Ɛzukoalɛdeɛ 15

Nyamenle Ɛhulolɛdeɛ Mɔɔ Ɛboa Wɔamaa Bɛayɛ La

Duzu ati a ɔwɔ kɛ ɛka mɔɔ ɛlɛsukoa la anwo edwɛkɛ ɛkile awie mɔ a? (1)

Nwane mɔ a ɛbahola wɔaha edwɛkɛ kpalɛ ne wɔahile bɛ a? (2)

Duzu tumi a wɔ nyɛleɛ bahola anyia ye wɔ menli fofolɛ anwo zo a? (2)

Mekɛ boni a ɛbahola ɛ nee asafo ne abɔ nu aha edwɛkɛ ne a? (3)

1. Ɛleka mɔɔ wɔradwu ye kɛkala la, wɔzukoa ninyɛne mgbalɛ dɔɔnwo wɔvi Bible ne anu. Ɔwɔ kɛ zɛhae nrɛlɛbɛ ne boa maa ɛnyia Kiliseɛnema subane. (Ephesusma 4:22-24) Zɛhae nrɛlɛbɛ ye anwo hyia kpalɛ na wɔahola wɔanyia ngoane mɔɔ ɛnlɛ awieleɛ. (John 17:3) Noko akee, ɔhyia kɛ awie mɔ noko te edwɛkɛ kpalɛ ne amaa bɛdabɛ noko bɛanyia ngoane. Ɔwɔ kɛ nɔhalɛ Kiliseɛnema kɔsɔɔti di daselɛ kile menli fofolɛ. Ɔle Nyamenle mɛla.—Romema 10:10; 1 Corinthma 9:16; 1 Timothy 4:16.

2. Ɛbahola wɔabɔ ɔ bo wɔaha ninyɛne mgbalɛ mɔɔ ɛlɛsukoa la wɔahile menli mɔɔ bikye wɔ la. Ka bie kile wɔ abusua ne, ɛ gɔnwo mɔ, menli mɔɔ ɛ nee bɛ kɔ sukulu, nee menli mɔɔ ɛ nee bɛ yɛ gyima la. Da atiakunlukpalɛ nee abotane ali wɔ mekɛ mɔɔ ɛlɛyɛ ɛhye la. (2 Timothy 2:24, 25) Kakye kɛ menli ta nea sonla nyɛleɛ dɔɔnwo tɛla mɔɔ ɔka la. Yemɔti wɔ nyɛleɛ kpalɛ ne bahola ahwe awie mɔ yeamaa bɛadie edwɛkɛ ne mɔɔ ɛka ɛkile bɛ la.—Matthew 5:16; 1 Peter 3:1, 2, 16.

3. Ɔbadwu mekɛ bie la, ɛbahola wɔafɛta na wɔabɔ ɔbo ɛ nee Jehovah Dasevolɛma asafo ne mɔɔ wɔ ɛleka mɔɔ ɛde la abɔ nu aha edwɛkɛ ne. Ɛhye le wɔ anyunluhɔlɛ nu debie mɔɔ hyia. (Matthew 24:14) Nea anyelielɛ mɔɔ ɔbayɛ a, saa ɛkola ɛboa awie fofolɛ ɛmaa ɔbayɛ Jehovah sonvolɛ na ɔbanyia ngoane mɔɔ ɛnlɛ awieleɛ a!—1 Thessalonicama 2:19, 20.