Nyamenle Mɔɔ Ɛbabikye Ye Wɔ Asɔneyɛlɛ Nu La
Ɛzukoalɛdeɛ 7
Nyamenle Mɔɔ Ɛbabikye Ye Wɔ Asɔneyɛlɛ Nu La
Duzu ati a nwolɛ hyia kɛ ɛkɛyɛ asɔne dahuu a? (1)
Nwane a ɔwɔ kɛ yɛ asɔneyɛlɛ dwu ye ɛkɛ a, na wɔ adenle boni azo? (2, 3)
Duzu ninyɛne a ɔfɛta kɛ yɛyɛ nwolɛ asɔne a? (4)
Mekɛ boni anu a ɔwɔ kɛ ɛyɛ asɔne a? (5, 6)
Asoo Nyamenle tie asɔneyɛlɛ kɔsɔɔti ɔ? (7)
1. Asɔneyɛlɛ le edwɛkɛ mɔɔ bɛfa mɛlɛbɛnwoaze bɛka bɛkile Nyamenle a. Ɔwɔ kɛ ɛsɛlɛ Nyamenle dahuu. Ɛhye ɛyɛlɛ bamaa wɔahola wɔade nganeɛ kɛ ɛbikye ye kɛ ɛ gɔnwo mɔɔ ɛkulo ye la. Jehovah le bedevinli na eza ɔlɛ tumi, noko ɔtie yɛ asɔneyɛlɛ! Asoo ɛsɛlɛ Nyamenle dahuu ɔ?—Edwɛndolɛ 65:2; 1 Thessalonicama 5:17.
2. Asɔneyɛlɛ le yɛ ɛzonlelɛ ne foa. Yemɔti ɔwɔ kɛ Nyamenle, Jehovah angome kye ala a yɛ asɔneyɛlɛ dwu ye ɛkɛ a. Mekɛ mɔɔ Jesus wɔ azɛlɛ ye azo la, ɔ Ze a ɔyɛle ye asɔne dahuu a, na tɛ awie gyɛne biala ɔ. Zɔhane ala a ɔwɔ kɛ yɛyɛ a. (Matthew 4:10; 6:9) Noko akee ɔwɔ kɛ yɛyɛ yɛ asɔne ne amuala wɔ Jesus duma nu. Ɛhye kile kɛ yɛbu Jesus gyinlabelɛ ne na yɛlɛ diedi wɔ ye ɛkpɔnelɛ afɔlebɔlɛ ne anu.—John 14:6; 1 John 2:1, 2.
3. Mekɛ mɔɔ yɛlɛyɛ asɔne la, ɔwɔ kɛ yɛfi yɛ ahonle nu yɛtendɛ yɛkile Nyamenle. Ɔnle kɛ yɛ asɔneyɛlɛ ne yɛ edwɛkɛ mɔɔ yɛhye yɛgua yɛ ti anu anzɛɛ yɛkenga yɛfi asɔneyɛlɛ buluku bie anu. (Matthew 6:7, 8) Yɛbahola yɛayɛ asɔne wɔ gyinlabelɛ bialɛ mɔɔ nidi wɔ nu la anu, wɔ mekɛ biala, nee ɛleka biala. Nyamenle kola te asɔne mɔɔ yɛyɛ ye yɛ ahonle nu mɔɔ yɛmbuke yɛ nloa la. (1 Samuel 1:12, 13) Ɔle kpalɛ kɛ yɛbakpondɛ ɛleka mɔɔ le koonwu mɔɔ awie gyɛne ɛnle ɛkɛ ne la na yɛayɛ yɛ fealeranu asɔne.—Mark 1:35.
4. Duzu ninyɛne a ɛbahola wɔayɛ nwolɛ asɔne a? Debie biala mɔɔ ɔbahola yeaha ɛ nee ye bɛ agɔnwolɛvalɛ ne la. (Philippima 4:6, 7) Neazo asɔneyɛlɛ ne kile kɛ ɔwɔ kɛ yɛsɛlɛ yɛfale Jehovah duma ne nee ye atiakunlukpɔkɛ ne anwo. Eza noko yɛbahola yɛahile kɛ ɔva yɛ nwonane nu ngyialɛdeɛ ɔmaa yɛ, ɔva yɛ ɛtane ɔhyɛ yɛ, na ɔboa yɛ ɔmaa yɛho yɛtia sɔnea. (Matthew 6:9-13) Ɔnle kɛ yɛyɛ angomedi wɔ yɛ asɔneyɛlɛ nu. Ɔwɔ kɛ yɛsɛlɛ ninyɛne mɔɔ nee Nyamenle ɛhulolɛdeɛ yia la angome kye.—1 John 5:14.
5. Ɛbahola wɔayɛ asɔne mekɛ biala mɔɔ wɔ ahonle kile wɔ kɛ ɛla Nyamenle ase anzɛɛ ɛhanvo ye la. (1 Kolonika 29:10-13) Ɔwɔ kɛ ɛyɛ asɔne mekɛ mɔɔ ɛlɛ ngyegyelɛ na bɛlɛsɔ wɔ diedi bɛanlea la. (Edwɛndolɛ 55:22; 120:1) Ɔfɛta kɛ ɛyɛ asɔne ansana wɔali wɔ aleɛ. (Matthew 14:19) Jehovah ka kile yɛ kɛ yɛyɛ asɔne “mekɛ biala.”—Ephesusma 6:18.
6. Mekɛ titile mɔɔ ɔhyia kɛ yɛyɛ asɔne la a le mekɛ mɔɔ yɛyɛ ɛtane bie mɔɔ anyebolo wɔ nu la. Wɔ mekɛ zɛhae mɔ anu, ɔwɔ kɛ yɛsɛlɛ Jehovah anwunvɔnezelɛ nee ye ɛtanefakyɛ. Saa yɛka yɛ ɛtane yɛkile ye na yɛbɔ mɔdenle biala mɔɔ yɛbahola la kɛ yɛnrɛzia yɛnrɛyɛ bieko a, Nyamenle “ɛzi pii kɛ ɔbava yɛahyɛ yɛ.”—Edwɛndolɛ 86:5; Mrɛlɛbulɛ 28:13.
7. Jehovah tie fɔɔnwoma angome kye asɔneyɛlɛ. Amaa Nyamenle adie wɔ asɔneyɛlɛ la, ɔwɔ kɛ ɛbɔ mɔdenle biala mɔɔ ɛbahola la kɛ ɛbali ye mɛla zo. (Mrɛlɛbulɛ 15:29; 28:19) Ɔwɔ kɛ ɛbɛlɛ ɛ nwo aze mekɛ mɔɔ ɛlɛyɛ asɔne la. (Luke 18:9-14) Nwolɛ hyia kɛ ɛkɛbɔ mɔdenle ɛkɛmaa wɔ nyɛleɛ nee deɛ mɔɔ ɛyɛ nwolɛ asɔne ne la yia. Ɔlua ɛhye azo ɛbahile kɛ ɛlɛ diedi, na amgba noko mɔɔ ɛka la le wɔ anyebolo edwɛkɛ. Adenle ɛhye angome kye azo ala a Jehovah babua wɔ asɔneyɛlɛ ne anwo bie a.—Hebrewma 11:6.
