Abɔnsam A Le Nwane?
Ɛzukoalɛdeɛ 4
Abɔnsam A Le Nwane?
Satan Abɔnsam—ɔvi nienwu a ɔrale a? (1, 2)
Kɛzi Satan bɛlɛbɛla menli ɛ? (3-7)
Duzu ati a ɔwɔ kɛ ɛko ɛtia Abɔnsam a? (7)
1. Edwɛkɛ kpɔkɛ “abɔnsam” kile awie mɔɔ ka adalɛ edwɛkɛ mɔɔ sokpa ɔfale awie fofolɛ nwo la. “Satan” kile kpɔvolɛ anzɛɛ dwazotiavolɛ. Ɛhye mɔ a le anluma mɔɔ bɛva bɛmaa Nyamenle kpɔvolɛ kpole ne a. Alumua ne, ɛnee ɔle anwumabɔvolɛ mɔɔ di munli mɔɔ ɔ nee Nyamenle wɔ anwuma a. Noko akee, nzinlii ɔdwenlenle ɔ nwo somaa na ɔ nye bolole ɛzonlelɛ mɔɔ ɛnee le Nyamenle angome kye ɛdeɛ la.—Matthew 4:8-10.
2. Anwumabɔvolɛ ɛhye, Satan, luale ɛwɔlɛ nwo zo dendɛle hilele Eve. Ɔ sa hanle ye ɔmanle ɔrayɛle Nyamenle anwo anzosesebɛ ɔlua adalɛ mɔɔ ɔbɔle ɔhilɛle ye la azo. Satan luale zɔhane ɛyɛlɛ zo dendɛle tiale mɔɔ bɛfɛlɛ ye Nyamenle “tumililɛ” anzɛɛ gyinlabelɛ kɛ Anwuma-Anwumanli ne la. Satan manle edwɛkɛ dwazole wɔ tumi mɔɔ Nyamenle di ye wɔ adenle mɔɔ fɛta, na ɔle kpalɛ ɔmaa menli mɔɔ ɔsie bɛ la anwo. Satan eza manle edwɛkɛ dwazole wɔ nɔhalɛ mɔɔ sonla dasanli bali yeamaa Nyamenle la anwo. Ɔlua ɛhye mɔɔ ɔyɛle la azo, Satan yɛle ɔ nwo Nyamenle kpɔvolɛ. Ɛhye ati a bɛravɛlɛle ye Satan Abɔnsam la.—Genesis 3:1-5; Job 1:8-11; Yekile 12:9.
3. Satan bɔ mɔdenle kɛ ɔto menli agyiba yeamaa bɛazonle ye. (2 Corinthma 11:3, 14) Adenle ko mɔɔ ɔfa zo ɔbɛlɛbɛla menli la a le adalɛ ɛzonlelɛ. Saa ɛzonlelɛ bie kilehile adalɛ fale Nyamenle anwo a, ɛnee ɔdi Satan atiakunlukpɔkɛ nwo gyima. (John 8:44) Menli mɔɔ wɔ adalɛ ɛzonlelɛ nu la bɛahola alie ali ye bɔkɔɔ kɛ bɛlɛsonle nɔhalɛ Nyamenle ne. Noko akee nɔhalɛ nu, bɛlɛsonle Satan. Yemɔ a le “ewiade ɛhye Nyamenle ne a.”—2 Corinthma 4:4.
4. Sunsumsɛm nzi ɛlilɛ le adenle bieko mɔɔ Satan dua zo fa menli ba ye tumi bo a. Bɛbahola bɛavɛlɛ sunsum kɛ bɛrabɔ bɛ nwo bane, bɛgyegye awie mɔ, bɛha kenlebie edwɛkɛ bɛhile bɛ, anzɛɛ bɛyɛ nwanwane ninyɛne. Satan a le atisesebɛ tumi ne mɔɔ li zɛhae nyɛleɛ ɛhye mɔ amuala anzi a. Saa yɛkɛzɔ Nyamenle anye a, ɔwɔ kɛ yɛtwe yɛ nwo yɛfi sunsumsɛm nzi ɛlilɛ biala anwo.—Deuteronomy 18:10-12; Gyima 19:18, 19.
5. Satan eza bɛlɛbɛla menli ɔlua mbusua mɔɔ bɛbu bɛ nwo somaa nee maanyɛleɛ
ngyehyɛleɛ mɔɔ bɛsonle bɛ la azo. Bie mɔ te nganeɛ kɛ bɛ maanle anzɛɛ bɛ abusua ne le kpalɛ tɛla gyɛne biala. Noko ɛhye ɛnle nɔhalɛ. (Gyima 10:34, 35) Bie mɔ noko fa bɛ nwo to maamulɛ ngyehyɛleɛ zo kɛ bɛmɛ a bɛbali adasama ngyegyelɛ ne mɔ anwo gyima a. Ɔlua ɛhye ɛyɛlɛ zo, bɛlɛkpo Nyamenle Belemgbunlililɛ ne. Yemɔ angome kye ala a bali yɛ ngyegyelɛ ne mɔ anwo gyima a.—Daniel 2:44.6. Adenle bieko mɔɔ Satan fa zo bɛlɛbɛla menli la a le atiakunluwɔzo ɛtane mɔɔ ɔfa ɔsɔ bɛ ɔnea la. Jehovah ka kile yɛ kɛ yɛhoati nyɛleɛ ɛtane ɛtane ɔluakɛ, ɔze kɛ ɛhye mɔ bagyegye yɛ. (Galatiama 6:7, 8) Bie a menli bie bahulo kɛ ɛkɛboka bɛ nwo wɔ zɛhae nyɛleɛ ɛhye mɔ anu. Noko, kakye kɛ Satan mumua ne a kpondɛ kɛ ɛyɛ ɛhye mɔ a.—1 Corinthma 6:9, 10; 15:33.
7. Satan bahola alua ɛkpɔlɛ anzɛɛ dwazotia zo yeamaa wɔahwe ɛ nwo wɔavi Jehovah anwo. Bie a wɔ alɔvolɛ biemɔ bava ɛya ɔluakɛ ɛlɛsukoa Bible ne la ati. Bie mɔ bahola agolo ɛ nwo. Noko nwane a wɔ ngoane vi ye ɛkɛ a? Satan kpondɛ kɛ ɔnwunlonwunla wɔ amaa wɔagyakyi Jehovah anwo debie ɛzukoalɛ. Mmamaa Satan di konim! (Matthew 10:34-39; 1 Peter 5:8, 9) Saa ɛko ɛtia Abɔnsam a ɛbahola wɔamaa Jehovah anye alie na wɔahile kɛ ɛlɛ ɛbulɛ ɛmaa ye tumililɛ ne.—Mrɛlɛbulɛ 27:11.
[Nvoninli wɔ mukelɛ 9]
Adalɛ ɛzonlelɛ, sunsumsɛm nzi elile nee maanle nwo ɛlɔlɛ bɛlɛbɛla menli
[Nvoninli wɔ mukelɛ 9]
Ko tia Satan ɔlua ɛhɔlɛ mɔɔ ɛkɔ zo wɔazukoa Jehovah anwo debie la azo