1. Ninyɛne mɔɔ fa mgbakyemgbakye ba abusua nu la bie mɔ a le boni?

MENLI mɔɔ wɔ mbusua mɔɔ ɛlɔlɛ, ndelebɛbo nee anzondwolɛ wɔ nu la anye die. Yɛ nye la kɛ ɛwɔ abusua zɛhae bie anu. Ɔyɛ alɔbɔlɛ kɛ, mbusua dɔɔnwo ne ala ɛnle zɔ na ninyɛne dɔɔnwo ɛmaa bɛ nu ɛkpakyekpakye. Duzu a fa mgbakyemgbakye ba mbusua nu a? Wɔ tile ɛhye anu, yɛbazuzu ninyɛne nsa anwo. Wɔ mbusua bie mɔ anu, menli ne kɔsɔɔti ɛnle ɛzonlenlɛ ko anu. Wɔ bie mɔ anu, ngakula ne mɔ awovolɛ ɛnle ko. Wɔ bie mɔ noko anu, mɔdenle mɔɔ bɛlɛbɔ kɛ bɛbanyia mɔɔ bɛhyia anzɛɛ ninyɛne dɔɔnwo la ɛva mgbakyemgbakye ɛra abusua ne anu. Noko akee, bie a debie mɔɔ maa abusua ko anu kpakyekpakye la ɛnrɛha abusua gyɛne. Duzu a maa ɔyɛ ngakyile a?

2. Nienwu a bie mɔ kpondɛ abusua asetɛnla nwo adehilelɛ fi a, noko ɛleka boni a adehilelɛ kpalɛ zɛhae wɔ a?

² Debie ko a le adwenle mɔɔ awie lɛ la. Saa ɛbɔ mɔdenle kɛ ɛbade ɛ gɔnwo edwɛkɛ bo a, ɔda ali kɛ ɛbahola wɔanwu kɛzi bɛnyia anzondwolɛ wɔ sua nu la. Debie mɔɔ tɔ zo nwiɔ la a le ɛleka mɔɔ ɛnyia adehilelɛ ɛfi la. Menli dɔɔnwo di bɛ gɔnwo mɔ gyimayɛvoma, kpalɛzoamra, menli mɔɔ tendɛ wɔ FM zo anzɛɛ alesama gyɛne folɛdulɛ zo. Noko akee bie mɔ kpondɛ mɔɔ Nyamenle Edwɛkɛ ne ka ye wɔ gyinlabelɛ bie anwo la na bɛfa mɔɔ bɛkɛnwu ye la bɛdi gyima. Kɛzi abusua  bie yɛ zɔ a ɔbamaa bɛanyia anzondwolɛ wɔ sua nu ɛ?​—2 Temɔte 3:16, 17.

3. (a) Folɛdulɛ boni a Baebolo ne fa maa wɔ awie mɔɔ yɛ nee ye ɛnlɛ diedi ko la ɛgyalɛ nwo a? (b) Ngyinlazo titile bie mɔ mɔɔ bokavolɛ ko le diedinli na ko ne ɛnle bie a bɛfa bɛdi gyima la bie mɔ a le boni?

³ Baebolo ne tu yɛ folɛ ɛsesebɛ kɛ yɛmmagya awie mɔɔ ɔ nee yɛ ɛnlɛ diedi ko la. (Mɛla ne 7:3, 4; 1 Kɔlentema 7:39) Noko akee, ɔbahola yeara ye kɛ ɛhɔle agyalɛ na wɔanwu Baebolo ne anu nɔhalɛ ne noko ɛ hu anyɛ zɔ. Duzu a ɛbayɛ a? Nɔhalɛ nu, agyalɛ ne tɛbɔ ɛkɛ. (1 Kɔlentema 7:10) Baebolo ne si zo kɛ ɔwɔ kɛ agyalɛ ne tɛnla ɛkɛ ne kyɛ na ɔka ɔkile agyalɛma kɛ bɛbɔ mɔdenle kɛ bɛbali bɛ ngyegyelɛ nwo gyima tɛla kɛ bɛbanriandi bɛavi nwolɛ. (Ɛfɛsɛsema 5:28-31; Taetɛse 2:4, 5) Na saa ɛ hu ɛmkponle zo fee kɛ ɛbazonle kɛmɔ Baebolo ne kile la ɛ? Bie a, ɔbabɔ mɔdenle kɛ ɔnrɛmaa ɛnrɛhɔ asafo debiezukoalɛ anzɛɛ ɔbaha kɛ ɔngulo kɛ ɔ ye kɛhɔ azua nu na ɔkɛha ɛzonlenlɛ nwo edwɛkɛ. Kɛ ɛbayɛ ye ɛ?

4. Adenle boni azo a yelɛ mɔɔ nee ɔ hu ɛnle ɛzonlenlɛ ko anu la bahola ade ye edwɛkɛ bo ɛ?

⁴ Biza ɛ nwo kɛ, ‘Duzu ati a me hu te nganeɛ zɔhane a?’ (Mrɛlɛbulɛ 16:20, 23) Saa ɔnde mɔɔ ɛlɛyɛ la abo kpalɛ a, bie a ɔbagyegye ye. Bie a ɛ nwo amra ɛlɛgyegye ye ɔluakɛ ninyɛne mɔɔ ɛyɛ ye dɛba ne ɛfa ɛboa bɛ la ɛnyɛ ye bieko. Kunli ko hanle kɛ: “Ɔka me ngome wɔ sua nu a, mete nganeɛ kɛ bɛkpo me.” Nrenya ɛhye dele nganeɛ kɛ asɔne bie ɛlɛdie ɔ ye. Noko anwomemaazo ti, yeanlie yeando nu kɛ ɔ nwo ɛyɛ ye koonwu. Ɔwɔ kɛ ɛmaa ɛ hu nyia anwodozo kɛ Gyihova anwo ɛlɔlɛ mɔɔ ɛlɛ la ɛngile kɛ ɛnɛ ɛngulo ye kɛ dɛba ne la. Nea kɛ ɛbanyia mekɛ wɔamaa ye.

5. Debie mɔɔ fɛta la boni a ɔwɔ kɛ yelɛ mɔɔ ɔ nee ɔ hu ɛnle ɛzonlenlɛ ko anu la yɛ a?

 ⁵ Noko akee, saa ɛbahola wɔali tɛnlabelɛ ne anwo gyima nrɛlɛbɛ nu a ɔwɔ kɛ bɛsuzu debie mɔɔ hyia kpalɛ la anwo. Nyamenle Edwɛkɛ ne tu yelɛma folɛ kɛ: “Bɛha bɛ nwo aze bɛmaa bɛ hu mɔ, na mɔɔ Kelaese ɛdoavolɛ biala ɔwɔ kɛ yɛ la ɛne.” (Kɔlɔsaema 3:18) Ɛhye ati, ɔtendɛ ɔtia fanwodi subane. Bieko, kɛmɔ ɔse “mɔɔ Kelaese ɛdoavolɛ biala ɔwɔ kɛ yɛ la ɛne” la ati, ngɛlɛlera ɛhye kile kɛ ɔwɔ kɛ ɔsuzu ɔ nwo aze mɔɔ ɔka yeamaa ɔ hu nee ɔ nwo aze mɔɔ ɔka yeamaa Kelaese la anwo. Ɔwɔ kɛ ɔyɛ ɔ mu nwiɔ ɔmaa ɔfɛta.

6. Ngyinlazo boni a ɔwɔ kɛ Keleseɛne yelɛ maa ɔtɛnla ye adwenle nu a?

⁶ Awie mɔɔ le Keleseɛnenli la ɛnrɛhola ɛnrɛbu ɔ nye ɛnrɛgua asafo debiezukoalɛ nee ye diedi ne mɔɔ gyi Baebolo ne azo mɔɔ ɔka nwolɛ edwɛkɛ yeahile awie mɔ la azo, ɔluakɛ bɛboka nɔhalɛ ɛzonlenlɛ nwo. (Wulomuma 10:9, 10, 14; Hibuluma 10:24, 25) Ɛnee saa  dasanli ka kɛ ɔnrɛmaa ɛnrɛyɛ debie mɔɔ Nyamenle kpondɛ kɛ ɛyɛ la a, kɛ ɛbayɛ ye ɛ? Gyisɛse Kelaese ɛzoanvolɛ ne mɔ hanle kɛ: “Ɔwɔ kɛ yɛtie Nyamenle yɛtɛla sonla.” (Gyima ne 5:29) Bɛ neazo ne maa yɛnwu mɔɔ ɔwɔ kɛ yɛyɛ ye wɔ gyinlabelɛ dɔɔnwo anu la. Asoo Gyihova anwo ɛlɔlɛ baha wɔ yeamaa wɔava ɛzonlenlɛ mɔɔ le ye ɛdeɛ la wɔamaa ye? Mekɛ ko ne ala, asoo ɛlɔlɛ nee ɛbulɛ mɔɔ ɛlɛ ɛmaa ɛ hu la bamaa wɔabɔ mɔdenle kɛ ɛyɛ mɔɔ sɔ ɔ nye la?​—Mateyu 4:10; 1 Dwɔn 5:3.

7. Kpɔkɛ boni a ɔwɔ kɛ Keleseɛne yelɛ bɔ a?

⁷ Gyisɛse hilele kɛ ɛhye ɛnrɛhola ɛnrɛyɛ boɛ dahuu. Ɔbɔle kɔkɔ kɛ kɛmɔ bɛbadwazo bɛatia nɔhalɛ ɛzonlenlɛ la ati, mbusua bie anu amra mɔɔ bɛkɔ asɔne la bade nganeɛ kɛ bɛye bɛ bɛvi nu, kɛ asɛɛ bɛva dadeɛ bɛpɛ bɛ nee abusua ne mɔɔ ɛha la avinli la. (Mateyu 10:34-36) Ɛhye bie dole raalɛ bie mɔɔ wɔ Japan la. Ɔ hu dwazole tiale ye wɔ ɛvolɛ 11 anu. Ɛnee ɔyɛ ye amumuyɛ na ɔta ɔto ye anlenkɛ nu. Noko ɔhɔle zo ɔgyinlanle ɔ nloa. Mediema mɔɔ wɔ asafo ne anu la boale ye. Ɔyɛle asɔne fane dɔɔnwo na edwɛkɛ mɔɔ wɔ 1 Pita 2:20 la manle ye anwosesebɛ dɔɔnwo. Adiema raalɛ ɛhye nwunle kɛ saa ɔgyinla kpundii a kenlebie ɔ hu baraboka ɔ nwo na bɛazonle Gyihova. Na zɔhane a ɔyɛle a.

8, 9. Kɛzi ɔwɔ kɛ yelɛ bɔ ye ɛbɛla na yeangyegye ɔ hu wɔ adenle mɔɔ ɔnfɛta la azo ɛ?

⁸ Ninyɛne kpalɛ dɔɔnwo wɔ ɛkɛ mɔɔ ɛbahola wɔayɛ wɔamaa wɔ bokavolɛ ahakyi a. Kɛ neazo la, saa ɛ hu ɛnlie wɔ ɛzonlenlɛ ne ɛndo nu a, mmayɛ ninyɛne gyɛne mɔɔ bamaa yeadendɛ nwolɛ la. Di sua nu ɛkɛ ne eni. Siezie ɛ nwo kɛnlɛma. Ka ɛlɔlɛ nwo edwɛkɛ dɔɔnwo na kile ɔ nwo anyezɔlɛ. Kɛ anrɛɛ ɛbadendɛ wɔatia ye la, boa ye emomu. Kile kɛ ɛbu ye kɛ ɔle ɛ ti. Saa ɛte nganeɛ kɛ yeyɛ wɔ ɛtane a, mmayɛ bie ɛsie ɔ gyakɛ  anu. (1 Pita 2:21, 23) Bu ɛ nye gua sonla sinlidɔlɛ zo na saa edwɛkɛ bie ba a, bɛlɛ ɛ nwo aze na dumua kpa kyɛlɛ.​—Ɛfɛsɛsema 4:26.

⁹ Mmamaa debiezukoalɛ mɔɔ ɛkɔ la ati, ye aleɛ ka amozi. Bie a ɛbahola wɔahɔ daselɛlilɛ wɔ mekɛ mɔɔ ɛ hu ɛnle sua nu la. Nrɛlɛbɛ wɔ nu kɛ Keleseɛne yelɛ ɛnrɛli ɔ hu daselɛ wɔ mekɛ mɔɔ ɔyɛ ye zɔ a ɔ nye ɛnrɛlie nwolɛ la. Emomu, ɔtie ɛzoanvolɛ Pita folɛdulɛ ɛhye: “Bɛmɛ nwuvolɛ mraalɛ, bɛbɛlɛ bɛ nwo aze bɛmaa bɛ hu mɔ, amaa nuhua mɔɔ ɔ hu ɛnlie Nyamenle Edwɛkɛ ne ɛnli la, bɛalua bɛ nyɛleɛ zo bɛahwe ye bɛarɛlɛ Nyamenle, mɔɔ ɔnrɛhyia kɛ bɛkɛha edwɛkɛ kpɔkɛ ko bɔbɔ a, ɔboalekɛ bɛbanwu bɛ nwo enililɛ nee bɛ [anwodelɛ] wɔ bɛ nyɛleɛ nu.” (1 Pita 3:1, 2) Keleseɛne yelɛma bɔ mɔdenle kpalɛ da Nyamenle sunsum ma ne ali.​—Galeehyeama 5:22, 23.

10. Kɛzi ɔwɔ kɛ adiema mɔɔ le kunli la yɛ ye nyɛleɛ wɔ ɔ ye mɔɔ ɔnle adiema la anwo ɛ?

¹⁰ Na saa kunli ne le adiema na yelɛ ne ɛnle bie ɛ? Baebolo ne fa gyinlabelɛ zɛhae anwo adehilelɛ maa. Ɔka kɛ: “Saa Kelaese ɛdoavolɛ nrenya bie aye ɛnle diedinli na yelɛ ne kponle zolɛ kɛ ɔ nee ye kɛdɛnla a, ɔmmabɔ ye ewole.” (1 Kɔlentema 7:12) Eza ɔtu kunlima folɛ kɛ: “Bɛhulo bɛ ye mɔ.”​—Kɔlɔsaema 3:19.

11. Kɛ ɔkɛyɛ na kunli ava ndelebɛbo ali gyima na yeayɛ ye tileyɛlɛ ne nrɛlɛbɛ nu wɔ mekɛ mɔɔ ɔ ye ɛnle adiema la ɛ?

¹¹ Saa ɛle kunli na ɛ ye nee wɔ ɛnle ɛzonlenlɛ ko anu a, bɔ mɔdenle kpalɛ nyia ɛbulɛ maa ɛ ye na suzu ye nganeɛdelɛ nwo. Kɛmɔ ɔle kpanyinli la ati, saa bɔbɔ ɛnlie ɛndo nu a ɔfɛta kɛ ɛmaa ɔnyia adenle ɔkɔ asɔne mɔɔ ɔkulo la. Mekɛ mɔɔ lumua mɔɔ ɛbaha wɔ diedi ne anwo edwɛkɛ wɔahile ye la, mmamaa ɛ nye da kɛ ɔbagyakyi ye ɛzonlenlɛ nu ninyɛne mɔɔ ɔze ye  dɛba la na yeazukoa debie fofolɛ. Kɛ anrɛɛ ɛbaha ye ɛkɛ ne ala kɛ ninyɛne mɔɔ bɛ abusua ne ɛyɛ ye mekɛ tendenle le adalɛ la, si abotane na ɛ nee ye ɛzuzu Ngɛlɛlera ne anwo. Bie a saa ɛfa mekɛ dɔɔnwo ɛyɛ asafo gyima a, ɔbade nganeɛ kɛ wɔbu ɛ nye wɔgua ɔ nwo zo. Ɔbadwazo yeatia mɔdenle mɔɔ ɛlɛbɔ kɛ ɛsonle Gyihova la, noko mɔɔ ɔkpondɛ yeaha ala a le kɛ: “Ɔwɔ kɛ ɛnyia mekɛ dɔɔnwo ɛmaa me!” Si abotane. Saa ɛfi ɛlɔlɛ nu ɛ nee ye suzu edwɛkɛ nwo a, mekɛ ɛlɛkɔ zo la ɔbaboa ye yeamaa yealie nɔhalɛ ɛzonlenlɛ ne yeado nu.​—Kɔlɔsaema 3:12-14; 1 Pita 3:8, 9.

12. Saa kunli nee yelɛ ɛnle ɛzonlenlɛ ko anu bɔbɔ a, kɛzi ɔwɔ kɛ bɛfa Ngɛlɛlera ne anu ngyinlazo bɛdi gyima bɛtete bɛ mra ɛ?

¹² Wɔ abusua mɔɔ bɛnle ɛzonlenlɛ ko anu la anu, ɔyɛ a ɛzonlenlɛ nu adehilelɛ mɔɔ bɛfa bɛmaa ngakula la kola yɛ ngyegyelɛ. Kɛzi ɔwɔ kɛ bɛfa Ngɛlɛlera ne anu ngyinlazo bɛdi gyima ɛ? Baebolo ne fa ngakula ne mɔ ɛtetelɛ nwo ɛzonlelilɛ to nrenya ne anwo zo titile, noko raalɛ ne lɛ gyima mɔɔ anwo hyia la yɛ wɔ nu. (Mrɛlɛbulɛ 1:8; fa to Mɔlebɛbo 18:19; Mɛla ne 11:18, 19 anwo.) Saa selɛ ne ɛnlie Kelaese tileyɛlɛ ne ɛndo nu bɔbɔ a, yemɔ a ɔle abusua ne ati a.

13, 14. Saa kunli ammaa ɔ ye anva ngakula ne mɔ angɔ debiezukoalɛ anzɛɛ ɔ nee bɛ anzukoa debie a, duzu a ɔbahola yeayɛ a?

¹³ Saa selɛma bie mɔ mɔɔ bɛngɔ asɔne la aye mɔ tete ngakula ne mɔ wɔ ɛzonlenlɛ nu a ɔngyegye bɛ. Bie mɔ deɛ ɔgyegye bɛ. Na saa ɛ hu ka kɛ ɔnle kɛ ɛfa ngakula ne mɔ ɛkɔ debiezukoalɛ anzɛɛ ɔnle kɛ ɛ nee bɛ sukoa Baebolo ne bɔbɔ wɔ sua nu ɛ? Ɛnee akee ɔwɔ kɛ ɛsuzu ɛzonlelilɛ mɔɔ ɛlɛ wɔ Gyihova Nyamenle anyunlu, mɔɔ ɛlɛ ye wɔ ɛ hu mɔɔ le ɛ ti nee ɛ mra mɔɔ ɛkulo bɛ edwɛkɛ la anwo kpalɛ. Kɛ ɔkɛyɛ na wɔayɛ ɛhye ɛ?

 ¹⁴ Ɔda ali wienyi kɛ ɛbayɛ asɔne wɔ edwɛkɛ ne anwo. (Felepaema 4:6, 7; 1 Dwɔn 5:14) Noko, awieleɛ ne ɛdawɔ yɛɛ ɔwɔ kɛ ɛsi mɔɔ ɛbayɛ la anwo kpɔkɛ a. Saa ɛbɔ mɔdenle ɛkilehile nuhua ɛkile ɛ hu kɛ ɛndwazo ɛntia ye tileyɛlɛ ne a, bie a ɔbadwu mekɛ bie la ye dwazotia ne baha aze. Saa ɛ hu ammaa ɛ nee ɛ mra ne mɔ angɔ debiezukoalɛ anzɛɛ ɛ nee bɛ anzukoa Baebolo ne bɔbɔ a, ɛbahola wɔahile bɛ debie. Dua adwelie mɔɔ ɛ nee bɛ di ye dahuu yɛɛ wɔ nyɛleɛ kpalɛ zo fa Gyihova anwo ɛlɔlɛ, ye Edwɛkɛ ne anu diedi, awovolɛ mɔ bɛbu bɛ mɔɔ bɛ ze boka ye, menli gyɛne nwo ɛlɔlɛ, nee gyima mɔɔ bɛfi nrɛlɛbɛ nu bɛyɛ la anwo anyezɔlɛ wula bɛ ahonle nu. Awieleɛ ne, bie a selɛ ne banwu debie kpalɛ mɔɔ bavi nu ara la na yeahile wɔ mɔdenlebɔlɛ ne anwo anyezɔlɛ.​—Mrɛlɛbulɛ 23:24.

15. Ɛzonlelilɛ boni a selɛ mɔɔ le adiema la lɛ wɔ ngakula ɛtetelɛ nu a?

¹⁵ Saa ɛle kunli mɔɔ le adiema na ɛ ye ɛnle bie a, ɛnee ɔwɔ kɛ ɛdi wɔ ɛzonlelilɛ nwo gyima na ‘ɛtete ɛ mra kɛmɔ Gyihova kpondɛ la.’ (Ɛfɛsɛsema 6:4) Nɔhalɛ nu, mekɛ mɔɔ ɛlɛyɛ zɔ la, ɔwɔ kɛ ɛyɛ atiakunlukɛnlɛma na ɛfi ɛlɔlɛ nee ndelebɛbo nu ɛ nee ɛ ye tɛnla.

16, 17. Saa ngakula ɛnle bɛ awovolɛ ɛzonlenlɛ nu a, Baebolo nu ngyinlazo boni mɔ a ɔwɔ kɛ bɛkakye a?

¹⁶ Ɔnyɛ nwanwane kɛ ngakula kɛhɔ ɛzonlenlɛ gyɛne mɔɔ ɔ nee bɛ awovolɛ ɛdeɛ le ngakyile la anu. Wɔyɛ ye nzonlɛ ɔ? Saa ye zɔhane a, Baebolo ne lɛ folɛdulɛ maa wɔ.

¹⁷ Nyamenle Edwɛkɛ ne ka kɛ: “Bɛdie bɛ awovolɛma wɔ Awulae ati, ɔluakɛ ɛhye a le debie kpalɛ mɔɔ ɔwɔ kɛ bɛyɛ a. ‘Di ɛ ze nee ɛ nli eni’ a le Nyamenle mɛla mɔɔ lumua mɔɔ ɛwɔkɛ wɔ nwolɛ a.” (Ɛfɛsɛsema 6:1, 2) Ɛbulɛ kpalɛ mɔɔ bɛnyia bɛmaa awovolɛ la boka ɛhye  anwo. Noko akee, mekɛ mɔɔ ɔhyia kɛ bɛtie awovolɛ ane la, ɔnle kɛ bɛyɛ zɔ mɔɔ bɛndwenle nɔhalɛ Nyamenle ne anwo a. Saa kakula yɛ kpanyinli na ɔbɔ ɔ bo kɛ ɔsi kpɔkɛ a, ɔbali ye nyɛleɛ ne anwo ɛzonle dɔɔnwo. Tɛ ewiade mɛla angome a ɔwɔ kɛ ɔyɛ zɔ wɔ nwo a, ɔwɔ kɛ ɔyɛ zɔ titile wɔ Nyamenle mɛla nwo. Baebolo ne ka kɛ: “Yɛ nuhua ko biala babu ye mgbonda ahile Nyamenle.”​—Wulomuma 14:12.

18, 19. Saa ngakula nee bɛ awovolɛ ɛnle ɛzonlenlɛ ko anu a, kɛzi bɛbahola bɛaboa bɛ awovolɛ bɛamaa bɛade bɛ diedi ne abo ɛ?

¹⁸ Saa wɔ diedi ne maa ɛyɛ nzenzaleɛ wɔ wɔ ɛbɛlabɔlɛ nu a, bɔ mɔdenle kɛ ɛbade wɔ awovolɛ edwɛkɛ bo. Ɔda ali kɛ saa ɔlua Baebolo ne mɔɔ ɛlɛsukoa na wɔava nuhua edwɛkɛ ne wɔabɔ wɔ ɛbɛla la ati ɛbu debie, ɛyɛ tieyɛ na ɛyɛ gyima mɔɔ bɛkɛva bɛkɛmaa wɔ la kpalɛ a, ɔbamaa bɛ nye alie. Noko akee, saa wɔ diedi fofolɛ ne maa ɛkpo ninyɛne mɔɔ bɛ nye die nwo la a, bɛbade nganeɛ kɛ ɛlɛkpo agyapadeɛ mɔɔ bɛkulo kɛ bɛfa bɛmaa wɔ la. Bie a ɛzulolɛ baha bɛ kɛ mɔɔ ɛlɛyɛ la ɛnle kpalɛ wɔ ɛleka mɔɔ ɛde la anzɛɛ ɔbamaa wɔaye wɔ adwenle wɔavi ninyɛne mɔɔ bɛte nganeɛ kɛ ɔbaboa wɔ yeamaa wɔayɛ boɛ la azo. Anwomemaazo noko bahola amaa bɛayɛ zɔ. Bie a bɛbade nganeɛ kɛ ɛlɛkile kɛ mɔɔ bɛlɛka la ɛnle kpalɛ na wɔ ɛdeɛ ne a le kpalɛ a.

¹⁹ Saa ɔkɛyɛ boɛ a, bɔ mɔdenle yɛ ngyehyɛleɛ ndɛndɛ maa wɔ awovolɛ nee asafo ne anu mgbanyima nee Alasevolɛ mɔɔ bɛbɔ mɔdenle la ɛyia. Ka kile wɔ awovolɛ maa bɛhɔ Belemgbunlililɛ Asalo na bɛdie debie mɔɔ bɛsukoa la na bɛnwu menli holɛ mɔɔ Gyihova Alasevolɛ de la kpalɛ. Ɔnrɛhyɛ, wɔ awovolɛ subane bahakyi. Mekɛ bɔbɔ mɔɔ awovolɛ ne mɔ dwazotia ne le kpole, bɛsɛkye Baebolo mbuluku, na bɛmmaa ngakula ne mɔ ɛngɔ debiezukoalɛ la, bɛkola  bɛnyia adenle bɛsukoa debie wɔ ɛleka gyɛne, bɛ nee bɛ gɔnwo mɔ Keleseɛnema tendɛ na bɛdua adenle gyɛne zo bɛboa awie mɔ na bɛdi bɛ daselɛ. Ɛbahola noko wɔava asɔneyɛlɛ wɔado Gyihova anyunlu. Ɔwɔ kɛ ngakula bie mɔ noko kendɛ toonwo bɛyɛ mgbanyinli mɔɔ bɛkɛvi sua nu la kolaa na bɛahola bɛayɛ dɔɔnwo. Noko akee, kɛzi gyinlabelɛ ne de ye biala wɔ sua nu ɛkɛ ne la, mmamaa ɛ rɛle fi kɛ ɔwɔ kɛ ɛdi “ɛ ze nee ɛ nli eni.” Bɔ mɔdenle yɛ wɔ afoa nu ɛdeɛ maa anzondwolɛ ɛdɛnla sua nu ɛkɛ. (Wulomuma 12:17, 18) Mɔɔ hyia kpalɛ la, maa anzondwolɛ ɛdɛnla wɔ nee Nyamenle avinli.

20. Nganeɛdelɛ boni a ngakula bahola anyia wɔ selɛ anzɛɛ ninli mɔɔ tɛ ɔdaye a ɔwole bɛ la anwo a?

²⁰ Wɔ azua dɔɔnwo anu, tɛ ɛzonlenlɛ a fa ngyegyelɛ kpole ba a, na dɔmaba mɔɔ wɔ abusua ne anu la. Mbusua dɔɔnwo wɔ ɛkɛ mɔɔ ngakula mɔɔ awovolɛ ko anzɛɛ nwiɔ ne wole bɛ kolaa na bɛagya la a wɔ nu a. Wɔ abusua zɛhae anu, anyebolo nee ɛyavalɛ bahola aha ngakula ne mɔ anzɛɛ bie a bɛnrɛnwu awie mɔɔ ɔwɔ kɛ bɛtie ye la. Ɛhye ati, ɔbamaa bɛadwazo bɛatia mɔdenle mɔɔ awovolɛ mɔɔ tɛ ɔdaye a ɔwole bɛ kɛbɔ kɛ ɔyɛ selɛ anzɛɛ ninli kpalɛ la. Duzu a baboa na abusua mɔɔ dɔmaba wɔ nu la agyinla a?

21. Ɔwɔ nuhua kɛ bɛ gyinlabelɛ ne le ngakyile ɛdeɛ, noko duzu ati a ɔwɔ kɛ awovolɛ mɔɔ bɛnea dɔmaba la maa Baebolo ne anu ngyinlazo boa bɛ ɛ?

²¹ Bɛnwu ye kɛ ɔnva nwo kɛ bɛ gyinlabelɛ ne le ngakyile la, bɛkola bɛfa Baebolo nu ngyinlazo mɔɔ ɛboa mbusua gyɛne la bɛdi gyima wɔ ɛke. Saa bɛbu bɛ nye bɛgua ngyinlazo ɛhye mɔ azo a, bie a ɔbaboa wɔ mekɛ ekyi bie anu, noko nzinlii ɔbava ngyegyelɛ yeara. (Edwɛndolɛ 127:1; Mrɛlɛbulɛ 29:15) Bɛva nrɛlɛbɛ  nee ndelebɛbo bɛli gyima​—nrɛlɛbɛ mɔɔ bamaa bɛava ngyinlazo kpalɛ mɔɔ nvasoɛ wɔ zo nee ndelebɛbo mɔɔ bamaa bɛanwu deɛmɔti abusua ne ka na ɔyɛ ninyɛne bie la. Ɔhyia noko kɛ bɛte awie biala edwɛkɛ bo.—Mrɛlɛbulɛ 16:21; 24:3; 1 Pita 3:8.

22. Duzu ati a ɔbahola yeayɛ se kɛ ngakula balie awovolɛ mɔɔ tɛ ɔdaye a ɔwole bɛ la ado nu a?

²² Saa tɛ ɛ mra a le ngakula ne mɔ a, bie a ɛbahakye kɛ mekɛ mɔɔ ɛnee ɛle agɔnwolɛ wɔ abusua ne anu la ɛnee ngakula ne mɔ anye die ɛ nwo. Noko akee mekɛ mɔɔ ɛrale sua nu ɛkɛ ne la bɛhakyile bɛ subane. Saa bɛkakye ahenle mɔɔ wole bɛ mɔɔ ɔnle sua nu ɛkɛ ne bieko la a, ngakula ne mɔ ɛnrɛnwu awie mɔɔ ɔwɔ kɛ bɛtie ye la, bie a bɛbade nganeɛ kɛ ɛkulo kɛ ɛsɛkye ɛlɔlɛ mɔɔ bɛlɛ bɛmaa awovolɛ ne mɔɔ ɛhɔ la. Ɔdwu mekɛ ne bie a, bɛbahola bɛaha bɛahile wɔ wienyi kɛ tɛ bɛ ze anzɛɛ bɛ nli a le wɔ. Edwɛkɛ zɛhae mɔ yɛ nyane. Noko “mmafa ɛya ndɛndɛ.” (Nolobɔvo ne 7:9) Ɔhyia ndelebɛbo na wɔade kɛzi ngakula ne mɔ te nganeɛ la abo.

23. Kɛ ɔkɛyɛ na bɛali ndeanlɛ nwo gyima wɔ abusua mɔɔ dɔmaba wɔ nu la anu ɛ?

²³ Zɔhane subane ne anwo hyia wɔ mekɛ mɔɔ ɔwɔ kɛ bɛtea awie la. Ndeanlɛ mɔɔ bɛmaa ɔkɔ zo la hyia. (Mrɛlɛbulɛ 6:20; 13:1) Na kɛmɔ asolo kakula biala la ati, ndeanlɛ noko bahola ayɛ ngakyile. Awovolɛ mɔɔ ɛlɛnea dɔmaba ngakula la bie mɔ nwu ye kɛ mɔlebɛbo ne, ɔle kpalɛ kɛ awovolɛ ne mɔɔ ɔ ra a le kakula ne la a badea ye a. Noko, ɔwɔ kɛ awovolɛ nwiɔ ne adwenle yɛ ko wɔ ndeanlɛ ne anwo na bɛfa bɛdi gyima, ɔnle kɛ bɛdi mɔguazo. (Mrɛlɛbulɛ 24:23) Tieyɛ nwo hyia, noko ɔwɔ kɛ bɛkakye kɛ sinlidɔlɛ wɔ ɛkɛ. Mmayɛ ninyɛne ɛmaa ɔbo zo. Fi ɛlɔlɛ nu tea bɛ.​—Kɔlɔsaema 3:21.

24. Duzu a baboa na ɛbɛlatane angɔ zo wɔ mrenya nee mraalɛ avinli wɔ abusua mɔɔ dɔmaba wɔ nu la anu ɛ?

 ²⁴ Edwɛkɛ mɔɔ bɛsuzu nwo kɛ abusua la maa ngyegyelɛ ka aze. Ɛhye kola boa abusua ne maa bɛfa bɛ adwenle bɛsie ninyɛne mɔɔ hyia wɔ ɛbɛlabɔlɛ nu la azo. (Fa to Felepaema 1:9-11 anwo.) Bɛkola noko bɛboa bɛ nuhua ko biala bɛmaa ɔnwu mɔɔ ɔbahola yeayɛ na abusua ne asa aha mɔɔ gyi ɔ nye zo la. Bieko, edwɛkɛ mɔɔ bɛsuzu nwolɛ wienyi la bahola ade ɛbɛla kpalɛ nwo ngyegyelɛ zo. Ɔwɔ kɛ ngakula mraalɛ nwu kɛzi ɔwɔ kɛ bɛsiezie bɛ nwo kpalɛ wɔ selɛ mɔɔ tɛ ɔdaye a ɔwole bɛ nee mediema mrenya biala mɔɔ asolo bɛ awovolɛ la anyunlu, yɛɛ ɔwɔ kɛ bɛtu ngakula mrenya folɛ wɔ kɛzi ɔwɔ kɛ bɛbɔ ɛbɛla kpalɛ wɔ bɛ mame ne mɔɔ tɛ ɔdaye a ɔwole bɛ nee bɛ mediema  mraalɛ biala mɔɔ asolo bɛ awovolɛ la anyunlu.​—1 Tɛsalonaekama 4:3-8.

25. Subane boni mɔ a kola boa maa anzondwolɛ tɛnla abusua mɔɔ dɔmaba wɔ nu la anu a?

²⁵ Amaa wɔagyinla dɔmaba ɛnleanlɛ nwo ngyegyelɛ nloa kpalɛ la, si abotane. Ɔhyia mekɛ na wɔanyia agɔnwolɛ fofolɛ. Ɔnla aze kɛ ngakula mɔɔ tɛ ɛdawɔ a ɛwole bɛ la banyia ɛlɔlɛ nee ɛbulɛ amaa wɔ. Noko bɛbahola bɛayɛ. Ahonle mɔɔ nrɛlɛbɛ nee ndelebɛbo ɛyi ye tɛkɛɛ yɛɛ ɛhulolɛ kpole mɔɔ ɛlɛ kɛ ɛsɔ Gyihova anye la a le debie mɔɔ bamaa anzondwolɛ ara abusua mɔɔ dɔmaba wɔ nu la anu a. (Mrɛlɛbulɛ 16:20) Subane ɛhye mɔ noko bahola aboa wɔ yeamaa wɔagyinla tɛnlabelɛ gyɛne nloa.

26. Adenle boni azo a ninyɛne ɛkpondɛlɛ nwo ngyegyelɛ fa mgbakyemgbakye ba abusua nu a?

²⁶ Ninyɛne ɛkpondɛlɛ nwo ngyegyelɛ bahola ava mgbakyemgbakye ara abusua nu wɔ ndenle dɔɔnwo azo. Ezukoa nwo mgbonde nee bɛ nwo mɔɔ bɛkulo kɛ bɛnyia​—anzɛɛ bɛnyia ye ekyi la, ɛva ngyegyelɛ ɛra abusua bie mɔ anu. Ngyegyelɛ bahola ara wɔ mekɛ mɔɔ agyalɛma nwiɔ ne yɛ gyima na bɛnyia “me ezukoa, wɔ ezukoa” nwo subane la. Saa bɛ mu nwiɔ bɛyɛ gyima na bɛanli butule bɔbɔ a, bɛbanwu kɛ bɛnnyia mekɛ bɛmmaa bɛ nwo. Debie mɔɔ ɛlɛkɔ zo wɔ ewiade la a le kɛ selɛma gyakyi bɛ mbusua ɛkɛ wɔ mekɛ tendenle​—siane anzɛɛ bɔbɔ wɔ ɛvolɛ dɔɔnwo anu amaa bɛanyia ezukoa dɔɔnwo mɔɔ sua nu a anrɛɛ bɛnrɛnyia la. Ɛhye bahola ava ngyegyelɛ kpole ara.

27. Saa abusua bie ɛlɛyia ezukoa nwo ngyegyelɛ a ngyinlazo mɔɔ bahola aboa la bie mɔ a le boni?

²⁷ Bɛnrɛhola bɛnrɛyɛ tɛnlabelɛ ɛhye mɔ anwo mɛla, ɔluakɛ ɔwɔ kɛ mbusua ngakyile gyinla ngyegyelɛ nee ngyianlɛ ngakyile nloa. Noko Baebolo nu folɛdulɛ kola boa. Kɛ neazo la, Mrɛlɛbulɛ 13:10 (NW) ka kɛ, saa “bɛbɔ nu bɛtu agyinla” a ɔpɛ ngyegyelɛ dɔɔnwo azo. Ɛhye ɛngile awie adwenle mɔɔ ɔkile ala na ɔkile kɛ ɔkpondɛ folɛdulɛ na yeanwu kɛzi ɔ gɔnwo dwenle edwɛkɛ nwo la. Bieko, saa bɛyɛ ezukoa nwo ngyehyɛleɛ kpalɛ a, ɔmaa abusua ne amuala bɔ nwolɛ mɔdenle. Ɔdwu mekɛ ne bie a ɔhyia​—bie a mekɛ ekyi bie anu—kɛ bɛ mu nwiɔ bɛbayɛ gyima bɛava bɛadua kakɛ bie wɔ mekɛ mɔɔ bɛlɛ ngakula anzɛɛ bɛlɛnea menli gyɛne la. Saa ɔba ye zɔhane a, ɔwɔ kɛ kunli maa yelɛ ne nwu ye kɛ ɔlɛ mekɛ ɔmaa ye. Ɔwɔ kɛ ngakula ne mɔ fi ɛlɔlɛ nu boa na bɛyɛ gyima mɔɔ ɔ ngomekye ɔta ɔyɛ la bie.​—Felepaema 2:1-4.

28. Ngakyelɛ kpalɛ boni mɔ a abusua bie fa di gyima a ɔbamaa koyɛlɛ adɛnla bɛ avinli a?

 ²⁸ Kakye kɛ ezukoa nwo hyia wɔ ewiade ɛhye anu ɛdeɛ, noko ɔnva anyelielɛ ɔmba. Ɔle nɔhalɛ kɛ ɔmmaa ngoane. (Nolobɔvo ne 7:12) Nɔhalɛ nu, ninyɛne ɛkpondɛlɛ dɔɔnwo bahola ava sunsum nee ɛbɛlabɔlɛ nu ngyegyelɛ ara. (1 Temɔte 6:9-12) Nea kɛzi ɔle kpalɛ kɛ yɛbalumua yɛakpondɛ Nyamenle Belemgbunlililɛ ne nee ye tenleneyɛlɛ ne na yɛanyia anwodozo kɛ ɔbayila mɔdenle mɔɔ yɛlɛbɔ kɛ yɛkpondɛ mɔɔ yɛhyia la azo ɛ! (Mateyu 6:25-33; Hibuluma 13:5) Saa ɛfa sunsum nu ninyɛne ɛdumua na ɛmaa anzondwolɛ tɛnla wɔ nee Nyamenle avinli a, ɛbanwu kɛ ninyɛne bie mɔ maa mgbakyemgbakye ba wɔ sua nu ɛdeɛ, noko ɛbanyia abusua mɔɔ ka bɔ nu kpalɛ wɔ ndenle mɔɔ hyia la azo.