Ɛzukoalɛdeɛ 9

Ɔwɔ Kɛ Nyamenle Sonvolɛma Anwo Te

Duzu ati a ɔwɔ kɛ yɛ nwo te wɔ adenle biala azo a? (1)

Duzu a yɛ nwo mɔɔ yɛbamaa yeade la kile wɔ sunsum nu a? (2)

ɛbɛlabɔlɛ nu a? (3) adwenle nu a? (4) nwonane nu a? (5)

Ɛdendɛlɛ mɔɔ nwolɛ ɛnde la boni a ɔwɔ kɛ yɛkoati a? (6)

1. Jehovah Nyamenle anwo te na ɔle nwuanzanwuanza. Ɔ nye la kɛ ye sonvolɛma anwo bahɔ zo ade—sunsum nu, ɛbɛla bɔlɛ nu, adwenle nu, nee nwonane nu. (1 Peter 1:16) Ɔhyia mɔdenlebɔlɛ kpalɛ na awie ahɔ zo amaa ɔ nwo ade wɔ Nyamenle anye zo. Yɛde ewiade mɔɔ nuhua ɛnde la anu. Eza noko ɔwɔ kɛ yɛko yɛtia yɛdayɛ mumua ne yɛ ɛtaneyɛlɛ atiakunluwɔzo. Noko ɔnle kɛ yɛ sa nu to.

2. Sunsum Afoa Nu Anwondelɛ: Saa yɛkpondɛ kɛ yɛsonle Jehovah a, yɛnrɛhola yɛnrɛdɛnla adalɛ ɛzonlelɛ ngilehilelɛ anzɛɛ amaamuo biala anu. Ɔwɔ kɛ yɛfi adalɛ ɛzonlelɛ nu na ɔnle kɛ yɛdi yɛboa ye wɔ adenle biala azo. (2 Corinthma 6:14-18; Yekile 18:4) Ɛnyia yɛzukoa nɔhalɛ ne mɔɔ fale Nyamenle anwo la, ɔwɔ kɛ yɛnea boɛ na yɛammaa menli mɔɔ kilehile adalɛ edwɛkɛ la ambɛlɛbɛla yɛ.—2 John 10, 11.

3. Ɛbɛlabɔlɛ Nu Anwondelɛ: Jehovah kpondɛ kɛ ye sonvolɛma bɔ bɛ ɛbɛla kɛ nɔhalɛ Kiliseɛnema mekɛ biala. (1 Peter 2:12) Ɔnwu debie biala mɔɔ yɛyɛ la, bɔbɔ  mɔɔ wɔ fealera nu la. (Hebrewma 4:13) Ɔwɔ kɛ yɛkoati nla nu ɛbɛla ɛzɛkyelɛ nee ewiade ɛhye anu evinli nyɛleɛ fofolɛ biala.—1 Corinthma 6:9-11.

4. Adwenle Nu Anwondelɛ: Saa yɛfa nzuzuleɛ mɔɔ nwolɛ te na ɔle bɔkɔbɔkɔ la yewula yɛ adwenle nu a, yɛ ɛbɛlabɔlɛ ne noko anwo bade. (Philippima 4:8) Na saa yɛdi ninyɛne mɔɔ nwolɛ ɛnde la anzi a, ɔbamaa yɛayɛ ninyɛndane. (Matthew 15:18-20) Ɔwɔ kɛ yɛkoati anyelielɛ ngakyile mɔɔ bazɛkye yɛ adwenle la. Yɛbahola yɛava nzuzuleɛ mɔɔ nwolɛ te la yɛawula yɛ adwenle nu ɔlua Nyamenle Edwɛkɛ ne mɔɔ yɛbazukoa la azo.

5. Nwonane Afoa Nu Anwondelɛ: Ɔluakɛ Kiliseɛnema gyi Nyamenle agyakɛ anu la ati, ɔwɔ kɛ bɛmaa bɛ sonlabaka ne nee bɛ adɛladeɛ yɛ bɔkɔbɔkɔ. Saa yɛkɔ baka zo yɛwie a, ɔwɔ kɛ yɛwowo yɛ sa anwo, eza ɔwɔ kɛ yɛwowo yɛ sa anwo ansa na yɛali anzɛɛ yɛazɔ aleɛ nu. Saa yɛnlɛ ɛfo mɔɔ nzule fa kɔ la a, ɔwɔ kɛ yɛfu yɛ bakazo ne yɛwula. (Deuteronomy 23:12, 13) Yɛ nwo mɔɔ yɛmaa yeade nwonane afoa nu la maa yɛnyia kpɔkɛdelɛ kpalɛ. Ɔwɔ kɛ Kiliseɛnenli aako nu nee ɔ nzi kɔsɔɔti te na ɔyɛ bɔkɔbɔkɔ. Ɔwɔ kɛ ɔyɛ ngakyile na ɔyɛ neazo kpalɛ wɔ ɛleka mɔɔ ɔde la.

6. Ɛdendɛlɛ Mɔɔ Nwolɛ Te: Ɔwɔ kɛ Nyamenle sonvolɛma ka nɔhalɛ dahuu. Adalɛma ɛnrɛhɔ Nyamenle Belemgbunlililɛ ne anu. (Ephesusma 4:25; Yekile 21:8) Kiliseɛnema ɛnga edwɛkɛ mɔɔ nwolɛ ɛnde la. Bɛndie anzɛɛ bɛnli nwɔwe mgbane mgbane, anzɛɛ bɛmbɔ adawu mɔɔ ɛkpɔlɔ la. Ɔlua bɛ ɛdendɛlɛ mɔɔ nwolɛ te la ati bɛle ngakyile wɔ gyima nu, sukulu nu nee ɛleka mɔɔ bɛdede la.—Ephesusma 4:29, 31; 5:3.

[Nvoninli wɔ mukelɛ 19]

Ɔwɔ kɛ Nyamenle sonvolɛma anwo te wɔ adenle biala azo