1, 2. (a) Kɛzi Gyisɛse zile zo kɛ ngyehyɛleɛ nwo hyia ɛ? (b) Ɛleka boni a ngyehyɛleɛ nwo hyia titile a?

SUAZILƐ hyia anwomoalɛ kpalɛ. Kolaa na bɛawula sua ne adiabo la, ɔwɔ kɛ bɛtɔ azɛlɛ na bɛyɛ nwolɛ pelane bɛto ɛkɛ. Noko akee, debie bieko anwo hyia. Gyisɛse hanle kɛ: “Saa bɛ nuhua bie kpondɛ kɛ ɔsi sua a, ɔdumua ɔtɛnla aze, ɔsese ye bolɛ, na ɔnea saa ɔlɛ ezukoa mɔɔ sa ye si la a.”​—Luku 14:28.

² Mɔɔ le nɔhalɛ wɔ suazilɛ nwo la noko fane agyalɛ kpalɛ nwo. Menli dɔɔnwo ka kɛ: “Mekulo kɛ megya.” Noko bɛ nuhua nyɛ a gyinla suzu kakɛ mɔɔ wɔ nu la anwo a? Ɔwɔ nuhua kɛ Baebolo ne ka agyalɛ  nwo edwɛkɛ kpalɛ ɛdeɛ, noko eza ɔtwe adwenle ɔkɔ ngyegyelɛ mɔɔ wɔ nu la azo. (Mrɛlɛbulɛ 18:22; 1 Kɔlentema 7:28) Ɛhye ati, ɔwɔ kɛ menli mɔɔ ɛlɛdwenle agyalɛ nwo la nyia nyilalɛ nee ngyegyelɛ mɔɔ wɔ nu la anwo adwenle mɔɔ fɛta la.

3. Duzu ati a Baebolo ne boa menli mɔɔ ɛlɛsuzu agyalɛ nwo la kpalɛ ɛ, na kpuyia nsa boni a ɔbaboa yɛ yeamaa yɛabua a?

³ Baebolo ne bahola aboa yɛ. Gyihova Nyamenle, agyalɛ Hyehyɛvolɛ ne a manle bɛhɛlɛle nuhua folɛdulɛ ne a. (Ɛfɛsɛsema 3:14, 15; 2 Temɔte 3:16) Bɛmaa yɛva ngyinlazo mɔɔ wɔ tete buluku ɛhye mɔɔ ɔtɛkpale nwolɛ anu la yɛzuzu nwolɛ kɛ (1) Kɛ ɔkɛyɛ na awie anwu kɛ yeziezie ɔ nwo yemaa agyalɛ ɛ? (2) Duzu a ɔwɔ kɛ bɛnwu ye wɔ bokavolɛ nwo a? (3) Kɛ ɔkɛyɛ na enililɛ ara agyalɛ nwo ɛdulɛ nu ɛ?

4. Duzu a hyia na wɔanyia agyalɛ kpalɛ a, na kɛmɔti ɛ?

⁴ Suazilɛ bahola ayɛ kakɛ kpole, eza ye boɛyɛlɛ wɔ mekɛ tendenle nu noko le kakɛ. Zɔhane ala a agyalɛ noko de a. Agyalɛ ɛnla aze; noko akee ɔwɔ kɛ bɛsuzu agyalɛ ne mɔɔ bɛnea bɛamaa yeadɛnla ɛkɛ ɛvolɛ biala la anwo. Duzu a agyalɛ ne mɔɔ bɛmaa yeadɛnla ɛkɛ la kile a? Debie mɔɔ anwo hyia kpalɛ la a le anwofamaa mɔɔ vi ahonle nu la. Ɛhye a Baebolo ne ka ye wɔ agyalɛ nwo a: “Yemɔti a nrenya fi ɔ ze nee ɔ nli anwo na ɔfa ɔ nwo ɔbɔ ɔ ye anwo kyengye, na bɛ mu nwiɔ bɛbɔ nu bɛyɛ nwonane ko a.” (Mɔlebɛbo 2:24) Gyisɛse Kelaese vale Ngɛlɛlera ne anu edwɛkɛ mɔɔ bɛgyinla zo bɛbɔ ewole na bɛkola bɛgya awie fofolɛ la manle​—adwɔmanebɔlɛ mɔɔ le, awie mɔɔ ɔnle bɛ hu anzɛɛ bɛ ye mɔɔ bɛ nee ye da la. (Mateyu 19:9) Ɔwɔ kɛ menli mɔɔ ɛlɛdwenle agyalɛ nwo la maa Ngɛlɛlera ne anu ngyinlazo ɛhye mɔ tɛnla bɛ adwenle  nu. Saa ɛnlɛ anwofamaa ɛhye a, ɛnee ɛtɛdwule mɔɔ ɛkɔ agyalɛ a.​—Mɛla ne 23:21; Nolobɔvo ne 5:4, 5.

5. Ɔwɔ nuhua kɛ anwofamaa mɔɔ vi ahonle nu la ka bie mɔ ɛzulolɛ ɛdeɛ, noko duzu ati a menli mɔɔ kulo kɛ bɛgya la bu ye kɛ ɔsonle bolɛ kpalɛ ɛ?

⁵ Adwenle mɔɔ kile kɛ ɔwɔ kɛ bɛfi bɛ ahonle nu bɛfa bɛ nwo bɛmaa la ka menli dɔɔnwo ɛzulolɛ. Kpavolɛ bie hanle ye wienyi kɛ, “Mekɛ mɔɔ menwunle ye kɛ yɛ mu nwiɔ yɛbadɛnla wɔ yɛ ngoane mekɛ mɔɔ ɛha la, mendele nganeɛ kɛ bɛva me bɛwula ɛleka bie mɔɔ mennyia adenle bɔbɔ na meakpundi me nwo a.” Noko saa amgba ɛkulo ahenle mɔɔ ɛkpondɛ kɛ ɛgya ye la a, anwofamaa ɛnrɛyɛ adesoa ɛnrɛmaa wɔ. Emomu, ɛbabu ye kɛ ɔle anwobanebɔlɛ. Anwofamaa mɔɔ wɔ agyalɛ nu la baboa agyalɛma yeamaa bɛanyia ɛhulolɛ kɛ bɛkɛdɛnla wɔ mekɛ mɔɔ le kpalɛ nee mekɛ mɔɔ ɛnle kpalɛ la anu, na bɛaboa bɛ nwo ɔnva nwo mɔɔ kɛzi biala la. Keleseɛnenli ɛzoanvolɛ Pɔɔlo hɛlɛle kɛ, nɔhalɛ ɛhulolɛ “ɛmkpo aze ɛlɛ” yɛɛ “ye abotane bo ɛndu ɛlɛ.” (1 Kɔlentema 13:4, 7) Raalɛ bie hanle kɛ, “Agyalɛ nu anwofamaa ne maa menwu ye kɛ melɛ anwobanebɔlɛ. Me nye die nwo kɛ yɛlie yɛ nwo yɛdo nu na yɛha ye bagua nu kɛ yɛkulo kɛ yɛbɔ nu yɛtɛnla la.”​—Nolobɔvo ne 4:9-12.

6. Duzu ati a ɔle kpalɛ kɛ ɛnrɛpele ɛ nwo ɛnrɛgya wɔ mekɛ mɔɔ ɛle kakula la ɛ?

⁶ Ɔhyia kɛ yɛnyi na yɛahola yɛanwu mɔɔ anwofamaa ɛhye kile la. Ɛhye ati, Pɔɔlo dule Keleseɛnema folɛ kɛ ɔle kpalɛ kɛ bɛnrɛgya wɔ mekɛ mɔɔ bɛtɛde ngakula mɔɔ nla nwo nganeɛdelɛ nu yɛ se na ɔbahola yeazɛkye kpɔkɛ kpalɛ mɔɔ ɔwɔ kɛ bɛsi la. Ngakula kakyi ndɛndɛ wɔ mekɛ mɔɔ bɛlɛnyi la. Menli mɔɔ gya wɔ mekɛ mɔɔ bɛle ngakula la nwu ye wɔ mekɛ ekyi bie anu kɛ bɛ atiakunluwɔzo, bɛ ngyianlɛ nee bɛ bokavolɛ ne ɛdeɛ ɛhakyi. Mgbondabulɛ kile  kɛ, ngakula mɔɔ gya ndɛndɛ la anye ɛnda ɛnlie na bɛbɔ ewole bɛtɛla menli mɔɔ kendɛ ekyii na bɛagya la. Yemɔti, mmapele ɛ nwo ɛkɔ agyalɛ. Saa wɔangya ndɛndɛ na ɛ ngomekye ɛtɛnla ekyii a, ɛhye bamaa wɔanyia anwubielɛ mɔɔ sonle bolɛ mɔɔ bamaa wɔabe kpalɛ na wɔayɛ bokavolɛ mɔɔ fɛta la. Saa ɛkendɛ ekyii na wɔagya a, ɔbamaa wɔanwu kɛzi ɛde la kpalɛ—debie mɔɔ hyia na agyalɛ ne ali munli kpalɛ la.

7. Duzu ati a ɔwɔ kɛ menli mɔɔ kpondɛ kɛ bɛgya la dumua nwu kɛzi bɛde la ɛ?

⁷ Ɔnyɛ wɔ se kɛ ɛbadiedia subane mɔɔ ɛkpondɛ kɛ bokavolɛ bie nyia la ɔ? Ɔnyɛ se ɔmmaa menli dɔɔnwo. Na wɔ subane noko ɛ? Subane boni a ɛlɛ mɔɔ ɔbaboa wɔ yeamaa wɔanyia agyalɛ kpalɛ a? Kunli anzɛɛ yelɛ boni a ɛbayɛ a? Kɛ neazo la, asoo ɛfi wɔ ahonle nu ɛdie wɔ nvonleɛ ɛto nu na ɛtie folɛdulɛ anzɛɛ ɛle bɔye? Asoo dahuu ɛ nye die yɛɛ ɛdwenle debie kpalɛ nwo anzɛɛ ɔyɛ a ɛyɛ ɛ nwo alɔbɔlɛ na ɛta ɛtendɛ ɛ nzo abo? (Mrɛlɛbulɛ 8:33; 15:15) Kakye kɛ agyalɛ ɛnrɛmaa ɛnrɛhakyi kɛzi ɛde la. Saa ɛmemaa ɛ nwo zo, ɛfa ɛya ndɛndɛ anzɛɛ ɛndwenle ninyɛne nwo wɔ adenle kpalɛ zo wɔ mekɛ mɔɔ ɛle belazinli la a, ɛgya a zɔhane ala a ɔbayɛ a. Kɛmɔ ɔyɛ se kɛ yɛbahola yɛanwu yɛ nwo kɛmɔ awie mɔ nwu yɛ la ati, duzu ati a ɛmbiza wɔ awovolɛ anzɛɛ ɛ gɔnwo bie mɔɔ ɛdie ye ɛdi kpalɛ la ɛmmaa ɔnga kɛzi ɛde la ɔngile wɔ na ɔnva nwolɛ nzuzulɛ ɔmmaa wɔ ɛ? Saa ɛnwu nzenzaleɛ bie mɔɔ ɔwɔ kɛ ɛyɛ la a, di nwolɛ gyima kolaa na wɔagya.

8-10. Duzu folɛ kpalɛ a Baebolo ne tu awie mɔɔ ɛlɛsiezie ɔ nwo amaa agyalɛ la ɛ?

⁸ Baebolo ne tu yɛ folɛ kɛ yɛmaa Nyamenle  sunsum ne ɛyɛ gyima wɔ yɛ nu, na yɛla subane ɛhye mɔ mɔɔ le kɛ, “ɛhulolɛ, anyelielɛ, [anzondwolɛ], abotane, atiakunlukɛnlɛmayɛlɛ, kpalɛyɛlɛ, nɔhalɛlilɛ, mɛlɛbɛnwoaze, yɛɛ bɛ nwo zo ɛhomolɛ” la ali. Eza ɔka ɔkile yɛ kɛ, “Bɛnyia subane fofolɛ” na “bɛva bɛ su fofolɛ ne mɔɔ Nyamenle ɛbɔ ye kɛ ɔdaye ye ɛsaso na ɔkile ɔ nwo wɔ nɔhalɛ ɛbɛla mɔɔ tenrɛ na ɔle nwuanzaanwu la anu la bɛwula.” (Galeehyeama 5:22, 23; Ɛfɛsɛsema 4:23, 24) Saa ɛfa folɛdulɛ ɛhye ɛdi gyima wɔ mekɛ mɔɔ ɛtɛgyale la a, ɔbayɛ kɛ ɛlɛfa ezukoa wɔado bange​—debie mɔɔ bayɛ nvasoɛ kpalɛ amaa wɔ kenlebie, wɔ mekɛ mɔɔ ɛkɛgya la.

⁹ Kɛ neazo la, saa ɛle raalɛ a, sukoa kɛ ɛbamaa wɔ adwenle ahɔ “ahonle nu sonla ne mɔɔ vea” la azo kpalɛ adɛla wɔ anwoziezielɛ. (1 Pita 3:3, 4, NW) Mɛlɛbɛnwoaze nee adwenle mɔɔ anu la ɛkɛ la baboa wɔ yeamaa wɔanwu nrɛlɛbɛ, mɔɔ le nɔhalɛ “abɔtile kɛnlɛma” la. (Mrɛlɛbulɛ 4:9; 31:10, 30; 1 Temɔte 2:9, 10) Saa ɛle nrenya a, sukoa kɛ ɛ nee mraalɛ kɛli wɔ ɛbulɛ nee atiakunlukɛnlɛma nu. (1 Temɔte 5:1, 2) Mekɛ mɔɔ ɛlɛsukoa kɛzi bɛsi kpɔkɛ na bɛdi ɛzonlelilɛ nwo gyima la, sukoa kɛ ɛbabɛlɛ ɛ nwo aze. Ɔkabɛnga subane bamaa ngyegyelɛ ara agyalɛ ne anu.​—Mrɛlɛbulɛ 29:23; Maeka 6:8; Ɛfɛsɛsema 5:28, 29.

¹⁰ Ɔwɔ nuhua kɛ wɔ adwenle mɔɔ ɛkakyi ye wɔ adenle ɛhye azo la ɛnla aze ɛdeɛ, noko ɔle debie mɔɔ ɔwɔ kɛ Keleseɛnema kɔsɔɔti di nwolɛ gyima a. Na ɔbaboa wɔ yeamaa wɔayɛ agyalɛ nu bokavolɛ mɔɔ ɔfɛta la.

11, 12. Kɛ ɔkɛyɛ na menli nwiɔ anwu ye kɛ bɛ adwenle yia anzɛɛ ɔnyia ɛ?

¹¹ Ɛleka mɔɔ ɛde la amaamuo ne maa awie kpondɛ  ye agyalɛ nu bokavolɛ ɔ? Saa zɔhane a ɔde a, ɛnee ɛnwu nrenya anzɛɛ raalɛ mɔɔ ɛ nye die ɔ nwo la a, kɛzi ɔwɔ kɛ ɛyɛ ye ɛ? Dumua biza ɛ nwo kɛ, ‘Asoo amgba mekulo kɛ megya?’ Ɔle atisesebɛ kɛ ɛbamaa awie anyia adwenle kɛ ɛbagya ye wɔ mekɛ mɔɔ ɔnle zɔ la. (Mrɛlɛbulɛ 13:12) Akee biza ɛ nwo kɛ, ‘Asoo mebahola meagya?’ Saa ɛbua kpuyia nwiɔ ne kɛ ɛhɛe a, bɛ amaamuo ne a bahile debie bieko mɔɔ ɔwɔ kɛ ɛyɛ la. Wɔ ɛleka ne bie mɔ, saa ɛfa mekɛ bie ɛnea ahenle ne ɛwie a, ɛbahola wɔabikye ye na wɔaha kɛ ɛkpondɛ kɛ ɛnwu ye kpalɛ. Saa yeanlie yeando nuhua a, mmayɛ dedee ɛmaa ɛ nwo yɛ ɛvɛlɛ. Kakye kɛ ahenle ne noko lɛ adenle si kpɔkɛ wɔ edwɛkɛ ne anwo. Noko akee, saa ɔdie ɔto nu a, bɛbahola bɛayɛ ngyehyɛleɛ na bɛayɛ ninyɛne mɔɔ fɛta la. Ɛhye bamaa wɔanyia adenle wɔanwu ye kɛ saa nrɛlɛbɛ wɔ nu kɛ ɛkɛgya sonla zɔhane a. * Duzu a ɔwɔ kɛ ɛnwu ye wɔ mekɛ ɛhye anu a?

¹² Amaa wɔabua kpuyia zɔhane ne la, suzu ninyɛne nwiɔ mɔɔ bɛfa bɛbɔ edwɛne mɔɔ le kɛ piano nee getae la anwo. Saa bɛbɔ bɛ kpalɛ a, bɛ nuhua ko biala bahola abɔ edwɛne mɔɔ ɔyɛ fɛ la. Noko saa bɛfa ninyɛne nwiɔ ɛhye bɛbɔ nu bɛbɔ edwɛne a, kɛzi ɔyɛ ɛ? Ɔwɔ kɛ ko biala nee ɔ gɔnwo kɔ. Zɔhane ala a ɔde wɔ ɛ nee ahenle mɔɔ bayɛ wɔ bokavolɛ la anwo a. Bie a bɛ nuhua ko biala ɛbɔ mɔdenle kpalɛ ɛli ye subane nwo gyima amaa ɔ nee ɔ gɔnwo ɛdeɛ ayɛ ko. Noko kɛkala, kpuyia ne a le kɛ: Bɛ nloa sɛ bɛ nwo ɔ? Wɔ adenle fofolɛ zo, bɛ adwenle yia ɔ?

13. Duzu ati a nrɛlɛbɛ ɛnle nu kɛ ɛ nee awie mɔɔ bɛ diedi ɛnle ko la kɛdu kɛ ɛgya ye ɛ?

¹³ Ɔhyia kɛ bɛnyia diedi nee ngyinlazo ko. Ɛzoanvolɛ  Pɔɔlo hɛlɛle kɛ: “Bɛ nee bɛdabɛ mɔɔ bɛnlie Kelaese bɛnli la mmatu.” (2 Kɔlentema 6:14; 1 Kɔlentema 7:39) Awie mɔɔ ɛ nee ye ɛnlɛ diedi ko wɔ Nyamenle anu mɔɔ ɛbagya ye la bahola ayɛ ngyegyelɛ kpole kpalɛ. Noko akee, awie mɔɔ ɛ nee ye sonle Gyihova Nyamenle la bamaa bɛ koyɛlɛ ne anu amia kpalɛ. Gyihova kulo kɛ ɛ nye die na koyɛlɛ kpalɛ tɛnla ɛ nee ahenle mɔɔ ɛbagya ye la avinli. Ɔkulo kɛ bɛdua ɛlɔlɛ nyɛma mɔɔ bɔ nwolɛ nsa la azo bɛfa bɛ nwo bɛbɔ bɛ nwo na bɛbeta Ye.​—Nolobɔvo ne 4:12.

14, 15. Asoo diedi ko mɔɔ menli lɛ la angome a maa koyɛlɛ ba agyalɛ nu a? Kilehile nu.

¹⁴ Ɔwɔ nuhua kɛ bɛbɔ nu bɛsonle Nyamenle a ɔbamaa bɛayɛ ko kpalɛ ɛdeɛ, noko dɔɔnwo boka nwolɛ. Amaa bɛ adwenle ayɛ ko la, ɔwɔ kɛ ɛ nee ahenle mɔɔ ɛbagya ye la nyia bodane ko. Bodane boni a gyi bɛ nye zo a? Kɛ neazo la, kɛzi bɛte nganeɛ wɔ awolɛ nwo ɛ? Duzu ninyɛne a bɛfa bɛdumua wɔ bɛ ɛbɛlabɔlɛ nu a? * (Mateyu 6:33) Wɔ agyalɛ kpalɛ biala anu, agyalɛma ne anye die bɛ nwo na bɛfa bɛ nwo agɔnwolɛ. (Mrɛlɛbulɛ 17:17) Ɛhye ati, ɔhyia kɛ bɛmaa bɛ nye die debie ko anwo. Ɔyɛ se kɛ agɔnwolɛvalɛ kpalɛ badɛnla ɛkɛ ahyɛ—titile agyalɛ bɔbɔ—wɔ mekɛ mɔɔ asolo debie mɔɔ bɛ nuhua ko biala anye die nwolɛ la. Noko akee, saa ahenle mɔɔ bayɛ wɔ bokavolɛ kenlebie la anye die debie titile bie mɔɔ le kɛ akpɔsahɔlɛ nwo na wɔmɔ ɛ nye ɛnlie nwolɛ a, asoo ɛhye kile kɛ ɔnle kɛ bɛgya ɔ? Ɔnle zɔ. Bie a bɛ nye die ninyɛne gyɛne dɔɔnwo anwo. Yeanga ye zɔ, ɛbahola wɔamaa ahenle mɔɔ bayɛ wɔ bokavolɛ la anye alie ɔlua debie  kpalɛ mɔɔ ahenle ne anye die nwo mɔɔ bɛbabɔ nu bɛayɛ la azo.​—Gyima ne 20:35.

¹⁵ Nɔhalɛ nu, saa bɛ adwenle bayia a, ɔgyi kɛzi bɛkola bɛyɛ nzenzaleɛ la azo na tɛ kɛzi bɛle ko la ɔ. Kɛ anrɛɛ bɛkɛbiza bɛ nwo kɛ, “Asoo yɛ nloa sɛ yɛ nwo wɔ debie biala anu?” la, bɛbahola bɛabiza kpuyia kpalɛ mɔɔ le kɛ: “Saa yɛ nloa anzɛ yɛ nwo a, kɛ yɛbayɛ ye ɛ? Yɛbahola yɛazuzu edwɛkɛ nwo bɛtɛɛ na yɛahile ɛbulɛ nee enililɛ yɛamaa yɛ nwo ɔ? Anzɛɛ yɛ adwelielilɛ ta kakyi kpolerazulɛ ɔ?” (Ɛfɛsɛsema 4:29, 31) Saa ɛkulo kɛ ɛgya a, nea boɛ wɔ awie mɔɔ memaa ɔ nwo zo, ɔle kyengye, ɔnlie ye nvonleɛ ɔndo nu na dahuu biala mɔɔ ɔkulo la ala a ɔkpondɛ kɛ bɛyɛ la anwo.

16, 17. Duzu a nrenya anzɛɛ raalɛ bahola anlea wɔ mekɛ mɔɔ ɔlɛsuzu awie mɔɔ ɔbagya ye la anwo a?

¹⁶ Wɔ Keleseɛne asafo ne anu, bɛdumua bɛsɔ menli mɔɔ bɛfa ɛzonlelilɛ bɛwula bɛ sa nu la bɛnea saa bɛfɛta a. (1 Temɔte 3:10) Ɛdawɔ noko ɛbahola wɔava ngyinlazo ɛhye wɔali gyima. Kɛ neazo la, raalɛ bahola abiza kɛ, “Duma kpalɛ boni a nrenya ɛhye lɛ a? Ɔ gɔnwo a le nwane mɔ? Ɔkola ɔkomo ɔ nwo zo ɔ? Kɛzi ɔbu mgbanyima ɛ? Abusua boni anu a ɔvi a? Kɛzi ɔ nee bɛ di adwelie ɛ? Subane boni a ɔlɛ ye wɔ ezukoa nwo a? Ɔbo nza ɔ? Ɔngyɛ na yeava ɛya, yɛɛ ɔkulo konle ɔ? Asafo nu ɛzonlelilɛ boni a ɔlɛ a, na kɛzi ɔdi nwolɛ gyima ɛ? Mebahola meabu ye ɔ?”​—Sɛlɛvolɛma 19:32; Mrɛlɛbulɛ 22:29; 31:23; Ɛfɛsɛsema 5:3-5, 33; 1 Temɔte 5:8; 6:10; Taetɛse 2:6, 7.

¹⁷ Nrenya bahola abiza kɛ, “Asoo raalɛ ɛhye kulo Nyamenle na ɔbu ye? Ɔbahola yeanlea sua nu boɛ ɔ? Duzu a ye abusua ne bahulo kɛ yɛyɛ a? Ɔze nrɛlɛbɛ,  ɔbɔ mɔdenle ɔyɛ gyima yɛɛ ɔnzɛkye ezukoa ɔ? Duzu a ɔka nwolɛ edwɛkɛ a? Asoo ɔdwenle awie mɔ anwo kpalɛ, ɔle angomedi anzɛɛ akpɔsemadi? Bɛkola bɛfa bɛ nwo bɛto ɔ nwo zo ɔ? Ɔfi ye ɛhulolɛ nu ɔbɛlɛ ɔ nwo aze ɔmaa tileyɛlɛ, anzɛɛ ɔ nzo yɛ se na bɔbɔ ɔte atua ɔ?”​—Mrɛlɛbulɛ 31:10-31; Luku 6:45; Ɛfɛsɛsema 5:22, 23; 1 Temɔte 5:13; 1 Pita 4:15.

18. Saa bɛnwu sinlidɔlɛ ngyikyi wɔ bɛ ɛdulɛ nu a, duzu a ɔwɔ kɛ bɛmaa ɔtɛnla bɛ adwenle nu a?

¹⁸ Mmamaa ɛ rɛle fi kɛ ɛ nee Adam abozonli mɔɔ ɛnli munli la a ɛlɛtu a, na tɛ ɛhulolɛ nwo buluku nu sonla bie mɔɔ bɛbu ye kɛ yelie duma la ɔ. Awie biala lɛ ye sinlidɔlɛ yemɔti ɔwɔ kɛ yɛbu yɛ nye yɛgua bie mɔ azo​—wɔ ɛdeɛ yɛɛ ahenle mɔɔ bayɛ wɔ bokavolɛ la ɛdeɛ. (Wulomuma 3:23; Gyemise 3:2) Bieko, sinlidɔlɛ bie bamaa bɛanyia adenle bɛanyi wɔ sunsum nu. Kɛ neazo la, fa ye kɛ wɔ bɛ ɛdulɛ ne anu, ɛnee bɛdi butule. Suzu nwolɛ nea: Ɔyɛ a menli bɔbɔ mɔɔ bɛkulo bɛ nwo na bɛbu bɛ nwo la anloa ɛnzɛ bɛ nwo. (Fa to Mɔlebɛbo 30:2; Gyima ne 15:39 anwo.) Asoo ɔbahola yeara ye kɛ ɔwɔ kɛ bɛ mu nwiɔ ‘bɛkomo bɛ nwo zo’ ekyii na bɛsukoa kɛzi bɛbaziezie edwɛkɛ wɔ anzondwolɛ nu la? (Mrɛlɛbulɛ 25:28) Ahenle mɔɔ bayɛ wɔ bokavolɛ la lɛ ɛhulolɛ kɛ ɔkɛnyia anyuhɔlɛ ɔ? Na ɛdawɔ noko ɛ? Ɛbahola wɔazukoa kɛ ɛnrɛmaa edwɛkɛ ɛnrɛgyegye wɔ anzɛɛ ɛnrɛva ɛya ndɛndɛ ɔ? (Nolobɔvo ne 7:9) Saa bɛsukoa kɛzi bɛsiezie edwɛkɛ la a, ɔbamaa bɛanwu adenle mɔɔ bɛdua zo a bɛbali adwelie kpalɛ la wɔ mekɛ mɔɔ bɛkɛgya la.​—Kɔlɔsaema 3:13.

19. Saa debie mɔɔ gyegye la finde bɛ ɛdulɛ nu a, duzu a nrɛlɛbɛ wɔ nu kɛ bɛkɛyɛ a?

¹⁹ Na saa ɛnwu ninyɛne mɔɔ gyegye wɔ kpole la noko ɛ? Ɔwɔ kɛ ɛsuzu ɛhye mɔ anwo kpalɛ. Ɔnva  nwo kɛzi bɛ nye die bɛ nwo na bɛkulo kɛ bɛgya ndɛndɛ la, bɛmmabu bɛ nye bɛgua sinlidɔlɛ mɔɔ le kpole la azo. (Mrɛlɛbulɛ 22:3; Nolobɔvo ne 2:14) Saa ɛ nee awie mɔɔ ɛnlie ye ɛnli kpalɛ la ɛlɛtu na bɛagya a, nrɛlɛbɛ wɔ nu kɛ ɛkɛpɛ zolɛ tɛla kɛ ɛkɛva ɛ nwo ɛkɛwula ngyehyɛleɛ bie anu la.

20. Kɛ ɔkɛyɛ na menli mɔɔ ɛlɛtu na bɛagya la ɛbɛlabɔlɛ nwo amba edwɛkɛ ɛ?

²⁰ Kɛ ɔkɛyɛ na wɔamaa enililɛ ara wɔ agyalɛ nwo ɛdulɛ nu ɛ? Mɔɔ lumua la, nea kɛ edwɛkɛ biala ɛnrɛra wɔ ɛbɛlabɔlɛ nwo. Asoo ɔfɛta wɔ ɛleka mɔɔ ɛde la kɛ menli mɔɔ ɛtɛgyale la kɛzɔ bɛ sa, kɛvo bɛ nloa anzɛɛ kɛbeta bɛ nwo? Saa ɛlɔlɛ nwo ninyɛne ɛhye mɔ ɛngyegye menli bɔbɔ a ɔnle kɛ bɛmaa nwolɛ adenle kɔkpula mekɛ mɔɔ bɛlie bɛdo nu bɔkɔɔ kɛ bɛbagya wɔ adenle biala azo la. Bɛnlea boɛ na ɛlɔlɛ zɔhane mɔɔ bɛda ye ali la anva ɛbɛlatane anzɛɛ adwɔmanebɔlɛ amba. (Ɛfɛsɛsema 4:18, 19; fa to Sɔlɔmɔn Edwɛne 1:2; 2:6; 8:5, 9, 10 anwo.) Kɛmɔ ahonle ne le mɛlɛbɛla la ati, nrɛlɛbɛ wɔ nu kɛ bɛ mu nwiɔ bɛnrɛvea sua, anzɛɛ kale mɔɔ gyi ɛleka bie la anu, nee ɛleka gyɛne bie mɔɔ te ɔ nwo mɔɔ bamaa bɛanyia adenle bɛabɔ ɛbɛlatane la. (Gyɛlɛmaya 17:9) Bɛmaa bɛ agyalɛ nwo ɛdulɛ ne anwo te a ɔbamaa yeala ali wienyi kɛ bɛkola bɛkomo bɛ nwo zo yɛɛ bɛnle angomedi na bɛmaa awie mɔ ɛhulolɛdeɛ kyia bɛ tɛla bɛdabɛ mumua ne bɛ ɛdeɛ. Mɔɔ hyia kpalɛ la, agyalɛ nwo ɛdulɛ mɔɔ anwo te la sɔ Gyihova Nyamenle mɔɔ tu ye azonvolɛ folɛ kɛ bɛhwe bɛ nwo bɛvi nyɛleɛ evinli nee adwɔmanebɔlɛ nwo la anye.​—Galeehyeama 5:19-21.

21. Adwelielilɛ kpalɛ boni a hyia na enililɛ ara agyalɛ nwo ɛdulɛ nu a?

 ²¹ Mɔɔ tɔ zo nwiɔ, adwelielilɛ kpalɛ boka agyalɛ nwo ɛdulɛ mɔɔ enililɛ wɔ nu la anwo. Mekɛ mɔɔ bɛ ɛdulɛ ne ɛlɛbikye agyalɛ la, ɔwɔ kɛ bɛsuzu ninyɛne bie mɔ anwo wienyi. Nienwu a bɛbadɛnla a? Bɛ mu nwiɔ bɛbayɛ gyima ɔ? Bɛkulo kɛ bɛwo mralɛ ɔ? Eza ɔle kpalɛ kɛ bɛ nuhua ko biala kɛha ninyɛne mɔɔ ɔyɛle ye dɛba ne mɔɔ bahola ava ngyegyelɛ ara la anwo edwɛkɛ. Ɛhye mɔ bie a le kakɛ kpole mɔɔ ɔtua anzɛɛ kpɔkɛdelɛ nwo edwɛkɛ mɔɔ le kɛ ewule bie mɔɔ wɔ ɔ nwo la. Kɛmɔ menli dɔɔnwo nyia HIV (ngɛkɛba mɔɔ maa bɛnyia AIDS la) a ɔnla ali ɛkɛ ne ala la ati, nvonleɛ ɛnle nwolɛ kɛ bɛ nuhua ko biala anzɛɛ awovolɛ mɔɔ dwenle bɛ mra nwo la kɛha kɛhile awie mɔɔ dɛba ne ɔ nee menli dɔɔnwo bɔle adwɔmane anzɛɛ ɔvale nyile ɔwɔle ɔ nwo la kɛ ɔhɔyɛ ye mogya ne anu neɛnleanu. Saa neɛnleanu ne maa ɔda ali kɛ awie ɛnyia AIDS a, ɔnle kɛ ɔyɛ ye kyengye kɛ ahenle mɔɔ ɛnlɛ ewule ne bie na ɔkpondɛ kɛ ɔpɛ agɔnwolɛvalɛ ne azo la ɛgya ye. Nɔhalɛ nu, awie biala mɔɔ ɛbɔ ɛbɛlatane mɔɔ esiane wɔ nu la ɔwɔ kɛ bɔ mɔdenle maa bɛnea ye mogya nu kɛ ɔnlɛ AIDS na yeabɔ ɔ bo kɛ ɔ nee awie tu na yeagya ye.

22, 23. (a) Adenle boni azo a awie arɛle bahola avi ɔ nwo wɔ mekɛ mɔɔ ɔlɛyɛ atɔfolɛlielɛ nwo ngyehyɛleɛ la ɛ? (b) Saa awie ɛlɛsuzu atɔfolɛlielɛ nee agyalɛ nwo a, adwenle kpalɛ boni a ɔwɔ kɛ ɔnyia a?

²² Ɔka ekyii na atɔfolɛlielɛ ne adwu zo a, bie a bɛ mu nwiɔ bɛnrɛnyia alagye ɔlua nwolɛ ngyehyɛleɛ mɔɔ bɛbayɛ la ati. Saa bɛanyɛ ninyɛne mgbole a,  bɛbahola bɛamaa adwenledwenle ne azo ade kpalɛ. Atɔfolɛlielɛ mɔɔ bɛyɛ ye kpole la bazɔ ɛ nwo amra nee menli ne anye noko ɔmaa agyalɛma mɔɔ bɛle fofolɛ la fɛ na bɛ ezukoa wie. Saa bɛdi bɛ amaamuo ne azo a ɔle kpalɛ, noko atɔfolɛlielɛ mɔɔ bɛyɛ ye kpole bɛmaa ɔtɛla awie mɔ ɛdeɛ la bahola aheda bodane mɔɔ ɔti bɛlɛyɛ la azo, na bɛaminli anyelielɛ mɔɔ ɔwɔ kɛ bɛnyia ye la. Ɔwɔ kɛ bɛsuzu awie mɔ nganeɛdelɛ nwo ɛdeɛ, noko atɔfolɛ nrenya ne a ɛzonlelilɛ titile la ɔ nwo zo kɛ ɔsi mɔɔ bahɔ zo wɔ atɔfolɛlielɛ ɛkponledolɛ ne abo la anwo kpɔkɛ a.​—Dwɔn 2:9.

²³ Kakye kɛ wɔ atɔfolɛlielɛ ne le kenle ko ala, noko wɔ agyalɛ ne badɛnla ɛkɛ wɔ wɔ ngoane mekɛ kɔsɔɔti anu. Mmafa wɔ adwenle ɛsie agyalɛ ne ɛhɔlɛ zo somaa. Emomu, biza Gyihova ɛkɛ ne adehilelɛ na dumua siezie ɛ nwo maa agyalɛ ngyehyɛleɛ mɔɔ ɛbadɛnla ɔ bo la. Yemɔ bamaa wɔaziezie ɛ nwo wɔamaa agyalɛ kpalɛ.