Ɛnzolɛ Mɔɔ Bɛyɛle La Liele Bɛ Ngoane

GYISƐSE KELAESE lumua vale Dwuuma ewiade ne mɔɔ ɛnee gyi ɛzonlenlɛ sua ne mɔɔ wɔ Gyɛlusalɛm azo la awieleɛ nwo kɔkɔbɔlɛ manle. Yeanga kenle mɔɔ ɔbazi la. Noko ɔhanle edwɛkɛsisilɛ mɔɔ bahɔwie zɔhane ɛzɛkyelɛ ne anu la. Ɔdule ye ɛdoavolɛma folɛ kɛ bɛhɔ zo bɛzinza na bɛye bɛ nwo bɛvi ɛleka ne mɔɔ esiane ne wɔ la.

Gyisɛse hanle dole ɛkɛ ne kɛ: “Saa bɛnwu kɛ ɛlɔnema ɛbɔ ɛyia Gyɛlusalɛm a, ɛnee bɛnwu ye kɛ ɔnrɛhyɛ biala na bɛazɛkye ye.” Eza ɔhanle kɛ: “Saa bɛnwu munzudeɛ ne mɔɔ bɔ maanle la . . . kɛ ɔgyi ɛleka nwuanzanwuanza ne a, . . . ɛnee bɛdabɛ mɔɔ bɛwɔ Dwudiya la ɛnriandi ɛhɔ awoka ne mɔ azo.” Gyisɛse andu ye ɛdoavolɛma folɛ kɛ bɛzia bɛ nzi bɛhɔboɔboa anwonyia nloa. Amaa bɛanyia ngoane la ɛnee ɛnriandilɛ nwo hyia.—Luku 21:20, 21; Mateyu 24:15, 16.

Amaa bɛaha atuadelɛ tendenle ne aze la, Cestius Gallus lile Wulomu ɛlɔnema anyunlu rale Gyɛlusalɛm anwo zo wɔ ɛvolɛ 66 Y.M. Ɔwolole suakpole ne azo bɔbɔ na ɔbɛngale ɛzonlenlɛ sua ne ɔyiale. Suakpole ne azo yɛle begyebegye. Bɛdabɛ mɔɔ ɛnee bɛlɛsinza la nwunle kɛ esiane ɛbikye. Noko asoo ɛnee bɛkɛhola nriandi? Arɛlevilɛ nu ala, Cestius Gallus hwenle ye ɛlɔnema ne ziale. Dwuu atuadelɛma kpole bɛ. Bɔ zo mɔɔ ɛnee akee mekɛ ɛdwu kɛ bɛnriandi bɛfi Gyɛlusalɛm yɛɛ Dwudiya a!

Ɛvolɛ ne mɔɔ li zolɛ la anu, Wulomu ɛlɔnema mɔɔ Vespasian yɛɛ ɔ ra Titus a li bɛ ti la ziale rale. Konle zile maanle ne amuala anu. Wɔ ɛvolɛ 70 Y.M. mɔlebɛbo, Wulomuma vale mbaka ati ndwodwɔɔnwo liele Gyɛlusalɛm anwo bane yiale. Ɛnee ɛleka biala ɛnle ɛkɛ mɔɔ awie kola fa nriandi a. (Luku 19:43, 44) Konlema ekpunli ekpunli mɔɔ wɔ suakpole ne azo la hunle bɛ nwo ngoko ngoko. Wulomuma hunle menli mɔɔ hale la anzɛɛ bɛvale bɛ bɛhɔle akɛlɛzonlenlɛ nu. Bɛzɛkyele suakpole ne nee ye ɛzonlenlɛ sua ne bɔkɔɔ. Kɛmɔ ɛvoya ne mɔɔ lumua Dwuuma tetedwɛkɛ kɛlɛvolɛ Josephus kile la, Dwuuma mɔɔ bo mgbe ko la nwunle amaneɛ na bɛwule. Bɛtɛsili zɔhane ɛzonlenlɛ sua ne bieko ɛlɛ.

 Saa ɛnee Keleseɛnema ne tɛbɔ Gyɛlusalɛm wɔ ɛvolɛ 70 Y.M. a anrɛɛ bɛhunle bɛ anzɛɛ bɛ nee bɛ hɔle akɛlɛzonlenlɛ nu kɛmɔ bɛyɛle awie biala mɔɔ ɛnee wɔ ɛkɛ ne la. Noko akee, mɔmoane tetedwɛkɛ kɛlɛvolɛma bɔ amaneɛ kɛ Keleseɛnema ne diele Nyamenle kɔkɔbɔlɛ na bɛnriandile bɛvile Gyɛlusalɛm yɛɛ Dwudiya amuala bɛhɔle awoka ne mɔ mɔɔ gua Azule Dwɔdan ne aduduleɛ la azo. Bie mɔ dɛnlanle Pella, mɔɔ wɔ Perea maanzinli nu la. Bɛdule bɛvile Dwudiya yɛɛ bɛanzia bɛ nzi. Gyisɛse kɔkɔbɔlɛ ne mɔɔ bɛdiele la liele bɛ ngoane.

Asoo Ɛtie Kɔkɔbɔlɛ Kpalɛ?

Menli dɔɔnwo mɔɔ ɛde kɔkɔbɔlɛ dɔɔnwo mɔɔ anzi la, bu bɛ nye gua kɔkɔbɔlɛ kɔsɔɔti azo. Noko akee, kɔkɔbɔlɛ ɛdielɛ bahola alie wɔ ngoane.

Wɔ ɛvolɛ 1975 anu, bɛbɔle kɔkɔ kɛ azɛlɛkpusulɛ bazi wɔ China. Arane mgbanyima lile nwolɛ gyima. Menli ne diele. Menli apenle apenle dɔɔnwo nyianle ngoane.

Wɔ April, ɛvolɛ 1991 anu wɔ Philippines, menli mɔɔ de Boka Pinatubo agye nu la bɔle amaneɛ kɛ kpukpuke yɛɛ nzonle vi boka ne anu ɛlɛfinde. Mekɛ mɔɔ Philippines ɛleka ne mɔɔ nea Awoka nee bɛ Ɛkpusulɛ nwo edwɛkɛ zo la nleanle gyinlabelɛ ne wɔ siane nwiɔ anu wiele la, ɔbɔle esiane mɔɔ ɛlɛba arazi la anwo kɔkɔ. Ndɛndɛ zo, bɛyele menli apenle apenle dɔɔnwo bɛvile ɛkɛ ne. Wɔ June 15 aleɛbahye, boka ne kpukele kpole bie, na ɔvuandile ndɛtɛlɛ tone nu tɔne mgbe mgbe ɔhɔle anwuma anwuma ɔhɔgɔale ye wɔ namunamu ne mɔ azo. Ɛnzolɛ mɔɔ bɛyɛle la liele menli apenle apenle ngoane.

Baebolo ne bɔ ewiade ne mɔɔ wɔ ɛkɛ ne kɛkala la awieleɛ nwo kɔkɔ. Kɛkala yɛwɔ awieleɛ mekɛ ne anu. Mekɛ mɔɔ awieleɛ ne ɛlɛbikye la, asoo ɛlɛsinza ɔ? Asoo ɛlɛyɛ debie mɔɔ bamaa wɔahwe ɛ nwo wɔavi ɛleka ne mɔɔ esiane ne wɔ la? Asoo ɛlɛyɛ ye ndɛndɛ wɔabɔ awie mɔ kɔkɔ wɔamaa bɛayɛ zɔhane?

[Nvoninli wɔ mukelɛ 20]

Ɛnzolɛ mɔɔ bɛyɛle ye wɔ kɔkɔbɔlɛ ne anwo la liele menli dɔɔnwo ngoane wɔ mekɛ mɔɔ Boka Pinatubo vuandile ndɛtɛlɛ guale la

[Nvoninli wɔ mukelɛ 21]

Keleseɛnema mɔɔ diele Gyisɛse kɔkɔbɔlɛ ne la nyianle ngoane wɔ mekɛ mɔɔ bɛzɛkyele Gyɛlusalɛm wɔ ɛvolɛ 70 Y.M. la