Ɛzukoalɛdeɛ 8

Abusua Azedɛnlalɛ Mɔɔ Sɔ Nyamenle Anye

Kunli gyinlabelɛ wɔ abusua ne anu a le boni? (1)

Kɛzi ɔwɔ kɛ kunli nee yelɛ di ɛ? (2)

Duzu gyima a selɛ lɛ bɛ yɛ a? (3)

Duzu a le yelɛ ne gyima wɔ abusua ne anu a? (4)

Duzu a Nyamenle kpondɛ avi awovolɛ nee mralɛ ɛkɛ a? (5)

Duzu a Bible ne ka ye wɔ agyalɛ nu ɛtetelɛ nee ewolebɔlɛ nwo a? (6, 7)

1. Bible ne se kunli a le ye abusua ne ati a. (1 Corinthma 11:3) Ɔwɔ kɛ kunli nyia yelɛ ko ala. Ɔwɔ kɛ bɛgya bɛ nwo kpalɛ kɛ mɔɔ mɛla ne se la.—1 Timothy 3:2; Titus 3:1.

2. Ɔwɔ kɛ kunli dɔ ɔ ye kɛ mɔɔ ɔdɔ ɔ nwo ala la. Ɔwɔ kɛ ɔ nee ye di kɛ mɔɔ Jesus nee ye ɛdoavolɛma lile la. (Ephesusma 5:25, 28, 29) Ɔnle kɛ ɔbo ɔ ye anzɛɛ ɔkile ye nyane wɔ adenle biala azo. Emomu ɔwɔ kɛ ɔdi ye eni na ɔbu ye.—Kolosaema 3:19; 1 Peter 3:7.

3. Ɔwɔ kɛ selɛ yɛ gyima ɛsesebɛ ɔfa ɔnea ye abusua ne. Ɔwɔ kɛ ɔmaa ɔ ye nee ɔ mra aleɛ, ɛdanlɛ nee dabelɛ. Ɔwɔ kɛ selɛ eza fa ye abusua ne sunsum nu ngyialɛdeɛ maa bɛ. (1 Timothy 5:8) Ɔdi ye abusua ne anyunlu na ɔboa bɛ ɔmaa bɛsukoa Nyamenle nee ye atiakunlukpɔkɛ ne mɔ anwo debie.—Deuteronomy 6:4-9; Ephesusma 6:4.

4. Ɔwɔ kɛ yelɛ yɛ boavolɛ kpalɛ maa ɔ hu. (Genesis 2:18) Ɔwɔ kɛ ɔboa ɔ hu wɔ ngakula ne mɔ ɛhilehilelɛ nee bɛ ɛtetelɛ nu. (Mrɛlɛbulɛ 1:8) Jehovah kpondɛ kɛ yelɛ fi ɛlɔlɛ nu nea ye abusua ne. (Mrɛlɛbulɛ 31:10, 15, 26, 27; Titus 2:4, 5) Ɔwɔ kɛ ɔnyia ɛbulɛ kpole ɔmaa ɔ hu.—Ephesusma 5:22, 23, 33.

5. Nyamenle kpondɛ kɛ ngakula tie bɛ awovolɛ. (Ephesusma 6:1-3) Ɔ nye la kɛ awovolɛ bahilehile bɛ mra na bɛadenrɛdenrɛ bɛ. Ɔwɔ kɛ awovolɛ nyia mekɛ maa bɛ mra na bɛ nee bɛ sukoa  Bible ne, na bɛfa bɛ sunsum afoa nu nee bɛ nganeɛdelɛ nu ngyialɛdeɛ bɛmaa bɛ. (Deuteronomy 11:18, 19; Mrɛlɛbulɛ 22:6, 15) Ɔnle kɛ awovolɛ tea bɛ mra wɔ kyengye anzɛɛ atisesebɛ adenle zo.—Kolosaema 3:21.

6. Saa agyalɛma yia ngyegyelɛ wɔ bɛ nee bɛ nwo ɛlualɛ nu a, ɔwɔ kɛ bɛbɔ mɔdenle kɛ bɛbava Bible folɛdulɛ bɛali gyima. Bible ne tu yɛ folɛ kɛ yɛla ɛlɔlɛ ali na yɛva ɛtane yɛhyɛ. (Kolosaema 3:12-14) Nyamenle Edwɛkɛ ne ɛnzi agyalɛ nu ɛtetelɛ adua kɛ adenle mɔɔ bɛdua zo bɛdi ngyegyelɛ ngyikyi ngyikyi nwo gyima a. Noko akee yelɛ bahola yeade ɔ nwo yeavi ɔ hu anwo saa (1) ɔ hu tu ɔ gye kɛ ɔnrɛnlea ye abusua ne, (2) ɔ hu yɛ basabasa dedee ɔkɔdwu ɛleka mɔɔ yelɛ ne kpɔkɛdelɛ nee ye ngoane da esiane nu, anzɛɛ (3) ɔ hu dwazotia mɔɔ bo zolɛ la ɛmmaa ɔngola ɔnzonle Jehovah a.—1 Corinthma 7:12, 13.

7. Ɔwɔ kɛ agyalɛma di nɔhalɛ maa bɛ nwo. Agyalɛ ɛzɛkyelɛ le ɛtane mɔɔ tia Nyamenle nee ahenle ɔ hu anzɛɛ ɔ ye ne a. (Hebrewma 13:4) Nla wɔ agyalɛ ne anzi angome kye ala a le Ngɛlɛlera ngyinlazo mɔɔ bɛkola bɛgyinla zo bɛbɔ ewole na bɛgya fofolɛ a. (Matthew 19:6-9; Romema 7:2, 3) Saa menli bɔ ewole mɔɔ ɔngyi Ngɛlɛlera edwɛkɛ zo na bɛgya awie fofolɛ a Jehovah kyi.—Malakae 2:14-16.

[Nvoninli wɔ mukelɛ 17]

Nyamenle anye la kɛ awovolɛ bahilehile bɛ mra na bɛadenrɛdenrɛ bɛ.

[Nvoninli wɔ mukelɛ 17]

Selɛ mɔɔ lɛ ɛhulolɛ la yɛ nziezieleɛ maa ye abusua ne wɔ nwonane nee sunsum nu