Ɛzukoalɛdeɛ 6

Nyamenle Belemgbunlililɛ Ne A Le Duzu?

Nienwu a Nyamenle Belemgbunlililɛ ne wɔ a? (1) Nwane a le ye Belemgbunli a? (2)

Asoo menli fofolɛ nee Belemgbunli ne di tumi ɔ? Saa ɔle zɔ a, bɛle nyɛ? (3)

Duzu a kile kɛ yɛde awieleɛ mekɛ ne anu a? (4)

Duzu a Nyamenle Belemgbunlililɛ ne bayɛ amaa adasama a? (5-7)

1. Mekɛ mɔɔ Jesus wɔ azɛlɛ ye azo la ɔhilele ye ɛdoavolɛma ne mɔ kɛ bɛyɛ Nyamenle Belemgbunlililɛ ne anwo asɔne. Belemgbunlililɛ le arane mɔɔ belemgbunli a li ɔ ti a. Nyamenle Belemgbunlililɛ ne le arane titile bie. Bɛhyehyɛ ye wɔ anwuma na ɔbali azɛlɛ ɛhye azo tumi. Ɔbade Nyamenle duma ne anwo anzɛɛ ɔbayɛ ye nwuanzanwuanza. Ɔbamaa bɛayɛ Nyamenle ɛhulolɛdeɛ wɔ azɛlɛ ye azo kɛmɔ bɛyɛ ye wɔ anwuma la.—Matthew 6:9, 10.

2. Nyamenle bɔle ɛwɔkɛ kɛ Jesus bayɛ Belemgbunli wɔ ye Belemgbunli Maanle ne anu. (Luke 1:30-33) Mekɛ mɔɔ Jesus wɔ azɛlɛ ye azo la ɔhilele kɛ ɔbayɛ Tumivolɛ atiakunlukɛnlɛma, mɔɔ ɔdi pɛlepɛle na ɔdi munli. Mekɛ mɔɔ ɔziale ɔhɔle anwuma la, tɛ ɛkɛ ne ala a bɛvale ye bɛziele Nyamenle Belemgbunli Maanle ne azo Belemgbunli a. (Hebrewma 10:12, 13) Wɔ ɛvolɛ 1914 ne anu Jehovah vale tumi ne mɔɔ ɛnee yeva yebɔ Jesus ɛwɔkɛ la ɔmanle ye. Ɔvi mekɛ zɔhane mɔɔ ba la, Jesus ɛli tumi wɔ anwuma kɛ Nyamenle ye Belemgbunli mɔɔ yekpa ye la.—Daniel 7:13, 14.

3. Jehovah eza ɛkpa mrenyia nee mraalɛ nɔhavoma bie ɛvi azɛlɛ ye azo kɛ bɛhɔ anwuma. Bɛ nee Jesus bali tumi kɛ arelemgbunli, ndɛnebuavolɛma, nee ɛsɔfoma wɔ adasama anwo zo. (Luke 22:28-30; Yekile 5:9, 10) Jesus vɛlɛle menli ɛhye mɔ mɔɔ ɔ nee bɛ babɔ nu ali tumi wɔ ye Belemgbunlililɛ ne anu la kɛ mboane eku ekyii. Bɛ dodo le 144,000.—Luke 12:32; Yekile 14:1-3.

4. Mekɛ mɔɔ Jesus rayɛlɛ Belemgbunli ala la, yɛɛ ɔvuandile Satan nee ye anwumabɔvolɛ ɛtane ne mɔ ɔvile anwuma ɔguale azɛlɛ ye azo a. Ɛhye ati a ninyɛne ɛzɛkye kpole zɛhae wɔ azɛlɛ ye azo ɔvi ɛvolɛ 1914 mɔɔ ba la. (Yekile 12:9, 12) Konle  konle, ɛhɔne, ewule ngakyile, mɛlazobulɛ mɔɔ ɛlɛkɔ ɔ nyunlu la—ɛhye mɔ amuala boka “sɛkɛlɛneɛ” mɔɔ kile kɛ Jesus ɛlɛdi tumi, na ngyehyɛleɛ ɛhye wɔ ye awieleɛ mekɛ nu la anwo.—Matthew 24:3, 7, 8, 12; Luke 21:10, 11; 2 Timothy 3:1-5.

5. Ɔnrɛhyɛ na Jesus abua menli ndɛne, akpa bɛ nu kɛmɔ boaneneavolɛ kpa mboane fi mbɔnkye nu la. “Mboane” ne mɔ a le bɛdabɛ mɔɔ bɛbala bɛ nwo ali kɛ bɛle ye nɔhalɛ ngɛkɛlɛ la. Bɛbanyia ngoane mɔɔ ɛnlɛ awieleɛ wɔ azɛlɛ ye azo. “Mbɔnkye” ne mɔ a le bɛdabɛ mɔɔ bɛbahile kɛ bɛkpo Nyamenle Belemgbunlililɛ ne la. (Matthew 25:31-34, 46) Ɔnrɛhyɛ biala, Jesus bazɛkye awie biala mɔɔ le kɛ abɔnkye la. (2 Tessalonicama 1:6-9) Saa ɛkpondɛ kɛ ɛyɛ Jesus “mboane” ne anu ko a, ɔwɔ kɛ ɛtie Belemgbunlililɛ ne anwo edwɛkɛ ne, na ɛyɛ mɔɔ ɛsukoa la anwo debie.—Matthew 24:14.

6. Kɛkala bɛhyehyɛ azɛlɛ ne anu bɛyɛ ye maanle dɔɔnwo. Nuhua ko biala lɛ ye arane. Maanle ɛhye mɔ ta ko tietia bɛ nwo. Noko Nyamenle Belemgbunlililɛ ne barali dasanli arane biala agyakɛ anu. Ɔbali tumi kɛ arane ko kye wɔ azɛlɛ ye azo amuala. (Daniel 2:44) Akee konle, ɛtanelilɛ, nee basabasayɛlɛ ɛnrɛra bieko. Na menli kɔsɔɔti babɔ nuhua adɛnla wɔ anzondwolɛ nee koyɛlɛ nu.—Micah 4:3, 4.

7. Wɔ Jesus Ɛvolɛ Apenle Belemgbunlililɛ ne anu adasama nɔhavoma barali munli, na azɛlɛ ne amuala barayɛ paladaese. Ɔkadwu ɛvolɛ apenle ko ne awieleɛ la ɛnee Jesus ɛwie debie biala mɔɔ Nyamenle hanle hilele ye kɛ ɔyɛ la amuala yɛ. Akee ɔbazia yeava Belemgbunlililɛ ne yeamaa ɔ Ze. (1 Corinthma 15:24) Duzu ati a ɛnrɛha mɔɔ Nyamenle Belemgbunlililɛ ne bayɛ la anwo edwɛkɛ ɛnrɛhile ɛ gɔnwo mɔ nee wɔ kulovolɛma ɛ?

[Nvoninli wɔ mukelɛ 13]

Wɔ Jesus tumililɛ bo, ɛkpɔlɛ anzɛɛ akpule bo bapɛ