edwɛkɛ mɔɔ maa anwosesebɛ nee ninyɛne mɔɔ menli ne bayɛ ye alehyenlɛ biala la baye ninyɛne mɔɔ dole yɛ dɛba ne mɔɔ yɛtɛdi nwolɛ nyane la avi yɛ adwenle nu ngyikyi ngyikyi.
24, 25. (a) Duzu a Ayezaya hanle dole ɛkɛ kɛ ɔbara a? (b) Duzu ati a yɛbahola yɛalie yɛali kɛ yɛnrɛhakye amaneɛnwunlɛ bieko a?
24 Nyamenle ne mɔɔ dwenle yɛ nwo la ka kɛ: ‘Mebɔ anwuma fofolɛ [anwuma arane fofolɛ mɔɔ bazie alesama] nee azɛlɛ fofolɛ [alesama tenlene abusua]; ninyɛne dɛba ne mɔ abo zo baminli mɔɔ awie ɛnrɛhakye bɛ bieko a. Bɛmaa bɛ nye ɛlie na bɛli fɛlɛko dahuu wɔ mɔɔ mebɔ la anwo.’ “Azɛlɛ ye azo amuala ɛyɛ diinyi, anzondwolɛ ɛra, na bɛkpakye bɛ ne nu bɛto edwɛne.”—Ayezaya 14:7; 65:17, 18.
25 Yemɔti Nyamenle balua ye Belemgbunlililɛ ne azo aye tɛnlabelɛ ɛtane biala mɔɔ ɛdɛnla ɛkɛ mekɛ tendenle la bɔkɔɔ. Ɔbahile kɛ ɔdwenle yɛ nwo kpalɛ mekɛ biala, ɔlua nyilalɛ ngakyile mɔɔ bamaa yɛ rɛle avi amaneɛ biala mɔɔ yɛnwunle ye dɛba ne mɔɔ yɛbanyia ye la azo. Saa yɛkulo kɛ yɛkakye ngyegyelɛ mɔɔ yɛyia ye dɛba la bɔbɔ a, yɛnrɛhakye ye kpalɛ biala.
26. Duzu ati a Nyamenle badua yɛ kakɛ wɔ amaneɛ biala mɔɔ yɛnwunle ye dɛba ne la anwo a?
26 Nyamenle balua adenle ɛhye azo adua yɛ kakɛ wɔ amaneɛ biala mɔɔ bie a yɛnwunle ye wɔ ewiade ɛhye anu la. Ɔze kɛ tɛ yɛdayɛ mumua ne yɛ nvonleɛ ti a bɛwole yɛ mɔɔ yɛnli munli a, ɔluakɛ yɛnyianle sinlidɔlɛ yɛvile yɛ awovolɛ mɔɔ lumua la ɛkɛ. Tɛ yɛ nvonleɛ ti a bɛwole yɛ bɛguale Seetan ewiade ne anu a ɔboalekɛ, saa Adam nee Yive lile nɔhalɛ a, anrɛɛ Paladaese nu a bɛbawo yɛ bɛagua. Ɛhye ati tɛ ngyegyelɛ mɔɔ yɛyia ye la ala a Nyamenle baye avi ɛkɛ a, emomu ɔbaze yɛ anwunvɔne kpole na yeamaa yɛ ninyɛne kpalɛ dɔɔnwo.
27. Ngapezo boni mɔ a bara nu wɔ ewiade fofolɛ ne anu a?
27 Wɔ ewiade fofolɛ ne anu, alesama banyia fanwodi ne mɔɔ bɛha bɛdo ɛkɛ wɔ Wulomuma 8:21, 22 la: “Kenle ko dedee bɛbaye abɔdeɛ muala bɛavi ɛkpɔlɔlɛ akɛlɛzonlenlɛ nu na yeanyia anyunlunyia fanwodi ne mɔɔ Nyamenle amra lɛ ye la. Ɔluakɛ yɛze kɛ toonwo mɔɔ yeradwu ɛnɛ la abɔdeɛ muala ɛlɛte nyane kɛ asɛɛ yevo awolɛ zo.” Akee alesama banyia bɛ nzɛlɛlɛ ɛhye anwo mualɛ bɔkɔɔ: “Wɔ belemgbunlililɛ ɛrɛla; Bɛyɛ Wɔ ɛhulolɛdeɛ wɔ azɛlɛ ye azo, Kɛmɔ bɛyɛ ye wɔ anwuma lɔ la.” (Mateyu 6:10) Asetɛnla mɔɔ bahɔ zo wɔ Paladaese azɛlɛ ne azo la kɛnlɛma bayɛ kɛ mɔɔ wɔ anwuma la.
[Debiezukoalɛ kpuyia ne mɔ]
[Nvoninli ne mɔɔ wɔ mukelɛ 23]
Wɔ ewiade fofolɛ ne anu, mgbanyima bazia anyia bɛ mgbavolɛ nu anwosesebɛ
[Nvoninli wɔ mukelɛ 24]
Bɛbaye anwodolɛ nee anwonyane kɔsɔɔti bavi ɛkɛ wɔ ewiade fofolɛ ne anu
[Nvoninli wɔ mukelɛ 25]
Wɔ ewiade fofolɛ ne anu, mɔwuamra badwazo ara ngoane nu
[Nvoninli wɔ mukelɛ 26]
“Bɛnrɛzukoa konle ɛhonlɛ bieko”
[Nvoninli ne mɔɔ wɔ mukelɛ 27]
Menli nee nane badɛnla anzondwolɛ nu wɔ Paladaese
[Nvoninli wɔ mukelɛ 27]
‘Nyamenle babuke ɔ sa nu yeamaa tease abɔdeɛ biala akunlu adwo ɔ nwo’
[Nvoninli wɔ mukelɛ 28]
Nyamenle Belemgbunlililɛ ne bayɛ ninyɛne kpalɛ dɔɔnwo azie amaneɛ mɔɔ yɛnwunle ye la abo zo
