‘Ndɛnebualɛ Mekɛ Ne’ Ɛdwu

YEKILE, Baebolo buluku ne mɔɔ li awieleɛ la, maa yɛnwu kɛ anwumabɔvolɛ bie mɔɔ ɛnee lua anwomanyunlu la lɛ ‘damɛnlangoate nrɛlaleɛ mɔɔ le edwɛkpa la kɛ ɔkabɔ ye nolo.’ Ɔdeanle nu ɔhanle kɛ: “Bɛzulo Nyamenle, na bɛye ye ayɛlɛ. Ɔluakɛ mekɛ ne ɛdwu mɔɔ ɔbabua . . . ndɛne a.” (Yekile 14:6, 7) Mɔɔ boka ‘ndɛnebualɛ mekɛ’ zɔhane anwo la a le Nyamenle ndɛnebualɛ nwo nolobɔlɛ yɛɛ nwolɛ gyimalilɛ. Ndɛnebualɛ ne anwo gyimalilɛ bara kɛ “awieleɛ mekɛ ne” mɔɔ yɛde nuhua kɛkala la awieleɛ.—2 Temɔte 3:1.

‘Ndɛnebualɛ mekɛ ne’ le edwɛkpa maa bɛdabɛ mɔɔ bɛkulo tenleneyɛlɛ la. Ɔle mekɛ mɔɔ Nyamenle bamaa ye azonvolɛ, mɔɔ ɛnwu amaneɛ wɔ basabasayɛlɛ, atisesebɛ yɛɛ anyebolo ewiade ɛhye anu la anyia anwodɔlɛ a.

Kɛkala, kolaa na ‘ndɛnebualɛ mekɛ ne’ ara awieleɛ wɔ ewiade ɛtane ɛhye ɛzɛkyelɛ nu la, bɛdu yɛ folɛ kɛ: “Bɛzulo Nyamenle, na bɛye ye ayɛlɛ.” Ɛlɛyɛ zɔhane ɔ? Ɛhye kile dɔɔnwo tɛla kɛ ɛkɛha kɛ, “Medie Nyamenle medi.” (Mateyu 7:21-23; Gyemise 2:19, 20) Nyamenle nwo ɛzulolɛ kpalɛ ɔwɔ kɛ maa yɛnyia ɛbulɛ kpole yɛmaa ye. Ɔwɔ kɛ ɔka yɛ ɔmaa yɛkyi ɛtaneyɛlɛ. (Mrɛlɛbulɛ 8:13) Ɔwɔ kɛ ɔboa yɛ ɔmaa yɛkulo mɔɔ le kpalɛ la na yɛkyi mɔɔ le ɛtane la. (Emɔso 5:14, 15) Saa yɛnyia ɛbulɛ yɛmaa Nyamenle a, yɛbadie ye kpalɛ. Yɛnrɛmaa ninyɛne gyɛne ɛnrɛli yɛ mekɛ na yɛnrɛbu yɛ nye yɛnrɛgua ye Edwɛkɛ, Baebolo ne, ɛgengalɛ dahuu zo. Yɛbayeye yɛ ahonle nu yɛava yɛ rɛle yɛawula ye nu dahuu. (Edwɛndolɛ 62:8; Mrɛlɛbulɛ 3:5, 6) Menli mɔɔ bu ye nɔhalɛ nu la ze kɛ, kɛ anwuma nee aze Bɔvolɛ la, yemɔ a le Aleɛabo Amuala Tumivolɛ a, na bɛfi ɛlɔlɛ nu bɛbɛlɛ bɛ nwo aze bɛmaa ye kɛ Awie mɔɔ lɛ adenle nea bɛ ngoane zo la. Saa yɛnwu ye kɛ ɔwɔ kɛ yɛyɛ dɔɔnwo wɔ edwɛkɛ ɛhye mɔ anwo a, bɛmaa yɛyɛ zɔ ndɛndɛ.

Eza bɛfɛlɛ Mekɛ ne mɔɔ bɛbava bɛali ndɛnebualɛ ne anwo gyima mɔɔ anwuma bɔvolɛ ne hanle nwolɛ edwɛkɛ la “Yehowa kenle.” Zɛhae “kenle” ne rale tete Gyɛlusalɛm anwo zo wɔ ɛvolɛ 607 K.Y.M. ɔluakɛ menli mɔɔ wɔ zolɛ la andie kɔkɔbɔlɛ mɔɔ Yehowa vale luale ye ngapezoma ne anwo zo manle la. Yehowa kenle ne mɔɔ bɛdele nganeɛ kɛ ɔwɔ moa la eza manle bɛ ngoane dɔle esiane nu. Yehowa bɔle bɛ kɔkɔ kɛ: “Ɔnrɛhyɛ biala, yebikye kpalɛ.” (Zɛfanaya 1:14) ‘Yehowa kenle’ bieko rale tete Babelɔn anwo zo wɔ ɛvolɛ 539 K.Y.M. (Ayezaya 13:1, 6) Ɔluakɛ bɛnyianle anwodozo wɔ bane mɔɔ bɛlie yɛɛ bɛ nyamenle ne mɔ anu la ati, Babelɔnma bule bɛ nye guale kɔkɔbɔlɛ mɔɔ Yehowa ngapezoma ne vale manle la azo. Noko, wɔ kenle ko nɔɔzo, Mideama yɛɛ Pɛhyeama honle vale Babelɔn suakpole ne.

Boni a bado yɛ ɛnɛ a? ‘Yehowa kenle’ bieko mɔɔ anu yɛ se la ɔ. (2 Pita 3:11-14) Nyamenle ɛbua “Suakpole Babelɔn mɔɔ ɛlie duma [Babelɔn Kpole ne, NW]” ndɛne. Kɛmɔ Yekile 14:8 kile la, anwumabɔvolɛ bie hanle kɛ: “[Babelɔn Kpole ne, NW] ɛbɔ bɔkɔɔ.” Yemɔ ɛlumua ɛzi. Ɔnrɛhola ɔnrɛzi menli mɔɔ sonle Yehowa la adenle bieko. Bɛmaa ye ɛbɛla funli ne nee ɔ nwo mɔɔ ɔfa ɔwula konle nu la ɛla ali wɔ ɛleka dɔɔnwo. Akee ye ɛzɛkyelɛ mɔɔ li awieleɛ la ɛbikye. Ɔlua zɔhane adwenle ne ati, Baebolo ne tu menli mɔɔ wɔ ɛleka biala la folɛ kɛ: “Bɛvinde, . . . bɛvi zolɛ bɛye bɛ nwo [Babelɔn Kpole ne, NW] . . . anrɛɛ bɛkɛyɛ ye ɛtane ne bie, bɛkɛmaa ye munzule ne bie kɛha bɛ. Ɔluakɛ bɛhuohua ye ɛtane ne mɔ anloa bɛmaa yehɔ anwuma kpalɛ, na Nyamenle ɛhakye ye amumuyɛ ne mɔ.”—Yekile 18:4, 5.

Babelɔn Kpole ne a le duzu? Yemɔ a le ewiade amuala ɛzonlenlɛ ngyehyɛlɛ mɔɔ nee tete Babelɔn subane le ko la. (Yekile, tile 17, 18) Suzu ninyɛne ne mɔ mɔɔ le ko la bie mɔ anwo nea:

 • Tete Babelɔn ɛsɔfoma vale bɛ nwo wulale maanle ne maanyɛlɛ edwɛkɛ nu ɛsesebɛ. Ɔle zɔ wɔ ɛzonlenlɛ dɔɔnwo anu ɛnɛ.

• Babelɔn ɛsɔfoma a ɛnee ta si maanle ne konle adua a. Ɛzonlenlɛ mɔɔ wɔ ɛkɛ ne ɛnɛ la ta dumua yila sogyama wɔ mekɛ mɔɔ maanle ne kɛhɔ konle la.

• Tete Babelɔn ngilehilelɛ yɛɛ ye nyɛleɛ manle maanle ne bɔle ɛbɛlatane. Saa ɛnɛ ɛzonlenlɛ nu adekilevolɛma fa Baebolo ngyinlazo wɔ ɛbɛla kpalɛ ɛbɔlɛ nwo sie ahane ne a, bɛmaa ɛbɛlatane bu zolɛ wɔ ɛsɔfoma yɛɛ bɛ menli ne avinli. Ɔhyia kɛ yɛyɛ ye nzonlɛ kɛ ɔluakɛ Babelɔn Kpole ne yɛɛ ewiade ne nee ye maanyɛlɛ ngyehyɛlɛ ne bɔ adwɔmane la ati, Yekile ka ɔ nwo edwɛkɛ kɛ ɔle tuutuunli.

• Baebolo ne eza ka kɛ Babelɔn Kpole ne nyianle “anyunlunyia nvoanle.” Wɔ tete Babelɔn, ɛzonlenlɛ sua ngyehyɛlɛ ne vale azɛlɛ dɔɔnwo, na ɛsɔfo ne mɔ liele duma wɔ ezukoa gyimayɛlɛ nu. Ɛnɛ, Babelɔn Kpole ne lɛ ɛleka ɛleka mɔɔ bɛsonle la, yɛɛ eza ɔlɛ gyima gyima dɔɔnwo. Ye ngilehilelɛ yɛɛ ye ɛnwomenlelielɛ ne mɔ maa ɔ nee menli mɔɔ wɔ gualilɛ nu la nyia bɛ nwo.

• Ananze, ngonyia yɛɛ sili mɔɔ ɛnee bɛfa bɛdi gyima la ɛbu zolɛ wɔ tete Babelɔn, kɛmɔ ɔde wɔ ɛleka dɔɔnwo ɛnɛ la. Bɛbule ewule kɛ ɔle adenle mɔɔ bɛdua zo bɛkɔ asetɛnla fofolɛ nu a. Ɛnee ɛzonlenlɛ sua mɔɔ bɛfa bɛsonle ye nyamenle ne mɔ la ɛbu zolɛ wɔ Babelɔn, noko Babelɔnma dwazole tiale menli mɔɔ sonle Yehowa la. Diedi yɛɛ nyɛleɛ ko ne ala da Babelɔn Kpole ne ali.

Wɔ tete mekɛ zo, Yehowa manle maanyɛlɛ yɛɛ sogyalilɛ maanle mɔɔ lɛ tumi la hwenle bɛdabɛ mɔɔ bɛhɔle zo bɛbule bɛ nye bɛguale ɔdaye nee ye ɛhulolɛdeɛ ɛyɛlɛ zo la anzo. Ɛhye ati Aseleama zɛkyele Samɛlea wɔ ɛvolɛ 740 K.Y.M. Babelɔnma zɛkyele Gyɛlusalɛm wɔ ɛvolɛ 607 K.Y.M. yɛɛ Wulomuma noko yɛle zɔ wɔ ɛvolɛ 70 Y.M. Mideama yɛɛ Pɛhyeama noko honle vale Babelɔn wɔ ɛvolɛ 539 K.Y.M. Mɔɔ fane yɛ mekɛ ye anwo la, Baebolo ne ɛha ɛdo ɛkɛ ne kɛ maanyɛlɛ tumililɛma, mɔɔ le kɛ nane la, bahɔ “tuutuunli ne” anwo zo na baye ɔ nwo, na bamaa kɛ ɔsi ɔde la ala ali. Bɛbazɛkye ye bɔkɔɔ.—Yekile 17:16.

Asoo ewiade tumililɛma bayɛ zɛhae deɛ ye amgba? Baebolo ne ka kɛ ‘Nyamenle bava awula bɛ ahonle nu.’ (Yekile 17:17) Ɔbayɛ arɛlevilɛ nu yɛɛ ɛzulolɛ, na ɔbara ndɛndɛ mɔɔ bɛnrɛnwu ye a.

Boni a ɔhyia kɛ ɛyɛ a? Biza ɛ nwo kɛ: ‘Asoo me nee ɛzonlenlɛ bie mɔɔ ye ngilehilelɛ yɛɛ ye nyɛleɛ ɛnle kpalɛ mɔɔ ɔmaa ɔda ali kɛ ɔboka Babelɔn Kpole ne anwo la tu?’ Saa ɛngɔ bie bɔbɔ a, ɛbahola wɔabiza ɛ nwo kɛ: ‘Asoo memaa ye subane ne ka me?’ Subane boni ɔ? Subane mɔɔ kponle ɛbɛlatane, anwonyia yɛɛ anyelielɛ mɔɔ bɛkulo bɛtɛla Nyamenle ɛhulolɛ, anzɛɛ Yehowa Edwɛkɛ ne (bɔbɔ wɔ ninyɛne mɔɔ asɛɛ ɔle ngyikyi la anwo) mɔɔ anyefuu nu bɛbu bɛ nye bɛgua zolɛ la. Dwenle wɔ mualɛ ne anwo kpalɛ.

Amaa yɛanyia Yehowa anyunlu ɛlolɛ la, nwolɛ hyia kɛ yɛmaa yɛ nyɛleɛ yɛɛ yɛ ahonle nu ɛhulolɛdeɛ di daselɛ kɛ nɔhalɛ nu yɛmboka Babelɔn Kpole ne anwo. Ɔnle kɛ yɛgyinlegyinla nwolɛ. Baebolo ne bɔ yɛ kɔkɔ kɛ awieleɛ ne bara arɛlevilɛ nu la, ɔse: “Kɛ bɛbavuandi Suakpole Babelɔn bɛado la ɛne, na bɛnrɛnwu ye bieko.”—Yekile 18:21.

Noko dɔɔnwo tɛbɔ ɛkɛ. Wɔ ‘ndɛnebualɛ mekɛ’ ne anwo debie bieko anu, Yehowa Nyamenle babua ewiade amuala maanyɛlɛ  ngyehyɛlɛ ne, zolɛ tumililɛma yɛɛ bɛdabɛ mɔɔ bɛbu bɛ nye bɛgua tumi mɔɔ ɔlɛ adenle ɔdi ɔlua ye anwuma Belemgbunlililɛ ne mɔɔ yeva yewula Gyisɛse Kelaese asa nu la azo la amuala ndɛne. (Yekile 13:1, 2; 19:19-21) Ngapezo ɛnyelɛzodeɛnwunlɛ ne mɔɔ bɛhɛlɛ ye wɔ Daneɛle 2:20-45 la da maanyɛlɛ tumililɛ mɔɔ vi tete Babelɔn mekɛ zo badwu ɛnɛ mekɛ ye azo la ali kɛ ananze totohyia mɔɔ bɛva ezukoa nvutuke, dwɛtɛ fufule, kɔbele, bulalɛ yɛɛ ɛva bɛyɛ la. Baebolo ngapezo ne hanle yɛ mekɛ ye anwo edwɛkɛ dole ɛkɛ ne kɛ: ‘Nyamenle bamaa belemgbunlililɛ ko avinde mɔɔ awie ɛnrɛhola ɛnrɛzɛkye ye kenle bie maanle nu a.’ Baebolo ne ka ye wɔ mɔɔ bɔ zo mɔɔ zɔhane Belemgbunlililɛ ne bayɛ wɔ Yehowa ‘ndɛnebualɛ mekɛ’ ne anu la anwo kɛ: ‘Ɔbahomo belemgbunlililɛ zɔhane mɔ [mɔɔ menli ɛyɛ la] anwo zo yeamaa bɛagolo, na yemɔ ɔbadɛnla ɛkɛ ne dahuu.’—Daneɛle 2:44.

Baebolo ne bɔ nɔhalɛ azonvolɛ kɔkɔ kɛ bɛmmakulo “ewiade debie biala”—asetɛnla mɔɔ ewiade ɛhye mɔɔ ɛhwe ɔ nwo ɛvi Nyamenle anwo la si ye adua la. (1 Dwɔn 2:15-17) Asoo wɔ kpɔkɛzilɛ yɛɛ wɔ nyɛleɛ kile kɛ ɛgyi Nyamenle Belemgbunlililɛ ne anzi kpundii? Asoo ɛfa ɛdumua wɔ wɔ asetɛnla nu amgba?—Mateyu 6:33; Dwɔn 17:16, 17.

[Ɛlɛka wɔ mukelɛ 14]

Mekɛ Boni A Awieleɛ ne Bara A?

‘Sonla Ra ne bara mekɛ mɔɔ bɛ nye ɛnla la.’—Mateyu 24:44.

“Yemɔti bɛzinza, ɔboalekɛ bɛnze kenle ko ne anzɛɛ dɔnehwele ko ne.”—Mateyu 25:13.

“Ɔnrɛhyɛ fee.”—Habakɛke 2:3.

[Ɛlɛka wɔ mukelɛ 14]

Saa Ɛze Mekɛ ne A Anrɛɛ Ɛkahakyi Wɔ Ɛbɛlabɔlɛ Ɔ?

Saa ɛze kɛ mekɛ mɔɔ Nyamenenle bava abua ye ndɛne ne mɔɔ ɛlɛba la tɛka mekɛ ekyi a, anrɛɛ yemɔ bamaa wɔahakyi wɔ ɛbɛlabɔlɛ ɔ? Saa ewiade dɛba ɛhye awieleɛ ɛhyɛ ɛ nye zo ekyi ɛdɛla mɔɔ ɛnee ɛsuzu la a, asoo wɔmaa ɛhye ɛdo ɛ sa nu wɔ Yehowa ɛzonlenlɛ nu.—Hibuluma 10:36-38.

Mekɛ kpɔtee ne mɔɔ yɛnze la maa yɛnyia adenle yɛkile kɛ yɛfi adwenle mɔɔ anu te la anu a yɛsonle Nyamenle a. Bɛdabɛ mɔɔ bɛze Yehowa la ze kɛ mekɛ ezinra nu mɔdenlebɔlɛ ɛnrɛzɔ Nyamenle ne, mɔɔ nwu ahonle nu la anye.—Gyɛlɛmaya 17:10; Hibuluma 4:13.

Menli mɔɔ sonle Yehowa nɔhalɛ nu la dahuu fa ye dumua wɔ bɛ asetɛnla nu. Bie a nɔhalɛ keleseɛnema bayɛ gyima kɛ menli gyɛne yɛ la. Noko akee, tɛ mɔɔ gyi bɛ nye zo la a le kɛ bɛfa bɛanyia bɛ nwo, na emomu, kɛ ɔmaa bɛanyia mɔɔ bɛkɛli nee mɔɔ bɛkɛwula yɛɛ ekyi mɔɔ bɛkɛmaa awie mɔ bie la. (Ɛfɛsɛsema 4:28; 1 Temɔte 6:7-12) Eza bɛdielie bɛ nye bɛmaa ninyɛne nu kakyi ekyii, noko bɛ adwenle a le kɛ bɛfa bɛalie bɛ ɛnwomenle, na tɛ kɛ bɛyɛ mɔɔ awie biala ɛlɛyɛ la bie. (Maake 6:31; Wulomuma 12:2) Bɛkulo Nyamenle ɛhulolɛdeɛ ɛyɛlɛ kɛmɔ Gyisɛse Kelaese yɛle la.—Edwɛndolɛ 37:4; 40:8.

Nɔhalɛ keleseɛnema kpondɛ kɛ bɛtɛnla aze dahuu na bɛsonle Yehowa. Anyelazo ɛhye ɛlɛmaa bava mekɛ tendenle bɛahendɛ bɛadɛla mɔɔ wɔannea a bie mɔ zuzule la.

 [Ɛlɛka/Nvoninli wɔ mukelɛ 15]

Tumililɛ Nwo Edwɛkɛ Ne

Amaa yɛade deɛ mɔɔ ɔti Nyamenle maa amaneɛnwunlɛ dɔɔnwo nwo adenle la abo la, ɔhyia kɛ yɛte tumililɛ nwo edwɛkɛ ne abo.

Kɛmɔ Yehowa a le Bɔvolɛ ne la ati, ɔlɛ adenle ɔdi azɛlɛ ye yɛɛ bɛdabɛ mɔɔ bɛde zolɛ la amuala azo tumi. Noko akee, Bible ne kilehile nuhua kɛ wɔ alesama mɔlebɛbo ala yɛɛ Yehowa tumililɛ ne anwo rale edwɛkɛ a. Seetan Abɔnsam hilele kɛ Yehowa ɛva ninyɛne ɛvea yɛ awovolɛma ne mɔɔ lumua la, ɔluakɛ yebɔ adalɛ yehile bɛ wɔ mɔɔ saa bɛbule bɛ nye bɛguale Nyamenle mɛla zo na bɛlile bɛ ti anwo a anrɛɛ kɛzi la anwo, na amgba anrɛɛ ɔkɛyɛ kpalɛ kɛ bɛkɛgyakyi Nyamenle na bɛkɛnlea bɛ nwo zo.—Mɔlebɛbo, tile 2, 3.

Saa Nyamenle zɛkyele atuadelɛma ne ɛkɛ ne ala a, anrɛɛ yemɔ bala ye tumi ne ali, noko anrɛɛ ɔnrɛpɛ edwɛkɛ ne azo. Kɛ anrɛɛ ɔkɛzɛkye atuadelɛma ne ɛkɛ ne ala la, Yehowa ɛmaa abɔdeɛ mɔɔ ze nrɛlɛbɛ la amuala adenle kɛ bɛnlea mɔɔ vi atuadelɛ nu kɛra la. Ɔwɔ nuhua kɛ ɛnee ɛhye kile amaneɛnwunlɛ ɛdeɛ, noko eza ɔmanle bɛnyianle adenle bɛwole yɛ.

Eza bieko, Yehowa minlinle ye debie kpole, ɔvale ɛhulolɛ ɔyɛle ngyehyɛlɛ kɛ alesama mɔɔ kɛdie ye na bɛkɛnyia diedi wɔ ɔ Ra ne ɛkpɔnelɛ afɔlebɔlɛ ne anu la bahola anyia fanwodi avi ɛtane yɛɛ mɔɔ vi nuhua ba la anwo na badɛnla aze wɔ Paladaese. Saa nwolɛ kɛhyia a, ɛhye bahola alua ewudwazo zo.

Edwɛkɛ ne ɛlilɛ mɔɔ yemaa mekɛ wɔ nwolɛ la eza ɛmaa Nyamenle azonvolɛ ɛnyia adenle mɔɔ bɛkola bɛdua zolɛ bɛkile Nyamenle ɛhulolɛ nwo anyelielɛ na bɛkile bɛ nɔhalɛlilɛ wɔ gyinlabelɛ biala anu. Nyamenle tumililɛ nwo edwɛkɛ ne ɛlilɛ yɛɛ dasanli nɔhalɛlilɛ nwo edwɛkɛ ne mɔɔ boka ye la, anwo hyia amaa mɛla ali gyima wɔ aleɛabo. Tɛ zɔhane a, nɔhalɛ anzondwolɛ ɛnrɛra ɛlɛ. *

[Ɔ bo ɛkɛ ne edwɛkɛ]

[Nvoninli]

Ewiade amuala maanyɛlɛ tumililɛ ngyehyɛlɛ ne bara ye awieleɛ