Ɛzukoalɛdeɛ 14

Kɛzi Bɛhyehyɛ Jehovah Dasevolɛma La

Mekɛ boni a Jehovah Dasevolɛma nyianle bɛ mekɛ ɛhye anu mɔlebɛbo a? (1)

Adenle boni azo a Jehovah Dasevolɛma fa yɛ bɛ nyianu a? (2)

Adenle boni azo a bɛfa bɛtua kakɛ mɔɔ bɛbɔ la a? (3)

Nwane mɔ a di asafo ko biala anyunlu a? (4)

Duzu nyianu mgbole a bɛyɛ ye ɛvolɛ biala a? (5)

Duzu gyima a bɛyɛ ye wɔ bɛ asafo ne abo nee ɔ sa ngane ɔfese ne mɔ anu a? (6)

1. Jehovah Dasevolɛma nyianle bɛ mekɛ ɛhye anu mɔlebɛbo ne wɔ 1870 ɛvolɛ ne mɔ anu. Alumua ne ɛnee bɛfɛlɛ bɛ Bible Sukoavoma. Noko wɔ ɛvolɛ 1931 ne anu, bɛvale Ngɛlɛlera ne anu duma mɔɔ le Jehovah Dasevolɛma la. (Isaiah 43:10) Ahyehyɛde mɔɔ mɔlebɛbo ne ɛnee le ekyi la anwo ɛzo ɛrayɛ Dasevolɛma mgbe dɔɔnwo mɔɔ bɛlɛka edwɛkɛ ne anyebolo zo wɔ maanle mɔɔ bo 230 la azo.

2. Jehovah Dasevolɛma asafo dɔɔnwo ne ala yɛ nyianu fane nsa dapɛne biala. Bɛto ɛsalɛ bɛfɛlɛ wɔ kɛ ɛhɔ nuhua ko biala bie. (Hebrewma 10:24, 25) Mɔɔ bɛgyinla zolɛ bɛkilehile la a le Bible ne. Bɛfa asɔneyɛlɛ bɛbɔ nyianu ne biala abo na eza bɛfa bɛkpɔne. Wɔ nyianu ne dɔɔnwo abo bɛto sunsum nu edwɛne mɔɔ vi ahonle nu. (Ephesusma 5:18, 19) Bɛndua ezukoa na bɛahɔ ɛkɛ, yɛɛ bɛnlielie ezukoa wɔ ɛkɛ.—Matthew 10:8.

3. Asafo dɔɔnwo ne ala yɛ bɛ nyianu ne mɔ wɔ Belemgbunlililɛ Asalo. Ɛhye mɔ ta yɛ azua mɔɔ bɛ ɛzilɛ ɛnyɛ se mɔɔ Dasevolɛma mɔɔ tu bɛ nwo maa la a sisi a. Ɛnrɛnwu aboduaba, meanubaka, anzɛɛ ninyɛne mɔɔ le kɛ ɛhye mɔ la biala wɔ Belemgbunlililɛ Asalo ɛkɛ. Bɛfa ndoloboa mɔɔ bɛfi bɛ ahonle nu bɛye la a bɛtua nwolɛ kakɛ a. Ndoloboa ɛlɛka gyi ɛkɛ maa  bɛdabɛ mɔɔ bɛkulo kɛ bɛye ndoloboa la.—2 Corinthma 9:7.

4. Wɔ asafo biala anu, mgbanyima anzɛɛ neavolɛma wɔ ɛkɛ. Bɛdi asafo ne anyunlu wɔ bɛ ɛhilehilelɛ nu. (1 Timothy 3:1-7; 5:17) Asafo nu sonvolɛma boa bɛ. (1 Timothy 3:8-10, 12, 13) Bɛmmaa menli ɛhye mɔ zo bɛndɛla bɛdabɛ mɔɔ bɛha wɔ asafo ne anu la. (2 Corinthma 1:24) Bɛmmaa bɛ amodinli titile biala. (Matthew 23:8-10) Bɛnziezie bɛ nwo ngakyile bɛnvi menli mɔɔ ɛha la anwo. Zɔhane ala noko a bɛndua bɛ kakɛ wɔ bɛ gyimalilɛ ne anwo a. Mgbanyima ne mɔ fi bɛ ɛhulolɛ nu di asafo ne sunsum nu ngyialɛdeɛ nwo gyima. Bɛkola bɛfa arɛlekyekyelɛ nee adenhilelɛ bɛmaa wɔ ngyegyelɛ mekɛ nu.—James 5:14-16; 1 Peter 5:2, 3.

5. Jehovah Dasevolɛma eza yɛ ayia anzɛɛ nyianu mgbole ɛvolɛ biala. Wɔ zɛhae mekɛ ne mɔ anu asafo dɔɔnwo bayia nu tie Bible ngilehilelɛ titile bie. Ɛdoavolɛma fofolɛ ɛzɔnelɛ boka maanzinli nyianu anzɛɛ maangyeba nyianu ne mekɛ biala ngyehyɛleɛ ne anwo.—Matthew 3:13-17; 28:19, 20.

6. Jehovah Dasevolɛma ewiade ye gyimalilɛ ne abo wɔ New York. Ɛkɛ ne a Neazo Eku ne, mgbanyima eku bie mɔɔ bɛbe mɔɔ bɛnea asafo mɔɔ wɔ ewiade kɔsɔɔti azo la wɔ a. Gyimalilɛ ne abo asa ngane ɔfese mɔɔ bo 104 la noko wɔ ewiade kɔsɔɔti. Wɔ zɛhae ɛleka ne mɔ, menli mɔɔ ɛdu bɛ nwo ɛmaa la boa maa bɛyɛ Bible mbuluku na bɛfa bɛnwa. Bɛfa kɛzi ɔwɔ kɛ bɛyɛ daselɛlilɛ gyima ne noko la anwo adehilelɛ bɛmaa. Duzu ati a ɛnyɛ ngyehyɛleɛ ɛngɔmkpɔla gyimalilɛ ne abo asa ngane ɔfese ne mɔɔ bikye wɔ la ɛ?