“Amaa Bɛangɔndɔ Sɔnea Nu”
“Amaa Bɛangɔndɔ Sɔnea Nu”
‘Bɛhɔzo bɛzinza na bɛzɛlɛ dahuu amaa bɛangɔndɔ sɔnea nu.’—MATEYU 26:41.
ƐNEE ngyegyelɛ ne anloa yɛ se tɛla biala mɔɔ ɛdo ye ɛlɛ la. Ɛnee Gyisɛse Kelaese, mɔɔ le Nyamenle Ra ne la, asetɛnla wɔ azɛlɛ ye azo awieleɛ ɛbikye. Gyisɛse nwunle ye kɛ ɔnrɛhyɛ bɛbahye ye, bɛabua ye ewule fɔlɛ, na bɛahu ye wɔ amaneɛnwunlɛ baka zo. Ɔnwunle ye kɛ ye kpɔkɛzilɛ yɛɛ ye nyɛleɛ biala baha ɔ Ze duma ne. Gyisɛse eza nwunle ye kɛ alesama kenlebie ngoane anyelazo gyi ɔ nwo zo. Mɔɔ ɔyiale ngyegyelɛ ɛhye amuala la, duzu a ɔyɛle a?
2 Gyisɛse nee ye ɛdoavolɛma ne hɔle Gɛtesɛmani tola ne anu. Ɛnee ɔle ɛleka mɔɔ Gyisɛse kulo ye ɛhɔlɛ a. Wɔ ɛkɛ ne, ɔhwenle ɔ nwo ɔvile ye ɛdoavolɛma ne anwo ɔhɔle ɔ nyunlu ekyii. Mɔɔ ɔhale ɔ ngomekye la, ɔzɛlɛle anwosesebɛ ɔvile ɔ Ze mɔɔ wɔ anwuma la ɛkɛ, na ɔhanle ye ahonle nu edwɛkɛ amuala wɔ asɔneyɛlɛ nu ɔhilele ye, tɛ kokye ala na emomu fane nsa. Ɔwɔ nuhua kɛ Gyisɛse di munli ɛdeɛ, noko yeande nganeɛ kɛ ɔ ngome ɔbahola yeagyinla ngyegyelɛ ne anloa.—Mateyu 26:36-44.
3 Ɛnɛ, yɛdayɛ noko yɛyia ngyegyelɛ. Wɔ buluku ɛhye mɔlebɛbo, yɛzuzule daselɛ mɔɔ kile kɛ yɛde ewiade ɛtane ɛhye awieleɛ mekɛ nu la anwo. Sɔnea yɛɛ adwenledwenle mɔɔ Seetan ewiade ne fa ba la anu ɛlɛyɛ se. Yɛ nuhua ko biala mɔɔ kile kɛ ɔsonle nɔhalɛ Nyamenle ne la kpɔkɛzilɛ nee ye nyɛleɛ ka Nyamenle duma na ɔka yɛ nuhua ko biala ngoane nwo anyelazo wɔ ye ewiade fofolɛ ne anu kpole. Yɛkulo Yehowa. Yɛkpondɛ kɛ ‘yɛgyinla kpundii yɛkɔ awieleɛ’—yɛ ngoane mekɛ awieleɛ anzɛɛ ewiade ɛhye awieleɛ, nuhua biala mɔɔ kɛlumua kɛra la. (Mateyu 24:13) Noko kɛzi yɛkola yɛmaa yɛ nye da ɛkɛ na yɛkɔzo yɛsinza ɛ?
4 Kɛmɔ ɛnee Gyisɛse ze kɛ ye ɛdoavolɛma—mɔɔ ɛnee wɔ ɛkɛ tete ne yɛɛ ɛnɛ, noko bayia ngyegyelɛ la ati, ɔdule folɛ kɛ: ‘Bɛhɔzo bɛzinza na bɛzɛlɛ dahuu, amaa bɛangɔndɔ sɔnea nu.’ (Mateyu 26:41) Duzu a zɔhane edwɛkɛ ne kile maa yɛ ɛnɛ a? Sɔnea boni a ɛyia ye a? Na kɛzi ɛbahola ‘wɔahɔzo wɔazinza’ ɛ?
Duzu Anwo Sɔnea ɔ?
5 Dahuu yɛ muala yɛyia sɔnea kɛ yɛkɛdɔ “Abɔnsam . . . ɛhane ne anu.” (2 Temɔte 2:26) Baebolo ne bɔ yɛ kɔkɔ kɛ Seetan ɛdu ɔ nye ɛzie Yehowa azonvolɛ anyunlu. (1 Pita 5:8; Yekile 12:12, 17) Atiakunlukpɔkɛ boni ati ɔ? Tɛ kɛ ɔku yɛ ala. Ɔnle konimlilɛ ɔmmaa Seetan kɛ yɛkɛli nɔhalɛ yɛkɛmaa Nyamenle na yɛkɛwu. Seetan ze kɛ, wɔ Ye mekɛ nu, Yehowa balua ewudwazo zo aye ewule avi ɛkɛ ne.—Luku 20:37, 38.
6 Seetan kpondɛ kɛ ɔsɛkye debie mɔɔ sonle bolɛ bɔbɔ tɛla yɛ ngoane mɔɔ yɛlɛ ye kɛkala la—yɛ nɔhalɛlilɛ mɔɔ yɛdi yɛamaa Nyamenle la. Seetan ɛlɛbɔ mɔdenle biala ahile kɛ ɔkola ɔmaa yɛgyakyi Yehowa ɛzonlenlɛ. Ɛhye ati, saa ɔkola ɔbɛlabɛla yɛ mɔɔ yɛnli nɔhalɛ, yɛgyakyi edwɛkpa ne ɛhanlɛ anzɛɛ yɛkpo Keleseɛne ngyinlazo ne mɔ a, zɔhane bayɛ konimlilɛ amaa Seetan! (Ɛfɛsɛsema 6:11-13) Ɛhye ati “Abɔnsam anzɛɛ Sɔneavolɛ ne” sɔ yɛ nea.—Mateyu 4:3.
7 Seetan “agyiba ne mɔ” le ngakyile. (Ɛfɛsɛsema 6:11) Ɔbahola yeava anwonyiahulolɛ, ɛzulolɛ, adwenle nu keseeyɛlɛ anzɛɛ anyelielɛ nzililɛ yeazɔ yɛ yeanlea. Noko ye ndenle ne mɔ anu ko mɔɔ ɛnyia ngɔzo la a le bɛ sa nu mɔɔ to la. Kɛ amumuyɛ sonla la, ɔze kɛ alɔbɔlɛlilɛ kola maa yɛyɛ bɛtɛɛ, na ɔmaa yɛtɔ sɔnea nu. (Mrɛlɛbulɛ 24:10) Ɛhye ati mekɛ mɔɔ akee yɛkɛde nganeɛ kɛ yɛ “ɛnwomenle ewie” bɔkɔɔ la, ɔsɔ yɛ ɔnlea kɛ yɛkɛgyakyi nuhua.—Edwɛndolɛ 38:8.
8 Mekɛ mɔɔ yɛlɛbikye awieleɛ mekɛ ne awieleɛ la, ɔle kɛ asɛɛ ninyɛne mɔɔ maa bɛ sa nu to la ɛhɔ ɔ nyunlu la, na bɛka yɛ. (Nea ɛlɛka ne “Ninyɛne Bie Mɔ Mɔɔ Maa Bɛ Sa Nu To” anu.) Kɛ ɔsi ɔde ye biala la, bɛ sa nu mɔɔ to la kola maa yɛ anwosesebɛ wie. ‘Ɛbɛla kpalɛ mɔɔ yɛbɔ wɔ adenle biala anu’ na yɛadɔ mekɛ yɛamaa ɛzonlenlɛ nu gyimayɛlɛ, mɔɔ le kɛ Baebolo ne ɛzukoalɛ, Keleseɛne ayia ɛhɔlɛ yɛɛ ɛzonlenlɛ gyima ne mɔɔ yɛfa yɛ nwo yɛawula nuhua la, kola yɛ se saa ɔba ye kɛ yɛvɛ wɔ nwonane nu, adwenle nu yɛɛ nganeɛdelɛ nu a. (Ɛfɛsɛsema 5:15, 16) Kakye kɛ Sɔneavolɛ ne kpondɛ kɛ ɛgyakyi nuhua. Noko tɛ mekɛ mɔɔ ɔwɔ kɛ ɛto nuhua anzɛɛ ɛbu ɛ nye ɛgua ɛhyianlɛ mɔɔ mekɛ ne mɔɔ yɛde nuhua la anwo hyia la azo la ɛne! (Luku 21:34-36) Kɛzi ɛkola ɛko ɛtia sɔnea na ɛkɔzo ɛsinza ɛ? Suzu ninyɛne nna mɔɔ kola boa la anwo nea.
‘Bɛzɛlɛ Dahuu’
9 Fa ɛ nwo to Yehowa anwo zo ɔlua asɔneyɛlɛ zo. Kakye Gyisɛse neazo ne mɔɔ ɔyɛle ye wɔ Gɛtesɛmani tola ne anu la. Mɔɔ ɔhyelele ɔ nwo zo kpole la, duzu a ɔyɛle a? Ɔkpondɛle moalɛ ɔvile Yehowa ɛkɛ, ɔyɛle asɔne ɛsesebɛ ɔmanle ‘ɛhɛlɛnra mɔɔ dule ye la yɛle kɛ mogya ndɔkɛ ɛlɛtete agua aze la.’ (Luku 22:44) Dwenle nwolɛ nea. Ɛnee Gyisɛse ze Seetan kpalɛ. Mɔɔ Gyisɛse wɔ anwuma la, ɔnwunle sɔnea kɔsɔɔti mɔɔ ɛnee Seetan fa sua Nyamenle azonvolɛ ɛhane la. Noko akee, Gyisɛse ande nganeɛ kɛ ɔbahola yeagyinla debie biala mɔɔ Sɔneavolɛ ne bava azɔ ye anlea la anloa. Saa Nyamenle Ra ne mɔɔ di munli la dele nganeɛ kɛ ɔhyia kɛ ɔyɛ asɔne ɔdie moalɛ nee anwosesebɛ ɔfi Nyamenle ɛkɛ ne a, ɛnee fane nyɛ yɛ ɔwɔ kɛ yɛte nganeɛ kɛ yɛkɛyɛ zɔ a!—1 Pita 2:21.
10 Kakye, noko kɛ, mekɛ mɔɔ Gyisɛse dule ye ɛdoavolɛma ne folɛ kɛ ‘bɛzɛlɛ dahuu’ ɔwiele la, ɔhanle kɛ: “Sunsum ne kulo, na nwonane ne anwo ɛnyɛ se.” (Mateyu 26:41) Nwonane boni a ɛnee Gyisɛse ɛlɛka nwolɛ edwɛkɛ a? Nɔhalɛ nu ɛnee tɛ ye ɛdeɛ ne ɔ; ɛnee debie biala ɛndɔ sinli wɔ ye dasanli nwonane ne mɔɔ di munli la anwo. (1 Pita 2:22) Noko ɛnee tɛ kɛ ye ɛdoavolɛma ɛdeɛ ne de la ɛne. Ɔlua sinlidɔlɛ nee ɛtaneyɛlɛ subane mɔɔ bɛva bɛwo bɛ la ati, ɛnee bɛbahyia moalɛ nwo kpalɛ amaa bɛaho bɛatia sɔnea. (Wulomuma 7:21-24) Zɔhane ati a ɔdule bɛ, yɛɛ nɔhalɛ Keleseɛnema mɔɔ li bɛ nzi la amuala folɛ kɛ, bɛyɛ asɔne bɛzɛlɛ moalɛ amaa bɛagyinla sɔnea nloa. (Mateyu 6:13) Yehowa tie asɔneyɛlɛ zɛhae mɔ. (Edwɛndolɛ 65:2) Adenle ne boni azo? Wɔ adenle nwiɔ azo.
11 Mɔɔ lumua la, Nyamenle boa yɛ maa yɛnwu sɔnea ne mɔ. Seetan sɔnea ne mɔ le kɛ ngane mɔɔ bɛzua bɛ wɔ adenle mɔɔ nuhua le awozinli la anu la. Saa wɔannwu bɛ a, ɛbadɔ nuhua. Ɔlua Baebolo ne yɛɛ mbuluku mɔɔ bɛlua Baebolo ne azo bɛyɛ la azo, Yehowa maa yɛnwu Seetan ngane ne mɔ, na ɔboa yɛ ɔmaa yɛkoati kɛ yɛkɛdɔ sɔnea nu. Wɔ ɛvolɛ dɔɔnwo mɔɔ ɛze ɛhɔ la anu, mbuluku mɔɔ bɛyɛ yɛɛ nyianu mgbole nee ngyikyi ngyehyɛleɛ ɛhɔ zo ɛbɔ yɛ kɔkɔ wɔ ngane mɔɔ le kɛ sonla nwo ɛzulolɛ, nla nu ɛbɛlatane, anwonyiahulolɛ yɛɛ Seetan sɔnea ngakyile nwo. (Mrɛlɛbulɛ 29:25; 1 Kɔlentema 10:8-11; 1 Temɔte 6:9, 10) Asoo ɛ nye ɛnzɔ mɔɔ Yehowa ɛyɛ kɛ yemaa yɛnwu Seetan ndenle ne mɔ la ɔ? (2 Kɔlentema 2:11) Kɔkɔbɔlɛ ɛhye mɔ amuala le asɔne mɔɔ ɛyɛ ɛsɛlɛ moalɛ amaa wɔagyinla sɔnea nloa la anwo mualɛ.
12 Mɔɔ tɔ zolɛ nwiɔ, Yehowa bua yɛ asɔneyɛlɛ ɔlua anwosesebɛ mɔɔ ɔmaa yɛnyia yɛgyinla sɔnea nloa la azo. Ye Edwɛkɛ ne se: ‘Nyamenle . . . ɛnrɛmaa sɔnea mɔɔ bɛnrɛhola ɔ nloa gyinla la ɛnrɛdo bɛ ɛlɛ, bɛ sɔnea mekɛ nu bɔbɔ, ɔbamaa bɛ anwosesebɛ yeamaa bɛagyinla ɔ nloa, na yeahile bɛ adenle yeamaa bɛavi nu’. (1 Kɔlentema 10:13) Nyamenle ɛnrɛmaa sɔnea ɛnrɛbo yɛ nwo zo somaa mɔɔ yɛnrɛnyia ɛzonlenlɛ nu anwosesebɛ yɛnrɛho yɛnrɛtia ye ɛlɛ a—saa yɛkɔ zo yɛfa yɛ nwo yɛto ɔ nwo zo a. Kɛzi ‘ɔkile yɛ adenle ɔmaa yɛfi nu’ ɛ? Ɔfa ‘sunsum nwuanzanwuanza ne ɔmaa bɛdabɛ mɔɔ bɛkɛbiza ye la.’ (Luku 11:13) Zɔhane sunsum ne bahola aboa yɛ yeamaa yɛahakye Baebolo ngyinlazo mɔɔ kola mia yɛ bo mɔɔ yɛsika kɛ yɛyɛ mɔɔ tenrɛ la anu na yeaboa yɛ yeamaa yɛazi kpɔkɛ kpalɛ. (Dwɔn 14:26; Gyemise 1:5, 6) Ɔkola ɔboa yɛ ɔmaa yɛda subane kpalɛ mɔɔ yɛhyia amaa yɛali adwenle ɛtane zo konim la ali. (Galeehyeama 5:22, 23) Nyamenle sunsum ne eza bahola aha mediema diedima yeamaa ‘bɛaboa yɛ kpole kpalɛ.’ (Kɔlɔsaema 4:11) Asoo ɛ nye ɛnzɔ kɛ Yehowa dua ɛhulolɛ ndenle zɛhae mɔ azo tie wɔ asɔne mɔɔ ɛyɛ ɛsɛlɛ moalɛ la?
Fa Adwenle Kpalɛ Maa Ɛ Nye Ɛla Ninyɛne Ade
13 Amaa yɛahɔzo yɛazinza la, ɔhyia kɛ yɛfa adwenle kpalɛ yɛmaa yɛ nye da ninyɛne ade. Ɔlua asetɛnla nu ngyegyelɛ ti, ɔdwu mekɛ ne bie a ɛvɛlɛ ka yɛ muala. Noko ɔwɔ kɛ yɛkakye kɛ Nyamenle ambɔ yɛ ɛwɔkɛ kɛ yɛbanyia asetɛnla mɔɔ ngyegyelɛ ɛnle nuhua la wɔ ewiade ɛtane ɛhye anu ɛlɛ. Wɔ Baebolo mekɛ zo bɔbɔ, Nyamenle azonvolɛ yiale ngyegyelɛ, mɔɔ kpɔdekpɔdeyɛlɛ, ehyia, arɛlebɔlɛ yɛɛ anwodolɛ boka nwolɛ la.—Gyima ne 8:1; 2 Kɔlentema 8:1, 2; 1 Tɛsalonaekama 5:14; 1 Temɔte 5:23.
14 Ɛnɛ, yɛdayɛ noko yɛyia ngyegyelɛ. Yɛbahola yɛayia kpɔdekpɔdeyɛlɛ, ezukoa nwo adwenledwenle, yɛagyinla bɛ rɛle mɔɔ ɔbɔ la anloa, yɛ nwo ado yɛ na yɛanwu amaneɛ wɔ ndenle gyɛne zo. Saa Yehowa bɔ yɛ nwo bane fi ngyegyelɛ muala nwo wɔ nwanwane adenle zo a, asoo anrɛɛ Seetan ɛnrɛgyinla yemɔ azo ɔnrɛdendɛ ɔnrɛtia Yehowa? (Mrɛlɛbulɛ 27:11) Yehowa maa adenle ɔmaa bɛsɔ ye azonvolɛ bɛnea, ɔdwu mekɛ ne bie bɔbɔ a bɛwu ndɛ wɔ dwazotiama asa nu.—Dwɔn 16:2.
15 Ɛnee, akee, duzu a Yehowa ɛva ɛbɔ ɛwɔkɛ a? Kɛmɔ yɛlumua yɛnwu ye la, yebɔ yɛ ɛwɔkɛ kɛ ɔbamaa yɛahola yɛagyinla sɔnea biala mɔɔ yɛkɛyia ye la anloa, saa yɛfa yɛ rɛle yɛwula ye nu bɔkɔɔ a. (Mrɛlɛbulɛ 3:5, 6) Ɔdua ye Edwɛkɛ ne, ye sunsum ne yɛɛ ye fane ne azo ɔbɔ yɛ nwo bane wɔ ɛzonlenlɛ nu, na ɔboa yɛ ɔmaa yɛbɔ abusuabɔlɛ mɔɔ yɛ nee ye lɛ la anwo bane. Saa zɔhane abusuabɔlɛ ne anzɛkye, na yɛwu bɔbɔ a, yɛdi konim. Debie biala, ewule bɔbɔ, ɛngola ɛnzi Nyamenle adenle mɔɔ ɔmmaa ɔnyila ye nɔhalɛ azonvolɛ a. (Hibuluma 11:6) Na wɔ ewiade fofolɛ ne mɔɔ kɛkala ɛbikye la anu, Yehowa amgba bamaa ye nyilalɛ ɛwɔkɛ nwanwane ne mɔ mɔɔ ɛha la amuala ara nuhua amaa bɛdabɛ mɔɔ bɛkulo ye la.—Edwɛndolɛ 145:16.
Kakye Edwɛkɛ Ne
16 Amaa yɛagyinla yɛahɔ awieleɛ la, ɔwɔ kɛ yɛkakye edwɛkɛ ne mɔɔ anwo hyia wɔ amumuyɛyɛlɛ mɔɔ Nyamenle ɛmaa nwolɛ adenle la anu. Saa ɔdwu mekɛ ne bie na yɛdayɛ mumua ne yɛ ngyegyelɛ yɛ kɛ asɛɛ ɔbo zolɛ na ɔmaa yɛte nganeɛ kɛ yɛgyakyi nu a, ɔwɔ kɛ yɛkakye kɛ Seetan ɛzu adenle mɔɔ Yehowa lɛ ye di tumi la anwo kpolera. Mɛlɛbɛla sonla ne eza ɛzu Nyamenle azonvolɛ tunwomaa yɛɛ bɛ nɔhalɛlilɛ nwo kpolera. (Dwobu 1:8-11; 2:3, 4) Zɔhane edwɛkɛ ne yɛɛ adenle mɔɔ Yehowa ɛkpa kɛ ɔdua zolɛ yeaziezie la anwo hyia kpalɛ tɛla yɛ nuhua ko biala ngoane. Adenle ne boni azo?
17 Anwongyelelɛ mɔɔ Nyamenle ɛmaa nwolɛ adenle mekɛ ekyi la ɛmaa awie mɔ ɛnyia adenle ɛnwu nɔhalɛ ne. Dwenle ɛhye anwo nea: Gyisɛse nwunle amaneɛ amaa yɛahola yɛanyia ngoane. (Dwɔn 3:16) Asoo yɛ nye ɛnzɔ zɔhane deɛ ne? Noko asoo yɛlɛ ɛhulolɛ kɛ yɛkɛgyinla anwongyelelɛ nloa wɔ mekɛ ekyi anu amaa awie mɔ noko ahola anyia ngoane ɔ? Amaa yɛagyinla yɛahɔ awieleɛ la, ɔwɔ kɛ yɛnwu ye kɛ Yehowa nrɛlɛbɛ le kpole tɛla yɛ ɛdeɛ ne. (Ayezaya 55:9) Ɔbava amumuyɛyɛlɛ yeara awieleɛ wɔ mekɛ mɔɔ ɔle kpalɛ kpalɛ kɛ ɔfa ɔsiezie edwɛkɛ ne bɔkɔɔ na yeayɛ kpalɛ yeamaa yɛdayɛ mumua ne dahuu la. Asoo adenle kpalɛ bie wɔ ɛkɛ tɛla ɛhye? Nyamenle ɛnle amile!—Wulomuma 9:14-24.
“Bɛhwe Bɛbikye Nyamenle”
18 Amaa yɛanwu kɛ ɔwɔ kɛ yɛyɛ ninyɛne ndɛndɛ la, ɔhyia kɛ yɛbikye Yehowa. Mmamaa ɛ rɛle fi kɛ Seetan ɛlɛbɔ mɔdenle biala mɔɔ ɔkɛhola la kɛ ɔsɛkye yɛ abusuabɔlɛ kpalɛ mɔɔ yɛ nee Yehowa lɛ la. Seetan kulo kɛ yɛdie yɛdi kɛ awieleɛ ne ɛnrɛra ɛlɛ ɛhye ati nwolɛ ɛngyia kɛ yɛkɛbɔ edwɛkpa ne nolo anzɛɛ yɛkɛva Baebolo ngyinlazo yɛkɛdɛnla aze. Noko “ɔle alane yɛɛ ɔle adalɛ kɔsɔɔti bɛ ze.” (Dwɔn 8:44) Ɔwɔ kɛ yɛsika yɛ bo kɛ ‘yɛnrɛmaa Abɔnsam adenle.’ Abusuabɔlɛ mɔɔ yɛ nee Yehowa lɛ la le debie mɔɔ ɔnle kɛ yɛfa yɛdi nwɔhoa a. Baebolo ne tu yɛ folɛ ɛlɔlɛ nu kɛ: “Bɛhwe bɛbikye Nyamenle, na ɔdaye noko ɔkɛbikye bɛ.” (Gyemise 4:7, 8) Kɛzi ɛkola ɛbikye Yehowa kpalɛ ɛ?
19 Asɔneyɛlɛ mɔɔ ɛfa wɔazuzu edwɛkɛ nwo la hyia. Saa asetɛnla nu ngyegyelɛ kpondɛ abo zolɛ a, ka wɔ ahonle nu edwɛkɛ amuala kile Yehowa. Saa ɛka wɔ edwɛkɛ ne kpɔtee a, ɔnrɛyɛ se kɛ ɛkɛnwu kɛ ɔbua wɔ nzɛlɛlɛ. Bie a mualɛ ne ɛnrɛyɛ mɔɔ ɛnee wɔ wɔ adwenle nu la pɛpɛɛpɛ, noko saa ɔle wɔ ɛhulolɛdeɛ kɛ ɛdi ye eni na wɔali nɔhalɛ a, ɔbamaa wɔanyia moalɛ mɔɔ ɛhyia la amaa wɔahola wɔagyinla bɔkɔɔ. (1 Dwɔn 5:14) Mekɛ mɔɔ ɛlɛnwu ye adehilelɛ wɔ wɔ asetɛnla nu la, ɛbahwe wɔabikye ye kpalɛ. Yehowa subane nee ye ndenle ne mɔ mɔɔ wɔ Baebolo ne anu, anwo debie mɔɔ ɛkenga na wɔazuzu nwolɛ la noko anwo hyia. Debie nwo ɛzuzulɛ zɛhae boa wɔ maa ɛnwu ye kpalɛ; ɔka wɔ ahonle na ɔmaa wɔ ɛhulolɛ mɔɔ ɛlɛ ɛmaa ye la yɛ kpole. (Edwɛndolɛ 19:14) Na zɔhane ɛhulolɛ ne, mɔɔ tɛla debie biala la, baboa wɔ yeamaa wɔaho wɔatia sɔnea na wɔahɔzo wɔazinza.—1 Dwɔn 5:3.
20 Amaa yɛahwe yɛabikye Yehowa la, eza nwolɛ hyia kɛ yɛtwe yɛbikye yɛ gɔnwo mɔ diedima. Bɛbaha ɛhye anwo edwɛkɛ wɔ buluku ɛhye foa ne mɔɔ li awieleɛ la anu.
EDWƐKƐBIZALƐ
• Mekɛ mɔɔ Gyisɛse ngoane mekɛ ɛlɛba awieleɛ na ɔyiale ngyegyelɛ kpole la duzu a ɔyɛle a, na duzu a ɔdule ye ɛdoavolɛma folɛ kɛ bɛyɛ a? (Ɛden. 1-4)
• Duzu ati a Seetan ɛdu ɔ nye ɛzie Yehowa azonvolɛ anyunlu a, na ndenle boni azo a ɔsɔ yɛ ɔnea a? (Ɛden. 5-8)
• Amaa yɛaho yɛatia sɔnea la, duzu ati a ɔwɔ kɛ yɛyɛ asɔne dahuu (Ɛden. 9-12), yɛfa adwenle kpalɛ yɛmaa yɛ nye da ninyɛne ade (Ɛden. 13-15), yɛkakye edwɛkɛ ne (Ɛden. 16-17), na ‘yɛtwe yɛbikye Nyamenle’ ɛ (Ɛden. 18-20)?
[Ɛlɛka wɔ mukelɛ 25]
Ninyɛne Bie Mɔ Mɔɔ Maa Bɛ Sa Nu To
Kpɔkɛdelɛ/ɛrelerayɛlɛ. Saa ewule mɔɔ bɛyɛ ye ayile a ɔngɔ la maa yɛnwu amaneɛ anzɛɛ ɛrelerayɛlɛ ɛmmaa yɛngola debie yɛ a, yɛ rɛle bahola abɔ ɔluakɛ yɛngola yɛnyɛ dɔɔnwo wɔ Nyamenle ɛzonlenlɛ nu la ati.—Hibuluma 6:10.
Arɛlebɔlɛ. Bie a yɛ nye ɛmbanlie saa mɔdenle mɔɔ yɛlɛfa yɛabɔ Nyamenle Edwɛkɛ ne nolo la ɛnzo ma kpalɛ a.—Mrɛlɛbulɛ 13:12.
Bɛ nwo mɔɔ bɛbu ye kɛ ɔngyia. Saa bɛyɛ awie amumuyɛ mekɛ tendenle a, ɔbahola yealie yeali kɛ awie biala, Yehowa bɔbɔ, ɛngulo ye edwɛkɛ.— 1 Dwɔn 3:19, 20.
Nyanelilɛ. Saa awie agɔnwo diedinli bie fo ye a, ɔbahola yeagyegye ye dedee mɔɔ bie a ɔbagyakyi Keleseɛne ayia anzɛɛ daselɛlilɛ ɛhɔlɛ bɔbɔ a.—Luku 17:1.
Kpɔdekpɔdeyɛlɛ. Menli mɔɔ nee wɔ diedi ɛnle ko la bahola adwazo atia wɔ, bɛayɛ wɔ kpɔdekpɔde anzɛɛ bɛagolo ɛ nwo.—2 Temɔte 3:12; 2 Pita 3:3, 4.
[Nvoninli wɔ mukelɛ 26]
Gyisɛse dule yɛ folɛ kɛ ‘yɛzɛlɛ dahuu’ yɛlie moalɛ yɛva yɛgyinla sɔnea nloa
