1. Duzu ati a awuke zo ɛnleanlɛ bahola ayɛ se ɛnɛ ɛ?

NINYƐNE dɔɔnwo ɛlɛkakyi kenlensa ye, titile mɔɔ fane abusua asetɛnla nwo la. Bɛnlie debie mɔɔ bɛbule ye kɛ ɔle kpalɛ anzɛɛ ɔle amaamuo wɔ ɛvolɛ 40 anzɛɛ 50 mɔɔ ɛze ɛhɔ anu la bɛndo nuhua ɛnɛ. Ɔlua ɛhye ati, awuke zo ɛnleanlɛ bahola ayɛ ngyegyelɛ kpole. Noko akee, saa ɛtie Ngɛlɛlera ne anu folɛdulɛ ne a, ɛbahola wɔali ngyegyelɛ ɛhye mɔ anwo gyima.

2. Ninyɛne mɔɔ kɔ zo wɔ maanle nu la boni mɔ a kola fa ngyegyelɛ ba abusua nu a?

² Ɛnɛ, menli dɔɔnwo akunlu ɛndwo abusua asetɛnla mɔɔ le sikalɛ la anwo. Kɛmɔ gualilɛma yɛ ninyɛne dɔɔnwo na bɛbɔ nwolɛ nolo wɔ adenle kɛnlɛma zo bɛbɛlɛbɛla menli la ati, mrɛladane mgbe dɔɔnwo fa mekɛ tendenle yɛ gyima amaa bɛahola bɛadɔ ninyɛne ɛhye mɔ. Menli dɔɔnwo noko fɛ kpalɛ alehyenlɛ biala na bɛanyia aleɛ bɛali. Bɛfa mekɛ dɔɔnwo bɛyɛ gyima ɛnɛ bɛtɛla dɛba ne, bie a bɛyɛ gyima ngakyile nwiɔ amaa bɛahola bɛadua ninyɛne mɔɔ hyia bɛ la anwo kakɛ. Kɛmɔ gyima mɔɔ bɛnnyia ye bɛnyɛ la ɛlɛkɔ ɔ nyunlu la ati, saa bie mɔ nyia gyima a bɛ nye die. Ɛhɛe, ɛbɛlabɔlɛ ne yɛ se maa mbusua ɛnɛ, noko Baebolo ngyinlazo kola boa bɛ maa bɛyɛ biala mɔɔ bɛkɛhola la.

3. Ngyinlazo boni a ɛzoanvolɛ Pɔɔlo hilehilele nu a, na kɛzi awie fa di gyima a ɔbamaa yeahola yeanlea awuke zo ɛ?

 ³ Ɛzoanvolɛ Pɔɔlo yiale ezukoa nwo ngyegyelɛ. Mekɛ mɔɔ ɔlɛdi nwolɛ gyima la ɔzukoale debie mɔɔ sonle bolɛ la ɔvile nu na ɔhilehilele nuhua wɔ ye kɛlata ne anu ɔhilele ɔ gɔnwo Temɔte. Pɔɔlo hɛlɛle kɛ: “Yɛanva ɛhwee yɛamba ewiade ye, yɛɛ yɛnrɛva bie yɛnrɛhɔ. Ɛhye ati, saa yɛlɛ mɔɔ yɛdi nee mɔɔ yɛkeda la a, bɛmaa yɛ nye ɛzɔ yɛ nwo.” (1 Temɔte 6:7, 8) Nɔhalɛ nu, tɛ aleɛ nee tɛladeɛ angome a abusua hyia nwolɛ a. Eza bɛhyia ɛleka mɔɔ bɛbadɛnla la. Ɔwɔ kɛ ngakula ne mɔ kɔ sukulu. Ayileyɛlɛ nwo kakɛ nee kakɛ gyɛne noko wɔ ɛkɛ. Noko akee, Pɔɔlo ngyinlazo ne baboa. Saa yɛmaa yɛ nye sɔ mɔɔ yɛlɛ, yɛdi yɛ ngyianlɛ nwo gyima na yɛgyakyi mɔɔ yɛkulo la a, ɛbɛlabɔlɛ ne ɛnrɛyɛ se.

4, 5. Kɛzi debie mɔɔ bɛsuzu nwo bɛsie nee ngyehyɛleɛ boa wɔ awuke zo ɛnleanlɛ nu ɛ?

⁴ Yɛnwu ngyinlazo bieko mɔɔ boa la wɔ ndonwo ko mɔɔ Gyisɛse yɛle la anu. Ɔhanle kɛ: “Saa bɛ nuhua bie kpondɛ kɛ ɔsi sua a, ɔdumua ɔtɛnla aze, ɔsese ye bolɛ, na ɔnea saa ɔlɛ ezukoa mɔɔ sa ye si la a.” (Luku 14:28) Ɛnee Gyisɛse ɛlɛka debie mɔɔ bɛdumua bɛsuzu nwolɛ bɛsie la anwo edwɛkɛ. Yɛnwunle ye wɔ tile mɔɔ lumua ɛhye anyunlu la ko anu wɔ kɛzi ɛhye boa menli mɔɔ kpondɛ kɛ bɛgya la. Bɛgya bɛwie a, eza ɔboa wɔ sua nu ɛnleanlɛ nu. Debie mɔɔ bɛdumua bɛsuzu nwo bɛsie wɔ ɛhye anu la kile kɛ bɛbayɛ ezukoa nwo ngyehyɛleɛ bɛado ɛkɛ, na bɛalumua bɛadwenle kɛzi bɛbava ninyɛne mɔɔ bɛlɛ bɛali gyima nrɛlɛbɛ nu la. Wɔ adenle ɛhye azo, abusua ne bahola ade kakɛ mɔɔ bɛbabɔ la azo, bɛanyia ezukoa bɛado ɛkɛ bɛamaa ninyɛne mɔɔ bɛbahyia nwolɛ alehyenlɛ anzɛɛ dapɛne biala la, na bɛambɔ ɔ nzi kakɛ.

⁵ Wɔ maanle bie mɔ anu, ezukoa nwo ngyehyɛleɛ  ɛhye bahola ahile kɛ bɛbahoati bosea mɔɔ bɛdie bɛtotɔ ninyɛne mɔɔ nwolɛ ɛngyia la. (Mrɛlɛbulɛ 22:7) Eza ɔbahola yeahile kɛ yɛnrɛdɔ ninyɛne mɔɔ yɛanzuzu nwolɛ kɛ yɛbadɔ la—ninyɛne mɔɔ yɛ nye bɔ zo ala a ɛnee yɛlɛtɔ mɔɔ yɛndwenle ye kakɛ ne anwo la. Bieko, ezukoa nwo ngyehyɛleɛ bamaa yeala ali kɛ saa yɛyɛ angomedi na yɛsɛkye ezukoa wɔ kyakyadolɛ, sigalɛte nee nza dɔɔnwo ɛnlonlɛ nwo a, ɔbazɛkye abusua ne ezukoa gyinlabelɛ yɛɛ eza ɔ nee Baebolo ngyinlazo ɛnyia.​—Mrɛlɛbulɛ 23:20, 21, 29-35; Wulomuma 6:19; Ɛfɛsɛsema 5:3-5.

6. Ngɛlɛlera ne anu edwɛkɛ boni a boa ehyiavolɛma a?

⁶ Na ehyiavolɛma noko ɛ? Mɔɔ wɔ nu la a le kɛ, bɛbahola bɛakyekye bɛ rɛle bɛamaa bɛanwu kɛ ngyegyelɛ ɛhye mɔɔ wɔ ewiade amuala anu la ɛnrɛhyɛ na apɛ nu. Wɔ ewiade fofolɛ ne mɔɔ ɛlɛbikye ndɛndɛ la anu, Gyihova baye ehyia nee debie ɛtane biala mɔɔ maa alesama di nyane la avi ɛkɛ. (Edwɛndolɛ 72:1, 12-16) Kɔkpula zɔhane mekɛ ne, saa nɔhalɛ Keleseɛnema ɛlɛdi ehyia bɔbɔ a, bɛmmaa bɛ sa nu ɛndo ɔluakɛ bɛlɛ diedi wɔ Gyihova ɛwɔkɛ ne mɔɔ se: “Menrɛgyakyi bɛ ɛlɛ, yɛɛ me rɛle ɛnrɛvi bɛ fee” la anu. Ɔlua ɛhye ati, awie mɔɔ le adiema la bahola ava anwodozo aha kɛ: “Awulae le me boavolɛ, menrɛzulo ɛhwee.” (Hibuluma 13:5, 6) Wɔ mekɛ ɛhye mɔɔ yɛ se la anu, saa Gyihova azonvolɛ fa ye ngyinlazo ne mɔ bɔ bɛ ɛbɛla na bɛfa Belemgbunlililɛ ne bɛdumua bɛ ɛbɛlabɔlɛ nu a ɔboa bɛ wɔ ndenle dɔɔnwo anu. (Mateyu 6:33) Bɛ nuhua dɔɔnwo di ɛhye anwo daselɛ, yemɔti bɛka ɛzoanvolɛ Pɔɔlo edwɛkɛ ne bie kɛ: “Mezukoa ɛhye mɔ ɛyɛlɛ, amaa ɛleka biala nee mekɛ biala anu, saa menyia ye medi o, meannyia ye meanli o, saa melɛ bie o, menlɛ bie o, me kunlu adwo me nwo.  Ɔlua anwosesebɛ ne mɔɔ Kelaese fa maa me la ati, mekola megyinla ninyɛne muala anloa.”​—Felepaema 4:12, 13.

7. Gyisɛse edwɛkɛ boni a saa yɛfa yɛdi gyima a ɔbamaa yɛanlea awuke zo kpalɛ a?

⁷ Mekɛ mɔɔ Gyisɛse azɛlɛ ye azo ɛzonlenlɛ gyima ne ɛlɛkɔ ye awieleɛ la, ɔhanle kɛ: “Kulo ɛ gɔnwo kɛ ɛdawɔ ɛ nwo la.” (Mateyu 22:39) Bɛfa folɛdulɛ ɛhye bɛdi gyima wɔ abusua ne anu a ɔbaboa kpole wɔ awuke zo ɛnleanlɛ nu. Asoo tɛ menli mɔɔ yɛ nee bɛ wɔ abusua ne anu—kunli nee yelɛ, awovolɛ nee ngakula a  bikye yɛ kpalɛ na yɛkulo bɛ edwɛkɛ a? Kɛ ɔkɛyɛ na abusua ne anu amra ahile ɛlɔlɛ amaa bɛ nwo ɛ?

8. Kɛ ɔkɛyɛ na ɛlɔlɛ ala ali wɔ abusua ne anu ɛ?

⁸ Debie ko a le kɛ, abusua ne anu sonla ko biala bayɛ ye afoa nu ɛdeɛ wɔ sua nu gyimayɛlɛ nu. Ɛhye ati, ɔwɔ kɛ bɛmaa ngakula nwu ye kɛ saa bɛfa ninyɛne bɛdi nwɔhoa bɛwie a ɔwɔ kɛ bɛfa bɛgua ɔ bo zo ne. Bie a ɔhyia mekɛ nee mɔdenlebɔlɛ na bɛatoto ɛkpa ne nwonlomɔ biala, noko ɛhye boa kpole wɔ awuke zo ɛnleanlɛ nu. Nɔhalɛ nu, bɛnrɛhola bɛnrɛhoati ninyɛne mɔɔ ɔyɛ a bɛgua ye basaa la, noko bɛ muala bɛbahola bɛaboa bɛamaa sua nu ɛkɛ ayɛ bɔkɔbɔkɔ, na eza bɛdi debie bɛwie a bɛayeye ɔ bo zo ne. Mgbovonle, awie mɔɔ kulo ɔ ngome ɔ nwo, adendɛbɛnzoabo nee ɛhulolɛ nu mɔɔ bɛnvi bɛnyɛ debie la ɛnrɛboa bɛ nuhua biala. (Mrɛlɛbulɛ 26:14-16) Noko akee, awie mɔɔ te ɔ nyunlu na ɔfi ye ɛhulolɛ nu ɔyɛ debie la maa abusua asetɛnla yɛ anyelielɛ. “Nyamenle kulo sonla mɔɔ te ɔ nyunlu kyɛ debie la.”​—2 Kɔlentema 9:7.

9, 10. (a) Gyima boni a raalɛ ta yɛ wɔ sua nu a, na kɛ ɔkɛyɛ na ɛhye azo ade ɛ? (b) Sua nu gyimayɛlɛ nwo adwenle kpalɛ boni a bɛhile a?

⁹ Ninyɛne mɔɔ bɛsuzu nwolɛ nee ɛlɔlɛ baboa yeamaa bɛahoati tɛnlabelɛ mɔɔ le ngyegyelɛ kpole wɔ azua bie mɔ anu la. Mrɛladane a ta boa wɔ sua nu gyimayɛlɛ nu kpalɛ a. Bɛnea ngakula, bɛsiezie sua nu, bɛkpo ninyɛne na bɛdi gua bɛto aleɛ. Wɔ maanle bie mɔ anu, mraalɛ eza yɛ ɛbɔ nu gyima, bɛtɔne ninyɛne wɔ gua nu anzɛɛ bɛdua ndenle ngakyile zo bɛboa abusua ne ezukoa ngyehyɛleɛ ne. Ɛleka mɔɔ dɛba ne ɛnee bɛnyɛ ɛhye la, yera ye kɛ ɔwɔ kɛ mraalɛ dɔɔnwo mɔɔ bɛgya bɛ la kpondɛ gyima yɛ. Yelɛ nee ɛrɛladane mɔɔ yɛ ɛhye mɔ biala bie la fɛta nganvolɛ. Kɛmɔ “yelɛ kpalɛ” ne mɔɔ bɛha ɔ nwo edwɛkɛ wɔ  Baebolo ne anu de la, ɔfa ye mekɛ ɔyɛ gyima ɛsesebɛ. “Ɔnli ɔ sa anzi aleɛ.” (Mrɛlɛbulɛ 31:10, 27) Noko akee, ɛhye ɛngile kɛ raalɛ angomekye a ɔwɔ kɛ yɛ gyima wɔ sua nu a. Saa kunli nee yelɛ kɔ gyima dedee na bɛba sua nu a, asoo ɔwɔ kɛ yelɛ angomekye a yɛ sua nu gyima kɔsɔɔti wɔ mekɛ mɔɔ kunli ne nee abusua ne anu amra mɔɔ ɛha la ɛlɛdie bɛ menle la? Kyɛkyɛ. (Fa to 2 Kɔlentema 8:13, 14 anwo.) Kɛ neazo la, saa raalɛ kpondɛ kɛ ɔto aleɛ na abusua ne anu amra bie siezie ɛkponle ne azo, kɔdi gua anzɛɛ siezie ninyɛne boɛ wɔ sua nu ɛkɛ a, ɔ nye balie nwolɛ. Ɛhɛe, awie biala bahola ayɛ gyima ne bie.​—Fa to Galeehyeama 6:2 anwo.

¹⁰ Bie baha kɛ: “Ɛleka mɔɔ mede la, tɛ nrenya a yɛ gyima ɛhye mɔ a.” Ɛhye bahola ayɛ zɔ, noko asoo ɔnrɛyɛ kpalɛ kɛ ɛkɛzuzu edwɛkɛ ɛhye anwo bieko? Mekɛ mɔɔ Gyihova Nyamenle bɔle abusua ne abo la, yeanga kɛ raalɛ a ɔwɔ kɛ yɛ gyima bie mɔ a. Mekɛ mɔɔ Gyihova soanvolɛma titile bie mɔ hɔkpɔlale Ebileham wɔ mekɛ bie anu la, ɔdaye mumua ne ɔzɔle nu ɔmanle bɛdonle nyɛvolɛ ne mɔ aleɛ ne na bɛzieziele. (Mɔlebɛbo 18:1-8) Baebolo ne tu folɛ kɛ: “Ɔwɔ kɛ kunlima kulo bɛ ye mɔ kɛ bɛ nwo la.” (Ɛfɛsɛsema 5:28) Saa ɔkadwu nɔsolɛ la kunli te nganeɛ kɛ yevɛ na ɔdie ɔ menle a, asoo ɛhye ɛngile kɛ ɔ ye noko te nganeɛ zɔhane ala, na bie a yevɛ kpalɛ yedɛla ye ɔ? (1 Pita 3:7) Saa ye zɔhane a, asoo ɔnfɛta yɛɛ ɔngile ɛlɔlɛ kɛ kunli kɛboa wɔ sua nu ɔ?​—Felepaema 2:3, 4.

11. Adenle boni azo a Gyisɛse yɛle neazo kɛnlɛma manle abusua ne anu sonla ko biala ɛ?

¹¹ Gyisɛse a le awie mɔɔ zɔle Nyamenle anye na ɔmanle ɔ gɔnwo mɔ anye liele la anwo neazo kɛnlɛma a. Ɔnva nwo kɛ Gyisɛse angya ɛdeɛ, noko ɔyɛle neazo kpalɛ ɔmanle kunlima, yelɛma nee ngakula  kɔsɔɔti. Ɔhanle ɔ nwo edwɛkɛ kɛ: “Medame Sonla Ra bɔbɔ, meamba kɛ bɛzonle me; membale kɛ mebazonle.” (Mateyu 20:28) Nea kɛzi abusua mɔɔ nuhua menli lɛ subane ɛhye bie la anye die a!

12. Duzu a Gyihova kpondɛ kɛ menli mɔɔ sonle ye la yɛ a?

¹² Yɛnwu Baebolo ngyinlazo bieko mɔɔ kola boa wɔ sua nu ɛnleanlɛ nu la wɔ 2 Kɔlentema 7:1. Yɛkenga ye wɔ ɛkɛ ne kɛ: “Bɛmaa yɛwowo debie biala mɔɔ wɔ yɛ nwo mɔɔ gua yɛ sonlabaka ye anzɛɛ yɛ ɛkɛla ne mɔ anwo evinli la yɛgua.” Gyihova mɔɔ kulo “Nyamenlezonlenlɛ kpalɛ mɔɔ evinli biala ɛnle nwolɛ” la die menli mɔɔ tie sunsum nu edwɛkɛ ɛhye la to nu. (Gyemise 1:27) Na bɛ sua nu amra nyia zolɛ nvasoɛ.

13. Duzu ati a bɔkɔbɔkɔyɛlɛ hyia wɔ awuke zo ɛnleanlɛ nu ɛ?

¹³ Kɛ neazo la, Baebolo ne maa yɛnyia anwodozo kɛ mekɛ bie bara mɔɔ ewule nee anwodolɛ ɛnrɛdɛnla ɛkɛ  ne bieko a. Zɔhane mekɛ ne anu, “awie biala mɔɔ wɔ sua ne azo la ɛnrɛha kɛ, ‘Me nwo ɛdo me.’” (Ayezaya 33:24; Yekile 21:4, 5) Noko akee, kɔkpula kɛ zɔhane mekɛ ne bara la, ɔwɔ kɛ abusua biala di anwodolɛ nwo gyima ɔvi mekɛ mɔɔ kɔ mekɛ la. Pɔɔlo nee Temɔte bɔbɔ anwo dole bɛ. (Galeehyeama 4:13; 1 Temɔte 5:23) Dɔketama ka kɛ, yɛbahola yɛabɔ ewule dɔɔnwo anwo bane. Saa mbusua mɔɔ ze nrɛlɛbɛ la twe bɛ nwo fi nwonane nee sunsum nu nyɛleɛ evinli nwo a, bɛbabɔ bɛ nwo bane bɛavi anwodolɛ nwo. Maa yɛzuzu deɛmɔti ɔle zɔ la anwo.​—Fa to Mrɛlɛbulɛ 22:3 anwo.

14. Adenle boni azo a ɛbɛlabɔlɛ nu anwodelɛ bɔ abusua nwo bane fi anwodolɛ nwo a?

¹⁴ Sunsum nu anwodelɛ nee ɛbɛlabɔlɛ nu anwodelɛ a lua a. Kɛmɔ menli dɔɔnwo ze la, Baebolo ne si ɛbɛlabɔlɛ kpalɛ nwo adua na ɔtendɛ ɔtia nla nwo ɛbɛlatane biala mɔɔ awie mɔɔ ɛgya nee awie gyɛne kɛbɔ la. “Menli mɔɔ bɔ ɛbɛla mgbane mgbane, . . . bɛfa nwuvolɛ, mrenya mɔɔ fa bɛ gɔnwo mɔ mrenya nee mraalɛ mɔɔ fa mraalɛ . . . la, biala ɛnrɛnyia Nyamenle Belemgbunlililɛ ne.” (1 Kɔlentema 6:9, 10) Ngyinlazo kpalɛ ɛhye mɔɔ Keleseɛnema bali zolɛ la hyia kpalɛ wɔ ewiade ɛhye mɔɔ ɛkpɔlɔ la anu. Saa bɛyɛ zɔ a ɔsɔ Nyamenle anye na eza ɔbɔ abusua ne anwo bane ɔfi nla nu ewule mɔɔ le kɛ, AIDS, babaso, nee sakpu la anwo.​—Mrɛlɛbulɛ 7:10-23.

15. Maa neazo mɔɔ kile kɛ saa awie anli ɔ nwo eni a ɔbahola yeanyia ewule la.

¹⁵ ‘Debie biala mɔɔ gua sonlabaka ne anwo evinli mɔɔ yɛwowo’ la, bɔ abusua ne anwo bane fi ewule ngakyile nwo. Bɛ nwo eni mɔɔ bɛnli la a maa bɛnyia ewule dɔɔnwo a. Nwolɛ neazo titile a le sigalɛte ɛnlonlɛ. Tɛ ɛvovoa, adɛladeɛ, yɛɛ anwoma ne ala a sigalɛte ɛnlonlɛ sɛkye ye a, na eza ɔmaa menli nwo to bɛ.  Sigalɛte ɛnlonlɛ ku menli mgbe dɔɔnwo ɛvolɛ biala. Dwenle nwolɛ nea; saa menli mgbe dɔɔnwo twe bɛ nwo fi ‘debie biala mɔɔ gua bɛ sonlabaka ne anwo evinli la anwo a,’ anrɛɛ ɛvolɛ biala bɛ nwo ɛnrɛdo bɛ na bɛawu ndɛ!

16, 17. (a) Mɛla mɔɔ Gyihova vale manle Yizilayɛma la boni a bɔle bɛ nwo bane vile ewule ngakyile nwo a? (b) Kɛzi yɛbahola yɛava ngyinlazo mɔɔ wɔ Mɛla ne 23:12, 13 la yɛali gyima wɔ yɛ awuke nu ɛ?

¹⁶ Suzu neazo bieko anwo nea. Kɛyɛ ɛvolɛ 3,500 mɔɔ ɛze ɛhɔ la anu, Nyamenle vale ye Mɛla mɔɔ bahile Yizilayɛ maanle ne ɛzonlenlɛ nee bɛ alehyenlɛ biala ɛbɛlabɔlɛ adenle la manle bɛ. Mɛla zɔhane boale manle bɛbɔle maanle ne anwo bane ɔlua bɛnwonililɛ nwo adehilelɛ mɔɔ ɔvale ɔmanle la azo. Mɛla ɛhye anu ko fane bakazo mɔɔ ɔwɔ kɛ bɛfu bɛwula kpalɛ wɔ azokoɛleɛ ne anzi, amaa ɛleka mɔɔ menli ne de la ayɛ bɔkɔbɔkɔ la anwo. (Mɛla ne 23:12, 13) Tete mɛla  zɔhane tɛde folɛdulɛ kpalɛ. Ɛnɛ bɔbɔ menli nwo to bɛ na bɛwu ɔluakɛ bɛnva bɛnli gyima la ati. *

¹⁷ Kɛmɔ Yizilayɛma mɛla ɛhye anu ngyinlazo ne kile la, abusua ne abialeɛ nee bɛ tiefi—saa ɔwɔ sua nu anzɛɛ alie nwo a—ɔwɔ kɛ nwolɛ te na bɛfa ayile bɛgua nu. Saa bɛanli tiefi ne azo eni na bɛangeda zo a, nrɛzenra bara ɛkɛ na bɛamaa ngɛkɛba mɔɔ fa ewule ba la asalo sua nu ɛkɛ—na bie aha aleɛ mɔɔ yɛdi la! Bieko, saa mgbanyinli nee ngakula kɔ ɛkɛ na bɛwie a, ɔwɔ kɛ bɛwowo bɛ sa anwo. Saa bɛanyɛ ye zɔ a ngɛkɛba badɛnla bɛ nwo na bɛava bɛara sua nu. France dɔketa ko kile kɛ, “bɛ sa anwo ɛwowolɛ a tɛde adenle kpalɛ ko mɔɔ bɛdua zo bɛbɔ bɛ kunlu, bɛ ti anzɛɛ ewulenzane nwo bane a.”

18, 19. Nzuzulɛ boni a bɛva bɛmaa mɔɔ bamaa awie sua nu ayɛ bɔkɔbɔkɔ wɔ ɛleka mɔɔ bɛdi ehyia la ɛ?

¹⁸ Nɔhalɛ nu, bɔkɔbɔkɔyɛlɛ le ngyegyelɛ wɔ ɛleka mɔɔ ehyia wɔ la. Awie mɔɔ ɛdɛnla ɛleka zɛhae ɛlɛ la hilehilele nuhua kɛ: “Ewia kpole mɔɔ bɔ ɛleka ɛhye mɔ la maa ɛkɛ ne ɛziezielɛ yɛ se kpalɛ. Mulutu wolo sua nwo tokule biala anu na ɔsɛkye nwolɛ. . . . Menli mɔɔ anwo ɛlɛso wɔ azuamgbole zo nee ɛleka bie mɔ la noko fa kpɔkɛdelɛ nwo ngyegyelɛ ba. Gota mɔɔ bɛngeda zo, ewula mɔɔ bɛnvula, maanlema tiefi mɔɔ zolɛ le evinli, nane, ɛlɛtɛba nee ngɛkɛba ngakyile mɔɔ fa ewule ba la ɛbu zo.”

¹⁹ Bɔkɔbɔkɔyɛlɛ wɔ tɛnlabelɛ ɛhye anu yɛ se. Noko saa yɛbɔ nwolɛ mɔdenle a ɔfɛta. Saminla nee nzule  yɛɛ gyima ekyi mɔɔ yɛbayɛ la bolɛ ɛnyɛ se kɛ ayile nee asopiti kakɛ la. Saa ɛde ɛleka zɛhae bie a, bɔ mɔdenle di wɔ sua nu ɛkɛ ne eni na mmamaa nyɛmoa nene ɛkɛ. Saa ɔdwu fɔsɛlɛ nu na wɔ sua nu ɛkɛ ne yɛ ndɛtɛlɛ a, asoo ɛbahola wɔava awolɛ wɔagua ɛkɛ amaa ndɛtɛlɛ amba ɛkɛ? Saa awie wula mgbɔlaboa a, ɔbahola yeaye kolaa na yeawolo sua ne anu ɔ? Bieko, nea na evinli angɔ wɔ nzule ne anu. Mgbondabulɛ kile kɛ, yeanyɛ boɛ fee la ewule ngakyile mɔɔ nzule evinli nee bɛ nwo eni mɔɔ bɛnli fa ba la maa menli mgbe nwiɔ wu ɛvolɛ biala.

20. Saa awuke ne anu bayɛ bɔkɔbɔkɔ a, nwane mɔ a ɔgyi bɛ nwo zo a?

²⁰ Sua mɔɔ anu le bɔkɔbɔkɔ la gyi awie biala anwo zo​—ɛrɛladane, selɛ, ngakula nee nyɛvolɛ. Ɛrɛladane ko mɔɔ lɛ ngakula mɔtwɛ wɔ Kenya la hanle kɛ: “Awie biala ɛzukoa kɛ ɔbayɛ ye afoa nu ɛdeɛ.” Sua mɔɔ anu le bɔkɔbɔkɔ la ka abusua ne anu amra amuala anwo edwɛkɛ kpalɛ. Spain ɛrɛlɛ bie ka kɛ: “Edwɛkɛ biala ɛnle ehyia nee bɔkɔbɔkɔyɛlɛ avinli.” Saa yɛde sua kpole, ekyi, ndɛtɛlɛ sua anzɛɛ manrazua nu bɔbɔ a, bɔkɔbɔkɔyɛlɛ le debie mɔɔ bamaa abusua ne ade kpɔkɛ kpalɛ a.

21. Kɛmɔ Mrɛlɛbulɛ 31:28 kile la, duzu a baboa na anyelielɛ ara awuke bie anu a?

²¹ Mekɛ mɔɔ Mrɛlɛbulɛ buluku ne ka yelɛ kpalɛ ne anwo edwɛkɛ la, ɔhanle kɛ: “Ɔ mra dwazo na bɛyileyila ye. Ɔ hu noko zɔhane ala, na ɔye ye ayɛlɛ.” (Mrɛlɛbulɛ 31:28) Kenlenzu a ɛhanvole wɔ abusua ne anu sonla bie a? Amgba, yɛle kɛ felawɔse mɔɔ hyia nzule nee wuluwulu na yeakpazi la. Wɔ yɛ afoa nu, yɛhyia nganvolɛ kpalɛ. Ɔmaa yelɛ nwu ye kɛ ɔ hu anye sɔ gyima ɛsesebɛ mɔɔ ɔyɛ ɔfa ɔnea abusua ne la na ɔmbu  ɔ nye ɔngua ɔ nwo zo. (Mrɛlɛbulɛ 15:23; 25:11) Ɔle kɛnlɛma kɛ yelɛ kɛhanvo ɔ hu wɔ gyima mɔɔ ɔyɛ wɔ sua nu nee alie nwo la anwo. Ngakula noko nyia ngɔzo wɔ mekɛ mɔɔ bɛ awolɛ kɛye bɛ ayɛlɛ wɔ mɔdenle mɔɔ bɛbɔ ye wɔ sua nu, sukulu anzɛɛ Keleseɛne asafo ne anu anwo la. Nea mɔɔ nganvolɛ ekyi kola yɛ la! “Meda wɔ ase” ɛhanlɛ le nyɛ? Ɔnle bie, noko mɔɔ vi nu ba la a le kɛ ɔmaa abusua ne kola yɛ ninyɛne dɔɔnwo.

22. Duzu a hyia na ‘bɛakyekye awuke a,’ na kɛ ɔkɛyɛ na bɛahola bɛayɛ ɛhye ɛ?

²² Ninyɛne bie mɔ ati, awuke zo ɛnleanlɛ ɛnla aze. Noko, yɛbahola yɛayɛ yɛamaa yeayɛ boɛ. Baebolo nu ɛrɛlɛ bie ka kɛ: “Bɛfa nrɛlɛbɛ a bɛsi sua a, bɛfa ndelebɛbo a bɛkyekye awuke a.” (Mrɛlɛbulɛ 24:3) Saa abusua ne anu amra kɔsɔɔti bɔ mɔdenle nwu Nyamenle ɛhulolɛdeɛ na bɛfa bɛbɔ bɛ ɛbɛla a, bɛbanwu nrɛlɛbɛ na bɛanyia ndelebɛbo. Ɔhyia mɔdenlebɔlɛ kpalɛ na abusua anye alie!