Kɛ Ɛlɛsi Wɔabɔ Wɔ Ɛbɛla Ɛ?

• Alehyenlɛ ko biala anu edwɛkɛ ɛli menli dɔɔnwo adwenle bɔkɔɔ mɔɔ ɔmmaa bɛndwenle kɛ bɛlɛsi bɛabɔ bɛ ɛbɛla la anwo a.

• Baebolo ne ka ninyɛne mɔɔ yɛ nwanwane mɔɔ la yɛ nyunlu mɔɔ basisi la anwo edwɛkɛ kile yɛ. Eza ɔbɔ kɔkɔ kɛ ngakyile kpole bara fane ngakyile mɔɔ alesama ɛyɛ la anu wɔ ewiade amuala. Amaa yɛanyia nuhua nvasoɛ na yɛahoati esiane la, nyɛleɛ kpalɛ nwo hyia.

• Menli bie mɔ wɔ ɛkɛ mɔɔ bɛze mɔɔ Baebolo ne ka la yɛɛ bɛbɔ mɔdenle bɛfa bɛdi gyima noko bɛmaa asetɛnla nu adwenledwenle twetwe bɛ fi nwolɛ.

• Asoo ɛ nye die kɛ ɛlɛsi wɔabɔ wɔ ɛbɛla la anwo? Saa ɛyɛ ninyɛne nwo ngyehyɛleɛ a, asoo ɛsuzu kɛzi bɛbahola bɛaha ninyɛne mɔɔ gyi ɛ nye zo kenlebie la anwo?

[Ɛlɛka/Nvoninli ne mɔ wɔ mukelɛ 9]

Duzu A Anwo Hyia Wɔ Kpalɛ A?

Kɛzi ɛkɛbu mɔɔ doɔdoa zolɛ la ɛ? Tiedia bɛ kɛmɔ bɛ nwo si hyia wɔ la.

Bɛ nuhua dɔɔnwo anwo hyia wɔ asetɛnla nu, noko saa ɛye bie a, boni a kɛlumua a? kɛdɔ zo nwiɔ? yɛɛ mɔɔ kɛha a.

․․․ Pelasilililɛ/Ɛnwomenlelielɛ

․․․ Me gyima

․․․ Me kpɔkɛdelɛ

․․․ Me ti anwo fɛlɛkolilɛ

․․․ Me bokavolɛ

․․․ Me awovolɛma

․․․ Me mra

․․․ Awuke kɛnlɛma, tɛladeɛ kpalɛ

․․․ Medie duma wɔ debie biala ɛyɛlɛ nu

․․․ Nyamenle Ɛzonlenlɛ

 [Ɛlɛka wɔ mukelɛ 10, 11]

Asoo Ɛlɛsi Kpɔkɛ Kpalɛ wɔ Wɔ Ɛbɛlabɔlɛ Nu?

SUZU EDWƐKƐBIZALƐ ƐHYE MƆ ANWO

PELASILILILƐ/ƐNWOMENLELIELƐ: Asoo ɛnwomenlelielɛ mɔɔ mekpa la maa menyia anwosesebɛ? Asoo ɔle esiane debie mɔɔ bahola azɛkye me kpɔkɛdelɛ anzɛɛ yeamaa meayɛ wuleravolɛ? Asoo ɔle pelasilililɛ mɔɔ maa bɛ nye die wɔ mekɛ ekyi bie anu noko ɔkola ɔmaa bɛdi alɔbɔlɛ mekɛ tendenle la ɔ? Saa bɔbɔ pelasilililɛ mɔɔ mekpa la fɛta a, asoo mesɛkye mekɛ dɔɔnwo wɔ nwolɛ mɔɔ ɔmmaa mennyia mekɛ menyɛ ninyɛne mɔɔ anwo hyia la?

ME GYIMA: Asoo ɔboa me, anzɛɛ ɔdie me mekɛ kɔsɔɔti? Asoo ɔyɛ se somaa mɔɔ ɔlɛsɛkye me kpɔkɛdelɛ ɔ? Asoo mekulo kɛ bɛkpɔne a mekɛha gyima nu anzɛɛ mekulo kɛ mekɛnyia mekɛ mekɛmaa me bokavolɛ yɛɛ me mra? Saa me gyimamenle ka kɛ menyɛ gyima mɔɔ gyegye me adwenle anzɛɛ ɔmmaa mennyia ɛzonlenlɛ nu ninyɛne nwo anyelielɛ la a, asoo gyima ne ati mekɛyɛ zɔ?

ME KPƆKƐDELƐ: Asoo mefa medi nwɔhoa, anzɛɛ me nye bolo mebɔ nwolɛ bane? Asoo yemɔ anwo edwɛkɛ ala a meka a? Asoo kɛ mesi meyɛ ye la kile kɛ medwenle me abusua ne anwo ɔ?

ME TI ANWO FƐLƐKOLILƐ: Asoo ɛhye a medumua medwenle nwolɛ a? Asoo mefa medumua me bokavolɛ anzɛɛ me abusua ne fɛlɛkolilɛ nyunlu? Asoo adenle mɔɔ medua zolɛ mekpondɛ ye la nee nɔhalɛ Nyamenle ne mɔɔ mesonle ye la adenle le ko?

ME BOKAVOLƐ: Asoo mebu me bokavolɛ kɛ ɔle me gɔnwo wɔ mekɛ mɔɔ ɔyɛ me kɛnlɛma ala la? Asoo medi me bokavolɛ ne eni kɛ awie mɔɔ fɛta ɛbulɛ la? Asoo Nyamenle anu diedi ka kɛ mesi mebu me bokavolɛ la?

ME AWOVOLƐMA: Saa metɛde kakula a, asoo metie me awovolɛma—mefa ɛbulɛ meye bɛ edwɛkɛ nloa, meyɛ gyima mɔɔ bɛfa bɛmaa me, meba sua nu wɔ mekɛ mɔɔ bɛkɛhile, mekoati agɔnwolɛvalɛ yɛɛ ninyɛne mɔɔ bɛbɔ nwolɛ kɔkɔ la? Saa me nyi a, asoo mefa ɛbulɛ metie me awovolɛma, na meboa bɛ kɛmɔ ɔfɛta la wɔ mekɛ mɔɔ nwolɛ kɛhyia la? Asoo mekulo a yɛɛ metie bɛ a anzɛɛ ɔlua Nyamenle Edwɛkɛ ne anu folɛdulɛ zo?

ME MRA: Asoo mete nganeɛ kɛ ɛzonlelilɛ la me nwo zo kɛ mekilehile me mra ɛbɛlabɔlɛ kpalɛ, anzɛɛ me nye la kɛ sukulu ne mɔ kɛyɛ zɔ? Asoo menyia mekɛ memaa me mra, anzɛɛ memaa bɛfa nwɔhoalilɛ ninyɛne, TV, anzɛɛ sua nu ɛkɛ ne kɔmputer a bɛdielie bɛ nye a? Asoo metea me mra wɔ mekɛ biala mɔɔ bɛkɛbu bɛ nye bɛkɛgua Nyamenle mɛla ne mɔ azo, anzɛɛ meyɛ zɔ wɔ mekɛ mɔɔ bɛkɛha me ɛya ala la?

AWUKE KƐNLƐMA, TƐLADEƐ KPALƐ: Duzu a ka kɛ mesi medwenle me anwoziezielɛ yɛɛ me anwonyia nwo a—mekpondɛ kɛ memaa me gɔnwo mɔ nwu ye la ati? me abusua ne boɛlilɛ ti? Anzɛɛ kɛmɔ mesonle Nyamenle la ati ɔ?

MEDIE DUMA WƆ DEBIE BIALA ƐYƐLƐ NU: Asoo mete nganeɛ kɛ nwolɛ hyia kɛ mefa adenle kpalɛ zo meyɛ ninyɛne? Asoo mebɔ mɔdenle kɛ medie duma? Saa awie gyɛne yɛ debie kpalɛ tɛla me a asoo ɔgyegye me?

NYAMENLE ƐZONLENLƐ: Asoo ɛlielɛ mɔɔ Nyamenle die me ado nuhua la sonle bolɛ maa me tɛla kɛ me bokavolɛ, me mra, me awovolɛma, anzɛɛ me gyimamenle kɛlie me kɛdo nuhua la? Amaa meanyia asetɛnla mɔɔ anwodɔlɛ wɔ nu la, asoo mekɛhulo kɛ memaa ɛzonlenlɛ mɔɔ mefa meamaa Nyamenle la yɛ mɔɔ nwolɛ ɛngyia ɔ?

 SUZU BAEBOLO NE FOLƐDULƐ NE ANWO KPALƐ

Kɛ Nyamenle nwo si hyia wɔ wɔ ɛbɛlabɔlɛ nu ɛ?

Nolobɔvo 12:13: “Bɛzulo Nyamenle, na bɛli ye mɛla ne mɔ azo, ɔboalekɛ sonla gyima mɔɔ la ɔ nwo zo la ala ɛne.”

BIZA Ɛ NWO KƐ: Asoo me ɛbɛlabɔlɛ kile kɛ mebu ninyɛne zɔ ɔ? Asoo Nyamenle mɛla nwo tieyɛ ka kɛ mesi medi ɛzonlelilɛ wɔ sua nu, gyima nu, anzɛɛ wɔ sukulu nwo gyima la? Anzɛɛ ninyɛne gyɛne anzɛɛ asetɛnla nu ngyegyelɛ a kile mekɛ mɔɔ ɔwɔ kɛ menyia memaa Nyamenle la ɔ?

Abusuabɔlɛ boni a ɛnee Nyamenle lɛ a?

Mrɛlɛbulɛ 3:5, 6: “Yeye wɔ ahonle nu fa ɛ rɛle wula [Yehowa, NW] anu, mmafa wɔ adwenle ɛsɔ ɛ ngome wɔ nrɛlɛbɛ. Nwu Nyamenle wɔ wɔ ɛbɛlabɔlɛ muala anu na ɔbamaa wɔ ndenle adenrɛ fɔɔnwo amaa wɔ.”

Mateyu 4:10: “Yeyɛ [Yehowa, NW] wɔ Nyamenle ne na sonle ɔdaye ɔ ngome ala.”

BIZA Ɛ NWO KƐ: Asoo kɛ mete Nyamenle anwo nganeɛ la ɛne? Asoo ninyɛne mɔɔ meyɛ ye alehyenlɛ biala la yɛɛ kɛ mesi medi gyinlabelɛ ɛsesebɛ nwo gyima la kile diedi nee tunwomaa zɛhae ɔ?

Kɛzi Baebolo ɛgengalɛ yɛɛ ye ɛzukoalɛ nwo si hyia wɔ ɛ?

Dwɔn 17:3: “Ngoane mɔɔ ɛnlɛ awieleɛ la a le kɛ bɛkɛnwu kɛ wɔmɔ a ɛle nɔhalɛ Nyamenle kokye ne a, na bɛkɛnwu Gyisɛse Kelaese, mɔɔ wɔzoa ye la.”

BIZA Ɛ NWO KƐ: Asoo kɛ mesi mekenga Nyamenle Edwɛkɛ ne na medwenledwenle nwolɛ kpalɛ la kile kɛ medie medi zɔ amgba?

Kɛzi Keleseɛne asafo ayia ɛhɔlɛ nwo si hyia wɔ ɛ?

Hibuluma 10:24, 25: ‘Bɛmaa yɛdwenle yɛkpondɛ adenle mɔɔ yɛdua zolɛ a yɛkɛhulo yɛ nwo ngoko ngoko, na yɛkɛyɛ gyima kpalɛ la. Bɛmmamaa yɛgyakyi kɛ yɛkɛhɔ yɛ nyianu ne, . . . mekɛ mɔɔ bɛkɛnwu kɛ awieleɛ ne ɛlɛbikye la.’

Edwɛndolɛ 122:1: “Ɔyɛle me fɛ, mekɛ mɔɔ bɛhanle bɛhilele me kɛ: ‘Maa yɛhɔ [Yehowa, NW] sua nu.’”

BIZA Ɛ NWO KƐ: Asoo kɛ mesi mebɔ me ɛbɛla la kile anyezɔlɛ maa adehilelɛ ɛhye mɔɔ wɔ Nyamenle Edwɛkɛ ne anu la? Siane ne mɔɔ ɛze ɛhɔ la, asoo meangɔ Keleseɛne ayia ne bie mɔ ɔluakɛ menvale debie menlumuanle la ati ɔ?

Asoo ɛfa mɔdenlebɔlɛ ɛka Nyamenle nee ye atiakunlukpɔkɛ ne anwo edwɛkɛ ɛkile awie mɔ?

Mateyu 24:14: ‘Bɛbabɔ edwɛkpa ɛhye mɔɔ fane Belemgbunlililɛ ne anwo la nolo wɔ aleɛabo amuala amaa yeayɛ daselɛlilɛ . . . , kolaa na awieleɛ ne ara.’

Mateyu 28:19, 20: “Yemɔti bɛhɔ maanle ti nee maanle bo bɛmaa menli ɛrayɛ me ɛdoavolɛma, . . . na bɛhilehile bɛ bɛmaa bɛli debie biala mɔɔ meha mehile bɛ la azo.”

Edwɛndolɛ 96:2: “Bɛdo edwɛne bɛmaa [Yehowa, NW], na bɛyeyɛ ye. Bɛbɔ ye ngoanelielɛ ne nolo alehyenlɛ biala.”

BIZA Ɛ NWO KƐ: Asoo gyima ɛhye anwo hyia me amgba? Asoo kɛ mesi meyɛ ye la kile kɛ medie medi kɛ mekɛ mɔɔ yɛde nuhua la anwo hyia?