Yɛ Mediema Alɔvolɛ:

Wɔ ɛvoya ne mɔɔ tɔ zo nsuu K.Y.M., ngapezonli Yizikeɛle nyianle ɛnyelɛzodeɛnwunlɛ mɔɔ yɛ azibɛnwo. Ɔnwunle anwuma ehwili kpole bie mɔɔ aleɛabo Belemgbunli ne a ka la. Kɛzi ehwili zɔhane tia la yɛ azibɛnwo. Ɔtia ndɛndɛ kpalɛ kɛ mɔɔ ɛsɛlɛmanye fede a ɔde la, ɔkola ɔkɔ ɛleka biala mɔɔ ɔkulo la, ɔndo ye ɛnriandilɛ nu anzɛɛ ɔngakyi ɔ nwo bɔbɔ!​—Yiz. 1:4, 9, 12, 14, 16-27.

Yekile zɔhane maa yɛnwu kɛ Gyihova ahyehyɛdeɛ ne foa mɔɔ wɔ anwuma la ɛlɛnriandi dahuu. Na ahyehyɛdeɛ ne foa mɔɔ wɔ azɛlɛ ye azo la noko ɛ? Ɛzonlenlɛ ɛvolɛ ne mɔɔ ɛpɛ nu la maa ɔda ali kɛ Gyihova ɛlɛmaa ye ahyehyɛdeɛ ne foa mɔɔ wɔ azɛlɛ ye azo la noko anriandi zɔhane ala!

Wɔ United States ɛke, Brooklyn Bɛtɛle abusua ne anu amra anye ɛbolo bɛlɛtu bɛahɔ ewiade amuala gyima ne ati fofolɛ ne mɔɔ wɔ Warwick, New York nee ɛleka gyɛne yɛɛ azɛlɛsinli ne anu. Bɛtɛlema mɔɔ bɛwɔ Bɛtɛle ngakyile mɔɔ wɔ ewiade anu la anye ɛbolo bɛlɛsisi azua, bɛayɛ bie mɔ fofolɛ, yɛɛ bɛlɛmaa Bɛtɛlema bie mɔ ahɔboka Bɛtɛle gyɛne bie mɔ anwo anzɛɛ bɛahɔdɛnla ɛleka fofolɛ. Na ɛdawɔ noko ɛ? Saa ɛtɛtule ɛtɛkɔle ɛleka bɔbɔ a, bie a ɛlɛbɔ mɔdenle wɔaboa wɔ ndenle ngakyile zo.

Ɔyɛ Neazo Eku ne anyelielɛ kpole kɛ yenwu kɛ Nyamenle menli mɔɔ bɛwɔ ewiade amuala la ɛlɛbɔ mɔdenle bɛ nee Gyihova ahyehyɛdeɛ ne alua la. Dɔɔnwo ɛlɛsonle wɔ ɛleka mɔɔ bɛhyia moalɛ kpalɛ la. Bie mɔ ɛdu ɛhɔ ɛleka mɔɔ bɛka aneɛ gyɛne la bɛlɛsonle wɔ ɛkɛ. Dɔɔnwo ɛzɔ daselɛlilɛ ne foa mɔɔ ɛnee le fofolɛ maa bɛ anzɛɛ bɛnze ɔ nye zo la ɛnlea. Bie mɔ noko ɛdɛlɛ bɛ ɛzonlenlɛ gyima ne anu wɔ ndenle ngakyile zo. Eza nɔhalɛ Kilisienema kɔsɔɔti mɔɔ mgbanyima nee wuliravolɛma boka nwo la ɛlɛsu ngoane ɛnriandilɛ ne​—na bɛlɛbɔ mɔdenle wɔ Gyihova ɛzonlenlɛ nu bɛamaa yeala ali kɛ Seetan le adalɛ.​—1 Kɔl. 9:24.

Nyia anwodozo kɛ Gyihova nwu subane mɔɔ ɛda ye ali la. (Hib. 6:10) Bɛ tunwomaa sunsum ne maa yɛkakye Ebileham nee Sɛla. Mɔɔ Ebileham nyianle ɛvolɛ 70 mɔɔ kɔ la, ɔ nee ye abusua ne dule vile Kyalediama suakpole Yule azo hɔle moamoa ɛleka bie wɔ Keena, ɛleka mɔɔ ɔdɛnlanle tɛɛnte nu wɔ ɛvolɛ ɛya anu la. Nea tunwomaa sunsum mɔɔ ɔ nee ɔ ye lale ye ali a!​—Mɔl. 11:31; Gyi. 7:2, 3.

Ɛlɛda subane zɔhane bie ali ɔ? Bɛ kɔsɔɔti mɔɔ bɛlɛfa nɔhalɛlilɛ bɛagyinla anwongyelelɛ mekɛ ɛhye anloa la ɛlɛyɛ mɔɔ Gyisɛse se yɛyɛ la. Ɔhanle kɛ: “Yemɔti, bɛhɔ, bɛyɛ maanle maanle kɔsɔɔti anu  menli me ɛdoavolɛma, bɛzɔne bɛ wɔ Selɛ ne, Ralɛ ne nee sunsum nwuanzanwuanza ne duma nu.”​—Mat. 28:19.

Edwɛkɛkpɔkɛ “bɛhɔ” mɔɔ Gyisɛse vale lile gyima bɔbɔ la kile kɛ ɔwɔ kɛ yɛkeha yɛ nwo. Saa yɛnwu mɔɔ Kelaese ɛdoavolɛma mɔɔ bɛbɔ mɔdenle la ɛhola ɛyɛ wɔ ɛvolɛ mɔɔ ɛpɛ nu la anu a, ɔyɛ anyelielɛ kpole! Ɔmaa yɛnwu kɛ Gyihova ɛlɛyila Belemgbunlililɛ edwɛkpa ne mɔɔ bɛlɛbɔ ye nolo wɔ ewiade amuala la azo.​—Maake 13:10.

Menli dɔɔnwo ɛlɛtie edwɛkɛ ne. Nolobɔlɛma dodo mɔɔ tɛla biala wɔ ɛvolɛ mɔɔ ɛpɛ nu la ɛnee le 8,340,847, yɛɛ yɛyɛle Baebolo ɛzukoalɛ 10,115,264 siane biala. Ɔda ali wienyi kɛ, anwuma ehwili ne ɛlɛnriandi, na ɛdawɔ noko ɛlɛbɔ mɔdenle wɔadoa ye! Kɔ zo yɛ gyima kpalɛ mɔɔ ɛlɛyɛ ye wɔ mekɛ ekyii ɛhye mɔɔ ɛha anu la, kolaa na Gyihova ado ngoanelielɛ anlenkɛ ne anu.

Nea kɛzi yɛ ɛvolɛdwɛkɛ maa 2017 ne fɛta la: ‘Fa ɛ rɛle wula Gyihova anu na di boɛ’! (Edw. 37:3) Saa ɛtie edwɛkɛ ɛhye, ɛyɛ kpalɛ, ɔlua ɛzonlenlɛ nwuanzanwuanza mɔɔ ɛbava wɔamaa Gyihova la azo a, ɛnee ɛlɛkile kɛ ɛlɛ anwodozo wɔ ye nu. Yɛsɛlɛ wɔ, dahuu kakye kɛ ɔtɛkale ɛ ngome. Gyisɛse edwɛkɛ ne bayɛ nɔhalɛ dahuu: “Na nea! me nee bɛ lua dahuu kɔkpula mekɛ ɛhye awieleɛ.”​—Mat. 28:20.

Nyia anwodozo kɛ Gyihova bahɔ zo ayila ahonle nu mɔɔ ɛfi ɛsonle ye la. Saa mɔɔ ɛyɛ la le ekyi anzɛɛ kpole bɔbɔ a, mɔɔ Gyihova kpondɛ la a le kɛ ɛbava adwenle kpalɛ wɔayɛ mɔɔ ɛbahola la. Ɔ nye die ahyɛlɛdeɛ ɛhye mɔ anwo na ɔka ye ahonle kpalɛ. (2 Kɔl. 9:6, 7) Ɔti, kɔ zo bikye wɔ ɛlɔlɛ Selɛ ne ɔlua asɔneyɛlɛ, Nyamenle Edwɛkɛ ne ɛzukoalɛ, debiezukoalɛ nee daselɛlilɛ mɔɔ ɛbahɔ ye dahuu la azo.

Ɔluakɛ yeha Abɔnsam, atuadelɛnli atisesebɛ ne “mekɛ ekyi bie” la ati, ɔlɛbɔ mɔdenle biala kɛ ɔmaa yɛakpo yɛ munli nu mɔɔ yɛkpondɛ kɛ yɛgyinla yɛmaa Gyihova la. (Yek. 12:12) Kɔ zo bikye Gyihova, na ɛbali Abɔnsam anwo zo konim. (Edw. 16:8) Yɛsɛlɛ bɛ, bɛnwu ye kɛ yɛkulo bɛ kpole kpalɛ yɛɛ yɛ nye sɔ kɛzi bɛlɛbɔ mɔdenle bɛaboa Awulae Belemgbunlililɛ ne wɔ awieleɛ mekɛ ɛhye anu la.

Bɛ mediema,

Gyihova Alasevolɛ Neazo Eku