Ɛzukoalɛdeɛ 1

Kɛzi Ɛbahola Wɔanwu Mɔɔ Nyamenle Kpondɛ La

Edwɛkɛ mɔɔ nwolɛ hyia la boni a wɔ Bible ne anu a? (1)

Nwane a le Bible ne kɛlɛvolɛ a? (2)

Duzu ati a ɔwɔ kɛ ɛsukoa Bible ne a? (3)

1. Bible ne le ahyɛlɛdeɛ mɔɔ sonle bolɛ mɔɔ vi Nyamenle ɛkɛ. Ɔle kɛ kɛlata mɔɔ selɛ kulovolɛ bie ɛhɛlɛ ɛhɔmaa ɔ mra la. Ɔka nɔhalɛ ne mɔɔ fale Nyamenle anwo la ɔkile yɛ—sonla holɛ ko mɔɔ ɔde nee mɔɔ ɔkpondɛ la. Ɔkilehile kɛzi mɔɔ yɛbahola yɛagyinla ngyegyelɛ ngakyile nloa nee kɛzi yɛbahola yɛanyia nɔhalɛ anyelielɛ la anu. Bible ne angome ala a ka mɔɔ ɔwɔ kɛ yɛyɛ na yɛazɔ Nyamenle anye la ɔkile yɛ a.—Edwɛndolɛ 1:1-3; Isaiah 48:17, 18.

2. Menli ngakyile kɛyɛ 40 a vale ɛvolɛ mɔɔ bo 1,600 la hɛlɛle Bible ne a, na bɛbɔle ɔ bo wɔ ɛvolɛ 1513 Ansa na Yɛmekɛ Ye Ara. Mbuluku ngyikyi 66 a wɔ nu a. Nyamenle a vale ye sunsum ne boale menli mɔɔ hɛlɛle Bible ne la a. Ye adwenle a bɛhɛlɛle a na tɛ bɛdabɛ mumua ne bɛ adwenle ɔ. Yemɔti Nyamenle mɔɔ wɔ anwuma la a le Bible ne Kɛlɛvolɛ a, na tɛ dasanli biala mɔɔ wɔ azɛlɛ ye azo la ɔ.—2 Timothy 3:16, 17; 2 Peter 1:20, 21.

3. Nyamenle nleanle manle bɛhɛlɛle Bible ne bɔkɔɔ na bɛvale bɛziele kpalɛ. Bɛhɛlɛ Bible ne dɔɔnwo bɛdɛla buluku gyɛne biala. Tɛ awie biala a saa ɔnwu kɛ ɛlɛsukoa Bible ne a ɔ nye balie nwolɛ a, noko mmamaa yemɔ maa ɛgyakyi. Ɔnva nwolɛ ngyegyelɛ biala mɔɔ ɛbayia ye la, wɔ kenlebie mɔɔ ɛnlɛ awieleɛ la gyi ɛnwulɛ mɔɔ ɛbanwu Nyamenle na wɔayɛ ye ɛhulolɛdeɛ la azo.—Matthew 5:10-12; John 17:3.