Ewiade Fofolɛ Mɔɔ Nyamenle Ɛva Ɛbɔ Ɛwɔkɛ
Ewiade Fofolɛ Mɔɔ Nyamenle Ɛva Ɛbɔ Ɛwɔkɛ
BAEBOLO ne, mɔɔ le Nyamenle edwɛkɛ ne mɔɔ bɛhɛlɛ la, maa yɛnyia anyelazo wɔ mekɛ mɔɔ ɔka kɛ: ‘Na yɛmɛ kɛmɔ Nyamenle ɛwɔkɛ ne kile la yɛlɛkendɛ anwuma fofolɛ nee azɛlɛ fofolɛ mɔɔ tenleneyɛlɛ wɔ nu la.’—2 Pita 3:13.
“Anwuma fofolɛ” ne a le boni? Baebolo ne fa tumililɛ ka anwuma nwo edwɛkɛ. (Gyima ne 7:49) “Anwuma fofolɛ” ne le anwuma arane fofolɛ mɔɔ bali tumi wɔ azɛlɛ ye azo a. Ɔle fofolɛ ɔboalekɛ ɔbarali maanyɛlɛ tumililɛ ngyehyɛlɛ ne mɔɔ wɔ ɛkɛ ne ɛnɛ la agyakɛ anu; eza ɔle adenle fofolɛ mɔɔ ɔlua zolɛ a Nyamenle atiakunlukpɔkɛ bara nuhua a. Yemɔ a le Belemgbunlililɛ ne mɔɔ Gyisɛse hilele yɛ kɛ yɛyɛ nwolɛ asɔne la. (Mateyu 6:10) Kɛmɔ Nyamenle mɔɔ Yɛle la wɔ anwuma la ati, bɛfɛlɛ ye “anwuma belemgbunlililɛ ne.”—Mateyu 7:21.
“Azɛlɛ fofolɛ” ne a le boni? Tɛ azɛlɛ fofolɛ ɔ, ɔluakɛ Baebolo ne ka ye wienyi kɛ azɛlɛ ne badɛnla ɛkɛ ne dahuu. “Azɛlɛ fofolɛ” ne bayɛ alesama abusua fofolɛ. Ɔbayɛ fofolɛ ɔboalekɛ ɛnee bɛye ɛtanevolɛma bɛvi zolɛ. (Mrɛlɛbulɛ 2:21, 22) Menli mɔɔ badɛnla nuhua la amuala akee bali Bɔvolɛ ne eni na bɛadie ye na bɛadɛnla aze bɛamaa ɔ nee mɔɔ ɔ nye la kɛ yɛkɛyɛ la ayɛ ko. (Edwɛndolɛ 22:27) Bɛlɛto ɛsalɛ bɛavɛlɛ menli mɔɔ wɔ maanle muala anu la kɛ bɛzukoa zɔhane ninyɛne ne mɔ kɛkala na bɛva bɛbɔ bɛ ɛbɛla. Asoo ɛlɛyɛ zɔhane ɔ?
Wɔ Nyamenle ewiade fofolɛ ne anu, awie biala babu Ye tumililɛ ne. Asoo Nyamenle nwo ɛhulolɛ ka wɔ maa ɛtie ye? (1 Dwɔn 5:3) Asoo zɔhane da ali wɔ wɔ awuke nu, wɔ sukulu anzɛɛ wɔ gyima nu? wɔ kɛ ɛlɛsi wɔabɔ wɔ ɛbɛla la anu?
Wɔ ewiade fofolɛ ne anu, alesama abusua ne baha abɔ nu wɔ nɔhalɛ Nyamenle ne ɛzonlenlɛ nu. Asoo ɛsonle anwuma nee aze Bɔvolɛ ne? Asoo wɔ ɛzonlenlɛ ne ka wɔ nee ɛ gɔnwo mɔ ɛzonlenlɛma mɔɔ wɔ maanle maanle kɔsɔɔti anu la bɔ nu?—Edwɛndolɛ 86:9, 10; Ayezaya 2:2-4; Zɛfanaya 3:9.
[Ɛlɛka wɔ mukelɛ 17]
Nyamenle ne Mɔɔ Fa Ninyɛne Ɛhye Mɔ Bɔ Ɛwɔkɛ La
Yemɔ a le anwuma nee Azɛlɛ ne Bɔvolɛ a. Yemɔ a le ahenle ne mɔɔ Gyisɛse Kelaese hanle ɔ nwo edwɛkɛ kɛ ɔle “nɔhalɛ Nyamenle kokye ne a.”—Dwɔn 17:3.
Alesama dɔɔnwo di nyamenle mɔɔ bɛdabɛ mumua ne bɛyɛ la eni. Menli dɔɔnwo sonle ananze mɔɔ ngoane ɛnle bɛ nu la. Bie mɔ yeyɛ fane mɔɔ menli ɛhyehyɛ, ninyɛne anzɛɛ ɛbɛlabɔlɛ nwo adwenle ngakyile anzɛɛ mɔɔ bɛkulo la. Tɛ bɛdabɛ mɔɔ bɛkile kɛ bɛfa Baebolo ne bɛdi gyima la bɔbɔ amuala a di ahenle ne mɔɔ ɔda ye ali kɛ ɔle ‘nɔhalɛ Nyamenle ne’ la duma ne eni a.—Mɛla ne 4:35.
Bɔvolɛ ne mumua ne hanle ɔ nwo edwɛkɛ kɛ: “Medame a mele [Yehowa, NW] a. Me duma ɛne.” (Ayezaya 42:5, 8) Duma ɛhye finde fane kɛyɛ 7,000 wɔ aneɛ mɔɔ bɛlumua bɛvale bɛhɛlɛle Baebolo ne la anu. Gyisɛse Kelaese hilele ye ɛdoavolɛma kɛ bɛyɛ asɔne kɛ: “Yɛ Ze mɔɔ wɔ anwuma, wɔ duma nwo ɛde.”—Mateyu 6:9.
Sonla boni a le nɔhalɛ Nyamenle ne? Ɔka ɔ nwo edwɛkɛ kɛ awie mɔɔ le ‘anwunvɔnezelɛ nee atiakunlukɛnlɛma, ɔnva ɛya mgbane mgbane yɛɛ ɛhulolɛ kpundii anzɛɛ ɛlolɛ nee nɔhalɛlilɛ ɛyi ye tɛkɛɛ,’ yɛɛ ɔmmaa bɛdabɛ mɔɔ bɛ nye fuu bɛbulu ye mɛla ne mɔ azo la ɛnva bɛ nwo ɛnli ɛnvi ɛdeanlɛ nwo a. (Adendulɛ 34:6, 7) Kɛ ɔzile ɔ nee alesama lile la anwo tetedwɛkɛ si nɔhalɛ mɔɔ zɔhane edwɛkɛ ne de la azo.
Ɔwɔ kɛ bɛte duma ne nee ahenle mɔɔ duma ne gyi ɛkɛ ne maa ye la anwo, anzɛɛ bɛyɛ ye nwuanzanwuanza. Kɛ Bɔvolɛ yɛɛ Aleɛabo Amuala Tumivolɛ la, ɔfɛta kɛ yɛ muala yɛtie ye na yɛsonle ye. Asoo ɛtie ye na ɛsonle ye?
[Ɛlɛka/Nvoninli wɔ mukelɛ 18]
Ngakyile Boni A “Anwuma Fofolɛ nee Azɛlɛ Fofolɛ” Bava Ara A?
Azɛlɛ ne bahakyi Paladaese Luku 23:43
Ewiade amuala abusua mɔɔ maanle, Dwɔn 13:35;
aneɛ nee menli ngakyile kɔsɔɔti Yekile 7:9, 10
fi ɛhulolɛ nu ka bɔ nu
Ewiade amuala anzondwolɛ, Edwɛndolɛ 37:10, 11;
menli kɔsɔɔti anwobanebɔlɛ kpalɛ Maeka 4:3, 4
Gyima mɔɔ yɛ ahunlundwolɛ, Ayezaya 25:6;
Anwodolɛ, nyane nee ewule bavi ɛkɛ Ayezaya 25:8;
Ewiade mɔɔ ka bɔ nu sonle nɔhalɛ Yekile 15:3, 4
Nyamenle ne
[Ɛlɛka/Nvoninli ne mɔ wɔ mukelɛ 19]
Asoo Ɛkɛnyia Nuhua Nvasoɛ?
Nyamenle ɛmbɔ adalɛ!—Taetɛse 1:2.
Yehowa hanle kɛ: “Me edwɛkɛ . . . ɛnrɛzia ɛnrɛra me nwo ɛke mgbane, ɔbayɛ mɔɔ medwenle nwo kɛ ɔrayɛ la, na yeakpazi mɔɔ menzoanle ye nwolɛ la ɛyɛlɛ nu.”—Ayezaya 55:11.
Yehowa ɛbɔ ɔ bo ɛlɛbɔ “anwuma fofolɛ nee azɛlɛ fofolɛ.” Anwuma arane ne ɛbɔ ɔ bo ɛlɛdi tumi. Bɛdo “azɛlɛ fofolɛ” ne adiabo ne bɛwie.
Mekɛ mɔɔ ɔhanle ninyɛne nwanwane mɔɔ anwuma fofolɛ nee azɛlɛ fofolɛ ne bava arɛlɛ alesama anwo edwɛkɛ ɔwiele la, Yekile fa Nyamenle mumua ne, mɔɔ le Aleɛabo Amuala Tumivolɛ la edwɛkɛ ka kɛ: “Kɛkala meyɛ ninyɛne kɔsɔɔti fofolɛ.” Eza ɔhanle kɛ: “Kɛlɛ ɛhye, ɔluakɛ edwɛkɛ ɛhye mɔ le nɔhalɛ yɛɛ bɛfa bɛ rɛle bɛto zolɛ a ɔyɛ boɛ.”—Yekile 21:1, 5.
Edwɛkɛbizalɛ mɔɔ anwo hyia la a le kɛ, asoo yɛlɛyɛ ninyɛne mɔɔ anwo hyia la amaa yɛafɛta kɛ yɛkɛboka “azɛlɛ fofolɛ” ne mɔɔ “anwuma fofolɛ” ne banlea zolɛ la anwo?
