Ɛzukoalɛdeɛ 5

Nyamenle Atiakunlukpɔkɛ Maa Azɛlɛ Ye A Le Boni?

Duzu ati a Jehovah bɔle azɛlɛ ne a? (1, 2)

Duzu ati a azɛlɛ ne ɛnle paladaese kɛkala ɛ? (3)

Duzu a bara ɛtanevolɛma anwo zo a? (4)

Kenlebie, duzu a Jesus bayɛ amaa wuliravolɛma ɛ? mrelera ɛ? mowuamra ɛ? (5, 6)

Amaa wɔanyia kenlebie nyilalɛ ne bie la, duzu a ɔhyia kɛ ɛyɛ a? (7)

1. Jehovah bɔle azɛlɛ ɛhye amaa menli anye ahola alie zolɛ ɛdɛnlalɛ dahuu. Ɛnee ɔkpondɛ kɛ fɔɔnwoma mɔɔ bɛlɛ anyelielɛ la tɛnla azɛlɛ ne azo dahuu. (Edwɛndolɛ 115:16; Isaiah 45:18) Bɛnrɛzɛkye azɛlɛ ne ɛlɛ; ɔbadɛnla ɛkɛ ne dahuu.—Edwɛndolɛ 104:5; Ecclesiastes 1:4.

2. Ansana Nyamenle babɔ sonla la, Ɔvale azɛlɛ ne ɛleka ekyii bie na ɔyɛle ye paladaese kɛnlɛma bie. Ɔvɛlɛle ye Eden tola. Ɛke a ɔvale Adam nee Eve nrenya nee raalɛ mɔɔ bɛlumua la, ɔguale a. Nyamenle hyehyɛle kɛ bɛwo na bɛyi azɛlɛ ne tɛkɛɛ. Anrɛɛ ɛnee ngyikyi ngyikyi bɛbamaa azɛlɛ ne amuala ayɛ paladaese.—Genesis 1:28; 2:8, 15.

3. Adam ne Eve yɛle ɛtane ɔlua Nyamenle mɛla mɔɔ bɛ nye fuu bɛdonle la azo. Yemɔti Jehovah voanle bɛ vile Eden tola ne anu. Paladaese minlinle. (Genesis 3:1-6, 23) Noko Jehovah arɛle ɛtɛfile atiakunlukpɔkɛ mɔɔ ɔlɛ ɔmaa azɛlɛ ɛhye la. Yebɔ ɛwɔkɛ kɛ ɔbayɛ ye paladaese, ɛleka mɔɔ adasama badɛnla ye dahuu la. Kɛzi ɔbayɛ ɛhye ɛ?—Edwɛndolɛ 37:29.

4. Ansana azɛlɛ ɛhye bahola ayɛ paladaese la, ɔwɔ kɛ bɛye ɛtanevolɛma bɛfi ɛkɛ. (Edwɛndolɛ 37:38) Ɛhye bazi wɔ Amagɛdɔn mɔɔ le Nyamenle konle mɔɔ ɔfa zo yeaye ɛtanelilɛ yeavi ɛkɛ ne la. Ɛhye anzi ye, bɛbado Satan efiade ɛvolɛ 1,000. Ɛhye kile kɛ ɛtanevolɛma biala ɛnrɛha na bɛazɛkye azɛlɛ ne. Nyamenle menli angome kye ala a baha a.—Yekile 16:14, 16; 20:1-3.

5. Akee Jesus Christ bali tumi kɛ azɛlɛ ɛhye azo belemgbunli ɛvolɛ 1,000. (Yekile 20:6) Ngyikyi ngyikyi ɔbaye ɛtane  yeavi yɛ adwenle nee yɛ sonla baka ne anu. Yɛbarayɛ menli mɔɔ di munli kɛmɔ ɛnee Adam nee Eve de kolaa na bɛayɛ ɛtane la. Akee anwondolɛ, ɛrelerayɛlɛ nee ewule ɛnrɛdɛnla ɛkɛ bieko. Bɛbamaa wuliravolɛma anwo aza, na mrelera noko arayɛ mgbavolɛ nee mbɛlɛra bieko.—Job 33:25; Isaiah 33:24; Yekile 21:3, 4.

6. Wɔ Jesus Ɛvolɛ Apenle Tumililɛ ne anu, adasama mɔɔ di nɔhalɛ la bayɛ gyima amaa azɛlɛ ne amuala ahakyi paladaese. (Luke 23:43) Eza noko bɛbadwazo mowuamra mgbe mgbe bɛara dasanli ngoane nu wɔ azɛlɛ ye azo. (Gyima 24:15) Saa bɛyɛ mɔɔ Nyamenle kpondɛ avi bɛ ɛkɛ ne la a, bɛbahɔ zo bɛadɛnla aze wɔ azɛlɛ ye azo dahuu. Saa bɛanyɛ ye zɔ a, bɛbazɛkye bɛ bɔkɔɔ.—John 28, 29; Yekile 20:11-15.

7. Nyamenle mɔlebɛbo atiakunlukpɔkɛ mɔɔ ɔlɛ ye wɔ azɛlɛ ne anwo la akee bara nuhua. Asoo ɛbahulo kɛ ɛbanyia zɛhae kenlebie nyilalɛ ne bie ɔ? Saa zɔhane a ɔde a, ɛnee ɔhyia kɛ ɛkɛhɔ zo ɛkɛzukoa Jehovah anwo debie na ɛkɛli mɔɔ ɔkpondɛ la azo. Nyianu mɔɔ ɛbahɔ ye wɔ Jehovah Dasevolɛma Belemgbunlililɛ Asalo mɔɔ wɔ ɛleka mɔɔ ɛwɔ la baboa wɔ amaa wɔayɛ ɛhye.—Isaiah 11:9; Hebrewma 10:24, 25.

[Nvoninli wɔ mukelɛ 10]

Paladaese minlinle

[Nvoninli wɔ mukelɛ 11]

Wɔ Amagɛdɔn anzi, bɛbayɛ azɛlɛ ne paladaese