‘Bɛannwu Ye’

KƆKƆBƆLƐ mɔɔ bɛbu bɛ nye bɛgua zolɛ la kola kɔwie esiane nu.

Mekɛ mɔɔ ɛnee menli mɔɔ wɔ Darwin, mɔɔ wɔ Australia la, ɛlɛsiezie bɛ nwo amaa ɛvoyialilɛ wɔ ɛvolɛ 1974 anu la bɛdele ahumuakyima mɔɔ ɛlɛba aradu la anwo kɔkɔbɔlɛ. Noko, ɛnee ahumuakyima ɛtɛsɛkyele Darwin wɔ ɛvolɛ kɛyɛ 30 anu. Asoo ɔbazi mekɛ ɛhye anu? Menli mɔɔ wɔ zolɛ la anu dɔɔnwo ambu esiane ne kɛ ɔbayɛ ɛzulolɛ hɔkpulale kɛ anwoma mɔɔ anloa yɛ se la bɔle ɔ bo kɛ ɔkpa azua ne mɔ azo na yeabubu azua mɔɔ menli hɔveale nu la bane ne mɔ. Aleɛ kahye la, ɛnee suakpole ne ɛyɛ suadu.

Wɔ November, ɛvolɛ 1985 ne anu, boka kpukele wɔ Colombia. Ezukɔtweaba yɛɛ ayese mɔɔ ɛlɛkolo la pianle ndɛtɛlɛ mɔɔ boka ne ɛlɛkpu ara la hedale menli mɔɔ bo 20,000 mɔɔ wɔ Armero sua zo la anwo zo. Asoo bɛanlumua bɛambɔ nwolɛ kɔkɔ? Boka ne lumua kpusule wɔ siane dɔɔnwo anu. Noko kɛmɔ boka nwo ɛdɛnlanlɛ ɛha bɛ ɛkɛ la ati, yeanvane menli dɔɔnwo mɔɔ wɔ Armero la anwo. Bɛbɔle arane mgbanyima kɔkɔ kɛ ɔnrɛhyɛ na esiane azi, noko bɛambɔ maanlema kɔkɔ kpalɛ biala. Bɛluale riledeo zo bɛbɔle nolo bɛwulale maanlema anwosesebɛ. Bɛbɔle nolo wɔ asɔne sua nu bɛdule menli folɛ kɛ bɛzi abotane. Ye nɔsolɛ nu, boka ne kpukele fane nwiɔ mɔɔ ɛnee ɔyɛ ɛzulolɛ a. Asoo anrɛɛ ɛkɛgyakyi wɔ ninyɛne na ɛkɛnriandi? Menli ekyi bie a bɔle mɔdenle yɛle zɔ hɔkpulale kɛ ɛnee akee yekpa nwolɛ a.

Menli mɔɔ sukoa awolɛ nwo debie la ta ka ɛleka mɔɔ azɛlɛkpusulɛ bazi la to ɛkɛ ne nɔhalɛ nu. Noko tɛ mekɛ ne amuala a bɛkola bɛka kenle kpɔtee mɔɔ ɔbazi la a. Wɔ ɛvolɛ 1999 anu, azɛlɛkpusulɛ hunle menli kɛyɛ 20,000 wɔ ewiade amuala. Menli mɔɔ wule la anu dɔɔnwo zuzule kɛ ɔnrɛzi zɔ ɛlɛ.

Kɛzi Ɛyɛ wɔ Kɔkɔbɔlɛ Mɔɔ Vi Nyamenle Mumua Ne Ɛkɛ La Anwo Ɛ?

Baebolo ne lumua hanle ninyɛne mɔɔ basisi yeamaa awieleɛ mekɛ ne ala ali la anwo edwɛkɛ wienyi. Ɔka yemɔ anwo edwɛkɛ la, ɔdule yɛ folɛ kɛ yɛzuzu “Nowa mekɛ ne” anwo. ‘Kolaa na azuyilɛ kpole ne ara’ la, menli lile asetɛnla nu ninyɛne nzi mɔɔ bɛannyia alagye a, ɔnva nwolɛ kɛ ɛnee basabasayɛlɛ mɔɔ  ɛbu zo la gyegye bɛ la. Wɔ kɔkɔbɔlɛ ne mɔɔ Nyamenle vale luale ye sonvolɛ Nowa anwo zo manle la anwo ɛdeɛ, “bɛannwu mɔɔ ɛlɛba arazi la toonwo azuyilɛ kpole ne ravale bɛ muala.” (Mateyu 24:37-39) Asoo anrɛɛ ɛkɛdie kɔkɔbɔlɛ ne? Asoo ɛyɛ ye zɔ ɛnɛ?

Saa ɛnee ɛwɔ Sodɔm, mɔɔ bikye Nyevile Wulera ne, wɔ Lɔɔto, mɔɔ le Ebileham awozoa ne la mekɛ zo ɛ? Ɛnee sua ne azo le kɛ paladaese la. Ɛnee sua ne azo yɛ fɛ. Ɛnee ɛhwee ɛnvane menli nwo. Wɔ Lɔɔto mekɛ zo, “menli hɔle zo lile, nlonle, bɛlile gua, bɛyɛle egyinli na bɛsisile azua.” Ɛnee eza ɛbɛlatane ɛbu zolɛ wɔ sua ne mɔɔ bɛdɛnlanle zolɛ la azo. Asoo mekɛ mɔɔ Lɔɔto dendɛle tiale nyɛleɛ ɛtane ɛtane ne mɔ la, saa ɛwɔ ɛkɛ a anrɛɛ ɛkɛdie? Asoo anrɛɛ mekɛ mɔɔ ɔhanle ɔhilele wɔ kɛ Nyamenle ɛbɔ kpɔkɛ kɛ ɔsɛkye Sodɔm suakpole ne la ɛkɛdie? Anzɛɛ anrɛɛ ɛkɛva ɛkɛli nwɔhoa, kɛmɔ menli mɔɔ ɛnee baragya Lɔɔto amra mraalɛ ne mɔ yɛle la? Anrɛɛ ɛkɛbɔ ɔ bo kɛ ɛnriandi na akee wɔado ɛ nye ɛ nzi, kɛmɔ Lɔɔto aye ne yɛle la ɔ? Ɔwɔ nuhua kɛ bie mɔ anlie kɔkɔbɔlɛ ne anli ɛdeɛ, noko kenle ko ne mɔɔ Lɔɔto vile Sodɔm la, “Nyamenle manle senle nee sɔlefe vi anwuma dɔle kɛ ezule la rahunle bɛ muala.”—Luku 17:28, 29.

Yɛ mekɛ ye azo menli dɔɔnwo ɛnnwu ye. Noko bɛva neazo ɛhye mɔ bɛzie Nyamenle Edwɛkɛ ne anu kɛ kɔkɔbɔlɛ bɛmaa yɛ, amaa yeawula yɛ anwosesebɛ yeamaa YƐAHƆZO YƐAZINZA!

[Ɛlɛka/Nvoninli wɔ mukelɛ 22]

Asoo Ewiade Amuala Azuyilɛ Rale Amgba?

Kpolerazulɛma dɔɔnwo se yeanzi. Noko Baebolo ne se ɔle nɔhalɛ.

Gyisɛse Kelaese mumua ne hanle nwolɛ edwɛkɛ, na wɔ mekɛ mɔɔ ɔzile la, ɛnee ɔde anwuma ɔlɛnea.

[Ɛlɛka/Nvoninli wɔ mukelɛ 23]

Asoo Bɛzɛkyele Sodɔm yɛɛ Gomɔla Amgba?

Menli mɔɔ tudu azɛlɛ nwo la di edwɛkɛ ɛhye anwo daselɛ.

Ewiade tetedwɛkɛ ka nwolɛ edwɛkɛ.

Gyisɛse Kelaese lile mɔɔ zile la anwo daselɛ, na bɛha mɔɔ zile la anwo edwɛkɛ wɔ Baebolo mbuluku ngoko 14 anu.