Ɛzukoalɛdeɛ 12

Ɛbulɛ Mɔɔ Yɛkile Yɛamaa Ngoane Nee Mogya

Kɛzi ɔwɔ kɛ yɛbu ngoane ɛ? (1) ɛkolɛ ɛyelɛ ɛ? (1)

Adenle boni azo a Kiliseɛnema fa kile kɛ bɛ nye la ɛkɛ wɔ bɛ-nwo-banebɔlɛ nwo a? (2)

Asoo ɔle ɛtane kɛ yɛbahu nane ɔ? (3)

Nyɛleɛ mɔɔ ɛngile ɛbulɛ ɛmmaa ngoane la bie a le boni? (4) Nyamenle mɛla mɔɔ wɔ mogya nwo la a le boni? (5)

Asoo mogya mɔɔ bɛfa bɛmaa la boka nwo ɔ? (6)

1. Jehovah ɛkɛ a ngoane vi a. Ninyɛne mɔɔ ngoane wɔ nu la kɔsɔɔti nyianle bɛ ngoane vile Nyamenle ɛkɛ. (Edwɛndolɛ 36:9) Ngoane le nwuazanwuanza maa Nyamenle. Kakula bɔbɔ mɔɔ bɛtɛwole ye mɔɔ wɔ ɔ nli akunlu la ngoane sonle bolɛ maa Jehovah. Saa yɛ nye fuu yɛku kakula zɛhae mɔɔ ɛlɛnyi la a, ɔle ɛtane wɔ Nyamenle anye zo.—Exodus 21:22, 23; Edwɛndolɛ 127:3.

2. Nɔhalɛ Kiliseɛnema suzu ngoane nwo. Bɛnea bɛnwu ye kɛ bɛ kale nee bɛ aako ne mɔ ɛnva esiane biala ɛmba. (Deuteronomy 22:8) Nyamenle ngɛkɛlɛ anye fuu ɛnva bɛ ngoane ɛndo esiane nu wɔ nwɔhoalile anzɛɛ anyelielɛ nu. Yemɔti bɛnva bɛ nwo bɛnwula nwɔhoa mɔɔ basabasayɛlɛ wɔ nu mɔɔ maa anye fuu nu ala bɛbodaboda awie mɔ la anu. Bɛtwe bɛ nwo bɛfi nwɔhoalilɛ mɔɔ di boa basabasayɛlɛ la anwo.—Edwɛndolɛ 11:5; John 13:35.

 3. Nane ngoane noko le nwuanzanwuanza maa Bɔvolɛ ne. Kiliseɛnenli bahola ahu nane ava anyia aleɛ nee adɛladeɛ anzɛɛ yeava yeabɔ ɔ nwo bane yeavi anwondolɛ nee esiane nwo. (Genesis 3:21; 9:3; Exodus 21:28) Noko akee ɔle ɛtane kɛ yɛbayɛ nane asa anzɛɛ yɛbahu bɛ wɔ nwɔhoalilɛ nu anzɛɛ anyelielɛ zo ala.—Mrɛlɛbulɛ 12:10.

4. Kiliseɛnema ɛnlo sigalɛte, bɛnli betel ma, na bɛnlo nyile ɛtane bɛnva bɛnlielie bɛ nye. Nyɛleɛ ɛhye mɔ ɛnle kpalɛ, ɔluakɛ (1) bɛfa yɛ bɛyɛ bɛ ngɛkɛlɛ, (2) bɛsɛkye yɛ sonlabaka ne, na (3) nwolɛ ɛnde. (Romema 6:19; 12:1; 2 Corinthma 7:1) Ɔbahola yeayɛ ɛsesebɛ kpalɛ kɛ yɛbagyakyi subane ɛhye mɔ. Noko ɔwɔ kɛ yɛgyakyi na yɛazɔ Jehovah anye.

5. Mogya noko le nwuanzanwuanza wɔ Nyamenle anye zo. Nyamenle se ɛkɛla ne anzɛɛ ngoane ne wɔ mogya ne anu. Yemɔti ɔle ɛtane kɛ yɛbali mogya. Eza noko ɔle ɛtane kɛ yɛbali nane mɔɔ bɛandwi ye mogya bɛangua kpalɛ la. Saa bɛdofo nane bie bɛmaa ɔwu anzɛɛ ɔwu ɛhane nu a, ɔnle kɛ yedi. Saa bɛwɔ ye atwɛ anzɛɛ bɛbɔ ye etu na yɛkɛli a, ɔwɔ kɛ yetwi mogya ne yɛgua ndɛndɛ.—Genesis 9:3, 4; Leviticus 17:13, 14; Gyima 15:28, 29.

6. Asoo ɔle ɛtane kɛ yɛkɛlie mogya ɔ? Kakye kɛ, Jehovah kpondɛ kɛ yɛtwe yɛ nwo yɛfi mogya nwo. Ɛhye kile kɛ ɔnle kɛ adenle biala azo, yɛfa awie mɔ mogya anzɛɛ yɛdayɛ mumua ne bɔbɔ yɛ mogya mɔɔ bɛhwe bɛzie la yɛwula yɛ nuhua. (Gyima 21:25) Yemɔti nɔhalɛ Kiliseɛnema ɛnrɛlie mogya. Bɛbalie ndenle fofolɛ mɔɔ bɛfa zo bɛtondo ewule mɔɔ le kɛ nyile mɔɔ mogya ɛnle nu mɔɔ bɛfa bɛmaa la bɛado nu. Bɛkulo kɛ bɛtɛnla aze, noko bɛnrɛbɔ mɔdenle kɛ bɛbalie bɛ nwo ngoane ɔlua Nyamenle mɛla ɛbulɛ zo.—Matthew 16:25.

[Nvoninli wɔ mukelɛ 25]

Amaa yɛazɔ Nyamenle anye la, ɔwɔ kɛ yɛkpo mogya eliɛlɛ, ɛbɛla ɛtane ɛtane nee anye fuu esiane mɔɔ yɛfa yɛ nwo yɛado nu la