Ɔ Muala Kile Duzu?

GYISƐSE KELAESE hanle kɛ: ‘awieleɛ mekɛ ne’ bala ali ɔlua konle, ɛhɔne, ewule ngakyile yɛɛ azɛlɛ ɛkpusulɛ zo.—Mateyu 24:1-8; Luku 21:10, 11.

Sumunli 1914 mɔɔ ba la, asetɛnla ɛzɛkye ɔlua maanle maanle yɛɛ mbusua ekpunli avinli konle, mɔɔ ɔta ɔfi ɛsɔfoma mɔɔ bɛfa bɛ nloa bɛwulowula maanyɛlɛ edwɛkɛ nu ɛkɛ yɛɛ akee ɛnɛ amumuyɛma ɛtetalɛ mɔɔ ɛbu zolɛ la azo.

Ɔwɔ nuhua kɛ aleɛ nwo nrɛlɛbɛvolɛma ɛnyia anyuhɔlɛ wɔ aleɛ ɛlualɛ nu ɛdeɛ, noko ɛhɔne mɔɔ anu yɛ se la ku menli mgbe ɛya ɛya dɔɔnwo wɔ ewiade amuala. Ɛvolɛ biala menli mgbe mgbe dɔɔnwo wu ɔlua ɛhɔne ti.

Ewule ngakyile noko boka sɛkɛlɛneɛ ne mɔɔ Gyisɛse vale manle la anwo. Wɔ Ewiade Konle I la anzi, influenza ewulenzane ne hunle menli mɔɔ bo 21,000,000. Mɔɔ manle ɔyɛle ngakyile ɔvile ewule ngakyile mɔɔ ɛnee wɔ ɛkɛ ne anwo la, ɔhanle maanle maanle nee mbɔra mɔɔ wɔ moa mɔɔ wɔ ewiade amuala la azo menli. AIDS ɛlɛka menli dɔɔnwo wɔ ewiade amuala, na ewule mɔɔ le kɛ avinliwule, ɛbunlu, anyezinlira mɔɔ nvɔlɔ a fa ba yɛɛ bisa mɔɔ pɛ bɛ la kɔ zo ka maanle maanle mɔɔ ehyia la.

Bɛbɔ amaneɛ kɛ, ɛvolɛ biala azɛlɛ ɛkpusulɛ apenle apenle mɔɔ le ngakyile la dɔɔnwo sisi. Ɔwɔ nuhua kɛ bɛnyia ninyɛne nee ndenle mɔɔ le kpalɛ mɔɔ bɛdua zolɛ bɛka azɛlɛkpusulɛ nwo edwɛkɛ la, azɛlɛkpusulɛ mɔɔ kuhu menli wɔ maanle maanle mɔɔ menli zonle nuhua la ɛbu zolɛ.

Baebolo ne eza hanle dole ɛkɛ ne kɛ: “Mekpondɛ kɛ ɛnwu ye kɛ, awieleɛ mekɛ ne anu, anwongyelelɛ dɔɔnwo bara. Menli bayɛ angomedi nee ezukoa nwo anyebolo, bɛbamemaa bɛ nwo zo na bɛazua anyetele; bɛbabɔ aholoba, bɛnrɛdie bɛ awovolɛma, bɛbakpo amunli, bɛnrɛzonle Nyamenle; bɛ ti bayɛ se, bɛnrɛze anwunvɔne, bɛbabɔ nzekue, bɛbali mgbonde, bɛbava ɛya mgbane mgbane na bɛahyi kpalɛ, bɛbaye bɛ gɔnwo mɔ bamaa, bɛbayɛ mgbaha na bɛ ti anu ayɛ bɛ fɛ; bɛbahulo anyelielɛ bɛadɛla Nyamenle, bɛbazɔ nyamenlezonlenlɛ nu, na bɛnrɛlie ye tumi kpalɛ ne bɛnrɛdo nu. Twe ɛ nwo fi menli zɛhae mɔ anwo.”—2 Temɔte 3:1-5.

Asoo ɛnlie ɛndo nuhua kɛ yɛde “mekɛ mɔɔ anwongyelelɛ dɔɔnwo” wɔ nuhua la anu?

Asoo wɔnwu ye kɛ, fane dɔɔnwo ne ala, menli yɛ angomedi, bɛyɛ ezukoa nwo anyebolo na bɛmemaa bɛ nwo zo?

Nwane a ɛnlie ɛndo nuhua kɛ menli mɔɔ le angomedi na bɛle anyetele, bɛdi mgbonde na bɛnzonle Nyamenle la ɛyi ewiade ye a?

Asoo ɛze kɛ awovolɛma mɔɔ bɛndie bɛ yɛɛ atisesebɛ mɔɔ yɛ azibɛnwo la ɛnyia anyuhɔlɛ wɔ ewiade amuala na tɛ ɛleka ekyi bie ala ɔ?

 Ɛze ye wienyi kɛ yɛde ewiade mɔɔ kulo anyelielɛ na ɔkyi kpalɛyɛlɛ la anu. Kɛ Baebolo ne si ka nyɛleɛ mɔɔ bahɔ zo wɔ “awieleɛ mekɛ ne” anu la anwo edwɛkɛ la ɛne.

Asoo ninyɛne dɔɔnwo anwo tɛkyia amaa yɛanwu mekɛ mɔɔ yɛde nuhua la? Gyisɛse eza hanle dole ɛkɛ ne kɛ mekɛ ko ne ala anu, bɛbabɔ edwɛkpa ne mɔɔ fane Nyamenle Belemgbunlililɛ ne anwo la nolo wɔ aleɛabo amuala. (Mateyu 24:14) Bɛlɛyɛ ye zɔhane ɔ?

Bɛyɛ The Watchtower, mɔɔ bɔ Yehowa Belemgbunlililɛ ne anwo edwɛkpa ne nolo la wɔ aneɛ dɔɔnwo nu dahuu bɛtɛla magazine biala.

Ɛvolɛ biala, Yehowa Alasevolɛ fa dɔnehwele mɔɔ bo mgbe mgbe ko la di awie mɔ daselɛ wɔ Nyamenle Belemgbunlililɛ ne anwo.

Kɛkala, bɛyɛ mbuluku mɔɔ kilehile Baebolo ne anu la wɔ aneɛ kɛyɛ 400  anu, mɔɔ aneɛ mɔɔ menli ekpunli ekyi bie a ka ye wɔ moamoa bɔbɔ la boka nwolɛ a. Yehowa Alasevolɛ ɛbɔ edwɛkpa ne nolo wɔ maanle maanle kɔsɔɔti anu; eza bɛha edwɛkɛ ne wɔ mbɔra dɔɔnwo yɛɛ azɛlɛsinli mɔɔ le ngyikyi mɔɔ bɛnde bɛ nwo edwɛkɛ wɔ ewiade ye anu bɔbɔ la anu. Wɔ maanle dɔɔnwo anu, bɛyɛ dahuu Baebolo ɛzukoalɛ nwo ngyehyɛlɛ.

Nɔhalɛ nu, bɛlɛbɔ edwɛkpa ne mɔɔ fane Nyamenle Belemgbunlililɛ ne anwo la nolo wɔ aleɛabo amuala, tɛ kɛ bɛfa bɛahakyi ewiade ne, na emomu kɛ bɛfa bɛali daselɛ. Bɛlɛmaa menli mɔɔ wɔ ɛleka biala la anyia adenle ahile saa ahenle mɔɔ bɔle anwuma nee aze la anwo hyia bɛ na ɔlua zo bɛkɛnyia ɛbulɛ bɛkɛmaa ye mɛla ne mɔ na bɛkɛhulo bɛ gɔnwo a.—Luku 10:25-27; Yekile 4:11.

Ɔnrɛhyɛ, Nyamenle Belemgbunlililɛ ne baye ɛtaneyɛlɛ muala avi azɛlɛ ye azo na yeayɛ ye ewiade amuala paladaese.—Luku 23:43.

[Ɛlɛka wɔ mukelɛ 6]

Duzu Anwo Awieleɛ Mekɛ Ɔ?

Tɛ alesama awieleɛ mekɛ ɔ. Ɔluakɛ Baebolo ne maa bɛdabɛ mɔɔ bɛyɛ Nyamenle ɛhulolɛdeɛ la nyia anyelazo kɛ bɛbadɛnla aze dahuu.—Dwɔn 3:16, 36; 1 Dwɔn 2:17.

Tɛ azɛlɛ ye awieleɛ mekɛ ɔ. Nyamenle Edwɛkɛ ne bɔ ɛwɔkɛ kɛ azɛlɛ ye badɛnla ɛkɛ ne dahuu.—Edwɛndolɛ 37:29; 104:5; Ayezaya 45:18.

Emomu, ɔle basabasayɛlɛ, ewiade ɛtane ɛhye yɛɛ bɛdabɛ mɔɔ bɛbɔ ye ɛbɛla ne bie la awieleɛ mekɛ.—Mrɛlɛbulɛ 2:21, 22.

[Ɛlɛka/Nvoninli wɔ mukelɛ 7]

Asoo Baebolo ne Le Nyamenle Edwɛkɛ Amgba?

Baebolo ngapezoma hɛlɛle ye fane dɔɔnwo kɛ: ‘Yehowa se.’ (Ayezaya 43:14; Gyɛlɛmaya 2:2) Gyisɛse Kelaese, mɔɔ le Nyamenle Ra bɔbɔ la, zile zolɛ kɛ ‘yeanga ɔ ti anwo edwɛkɛ.’ (Dwɔn 14:10) Baebolo mumua ne ka ye wienyi kɛ: “Bɛfa Nyamenle sunsum a bɛkɛlɛ Nyamenle edwɛkɛ ne a.”—2 Temɔte 3:16.

Buluku gyɛne biala ɛnle ɛkɛ ne mɔɔ bɛyɛ ye wɔ aneɛ dɔɔnwo anu—mɔɔ ɔbo 2,200, kɛmɔ United Bible Societies (eku mɔɔ yɛ Baebolo la) ka la. Buluku gyɛne biala ɛnle ɛkɛ mɔɔ bɛva bɛmaa dɔɔnwo zɛhae—mɔɔ kɛkala ɔbo mgbe mgbe nna a. Asoo tɛ kɛ ɔwɔ kɛ edwɛkɛ mɔɔ vi Nyamenle ɛkɛ, mɔɔ ɔwɔ kɛ alesama amuala asa ka ye la yɛ la ɛne?

Amaa wɔanwu daselɛ ne mɔ mɔɔ kile kɛ Baebolo ne vi Nyamenle sunsum nu la kpalɛ la, nea The Bible—God’s Word or Man’s?, buluku ne mɔɔ wɔ Nrelenza nu, mɔɔ Yehowa Alasevolɛ ɛyɛ la anu.

Saa ɛfa anyezɔlɛ ɛkenga Baebolo ne kɛ ɔle Nyamenle Edwɛkɛ amgba a, ɔbayɛ nvasoɛ kpole yeamaa wɔ.

[Ɛlɛka/Nvoninli ne mɔ wɔ mukelɛ 8]

Nyamenle Belemgbunlililɛ Ne A Le Duzu?

Yemɔ a le tumililɛ titile mɔɔ nɔhalɛ Nyamenle ne, Yehowa, mɔɔ le anwuma nee aze Bɔvolɛ ne la ɛva ɛzie ɛkɛ ne la.—Gyɛlɛmaya 10:10, 12.

Baebolo ne bɔ Gyisɛse Kelaese duma kɛ yemɔ a le ahenle mɔɔ Nyamenle ɛva zɛhae tumililɛ ne ɛwula ɔ sa a. (Yekile 11:15) Mekɛ mɔɔ Gyisɛse wɔ azɛlɛ ye azo la, ɔlale ye ali kɛ ɛnee ɔlɛ tumi nwanwane mɔɔ vi Nyamenle ɛkɛ a—tumi mɔɔ boale ye manle ɔlile nyevile nee ahumu zo, ɔyɛle ewule kɔsɔɔti ayile, na bɔbɔ ɔdwazole mɔwuamra la. (Mateyu 9:2-8; Maake 4:37-41; Dwɔn 11:11-44) Baebolo ngapezo mɔɔ vi Nyamenle sunsum nu la hanle dole ɛkɛ ne kɛ eza Nyamenle bamaa ye “ebialilɛ tumi, anyunlunyia, yɛɛ enililɛ, amaa aleɛabo maanle maanle mɔɔ ka aneɛ ngakyile la azonle ye.” (Daneɛle 7:13, 14) Bɛfɛlɛ zɔhane tumililɛ ne anwuma Belemgbunlililɛ; kɛkala, Gyisɛse Kelaese di ye tumi ne wɔ anwuma nehane.

[Nvoninli ne mɔ wɔ mukelɛ 7]

Ewiade amuala edwɛkpa ne nolobɔlɛ