“Mɔɔ Hyia Kpalɛ La, Bɛva Bɛ Ahonle Muala Bɛhulo Bɛ Nwo”

“Ninyɛne kɔsɔɔti awieleɛ ɛbikye. . . . Mɔɔ hyia kpalɛ la, bɛva bɛ ahonle muala bɛhulo bɛ nwo ngoko ngoko.”—1 PITA 4:7, 8.

ƐNEE Gyisɛse ze kɛ ye mekɛ ekyi mɔɔ li awieleɛ mɔɔ ɔ nee ye ɛdoavolɛma balua la anwo hyia. Ɛnee ɔze mɔɔ la bɛ nyunlu la. Ɛnee bɛlɛ gyima dɔɔnwo mɔɔ ɔwɔ kɛ bɛyɛ, noko, ɛnee bɛbakpɔ bɛ na bɛayɛ bɛ kpɔdekpɔde kɛmɔ bɛvale bɛyɛle ye ala la. (Dwɔn 15:18-20) Fane dɔɔnwo wɔ zɔhane nɔe ne mɔɔ li awieleɛ la anu, ɔhakyele bɛ kɛ ɔhyia kɛ ‘bɛkulo bɛ nwo ngoko ngoko.’—Dwɔn 13:34, 35; 15:12, 13, 17.

² Ɛzoanvolɛ Pita, mɔɔ ɛnee wɔ ɛkɛ ne zɔhane nɔe ne la, dele edwɛkɛ ne abo. Wɔ ɛvolɛ dɔɔnwo anzi, mekɛ mɔɔ ɛnee ɔka ekyii na bɛazɛkye Gyɛlusalɛm la, Pita zile kɛ ɛhulolɛ nwo si hyia la azo. Ɔdule Keleseɛnema folɛ kɛ: “Ninyɛne kɔsɔɔti awieleɛ ɛbikye. . . . Mɔɔ hyia kpalɛ la, bɛva bɛ ahonle muala bɛhulo bɛ nwo ngoko ngoko.” (1 Pita 4:7, 8) Pita edwɛkɛ ne anwo hyia kpalɛ maa bɛdabɛ mɔɔ bɛwɔ ewiade ɛhye “awieleɛ mekɛ ne” anu la. (2 Temɔte 3:1) ‘Ahonle muala nu ɛhulolɛ’ a le duzu? Duzu ati a nwolɛ hyia kɛ yɛnyia zɛhae ɛhulolɛ ne yɛmaa awie mɔ ɛ? Na kɛzi yɛkola yɛkile kɛ yɛlɛ zɛhae ɛhulolɛ ne ɛ?

‘Ahonle Muala nu Ɛhulolɛ’—Yemɔ A Le Duzu?

³ Menli dɔɔnwo suzu ɛhulolɛ nwo kɛ ɔle nganeɛdelɛ mɔɔ ɔwɔ kɛ ɔfi yɛ nu ala a ɔba a. Noko ɛnee tɛ ɛhulolɛ bie ala a Pita ɛlɛka nwolɛ edwɛkɛ a; ɛnee ɔlɛka ɛhulolɛ kpalɛ nwo edwɛkɛ. Edwɛkɛkpɔkɛ “ɛhulolɛ” ne mɔɔ wɔ 1 Pita 4:8 la le Giliki edwɛkɛkpɔkɛ a·gaʹpe mɔɔ bɛhile ɔ bo la. Zɔhane edwɛkɛkpɔkɛ ne kile ɛhulolɛ mɔɔ angomedi ɛnle nu mɔɔ lɛ ngyinlazo la. Buluku ko ka kɛ: “Agape ɛhulolɛ le mɔɔ bɛkola bɛkile ye adenle a ɔluakɛ tɛ nganeɛdelɛ a ka ye a na emomu ɔle kpɔkɛ mɔɔ bɛsi bɛyɛ debie a.” Ɔluakɛ angomedi wɔ yɛ nwo la ati, yɛhyia ngakyelɛ amaa yɛahulo yɛ nwo ngoko ngoko, wɔ ndenle mɔɔ ngyinlazo kpalɛ kile ye adenle la azo.—Mɔlebɛbo 8:21; Wulomuma 5:12.

⁴ Ɛhye ɛngile kɛ ɔwɔ kɛ yɛnyia ɛhulolɛ yɛmaa yɛ nwo ngoko ngoko kɛmɔ bɛse yɛyɛ ye zɔ la ati ɔ. A·gaʹpe ɛnle ɛhulolɛ mɔɔ anyelielɛ nee nganeɛdelɛ ɛnle nu a. Pita hanle kɛ ɔwɔ kɛ ‘yɛfa ahonle muala [mɔɔ abo kile, “mɔɔ anu tɛlɛ” la] yɛkulo yɛ nwo ngoko ngoko.’ * (Kingdom Interlinear) Noko akee, ɛhulolɛ zɛhae hyia mɔdenlebɔlɛ. Abɔlɔba ko hanle ye wɔ Giliki edwɛkɛkpɔkɛ mɔɔ bɛhile ɔ bo “ahonle muala” la anwo kɛ: “Ɔkile kɛ awie mɔɔ su ɛnriandilɛ la si mia ɔ nwo wɔ mekɛ mɔɔ ɔlɛba yearawie ɛnriandilɛ ne la.”

⁵ Ɛhye ati, ɔnle kɛ yɛ ɛhulolɛ ne ka ninyɛne mɔɔ bɛ ɛyɛlɛ ɛnyɛ se la anzɛɛ menli ekyi bie ala. Keleseɛne ɛhulolɛ kile kɛ ɔwɔ kɛ yɛbuke yɛ ahonle nu, na yɛda ɛhulolɛ ali wɔ mekɛ bɔbɔ mɔɔ zɔhane ɛyɛlɛ yɛ se la. (2 Kɔlentema 6:11-13) Ɔda ali wienyi kɛ, ɛhulolɛ ɛhye le debie mɔɔ ɔhyia kɛ yɛyɛ nwolɛ gyima na yɛanyia a, kɛmɔ awie mɔɔ su ɛnriandilɛ la ɔwɔ kɛ tete ɔ nwo na ɔfa ɔyɛ gyima ɔmaa ye mɔdenlebɔlɛ nyia ngɔzo la. Nwolɛ hyia kɛ yɛnyia ɛhulolɛ zɛhae yɛmaa yɛ nwo ngoko ngoko. Kɛmɔti ɛ? Yeanyɛ boɛ fee la, ɔlua ninyɛne nsa ati.

 Duzu Ati A Ɔwɔ Kɛ Yɛkulo Yɛ Nwo Ngoko Ngoko A?

⁶ Mɔɔ lumua la, “ɔluakɛ ɛhulolɛ vi Nyamenle.” (1 Dwɔn 4:7) Yehowa, mɔɔ subane kɛnlɛma ɛhye vi ye la, lumua hulole yɛ. Ɛzoanvolɛ Dwɔn se: “Kɛ Nyamenle zile hilele kɛ ɔkulo yɛ la ɛne, ɔzoanle ɔ Ra kokye ne wɔ ewiade ye anu, amaa ɔlua ɔ nwo zo yɛanyia ngoane.” (1 Dwɔn 4:9) ‘Bɛzoanle’ Nyamenle Ra ne ɔlua dasanli mɔɔ ɔrayɛle, ɔyɛle ye ɛzonlenlɛ gyima ne na ɔwule wɔ amaneɛnwunlɛ baka zo la azo—ɔyɛlɛ ɔ muala “amaa yɛanyia ngoane.” Kɛzi ɔwɔ kɛ Nyamenle ɛhulolɛ kpole ɛhye mɔɔ ɔlale ye ali la ka yɛ ɛ? Dwɔn se: “Saa Nyamenle ɛhulo yɛ ɛhulolɛ zɛhae a, ɛnee ɔwɔ kɛ yɛdayɛ noko yɛkulo yɛ nwo ngoko ngoko.” (1 Dwɔn 4:11) Yɛ ye nzonlɛ kɛ Dwɔn hɛlɛle kɛ, “Saa Nyamenle ɛhulo yɛ ɛhulolɛ zɛhae a”—tɛ ɛ ngome ala na emomu yɛ muala. Edwɛkɛ ne anu la ɛkɛ ne wienyi: Saa Nyamenle kulo yɛ gɔnwo mɔ azonvolɛ a, ɛnee ɔwɔ kɛ yɛdayɛ noko yɛkulo bɛ.

⁷ Mɔɔ to zolɛ nwiɔ, Nwolɛ hyia kpalɛ kɛ yɛkulo yɛ nwo ngoko ngoko kpalɛ wɔ mekɛ ɛhye anu amaa yɛaboa yɛ mediema mɔɔ ɛhyia la ɔluakɛ “ninyɛne kɔsɔɔti awieleɛ ɛbikye.” (1 Pita 4:7) Yɛwɔ mekɛ mɔɔ “anwongyelelɛ dɔɔnwo” wɔ nu la anu. (2 Temɔte 3:1) Ewiade ye anu gyinlabelɛ, esiane, yɛɛ dwazotia maa yɛ nwo kyele yɛ. Wɔ gyinlabelɛ mɔɔ yɛ se la anu, ɔhyia kɛ yɛtwe yɛbikye yɛ nwo ngoko ngoko kpalɛ. Ahonle muala nu ɛhulolɛ baha yɛ abɔ nuhua ɛsesebɛ na yeaha yɛ yeamaa ‘yɛadwenle yɛamaa yɛ nwo ngoko ngoko.’—1 Kɔlentema 12:25, 26.

⁸ Mɔɔ tɔ zolɛ nsa, ɔhyia kɛ yɛkulo yɛ nwo ngoko ngoko ɔluakɛ yɛmkpondɛ kɛ ‘yɛmaa Abɔnsam adenle’ yɛmaa ɔsɛkye yɛ. (Ɛfɛsɛsema 4:27) Seetan anwo yɛ ndɛ kɛ ɔfa yɛ mediema diedima sinlidɔlɛ, bɛ bɛtɛɛyɛlɛ nee bɛ nvonleɛ yeali gyima, yeava yeadenda yɛ gyakɛ anu. Asoo edwɛkɛ bie mɔɔ bɛandwenle nwolɛ anzɛɛ atisesebɛ nyɛleɛ bie bamaa yɛahwe yɛ nwo yɛavi asafo ne anwo? (Mrɛlɛbulɛ 12:18) Saa yɛlɛ ahonle muala nu ɛhulolɛ yɛmaa yɛ nwo ngoko ngoko a, yɛnrɛyɛ zɔ! Ɛhulolɛ zɛhae maa yɛnyia anzondwolɛ na yɛbɔ nuhua yɛsonle Nyamenle.—Zɛfanaya 3:9.

Kɛzi Ɛkile kɛ Ɛkulo Awie Mɔ La

⁹ Ɛhulolɛ mɔɔ bɛkile la ɔwɔ kɛ bɔ ɔ bo wɔ sua nu. Gyisɛse hanle kɛ bɛbalua ɛhulolɛ mɔɔ bɛlɛ bɛmaa bɛ nwo ngoko ngoko la azo bɛanwu ye nɔhalɛ ɛdoavolɛma. (Dwɔn 13:34, 35) Tɛ asafo ne anu ala a ɔwɔ kɛ ɛhulolɛ da ali a na emomu wɔ abusua ne anu noko—wɔ agyalɛ bokavolɛma avinli yɛɛ awovolɛma nee bɛ mra avinli. Nganeɛ mɔɔ yɛte kɛ yɛlɛ ɛhulolɛ yɛmaa abusua ne anu amra la anzo; ɔwɔ kɛ ɔda ali wɔ ndenle mɔɔ fɛta la azo.

¹⁰ Kɛzi agyalɛ bokavolɛma kola kile ɛhulolɛ maa bɛ nwo ɛ? Kunli mɔɔ kulo ɔ ye nɔhalɛ nu la dua ye edwɛkɛ yɛɛ nyɛleɛ zo maa ɔ ye nwu ye—wɔ gua zo yɛɛ sua nu, kɛ ɔ nye die ɔ nwo. Ɔbu ye kɛ ɔfɛta enililɛ yɛɛ ɔsuzu ye adwenle, ye nzuzulɛ yɛɛ ye nganeɛdelɛ nwo. (1 Pita 3:7) Ɔfa ye boɛlilɛ ɔdumua ye ɛdeɛ nyunlu na ɔbɔ mɔdenle biala ɔdi ye nwonane nu, ɛzonlenlɛ nu yɛɛ nganeɛdelɛ nu ngyianlɛ nwo gyima. (Ɛfɛsɛsema 5:25, 28) Yelɛ mɔɔ kulo ɔ hu nɔhalɛ nu la di ye “eni,” saa bɔbɔ ɔdwu mekɛ ne bie a ɔngola ɔnyɛ mɔɔ ɔkpondɛ kɛ ɔyɛ la a. (Ɛfɛsɛsema 5:22, 33) Ɔboa ye bokavolɛ ne na ɔbɛlɛ ɔ nwo aze ɔmaa ye, ɔnva adwenle ɛtane ɔmbiza ninyɛne ɔnvi ye ɛkɛ, na emomu ɔ nee ye yɛ ko bɛmaa bɛ nye kɔ ɛzonlenlɛ nu ninyɛne zo.—Mɔlebɛbo 2:18; Mateyu 6:33.

¹¹ Awovolɛma, kɛzi bɛkola bɛkile ɛhulolɛ bɛmaa bɛ mra ɛ? Mɔdenle mɔɔ bɛbɔ kɛ bɛyɛ  gyima ɛsesebɛ bɛamaa bɛanyia mɔɔ hyia bɛ wɔ nwonane nu la maa bɛnwu bɛ ɛhulolɛ ne. (1 Temɔte 5:8) Noko ngakula hyia dɔɔnwo tɛla aleɛ, tɛladeɛ yɛɛ bɛ nwo banebɔlɛ. Saa bɛkɛnyi, bɛkɛhulo nɔhalɛ Nyamenle ne na bɛkɛzonle ye a, bɛhyia ɛzonlenlɛ nu ndetelɛ. (Mrɛlɛbulɛ 22:6) Yemɔ kile kɛ ɔwɔ kɛ bɛnyia mekɛ kɛ abusua la bɛsukoa Baebolo ne, bɛkɔ daselɛlilɛ na bɛkɔ Keleseɛne ayia. (Mɛla ne 6:4-7) Saa gyima zɛhae mɔ bahɔ zolɛ dahuu a ɔhyia afɔlebɔlɛ kpole, ye titile ne wɔ anwongyelelɛ dɔɔnwo mekɛ ɛhye mɔ anu. Bɛ mra ne mɔ ɛzonlenlɛ nu ngyianlɛ mɔɔ bɛdwenle nwolɛ yɛɛ mɔdenle mɔɔ bɛbɔ kɛ bɛdi nwolɛ gyima la kile ɛhulolɛ mɔɔ bɛlɛ, ɔluakɛ bɛdua zɔhane ɛyɛlɛ zo bɛkile kɛ bɛdwenle bɛ dahuu boɛlilɛ nwo.—Dwɔn 17:3.

¹² Nwolɛ hyia noko kɛ awovolɛma da ɛhulolɛ ali ɔlua bɛ mra ne mɔ nganeɛdelɛ nu ngyianlɛ mɔɔ bɛdi nwolɛ gyima la azo. Ngakula ɛnlɛ anwosesebɛ; zɔhane ati bɛhyia kɛ bɛkɛnwu kɛ ɛkulo bɛ. Bɛha bɛhile bɛ kɛ bɛkulo bɛ, na bɛyɛ ninyɛne dɔɔnwo wɔ ɛhulolɛ nu bɛmaa bɛ, ɔluakɛ edwɛkɛ zɛhae mɔ maa bɛnyia anwodozo kɛ bɛkulo bɛ yɛɛ bɛsonle bolɛ. Bɛvi ɛhulolɛ nu bɛhanvo bɛ kpalɛ, ɔluakɛ ɔmaa bɛnwu kɛ bɛnwu bɛ mɔdenlebɔlɛ na ɔsɔ bɛ nye. Bɛvi ɛhulolɛ nu bɛdea bɛ, ɔluakɛ ɛdenrɛlɛ zɛhae maa bɛnwu ye kɛ bɛdwenle menli holɛ mɔɔ bɛbarayɛ la anwo. (Ɛfɛsɛsema 6:4) Ɛhulolɛ nwo edwɛkɛ zɛhae mɔ amuala mɔɔ fɛta la boa maa bɛnyia abusua mɔɔ anyelielɛ wɔ nu, mɔɔ ka bɔ nu mɔɔ ɛziezie ɔ nwo kpalɛ kɛ ɔgyinla awieleɛ mekɛ ɛhye mɔ anu ngyegyelɛ ne mɔ anloa la.

¹³ Ɛhulolɛ ka yɛ maa yɛbu yɛ nye yɛgua awie mɔ sinlidɔlɛ zo. Kakye kɛ mekɛ mɔɔ ɔtu ye kengavolɛma folɛ kɛ “bɛva bɛ ahonle muala bɛhulo bɛ nwo ngoko ngoko” la, Pita hilele deɛ mɔɔ ɔti ɛhye anwo hyia kpalɛ la: “Ɔboalekɛ ɛhulolɛ maa bɛfa ɛtane dɔɔnwo bɛkyɛ.” (1 Pita 4:8) Ɛtane mɔɔ yɛfa yɛahyɛ la ɛngile kɛ ‘yɛfea’ ɛtane mɔɔ anyebolo wɔ nuhua la azo. Bɛka edwɛkɛ mɔɔ le zɛhae mɔ la bɛkile menli mɔɔ lɛ nwolɛ adenle wɔ asafo ne anu la bɛmaa bɛdi nwolɛ gyima. (Sɛlɛvolɛma 5:1; Mrɛlɛbulɛ 29:24) Ɔnrɛyɛ ɛhulolɛ fee yɛɛ ɔnrɛyɛ mɔɔ gyi ngɛlɛlera zo kɛ yɛkɛmaa menli mɔɔ anyefuu yɛ ɛtane la kɛhɔ zo kɛboda anzɛɛ kɛzɛkye anzenwolɛbiema.—1 Kɔlentema 5:9-13.

¹⁴ Fane dɔɔnwo ne ala, nvonleɛ yɛɛ sinlidɔlɛ mɔɔ wɔ yɛ mediema nwo la le ngyikyi bie. Ɔdwu mekɛ ne bie a, yɛ muala yɛfo wɔ yɛ edwɛkɛ ɛhanlɛ anzɛɛ nyɛleɛ nu, yɛmaa yɛ gɔnwo mɔ arɛle bɔ anzɛɛ yɛmaa bɛdi nyane. (Gyemise 3:2) Asoo ɔwɔ kɛ yɛmaa yɛ nloa yɛ ndɛndɛ yɛbɔ awie mɔ sinlidɔlɛ nolo? Nyɛleɛ zɛhae bamaa mgbonde ala asafo ne anu ala. (Ɛfɛsɛsema 4:1-3) Saa ɛhulolɛ kile yɛ adenle a, yɛnrɛbɔ yɛ mediema azonvolɛ “anwo nzekue.” (Edwɛndolɛ 50:20) Kɛmɔ bane nwo sɛkye a bɛyɛ ye boɛ na bɛfa penti bɛkeda zolɛ la, zɔhane ala a ɛhulolɛ keda awie mɔ sinlidɔlɛ zo a.—Mrɛlɛbulɛ 17:9.

¹⁵ Ɛhulolɛ baha yɛ yeamaa yɛaboa bɛdabɛ mɔɔ bɛhyia kpalɛ la. Mekɛ mɔɔ awieleɛ mekɛ ye anu gyinlabelɛ ɛlɛkɔ zo azɛkye la, mekɛ bie bara mɔɔ yɛ mediema diedima bahyia ninyɛne anzɛɛ aleɛ nwo moalɛ a. (1 Dwɔn 3:17, 18) Kɛ neazo la, asoo yɛ asafo ne anu amra bie ɛyia ezukoa afoa nu anwongyelelɛ anzɛɛ ye gyima ɛvi ɔ sa? Ɛnee bie a yɛkola yɛfa ninyɛne bie yɛboa ye, kɛmɔ yɛ gyinlabelɛ ne kɛmaa yɛ adenle la. (Mrɛlɛbulɛ 3:27, 28; Gyemise 2:14-17) Asoo ɔhyia kɛ bɛyɛ kunlavolɛ bie mɔɔ ɛyɛ ɛrelera la sua nu boɛ? Ɛnee bie yɛkola yɛdumua yɛkɔyɛ gyima ne bie yɛfa yɛboa ye.—Gyemise 1:27.

¹⁶ Ɛhulolɛ mɔɔ yɛkile yɛamaa awie mɔ la ɛnle mɔɔ dwu bɛdabɛ mɔɔ yɛ nee bɛ de ala la ɛkɛ a. Ɔdwu mekɛ ne bie a, yɛbahola yɛade amaneɛbɔlɛ mɔɔ fane Nyamenle azonvolɛ mɔɔ wɔ maanle gyɛne zo mɔɔ ahumuakyima, azɛlɛkpusulɛ anzɛɛ maanle nu basabasayɛlɛ nwo esiane  mɔɔ anu yɛ se la ɛdo bɛ a. Bie a bɛbahyia aleɛ, tɛladeɛ yɛɛ ninyɛne gyɛne nwo ɛsesebɛ. Ɔnvane nwolɛ kɛ bɛvi aneɛ anzɛɛ mbusua ekpunli gyɛne nu la. ‘Yɛkulo yɛ gɔnwo mɔ diedima.’ (1 Pita 2:17) Ɛhye ati, kɛmɔ ɛvoya ne mɔɔ lumua la anu asafo ne mɔ yɛle la, yɛziezie yɛ nwo kɛ yɛboa moalɛ nwo ngyehyɛlɛ mɔɔ bɛyɛ kɛ bɛfa bɛaboa la. (Gyima ne 11:27-30; Wulomuma 15:26) Saa yɛda ɛhulolɛ ali wɔ ndenle zɛhae mɔ amuala azo a, koyɛlɛ ne mɔɔ ka yɛ bɔ nu wɔ awieleɛ mekɛ ɛhye mɔ anu la anu mia.—Kɔlɔsaema 3:14.

¹⁷ Ɛhulolɛ ka yɛ maa yɛka Nyamenle Belemgbunlililɛ ne anwo edwɛkpa ne yɛkile awie mɔ. Suzu Gyisɛse neazo ne anwo nea. Duzu ati a ɔhanle edwɛkɛ ne na ɔhilehilele a? “Ɔ kunlu yelɛyelale ye kpole” manle menli ne ɔluakɛ ɛnee bɛ ɛzonlenlɛ nu gyinlabelɛ ne yɛ alɔbɔlɛ la ati. (Maake 6:34) Adalɛ ɛzonlenlɛ mboaneneavolɛ, mɔɔ ɔwɔ kɛ anrɛɛ kilehile bɛ ɛzonlenlɛ nu nɔhalɛ na bɛmaa bɛnyia anyelazo la, bule bɛ nye guale bɛ nwo zo na bɛbɛlɛbɛlale bɛ. Ɛhye ati, kɛmɔ ahonle nu ɛhulolɛ nee anwunvɔnezelɛ kpole hanle Gyisɛse la, ɔvale ‘Nyamenle belemgbunlililɛ ne anwo edwɛkpa ne’ ɔkyekyele menli ne arɛle.—Luku 4:16-21, 43.

¹⁸ Ɛnɛ, noko, bɛbu bɛ nye bɛgua menli dɔɔnwo ɛzonlenlɛ nu ninyɛne zo, bɛbɛlɛbɛla bɛ yɛɛ bɛnlɛ anyelazo. Saa yɛdwenle menli mɔɔ ɛtɛbanwunle nɔhalɛ Nyamenle ne la, ɛzonlenlɛ nu ngyianlɛ nwo, kɛmɔ Gyisɛse yɛle la a, ɛnee ɛhulolɛ yɛɛ anwunvɔnezelɛ baha yɛ kɛ yɛha Nyamenle Belemgbunlililɛ ne anwo edwɛkpa ne yɛhile bɛ. (Mateyu 6:9, 10; 24:14) Ɔlua mekɛ ekyi ne mɔɔ ɛha la ati, nwolɛ ɛhyia ɛdɛla mekɛ biala kɛ bɛbɔ ngoanelielɛ nrɛlaleɛ ɛhye nolo.—1 Temɔte 4:16.

“Ninyɛne Kɔsɔɔti Awieleɛ Ɛbikye”

¹⁹ Kakye kɛ, kolaa na Pita adu ye folɛ ne kɛ bɛhulo bɛ nwo ngoko ngoko la, ɔlumua ɔhanle kɛ “Ninyɛne kɔsɔɔti awieleɛ ɛbikye.” (1 Pita 4:7) Ɔnrɛhyɛ ewiade ɛtane ɛhye bavi ɛkɛ yeamaa Nyamenle tenlene ewiade fofolɛ ne ara. (2 Pita 3:13) Ɛnee akee, ɛnɛ, ɛnle mekɛ mɔɔ yɛto yɛ adwenle nu a. Gyisɛse bɔle yɛ kɔkɔ kɛ: ‘Bɛnlea bɛ nwo boɛ, bɛmmamaa anyelielɛ dɔɔnwo, nza ɛbolɛ nee ɛbɛla ye anu ɛvɛlɛvɛlɛ di bɛ adwenle somaa, anrɛɛ ndɛnebualɛ kenle ne ɛralɛ kɛli bɛ nvunu kɛhye bɛ kɛ ɛhane.’—Luku 21:34, 35.

²⁰ Ɛnee, akee adenle biala la azo, bɛmaa ‘yɛhɔ zo yɛzinza,’ na yɛ nye ɛla ɛleka mɔɔ mekɛ ne ɛdwu la. (Mateyu 24:42) Bɛmaa yɛnlea boɛ wɔ Seetan sɔnea ne mɔ anu biala mɔɔ bahola ahwehwe yɛ la anwo. Bɛmmamaa yɛmaa ewiade ɛtane ɛhye adenle ɔtwe yɛ ɔfi ɛhulolɛ mɔɔ yɛkile yɛamaa awie mɔ la anwo ɛlɛ. Mɔɔ hyia kpalɛ la, bɛmaa yɛhwe yɛbikye Yehowa, nɔhalɛ Nyamenle ne, mɔɔ ɔnrɛhyɛ ye Mɛzaya Belemgbunlililɛ ne bamaa ye anyunlunyia atiakunlukpɔkɛ wɔ azɛlɛ ye anwo ara nuhua la dahuu.—Yekile 21:4, 5.

[Ɔ bo ɛkɛ ne edwɛkɛ ne mɔ]

EDWƐKƐBIZALƐ

• Folɛdulɛ mɔɔ li awieleɛ boni a Gyisɛse vale manle ye ɛdoavolɛma ɛ, na duzu a kile kɛ Pita dele ɔ bo a? (Ɛden. 1-2)

• ‘Ahonle muala nu ɛhulolɛ’ a le duzu? (Ɛden. 3-5)

• Duzu ati a ɔwɔ kɛ yɛkulo yɛ nwo ngoko ngoko a? (Ɛden. 6-8)

• Kɛzi ɛkola ɛkile kɛ ɛkulo awie mɔ ɛ? (Ɛden. 9-18)

• Duzu ati a mekɛ ɛhye ɛnle mekɛ mɔɔ bɛto bɛ adwenle nu ɛ, na duzu a ɔwɔ kɛ yɛsika yɛ bo kɛ yɛkɛyɛ a? (Ɛden. 19-20)

[Nvoninli wɔ mukelɛ 29]

Abusua mɔɔ ka bɔ nu la ɛziezie ɔ nwo kpalɛ kɛ ɔgyinla awieleɛ mekɛ ɛhye mɔ anu ngyegyelɛ ne mɔ anloa

[Nvoninli wɔ mukelɛ 30]

Ɛhulolɛ ka yɛ maa yɛboa bɛdabɛ mɔɔ bɛhyia kpalɛ la

[Nvoninli wɔ mukelɛ 31]

Nyamenle Belemgbunlililɛ ne anwo edwɛkpa ne mɔɔ yɛka yɛahile awie mɔ la le ɛhulolɛ gyima