Diedi Nee Amaamuo Ngakyile Mɔɔ Ɛnzɔ Nyamenle Anye La
Ɛzukoalɛdeɛ 11
Diedi Nee Amaamuo Ngakyile Mɔɔ Ɛnzɔ Nyamenle Anye La
Diedi nee amaamuo ngakyile boni a le nvoleɛ a? (1)
Asoo ɔwɔ kɛ Kiliseɛnema die di kɛ Nyamenle wɔ nu Menli Nsa ɔ? (2)
Duzu ati a nɔhalɛ Kiliseɛnema ɛnli Bolonyia, Easter, anzɛɛ Awolɛ Kenle ɛ? (3, 4)
Asoo mowuamra bahola agyegye bɛdabɛ mɔɔ bɛde aze la ɔ? (5) Asoo Jesus wule meanubaka zo ɔ? (6) Kɛzi Nyamenle mɔɔ yɛbazɔ ɔ nye la hyia ɛ? (7)
1. Tɛ diedi nee amaamuo ne amuala a le ɛtane a. Noko saa bɛvi adalɛ ɛzonlelɛ nu anzɛɛ bɛtia Bible ngilehilelɛ a, Nyamenle ɛnlie ɛndo nu.—Matthew 15:6.
2. Nsa-Ko: Asoo Jehovah le Nsa-Ko—Nyamenle ko mɔɔ wɔ nu menli nsa la ɔ? Kyɛkyɛ! Jehovah, Selɛ ne, a le “nɔhalɛ Nyamenle ko kye” ne a. (John 17:3; Mark 12:29) Jesus le Ye belamunli Ralɛ, na ɔwɔ Nyamenle abo. (1 Corinthma 11:3) Selɛ ne le kpole tɛla Ralɛ ne. (John 14:28) Sunsum nwuanzanwuanza ne ɛnle sonla; ɔle Nyamenle gyimalilɛ tumi.—Genesis 1:2; Gyima 2:18.
3. Bolonyia nee Easter: Bɛanwo Jesus wɔ December 25. Bɛwole ye kɛyɛ October 1, ɛvolɛ ne anu mekɛ mɔɔ ɛnee mboane neavolɛma finde bɛ mboane nɔɔzo la. (Luke 2:8-12) Jesus anga ye ɛlɛ angile Kiliseɛnema kɛ bɛli ye awolɛ kenle. Emomu ɔhanle ɔhilele ye ɛdoavolɛma ne kɛ bɛmaa ye ewule ne ɛdɛnla bɛ adwenle nu anzɛɛ bɛhakye. (Luke 22:19, 20) Bolonyia nee nwolɛ amaamuo ne mɔ vi tete adalɛ ɛzonlelɛ nu. Zɔhane ala a ɔle wɔ Easter amaamuo ngakyile ne mɔɔ le kɛ kolonvia nee asoasoa mɔɔ bɛfa bɛdi gyima la anwo a. Tete Kiliseɛnema anli Bolonyia nee Easter; zɔhane ala noko a nɔhalɛ Kiliseɛnema ɛnɛ ɛnli a.
4. Awolɛ Kenle: Awolɛ kenle ɛlilɛ nwiɔ mɔɔ bɛha nwolɛ edwɛkɛ wɔ Bible ne anu la, menli mɔɔ ɛnzonle Jehovah la a lile a. (Genesis 40:20-22; Mark 6:21, 22, 24-27) Alumua Kiliseɛnema anli awolɛ kenle. Awolɛ kenle ɛlilɛ nwo amaamuo ne vi tete adalɛ ɛzonlelɛ nu. Nɔhalɛ Kiliseɛnema fa debie kyɛ na bɛdie bɛ nye wɔ ɛvolɛ ne anu mekɛ biala.
5. Mowuamra Ɛzulolɛ: Mowuamra ɛngola ɛnyɛ debie anzɛɛ bɛnde nganeɛ biala. Yɛnrɛhola yɛnrɛboa bɛ, yɛɛ bɛnrɛhola bɛnrɛboda yɛ. (Edwɛndolɛ 146:4; Ecclesiastes 9:5, 10) Ɛkɛla ne wu; ɔndɛnla aze wɔ ewule nzi. (Ezekiel 18:4) Noko ɔdwu mekɛ ne bie a, anwumabɔvolɛ atisesebɛma mɔɔ bɛfɛlɛ bɛ susum evinli la, yɛ bɛ nwo kɛ asɛɛ mowuamra sunsum la. Amaamuo biala mɔɔ fale mowuamra ɛzonlelɛ anzɛɛ ɛzulolɛ nwo la le nvonleɛ.—Isaiah 8:19.
6. Meanubaka: Jesus anwu meanubaka zo. Ɔwule baka ko mɔɔ bɛkpɔnla la azo. Greek edwɛkɛkpɔkɛ mɔɔ bɛhile ɔ bo meanubaka wɔ Bible dɔɔnwo anu la, ɛnee ɔkile mgbunla sinli bie ala. Meanubaka sɛkɛlɛneɛ ne vi tete adalɛ ɛzonlelɛ ne mɔ anu. Alumua Kiliseɛnema anva meanubaka anli gyima anzɛɛ bɛanzonle ye. Yemɔti, asoo ɛnea a ɔbayɛ kpalɛ kɛ ɛbava meanubaka wɔali gyima wɔ ɛzonlelɛ nu ɔ?—Deuteronomy 7:26; 1 Corinthma 10:14.
7. Ɔbahola yeayɛ ɛsesebɛ kɛ ɛbahwe ɛ nwo wɔavi diedi nee amaamuo ɛhye mɔ bie anwo. Wɔanea ɛ nwo amra nee ɛ gɔnwo mɔ babɔ mɔdenle kɛ bɛdi wɔ adwenle kɛ ɛmmakakyi wɔ diedi ne mɔ. Noko Nyamenle mɔɔ ɛsɔ ɔ nye la hyia tɛla menli nye ɛzɔlɛ.—Mrɛlɛbulɛ 29:25; Matthew 10:36, 37.
[Nvoninli wɔ mukelɛ 22]
Nyamenle ɛnle Nsa-Ko
[Nvoninli wɔ mukelɛ 23]
Bolonyia nee Easter vi tete adalɛ ɛzonlelɛ nu
[Nvoninli wɔ mukelɛ 23]
Ndelebɛbo biala ɛnle ɛkɛ mɔɔ ɔti ɔwɔ kɛ ɛsonle anzɛɛ ɛsulo mowuamra a